1 Agilipa wɨkamʉɨla ʉ Paʉlo, "Wagombigwa kilongola." Kʉlʉlo ʉ Paʉlo wɨkaahʉmbʉɨla ʉmʉkono amʉtegeelye, wɨkandya kilongola, wɨkalʉnga.

2 "Mʉtemi Agilipa, kʉona lyoa lane ɨlelɨyɨ kimɨka pang'wako nilongole ʉsemelwa wane wɨhi nɨansemee Ayahudi, 3 kʉlʉ kʉʉlʉ ingɨ kʉnsoko ʉewe ʉlingɨle ɨtai ntendo yɨhi niya Ayahudi ni nkani niya wikʉngʉmi. Kʉlʉlo, kʉʉlompa gimya ʉntegeleke.

4 "Ayahudi ɨhi alɨngile likalo lane naɨnishiɨ kʉpuma ʉʉng'enya wane, kandɨɨlya ʉng'wandyo nʉwa likalo lane kihɨɨ ane nʉko kʉ Yelusalemu. 5 Anɨngile kitungo ɨlɨpu, hangɨ ahumile kʉnkʉɨɨla nanso anga alowe, kɨna puma ɨkalɨ aɨnkolɨ miumbɨ nɨla Apalisayo nɨnkomanɨɨye malagɨɨlyo adini itʉ na Kɨyahudi, kʉkɨla maumbɨ nɨmangɨza ɨhi. 6 Ʉnene itungo ɨlɨ nsemewe apaitɨ kʉnsoko isʉmbɨɨlyo nɨnkete kʉ ɨko Itunda naɨʉalapɨe Atata itʉ. 7 Ɨlɨ lɨlɨ ilago nindʉgʉ yitu ikʉmi na ɨbɨɨlɨ nɨasʉmbɨɨye kʉona lɨkʉkondanɨɨligwa, nɨenso akʉmitʉmɨla Itunda kʉ ngulu yɨhi ʉtikʉ nʉ ng'ʉng'wɨ. Ʉewe Mʉtemi Ayahudi akʉnsemela kʉnsoko isʉmbɨɨlyo lɨlo! 8 Kʉnɨkɨ mʉntʉ wɨhi mʉng'wanyu wasɨge kɨna ikaku Itunda kiʉsha ɨashi?

9 "Nʉnene ga ɨkalɨ aɨnihʉɨɨe kɨna ntakɨwe kitʉma kɨntʉ kɨhi nɨkɨhumile kʉlikʉngʉmya ɨ lina lang'wa Yesʉ nʉwa kʉ Nazareti. 10 Makani nanso ʉnene aɨnitʉmile ʉko kʉ Yelusalemu. Kʉʉhumi nʉwa a Apolyi nɨ akʉlʉ, aɨnɨatungile mʉkadulumu ahʉɨɨli ang'wa Yesʉ ɨdʉ nɨ ang'wi Itunda. Napa naɨakʉbʉlagwa, ʉnene aɨnɨkʉa bʉnkʉlʉbʉnkʉlʉ ngombe ahume kʉbʉlagwa. 11 Nkʉa yɨdʉ aɨnenda mʉnyʉmba yao niya kʉtankanɨla Ayahudi nɨzeaja, ʉnene aɨnɨgema kʉasinja alɨbehʉle ɨ lina lang'wa Yesʉ. Aɨnɨatakɨɨla anga ʉmʉhali, aɨnɨlongola ga nʉ mʉisalɨ niya mahɨɨ mangɨza nʉkʉaja.

12 "Mʉmɨhɨnzo nanso lʉhikʉ lʉng'wɨ naɨnongoe kʉ Damesiki, nɨzempewe ʉhumi nilagɨɨlyo kʉpuma kʉ apolyi nɨakʉlʉ. 13 Ʉwe Mʉtemi, nɨkaze nkolɨ mʉnzɨla anga ng'ʉng'wɨ itɨ, nɨkaona nzelya ntaki kʉkɨla mpasʉ kʉpuma kigʉlʉ, ɨkelya mpande yɨhi kʉmpilimɨɨlya ʉnene palʉng'wɨ nawo naɨkine. 14 Kɨhi kɨkagwa pihɨ, nikija lʉli lʉkitambʉlya nʉnene kʉ ntambʉ a Kɨebulania, ‘Sauli, Sauli. Kʉnɨkɨ ʉkʉnaja? Ʉkilemalya nankanda kikʉngʉma nʉnene anga ndogwe nɨkʉʉkʉa ilambɨ ʉ mʉlanga nʉwa mʉdɨmi wakwe.’ 15 "Nɨkakolya, ‘Wɨ nyenyu ʉewe, Isekʉlʉ?’ Isekʉlʉ nʉyo wɨkansʉkɨɨlya, ‘Nɨ nene Yesʉ nʉʉkʉnaja. 16 Ingɨ itungo ɨlɨ imɨke kʉ mɨgʉlʉ ako. Kʉnsoko nʉkigee kisɨgo ɨlɨ. Kʉʉɨka witʉme nʉ kʉtambʉɨla ɨantʉ ayo nʉmaine nayo nigee kʉng'wako. 17 Kʉʉgunɨɨlya kʉ Ayahudi ɨako nʉ kʉ antʉ nɨshanga Ayahudi nɨkʉʉlagɨɨlya kʉng'wao. 18 Ingɨ ahume kʉnɨnga apume mʉkiti ingɨle mʉwelʉ nʉ kʉhega mʉngulu yang'wa Shetani, ingɨle mʉʉtemi wang'wi Itunda ahume kʉsɨngɨɨlya ʉlekelwa nʉwa mɨlandʉ nʉ kʉtula palʉng'wɨ nawo nɨanihʉɨɨe.’

19 "Itɨ gwa, Mʉtemi Agilipa, ʉnene shanga aɨnɨlʉgoha kʉ mʉloto ʉwʉ nʉʉpembeeye kigʉlʉ. 20 Aɨnandɨɨye kʉtanantya kʉ antʉ a kʉ Damesiki, sʉnga kʉ Yelusalemu nʉ kʉisalɨ yɨhi niya kʉ Yʉdea nʉ kʉ antʉ nɨshanga Ayahudi ɨhi, kɨna atakɨwe kila itʉnʉ nʉkʉmʉpɨlʉkɨla Itunda nʉkʉkamɨnkɨɨlya kila itʉnʉ kʉ ntendo yao nimbɨ. 21 Ingɨ kʉnsoko nanso, Ayahudi ɨkamamba naɨ nkolɨ pa Nyʉmba ang'wi Itunda, ɨkahiya kʉmbʉlaga. 22 Ingɨ Itunda aɨʉnzaɨɨye, nɨ itɨgwa lʉhikʉ nʉla lelo nimɨkile apaitɨ nɨatambʉɨle ɨtai antʉ nɨ akʉlʉ nɨ antʉ nɨa niino. Shanga kʉtambʉla kɨhi kʉkɨla ayo Musa nɨamanga naɨatambʉe kɨna akʉpumɨla, 23 kɨna ʉ Kilisito ʉkagigwa nɨ kɨna nʉwanso ʉkʉtula wang'wandyo kiʉka kʉpuma kʉashi, wahume kʉtanantya welʉ nʉwa ʉgunwi kʉ antʉ akwe Ayahudi nʉ kʉ antʉ nɨshanga Ayahudi."

24 Paʉlo naɨ ʉkilongola, Pesito wɨkitʉnta nʉkʉlʉnga, "Paʉlo, ʉewe wahalaa. Ʉʉsomɨ nʉwako wakʉhalya." 25 Ingɨ ʉ Paʉlo wɨkasʉkɨɨlya, "Ʉnene shanga nihaile, mʉkʉlʉ Pesito, ingɨ kʉtambʉla ɨtai kʉnʉ nkete mahala ɨhi. 26 Mʉtemi Agilipa nʉng'wenso ga. Ʉlɨngile ɨmakani ɨhi, nʉnene kʉtambʉla kʉmatiliga ɨhi. Kʉnsoko nkete ɨ kʉlʉ kʉʉlʉ kɨna kʉtilɨ ikani ga nɨlɨ nɨlɨng'wɨ nɨshanga ʉlɨngile, kʉnsoko shanga aɨitʉmilwe kɨʉnkunku. 27 Mʉtemi Agilipa, itɨɨ, ʉahʉɨɨene ɨ amanga? Nɨngile kɨna ʉahʉɨɨe."

28 Agilipa wɨkamʉɨla ʉ Paʉlo, "Itɨɨ, ʉsɨgɨɨe kitungo ɨlɨ nikupɨ ʉkʉmpemane ntule nɨ Mʉkilisito?"

29 Paʉlo wɨkalʉnga, "Itule kitungo ikupɨ ang'wɨ kitungo ilepu, kʉmʉlompa Itunda, shanga ʉewe du wing'wene ingɨ nawa ɨhi nɨantegeeye lelo, atule anga nɨnɨlɨ ʉnene, kʉleka ɨkɨtungo du."

30 Naɨwakondya kʉtambʉla aya, mʉtemi Agilipa palʉng'wɨ nʉ Pesito mʉkʉlʉ nʉwa kʉ Yudea nʉ Belinike nawa naɨ ikalanilye ɨkimɨka. 31 Sʉnga naɨapuma mianza, ɨkitambʉlya "Mʉntʉ ʉyʉ shanga ʉtendile kɨntʉ kɨhi nɨkɨkʉmʉsasha washe ang'wɨ kʉtungwa mʉkadulumu." 32 Agilipa wɨkamʉɨla ʉ Pesito, "Mʉntʉ ʉyʉ aza ʉzelekelwa widese anga aza watule shanga ʉlompile kenda kʉng'wa Kaisali Mʉtemi nʉ mʉkʉlʉ nʉwa kʉ Lumi."