1 Naɨyalamʉlwa kɨna kinzʉ mʉhɨnzo kenda kʉ Italia kʉkɨɨla mʉlʉzɨ nʉlʉkʉlʉ, Paʉlo nɨatungwa aʉya ɨkaɨkwa mʉwɨmɨɨlwi wang'wa Juliasi naɨ ʉkolɨ miumbɨ laanyambita a Mʉtemi nʉ mʉkʉlʉ nʉwa kʉ Lumi, midale nɨla asʉnji ang'wa Kaisali Agusito. 2 Aɨkandilye mʉhɨnzo kɨkanankɨla meli naɨpumile kʉ Adilamitio nɨkɨɨla mʉisalɨ niyipantamile mu bandali niya mihɨɨ a Asia, kɨze kɨ palʉng'wɨ nʉ Alisitaliko mʉnya kʉ Makedonia kʉpuma kʉ Tesalonike. 3 Mʉdaʉao kɨkimɨka kʉ Sidoni, Juliasi nʉyo wɨkamʉtendeela iza ʉ Paʉlo, wɨkamʉgombya walongole kʉ ahʉmbaʉya amʉaɨɨlye maintʉ akiaɨɨlya. 4 Kʉpuma kʉng'wanso kɨkingɨla hangɨ mʉlʉzɨ kɨkakɨɨla ipande nɨla kihɨɨlɨ nɨla kɨsiwa nɨka Kipilo kʉnsoko ng'wega aɨʉkʉinyoma. 5 Naɨkaputa ʉlʉzɨ nʉlʉkʉlʉ nʉlʉkolɨ ipande nɨla Kilikia nɨ Pampilia, kɨkapika mʉkisalɨ ka Mila nɨkolɨ mihɨɨ akʉ Likia. 6 Kʉng'wanso mankata nʉwanso ʉ Juliasi wɨkalija meli Alekisandilia nilongoe kʉ Italia, wɨkakʉnankɨlya mʉmo.

7 Kɨkagenda lʉgendo lʉniino kʉ mahikʉ ɨdʉ kʉ lwago, panyambele kɨkapika pakupɨ nɨ Nido. Kʉnsoko ʉng'wega aɨʉkɨlɨ ʉkʉlʉ kɨkalemigwa naɨ kʉlomee kɨkapantamɨla kʉkilya, kɨkakɨɨla kilya akɨsiwa ka Kilete nikikengee nɨ Salimone. 8 Kɨkipantamɨɨlya mʉmpelo a lʉzɨ kʉ lwago kɨkapika nkɨka ɨng'wɨ nitangwa Bandali Nɨnza, pakupɨ nɨ kasalɨ nɨka Lasea.

9 Matungo ɨdʉ aɨalimɨe, mʉhɨnzo witʉ nʉwa mʉlʉzɨ wɨkatula nʉlwago, kʉnsoko matungo aʉgwalyi nʉwa Ayahudi aɨakɨla. Itɨ gwa ʉ Paʉlo wikaahʉgʉlya wɨkalʉnga, 10 "Anyandʉgʉ ane, kʉona kɨna mʉhɨnzo ʉwʉ ingɨ ʉkete lwago, shanga kʉ meli du ingɨ ikʉsasha ʉlimɨlyi ʉkʉlʉ nʉwa mɨligo, nʉ likalo litʉ." 11 Ingɨ mʉtongeeli nʉwa anyambita wɨkahita kʉtegeelya nkani nʉtambʉe ʉ Paʉlo, wikatyata ʉsɨgigwa nʉwa mʉlongolya meli nʉ mʉkola meli. 12 Kʉnsoko bandali nanso shanga aɨnza kikiɨ matungo ampepo, antʉ ɨdʉ ɨkalamʉla kʉlongoleke nʉ mʉhɨnzo azeasʉmbɨɨye kʉpika kʉ Poinike nʉkikiɨ kʉng'wanso matungo ampepo. Poenike ingɨ bandali nɨkolɨ kʉ kɨsiwa ka Kilete igozenkanilye nipande nila takama nɨ ng'weli, nɨ hukuma nɨ ng'weli.

13 Ng'wega kʉpuma takama wɨkatula kunka inino, ɨkasɨga kɨna ahumile kʉtenda mʉaloewe, itigwa ɨkaheja ɨkɨambɨɨla meli ɨkahega nʉkandya ʉmʉhɨnzo kʉtʉnga mʉmpelompelo a kɨsiwa ka Kilete. 14 Ingɨ naɨlakila itungo inɨɨno ng'wega ʉkʉlʉ nʉwitangwa "Ng'wega nʉwa hukuma" wɨkatula kunka kʉpuma kʉ kisiwa ka Kilete. 15 Meli ɨkakʉwa nʉ ng'wega kɨkaleng'wa kʉmɨlongolya ɨmeli kʉloma kʉʉpembeeye ʉng'wega nʉwanso, kɨkaleka ɨmeli ɨtalwe kʉʉlomile ʉng'wega. 16 Meli ɨkapatɨɨligwa kʉnsuntwa kɨkapikigwa kʉ kɨsiwa kɨniino nɨkitangwa Kauda. Kɨkahuma kʉlwago kʉtunga ibɨnɨ niniino nɨla kʉagunɨla iantʉ naɨ lɨkolɨ mʉ meli. 17 Antʉ naɨakondya kʉlutɨɨla ibɨnɨ nɨlanso niniino mʉ meli, ɨkatunga lʉdigi kʉambɨnkania palʉng'wɨ nɨ meli. Aɨogopile kʉtalwa mʉ mɨhangahanga mʉmpelo a Libia, ɨkaheja ɨkɨambɨɨla meli ɨkaleka ɨsuntwe nʉ ng'wega. 18 Aɨkʉʉsuntwa nʉ kɨntingʉ mʉdaʉao ng'wega wɨkalongoleka wɨkatula mɨzuga ɨmeli ɨkatula kʉgumanga mɨligo a mʉ meli, 19 lʉhikʉ nʉla kataatʉ kʉ mɨkonoao, ɨkagʉmɨla mʉlʉzɨ iseme niya meli. 20 Mahikʉ ɨdʉ shanga ɨkaona lyoa ang'wɨ nzota, ng'wega nʉanso wɨkalongoleka kʉtula ʉkʉlʉ, Sʉnga kɨkakatapa lʉkʉlʉ kʉgunɨka.

21 Naɨikiɨ mahikʉ ɨdʉ agila anga ndya, Paʉlo wɨkimɨka pakatiao wɨkalʉnga, "Ʉnyenye antʉ, aza mʉzentegeelya naza nʉmʉsɨgilye kɨna mʉleke kʉlongoleka nʉ mʉhɨnzo kʉpuma kʉ Kilete, papo ʉnyenye aza mʉzeegunɨka kʉgazɨka meli nʉlwago ʉlʉ nʉlʉbɨ nʉkʉlimɨlya nsao. 22 Itungo ɨlɨ kʉmʉlompa, komyi inkolo yanyu kʉnsoko kʉtilɨ ga nʉng'wɨ anyu nʉʉkʉsha, meli du ɨkʉgazɨka. 23 Itunda ʉyo nʉnene nɨ nɨmʉntʉ wakwe hangɨ nɨmitumɨla, igʉlo ʉtikʉ aza ʉmʉlagɨɨye ʉ Malaɨka wakwe wanigeela, 24 nʉyo wambɨla, ‘Paʉlo leka kogopa, kʉnsoko ʉtakɨwe kimɨka pang'wa Kaisali mʉtemi nʉ mʉkʉlʉ nʉwa kʉ Lumi. Itunda ʉkʉʉtendela ʉkende, kʉnsoko ako ʉkʉaguna ɨhi nɨakolɨ mʉhɨnzo ʉng'wɨ nʉewe mʉleke kʉsha.’ 25 Itɨ gwa, ʉnyenye antʉ komyi inkolo! Kʉnsoko nihʉɨɨe kɨna Itunda ʉkʉtenda anga nazaʉntambʉɨe. 26 Ingɨ meli itʉ ɨkʉsuntɨɨligwa nʉ kʉholomela kʉ kɨsiwa kɨngɨza."

27 Ʉtikʉ nʉwa lʉhikʉ likʉmi na innɨ, naɨlapika, kɨkaze kʉkɨlɨ kʉʉnsuntwa nʉ ng'wega kʉtʉnga Lʉzɨ nʉla Adilia, naɨyatula ʉtikʉ wigɨngʉ, alongolya meli ɨkakʉɨla kɨna kaakapuma mʉ Lʉzɨ nʉla Adilia. 28 Kʉlʉlo ɨkatunga shʉma na lʉdigi nʉkʉgʉmɨla mʉmazɨ kʉgemeelya ʉlundu nʉwa mazɨ ɨkahanga aɨmita makʉmi annɨ, naɨkalongoleka pantongeela iniino ɨkagemelya hangɨ ɨkahanga ʉlundu wakwe mita ikʉmi abɨɨlɨ na mʉtandatʉ. 29 Kɨhi aɨkogopile kʉmɨkumɨlya ɨmeli itʉ mʉmagwe nɨmakulu, ɨkagʉmɨla maambɨla meli ainnɨ kʉnyuma a meli, ɨkatula lompa ʉkaye kela. 30 Akʉa nsambo ɨkaduma nzila kʉtigana, kʉlʉlo ɨkasimya ibɨnɨ nɨla kʉgunɨla ɨantʉ naɨlɨkolɨ mʉ meli mʉlʉzɨ, ɨkitendisa kɨna akʉgʉmɨla mʉmazɨ ɨmaambɨɨla meli nakʉntongeela. 31 Ingɨ ʉ Paʉlo wɨkamʉɨla ʉ mankata nʉwa anyambita nɨ anyambita akwe, "Akʉa nsambo awa anga ahite kʉsiga mʉ meli, shanga mʉkʉgunɨka." 32 Kʉlʉlo anyambita awo ɨkatema indigi niiambɨɨe ibɨnɨ niniino nɨla kʉgunila ɨ antʉ mʉ meli, ɨkalekela ɨbɨni lɨtalwe nɨ mazɨ.

33 Daʉ nɨnkʉlʉ, Paʉlo wɨkaakomelya nkolo antʉ ɨhi alye indya, wazelʉnga, "Lelo ingɨ lʉhikʉ likʉmi na kannɨ mʉkolɨ mʉʉkɨa hangɨ mʉkɨlɨ kʉlya kɨntʉ kɨhi. 34 Kʉlʉlo kʉmʉlompa mʉlye indya, kʉnsoko yɨkʉmʉaɨɨlya mʉhume kishiɨ. Kʉnsoko kʉtilɨ anga mʉntʉ wɨhi mʉng'wanyu nʉkʉlemaala." 35 Naɨwakondya kʉtambʉla inkani izi, Paʉlo wɨkahola ʉmʉkate, wɨkamʉlompa Itunda ntongeelaao ɨhi, wɨkaʉega, wɨkandya kʉlya. 36 Kʉlʉlo antʉ ɨhi ɨkakomya nkolo, ɨkatulalya indya. 37 Mʉmeli nanso aɨkʉkolɨ antʉ Magana abɨɨlɨ nɨ makʉmi mʉpungatɨ na mʉtandatʉ. 38 Antʉ ɨhi naɨalya indya nʉkikʉta, ɨkatula gʉmɨla mʉlʉzɨ ngano nindya ying'wɨ kʉkepya ʉlito mʉ meli.

39 Naɨweleela, shanga ɨkamɨlɨnga ihɨɨ nanso, ingɨ aɨaine kɨhepeelo kɨkete mɨhangahanga ɨkalamʉla kʉsuntɨɨlya kʉko ɨmeli imɨke anga ɨzeyikʉhumɨka. 40 Kʉlʉlo ɨkatema maambɨɨla meli ɨhi nʉkʉmaleka mʉlʉzɨ, itungo lɨlo lɨɨlo ikatungʉla ndigi naɨitungɨɨe ʉlongoelyo nʉwa meli, sʉnga ɨkakɨngamya mʉgolole ʉng'wɨ nʉwa kʉntongeela kʉkɨja ng'wega ʉhume kʉmɨsuntɨɨlya ɨmeli ɨlome kʉmɨhangahanga. 41 Ingɨ meli ɨkasuntwa nɨ mazɨ ɨkenda paipelu ɨkaholomela mʉmɨhangahanga, nɨanso ɨkamɨkweheela ɨmeli pampelo alʉzɨ, ntongeela ameli ɨkaholomela mihangahanga, ɨkatula nkaku kʉhegigwa, ingɨ ipande nɨla kʉnyʉma ɨkatulabunɨka mapande kʉnsoko akʉkʉwa nɨmaɨngʉ.

42 Anyambita awo ɨkigombya kʉabʉlaga atungwa ɨhi kʉnsoko aɨogopile kɨna ahumile kipumpa nʉ kʉmanka atigane. 43 Ingɨ ʉ mankata wɨkahiya kʉmʉguna ʉ Paʉlo, wɨkaagɨɨlya anyambita aleke kitʉma ɨsɨgo lao. Wɨkalagɨɨlya awa nɨahumile kipumpa igʉmɨle mʉlʉzɨ, ipumpe apume kʉnzɨ a lʉzɨ. 44 Nɨasagile akʉpikɨɨla kʉnzi a lʉzɨ kʉtʉmɨla balʉa ambao ang'wɨ mapande nabunɨkɨe mʉ meli. Ʉʉgwa ʉsese kɨhi naɨkʉgunɨkile iza.