1 Naɨlapika lʉhikʉ liloeelya nɨla *pentekosite, antʉ naɨamʉhʉɨɨe ʉ Yesʉ Kilisito aɨilʉndɨɨe palʉng'wɨ. 2 Pumpulugu akija lʉli anga mʉlulumo ʉkʉlʉ kʉpuma kilunde, anga lʉli nʉla ng'wega ʉkizʉlya mʉnyʉmba ɨhi naɨ ikiɨ. 3 Sʉnga, yɨkigela intʉ nɨ yihanga nzahɨ niya moto, ɨkagalanʉka nʉkʉmikaɨla mitwe ng'waa mʉntʉ wɨhi mʉng'wanso. 4 Antʉ ɨhi ɨkatongwa nʉ Ng'wahʉ Ng'welʉ, ɨkatula ligitya ntambʉ ngɨɨza anga Ng'wahʉ naɨ ʉahumilye.

5 Kʉng'wanso kʉ Yelusalemu aɨakolɨ Ayahudi nɨamʉhʉɨɨe Itunda, naɨ apembeeye mahɨɨ ɨhi mʉ ʉnkumbigʉlʉ. 6 Antʉ naɨ igulye lʉli ʉlʉ nʉla ng'wega, antʉ ɨhi ɨkamanka ɨkapembya kaɨakolɨ ɨahʉɨɨli ang'wa Yesʉ, ɨkakʉɨlwa nangaluu kʉnsoko antʉ ɨhi aɨigulye ntambʉ akwe ɨkʉtambulwa nɨahʉɨɨli ang'wa Yesʉ. 7 Antʉ ɨkakʉɨlwa, nʉkitumba akitambʉlya, "Itɨɨ, awa ɨhi nɨkʉʉija akʉtambʉla itɨ, shanga anya kʉ Galilaya ne? 8 Yatula ʉlɨgwa ʉsese kɨhi kʉʉija akʉligitya kɨnyitaitʉ? 9 Ʉsese nɨkʉmolɨ apaɨti kɨanya kʉ Paliti nɨang'wɨ kʉ Media nʉkʉ Elamu, nɨangɨza anya kʉ Mesopotamia nʉ kʉ Yʉdea nʉ kʉ Kapadokia nʉ kʉ Ponto nʉ kʉ Asia. 10 Akolɨ anya kʉ Paligia nʉ kʉ Pampilia nʉ kʉ Misili nɨnkɨka akʉ Libia pakupɨ nɨ Kilene, nɨazɨɨla kʉpuma kʉ Lumi, 11 Ayahudi nɨ antʉ nɨkʉhʉɨɨe dini a Kiyahudi, nɨang'wɨ apumile kʉ Kilete ihɨɨ nɨpilimilwe nɨ mazɨ nʉ kʉ Alabu. Ʉsese kɨhi kʉigulye antʉ awa akʉtambʉla kɨnyitaitʉ, kɨhi kʉkʉɨwe makani makʉlʉ aʉkʉɨlwa nʉtendile Itunda kʉ ntambʉ yitʉ." 12 Atʉ ɨhi ɨkakʉɨlwa nʉkitumba kʉnʉ azikolya, "Ndogoelyo a makani aya ntʉni?

13 Ingɨ nɨang'wɨ ɨka asensa, ɨkalʉnga, "Antʉ awa agaile ntʉlɨ."

14 Sʉnga ʉ Petelo wɨkapumɨla mʉitʉmi aʉya nikʉmi naʉng'wɨ, wɨkitʉnta wɨkaaɨla, "Ʉnyenye adɨ mihɨ aluna ane Ayahudi, nʉnyenye mɨhi nɨmishiɨ mihɨɨ a Yelusalemu, tegeelyi kɨsa inkani yane mʉlɨnge ndogoelyo ikani ɨlɨ. 15 Antʉ awa shanga agaile anga ʉnyenye nɨmʉsɨgile, kʉnsoko itungo ɨlɨ ikɨlɨ saa taatʉ kɨdaʉdaʉ. 16 Ingɨ ɨtai ikani ɨlɨ, aɨlɨtambʉwe nʉ Yoeli mʉmanga wang'wi Itunda kɨna,

17 Itunda ʉlɨɨye,

"Mʉ mahikʉ ampelo,

Kʉahumya kʉ Ng'wahʉ wane mʉ antʉ ɨhi.

Agalimanga nɨ ananso anyu akʉpumya ʉmanga,

ahʉmba anyu akʉona mɨloto,

nɨanyampala anyu akʉlota ndoti.

18 Kʉlʉ kʉʉlʉ itʉmi ane ga nɨakɨgoha nawa nɨakɨkɨma,

kʉahumya kʉ Ng'wahʉ wane,

nɨenso akʉpumya ʉmanga.

19 Nʉnene kigeelya mɨʉkʉɨlwa migʉlya kilunde,

nɨ kɨlɨngasɨɨlyo pihɨ mihɨɨ,

yɨkʉtula nɨ sakami nʉ moto nʉ lyʉki lʉlito,

20 lyoa lɨkʉgiɨligwa nɨ kiti,

nʉng'weli ʉkʉtula ʉkaʉku anga sakami,

ɨze lʉkɨlɨ kʉza lʉhikʉ lang'wi Isekʉlʉ nʉla kʉtulya.

21 Pang'wanso, mʉntʉ wɨhi nʉʉkʉlompa ʉgunwi kʉpuma kʉng'wi Isekʉlʉ, ʉkʉgunwa.’

22 "Ʉnyenye Aisilaeli, tegeelyi inkani izi nɨkʉmʉɨla. Yesʉ Mʉnazaleti, mʉntʉ ʉyʉ aɨʉɨkilwe kɨhenga kʉng'waanyu kɨna ʉhumi wakwe aɨwang'wi Itunda, kʉkɨɨla mɨʉkʉɨlwa ni kɨlɨngasɨɨlyo, Itunda naɨ ʉtendile kʉ ʉhumi wakwe kʉng'waanyu, anga nɨmʉlɨngile. 23 Itunda aɨʉlamʉe kʉ masɨgo akwe kɨna ʉ Yesʉ mʉkʉmʉbʉlaga, nʉ nyenye mɨkaalekeela alʉgʉ amʉkome mʉ mʉsalaba. 24 Sʉnga Itunda aɨʉmiʉkilye, wɨkamʉkomola mʉ ʉwai nʉa nsha, kʉnsoko shanga aɨihumɨkile lʉkʉlʉ ɨsha ɨmʉgiɨlye. 25 Kʉnsoko ʉ Daudi aiʉtambʉe itɨ,

‘Mahikʉ ɨhi nɨmʉona Isekʉlʉ ʉkolɨ pantongela ane,

ʉkolɨ ipande lane nɨla ʉhumi, shanga kʉhingɨɨka.

26 Kʉlʉlo, nkolo ane iloile,

nʉ lʉlɨmɨ lane lʉkʉkʉa ngiligili kʉ ʉlowa.

Nʉ mʉɨlɨ wane,

ʉkikiɨ ɨze ʉsʉmbɨɨye,

27 kʉnsoko ʉewe Isekʉlʉ Itunda shanga ʉkʉmɨleka nkolo ane kʉ ʉlʉngʉ,

ang'wɨ mʉsanigwa nʉwako waole mʉ kɨbɨɨla.

28 Wandagɨɨla nzɨla nɨntongile kʉ ʉpanga,

pantongeela ako nalija ʉlowa.’

29 "Anyandʉgʉ ane Aisilaeli, ndoilwe nʉmʉɨle kʉlʉ kʉʉlʉ a makani naɨamʉhangɨle ʉgʉkʉ witʉ ʉ Daudi. Nʉanso aɨʉkule wɨkaɨkwa, kɨbɨɨla kakwe nɨsambʉnayʉ kɨlolɨ pang'witʉ. 30 Ingɨ ʉ Daudi aɨmʉmanga, hangɨ aɨʉlɨngile kɨna Itunda ʉmʉlapɨe ʉng'wɨ mʉʉtugwa wakwe ʉkʉmikalɨnsha mituntu nɨla ʉtemi anga ʉ Daudi. 31 Daudi aɨʉtongee kʉona makani nakʉpumɨla nʉ Yesʉ Kilisito ʉkiʉka. Apo naɨ ʉtambʉe kɨna,

"Itunda shanga ʉkʉmʉleka kʉ ʉlʉngʉ,

ang'wɨ mʉɨlɨ nʉwa mʉsanigwa wakwe ʉole.

32 "Itunda yʉyo aɨʉmiʉkilye ʉ Yesʉ nʉsese kɨ akʉɨɨli ikani nɨlanso. 33 Yesʉ naɨwaholwa nʉkʉɨkwa ipande nɨla ʉhumi nɨlang'wi Itunda, nʉ kʉhumigwa Ng'wahʉ Ng'welʉ, anga Tata naɨ ʉlapile, yʉyo ʉkʉpee ʉhumi anga nɨmʉkʉona nʉkija itungo ɨlɨ. 34 Daudi ng'wenso shanga aɨʉhoilwe kenda kigʉlʉ, ingɨ ʉtambʉe,

‘Isekʉlʉ Itunda aɨʉmʉɨe Isekʉlʉ wane,

Ikiɨ ipande lane nɨla ʉhumi,

35 kʉpikɨɨla nʉkʉhumye ʉateme alʉgʉ ako.’

36 "Kʉlʉlo Aisilaeli ɨhi alɨnge kɨna kʉlʉ kʉʉlʉ ʉyʉ yʉyʉ Yesʉ naɨ mʉmʉkomile mʉ mʉsalaba, Itunda ʉmʉtendɨle kʉtula Isekʉlʉ hangɨ Kilisito."

37 Ʉʉgwa antʉ naɨigulye nkani izi, ɨkaalɨka mʉ nkolo yao, ɨkamʉkolya ʉ Petelo nɨ itʉmi aʉya, "Aluna itʉ, itungo ɨlɨ kʉtende ʉlɨ?"

38 Petelo wɨkaasʉkɨɨlya, "Mɨhi mile itʉnʉ, nʉ kʉmʉsʉkɨla Itunda, mʉbadisigwe mɨhi kʉlina lang'wa Yesʉ Kilisito mʉhume kʉhegeligwa mɨlandʉ anyu, sʉnga mʉsɨngɨɨlye ilago nɨla Ng'wahʉ Ng'welʉ. 39 Kʉnsoko, ilapo nɨlanso aɨkʉnsoko anyu nɨ anaanyu nʉ kʉ antʉ nɨshanga Ayahudi, nʉ kʉ antʉ ɨhi nɨ itangilwe ni Isekʉlʉ Itunda witʉ."

40 Petelo wɨkalongoleka kʉ ahʉgʉlya antʉ kʉ nkani yakwe waze akomangɨɨla ɨantʉ wazeligitya, "Lɨponi ikuo nɨla wɨleli ʉwʉ nʉ ʉbɨ." 41 Lʉhikʉ nʉlanso antʉ naɨahʉʉɨe lʉkanɨ lang'wa Petelo ɨkabadisigwa antʉ elupu itaatʉ ɨkongeeleka mʉahʉɨɨli ang'wa Yesʉ. 42 Antʉ awa ɨhi ɨkalongoleka kʉtegeelya nʉ kʉmanyisigwa nʉwa itʉmi nʉkʉtula nʉ mʉhangʉ nɨaʉya, ɨkihangʉɨla nʉ kʉlya indya palʉng'wɨ nʉ lʉdya lang'wi Isekʉlʉ palʉng'wɨ nʉ kʉlompa.

43 Antʉ ɨhi ɨkingɨɨlwa nʉ woa kʉ ʉkʉɨlwa ni kɨlɨngasɨɨlyo naɨ yitʉmilwe nɨ itʉmi antʉ ɨhi ɨkamʉhʉɨɨla Itunda. 44 Ahʉʉɨli ang'wa Yesʉ Kilisito ɨhi ɨkikalanɨa nʉ kʉhangʉɨla insao yao. 45 Aɨkenda gʉlya nsao nɨ maintʉao naɨakete nʉkomoelana impia anga mʉaloewe. 46 Ɨkalongoleka kʉtankana palʉng'wɨ mahikʉ ɨhi pa Nyʉmba ang'wi Itunda, itungo nɨlakʉlya aɨɨlɨzania kʉ matolao ɨkalɨzania ndya kʉʉlowa wɨhi nɨ nkolo nzelʉ pe, 47 azemʉkʉlya Itunda, nʉ kʉaloa antʉ ɨhi. Mahikʉ ɨhi Isekʉlʉ Itunda wɨkongeelya ahʉɨɨli ang'wa Yesʉ Kilisito nawa naɨ akʉkomowe.