1 Yesʉ akahega pang’wanso akatulya kʉ Nazaleti kɨsalɨ naɨ ʉkʉɨe, aɨakʉɨɨe nɨamanyisigwa akwe. 2 Lʉhikʉ nʉla kʉsupya naɨlapika, akandya kʉmanyisa mʉnyʉmba a kʉtankanɨlya Ayahudi. Antʉ ɨdʉ naɨamigulye akakʉɨlwa, akikolya, "Itɨɨ, ʉpumɨɨye pɨ ʉmanyisi ʉwʉ? Mahala kɨ aya nʉkete? Hangɨ, ʉkitʉma ʉlɨ ɨmapɨlʉ aya? 3 Itɨɨ, ʉyʉ shanga anga mʉsesa mɨtɨ ng’wana wang’wa Malia, nɨaluna akwe a Yakobo nʉ Yosepu nʉ Yʉda nʉ Simoni? Itɨɨ, aluna akwe nɨakɨsʉngʉ shanga kikalanɨa papane?" Itɨ gwa, akamʉbɨpɨlwa, akahɨta kʉmʉhʉɨɨla.

4 Yesʉ akaatambʉɨla, "Mʉmanga wang’wi Itunda wɨkuligwa nɨantʉ amahɨɨ mangɨɨza, ingɨ shanga wɨkʉligwa nɨantʉ amihɨɨ akwe nʉ mʉanyandʉgʉ akwe nʉ mitolakwe."

5 Shanga akitʉma mampɨlʉ pang’wanso, kʉitɨ akalompeela alwae akeehʉ akaakomya. 6 Yesʉ akakʉɨlwa nangalʉ kʉnsoko shanga aɨ amʉhʉɨɨe.

Yesʉ aɨ wɨigendeela isalɨ niya pakupɨ nɨpang’wanso wazeamanyisa ɨantʉ. 7 Aɨ ʉitangile amanyisigwa ao nɨkʉmi naabɨɨlɨ. Akaapa ʉhumi nʉwakʉheja ahɨng’wɨ, akandya kʉalagɨɨlya abɨɨlɨ abɨɨlɨ, 8 akaalagɨɨlya, "Kʉmʉlongoe mʉhole mʉlanga nʉwa kikimagɨɨlya du. Mʉleke kʉhola ɨmpamba ang’wɨ nkapu ang’wɨ mpia mʉ mbogoshi. 9 Tugali makwasa ingɨ mʉleke kʉhola matugalo akʉkaɨla." 10 Hangɨ akaatambʉɨla, "Ikoe lɨhi nɨmʉkʉsɨngɨɨligwa, mishiɨ mʉmo kʉpikɨɨla nɨmʉkʉhega mʉkɨsalɨ nɨkanso. 11 Kɨsalɨ kɨhi antʉ nɨakʉhita kʉmʉsɨngɨɨlya ang’wɨ kʉmʉtegelya, hegi pang’wanso nʉkipyagʉla ʉlʉnkʉndɨ mʉmɨgʉlʉ anyu itule kɨlɨngasɨɨlyo kɨna Itunda waahita nɨenso."

12 Ʉʉgwa, amanyisigwa akalongola akaatanantɨlya ɨantʉ amʉsʉkɨle Itunda nʉ kʉleka mɨlandʉ.

13 Aɨ akenda ahegilye antʉ ɨdʉ ahɨng’wɨ, akaapaka makʉta alwae ɨdʉ, nʉkʉakomya.

14 Ingɨ, mʉtemi Helode aɨwigulye ɨhi nanso, kʉnsoko ʉ Yesʉi aɨwakʉmʉka mpande yɨhi. Antʉ ang’wɨ akatula lʉnga, "Yohana Mʉbadisi wiʉka, ʉkitʉma mɨʉkʉɨlwa kʉnsoko aɨ mʉmanga wang’wi Itunda."

15 Nɨang’wɨ aɨakʉlʉnga, "Mʉntʉ ʉyʉ, ingɨ mumanga Elia wiʉka."

Nɨang’wɨ akalʉnga, "Ʉyʉ mʉmanga wang’wi Itunda ʉng’wɨao mʉamanga ang’wi Itunda nɨakalɨ."

16 Ingɨ ʉ Helode naɨwija impola izi akalʉnga, "Ʉyʉ ingɨ Yohana Mʉbadisi! Naɨ nʉmʉdʉmʉe itwe, waiʉka." 17 Helode aɨʉtambʉe itɨ kʉnsoko aɨʉlagɨɨye kɨna Yohana Mʉbadisi waambwe watugwe mʉkadulumu. Aɨwitʉmile itɨ kʉnsoko aɨ wamʉtɨna Helodia naɨ mʉsʉngʉ wang’wa Pilipo heu wakwe. 18 Helode aiʉmʉtendee itɨ ʉ Yohana Mʉbadisi kʉsoko aɨʉmʉɨe, "Shanga inonee ʉewe kʉmʉtina ʉmʉsʉngʉ wang’wa heu wako."

19 Itɨ gwa ʉ Helodia aɨ ʉmʉbɨpɨwe nangalu ʉ Yohana, akalomeela kʉmʉbʉlaga, akaleng’wa, 20 kʉnsoko Helode aɨwɨmʉsʉnja. Helode aɨʉmogopile ʉ Yohana, kʉnsoko aɨʉlɨngɨle kɨna mʉntʉ nʉgombekile kʉng’wi Itunda, aɨwɨlowaa kʉmʉtegeelya, nɨitɨ ga naɨ wamʉtegeelya akahʉsha nangalu.

21 Naɨapika matungo akʉkɨmbʉkɨɨlya kʉtugwa ʉ Helode. Helode akanoneelelya iloeelya ɨanyampala ianza lakwe, nɨamankata nɨ atongeli nɨakʉ Galilaya. Papo gwa ʉ Helodia akalija lyoma naɨwɨlomeela kʉmʉbʉlaga ʉ Yohana. 22 Ʉʉgwa, mʉnanso wang’wa Helodia akingɨla miloeelya, akaina, akamʉloeelya nangalu ʉ Helode nɨazɨɨla akwe. Mʉtemi Helode akamʉɨla ʉmʉnanso nʉwanso, "Nompe kɨntʉ kɨhi nʉtakile, nʉnene kʉʉpa" 23 Akamʉlapɨla hangɨ, "Kɨntʉ kɨhi nʉkʉnompa, kʉʉpa, itule nusu a ʉtemi wane, kʉʉpa."

24 Papo gwa, ʉmʉnanso nʉwanso akapuma, akamʉkolya ʉnyinya, "Nompe ntʉni?"

Nyinya akamʉsʉkɨɨlya,

"Lompa itwe lang’wa Yohana Mʉbadisi."

25 Mʉnanso akatulya intambo kʉ Mʉtemi, akamʉlompa, "Ndoilwe ʉmpe ino ino itwe lang’wa Yohana mʉbadisi mʉntua."

26 Mʉtemi akahʉsha nangalu, akaleng’wa kʉmʉhitɨlya, kʉnsoko ilapo lakwe, nɨ aazɨɨla akwe nɨamolɨ miloeelya. 27 Ʉʉgwa ʉ Mʉtemi akamʉlagɨɨlya ʉmʉmboi walete itwe lang’wa Yohana. Mʉmboi akalongola mʉkadulumu akamʉdʉmʉla Yohana itwe, 28 akaɨkɨla itwe nɨlanso mʉntua, akaleta, akamʉpa ʉmʉnanso, nʉyo ʉmʉnanso akamʉpa ʉnyinya. 29 Amanyisigwa ang’wa Yohana naɨ igule itɨ, akalongola akaʉhola ʉmʉimba wang’wa Yohana akaʉɨka.

30 Amanyisigwa awo naɨalagɨigwe akatʉlya, akilinga ntongela ang’wa Yesʉ, akamʉɨla ɨhi nɨamanyisilye nʉkitʉma. 31 Yesʉ akaaɨla ɨamanyisigwa akwe, "Kwɨndi ʉnyenye ʉdu ipande nigila anga antʉ mʉsʉpye iniino." Aɨʉtambʉe itɨ kʉnsoko pang’wanso aɨ akolɨ antʉ ɨdʉ naɨ akingɨla nʉkʉpuma, Yesʉ nɨamanyisigwa akaʉlya ɨlyoma la kʉlya kʉnsoko akʉaaɨɨlya. 32 Itɨgwa, akanankɨla mibɨnɨ, akalongola ipande ningila antʉ.

33 Ingɨ antʉ ɨdʉ aɨ aine alongoe, akalɨnga kʉalomile. Antʉ ɨdʉ akapuma mʉisalɨ yɨhi, akamankɨɨla ʉko naɨʉlomile ʉ Yesʉi nɨamanyisigwa akwe, akaatongeela kʉpika. 34 Yesʉ naɨ ʉsimile mibɨnɨ, akaona antʉ ɨdʉ ilʉndile, akaaisɨɨlya, kʉnsoko aɨ ɨhanga nkolo ningɨla mʉdɨmi. Akandya kʉamanyisa nkani yɨdʉ. Akatula amanyisa 35 Matungo ampɨndɨ naɨapika, amanyisigwa akamʉhanga ʉ Yesʉi, akamʉɨla, "Mʉnʉ ingɨ wɨɨ, nilyoa laina haɨɨla. 36 Bahu ʉalage iantʉ alongole mʉisalɨ niikʉlʉ niisalɨ niinino nɨya pakʉpɨ, ende agʉle indya." 37 Yesʉ akaaɨla, "Api nyenye indya." Nɨenso akamʉkolya, "Itɨɨ, kende kʉagʉɨlye mɨkate nɨkete nsaɨlo dinali magana abɨɨlɨ, shanga akenela?"* 38 Yesʉ akaakolya, "Mʉkete mɨkate ɨnga? Endi mʉgoze." Naɨagoza, akamʉɨla, "Ɨkolɨ mɨkate ɨtaano ninsamaki ɨbɨɨlɨ."

39 Ʉʉgwa ʉ Yesʉi akaalagɨɨlya amanyisigwa akwe aɨli ɨantʉ ikiɨ maʉmbɨ mʉmapwa nɨmadabʉ. 40 Antʉ nɨenso ɨkikiɨ maʉmbɨ aantʉ igana, nɨmaʉmbɨ maʉlya antʉ makʉmi ataano. 41 Sʉnga ʉ Yesʉi akahola mɨkate nanso nɨtaano ni nsamaki niibɨɨlɨ, akalangamɨla kilunde, akakembeta, akaeganɨa mɨkate, akaapa amanyisigwa akwe aomolanie ɨantʉ. Ni nsamaki niibɨɨlɨ akaomolania antu. 42 Antʉ ɨhi akalya nʉ kikʉta. 43 Amanyisingwa akwe akahoela lʉsago nʉla mɨkate ni nsamaki, yɨkizʉla itoto ikʉmi na ibɨɨlɨ. 44 Antʉ naɨ alɨe ɨmɨkate nanso aɨ itʉnja du aɨ anga magana anzogu ataano.

45 Itungo lɨlo lɨɨlo ʉ Yesʉi akaalagɨɨlya amanyisigwa akwe anankɨlange mibɨnɨ, apute itumbi lakabɨɨli nɨla lʉzɨ apike kʉ Betisaɨda, nʉwanso aɨ ʉkʉlaga milʉndo nʉwa antʉ. 46 Yesʉ naɨ wakondya kʉalaga ɨantʉ, akalongola kʉlʉgʉlʉ kʉlompa. 47 Naɨ yatula ʉtikʉ, ibɨnɨ aɨ lɨmolɨ pakatɨ alʉzɨ nʉlʉkʉlʉ, Yesʉ aɨ ʉkolɨ wing’wene kitʉmbɨ. 48 Yesʉ akaaona amanyisigwa akwe akaga kʉlongolya ibɨnɨ, kʉnsoko aɨ akʉkɨngɨlwa nʉ ʉng’wega. Ʉtikʉ wigɨngʉ, Yesʉ akalongola kʉ amanyisigwa wazegenda migʉlya amazɨ, akahiya kʉakɨla. 49 Naɨ amʉona ʉkʉgenda migʉlya amazɨ, akasɨganɨɨlya kɨna mʉtumbʉka, akakʉta! 50 Nsoko ɨhi aɨamʉine aɨogopile ikʉlʉ.

Sʉnga ʉ Yesʉi akaaɨla, "Kilaji, ingɨ nene. Leki kogopi" 51 Sʉnga akanankɨla mibɨnɨ naɨ akolɨ, ʉng’wega ʉkakilaja. Nɨenso akakʉɨlwa. 52 Kʉnsoko aɨ akɨlɨ kʉlɨnga ɨndogoelyo amɨʉkʉɨlwa amɨkate. Nkolo yao aɨ nkaku kʉhʉɨɨla.

53 Naɨ aputile ʉlʉzɨ nʉlʉkʉlʉ akapika kihɨɨ akʉ Genesaleti, akimɨsha ibɨnɨ mʉmpelo a lʉzɨ. 54 Naɨasima mibɨnɨ itungo ʉdu antʉ akamʉlɨnga ʉ Yesʉi. 55 Ʉʉgwa, antʉ akalongola kʉpilima ihɨɨ nanso ihɨ, azeahola ɨalwae ao mʉmɨango akaatwala ʉko naɨ igulye kɨna ʉ Yesʉi ʉkolɨ. 56 Nkɨka yɨhi ʉ Yesʉi naɨwendile, mʉisalɨ niikʉlʉ ang’wɨ isalɨ ni iniino ang’wɨ gapɨhi, antʉ aɨ aaɨkile ɨalwae mʉʉgalagalo, akaminena ʉ Yesʉi kɨna ɨalwae agutye ʉdu ʉkunzɨlo nʉwa matugalo akwe. Nɨenso ɨhi naɨ amʉgutilye akakomya.