1 Yesʉ akandya kʉmanyisa ɨantʉ hangɨ pa mpelo alʉzɨ nʉla Galilaya. Milʉndo ʉkʉlʉ nʉwa antʉ ʉkamʉpilɨmɨɨlya nʉwanso akingɨla mibɨnɨ akikiɨ antʉ aleke kʉmʉnyoma. Antʉ ɨhi ɨkikiɨ kihɨ nɨ nyʉmʉ, pa mpelo alʉzɨ nʉlʉkʉlʉ. 2 Aɨ ʉkʉamanyisa makani ɨdʉ kʉmpyani, mʉʉmanyisi wakwe akaaɨla,

3 "Tegelyi! Mʉmyagi ʉng’wɨ aɨwendile kʉmyaga. 4 Naɨ ʉkʉmyaga ɨmbeʉ, nɨɨng’wɨ yɨkagwɨla mʉnzɨla nyonyi yɨkahoeela nʉkʉilya. 5 Mbeʉ ying’wɨ yɨkagwɨla mitalagwe mʉkʉtilɨ ihalʉ nɨlɨdʉ, ninyenso aɨikaiye kʉhelʉka kʉnsoko aɨituhɨɨwe iniino. 6 Mpasʉ naɨ akɨɨe mɨmea akwe ɨkanyala, yɨkalimansɨɨla, kʉnsoko ɨmɨli amɨmea shanga aɨɨhɨmbɨɨye iza. 7 Mbeʉ ying’wɨ yɨkagwɨla mʉmɨtɨ namija, ɨmɨtɨ ɨkakʉla ɨkasopa ɨmɨmea shanga ɨkapa anga mbeʉ ɨhi. 8 Mbeʉ ying’wɨ yɨkagwɨla mʉmboto, yɨkahelʉka yɨkakinda nʉkʉkʉla, yɨkapa. ing’wɨ makʉmi atatʉ, ninzʉya makʉmi mʉtandatʉ, ninzʉya igana."

9 Sʉnga Yesʉ akaaɨla, "Nʉkete ʉkʉtwɨ nʉije!"

10 Ingɨ ʉ Yesʉi naɨwatula wing’wene du, antʉ ang’wɨ naɨamigulye palʉng’wɨ nɨamanyisigwa ao nikʉmi na abɨɨlɨ, akamʉhanga, akamʉkolya ndogoelyo ampyani nanso. 11 Yesʉ akasʉkɨɨlya, "Itunda ʉmʉpee ʉnyenye kʉlɨnga ʉnkunku nʉwa ʉtemi wang’wi Itunda, ingɨ awo nɨakolɨ kʉnzi akʉtambʉɨlwa maintʉ ɨhi kʉmpyani, 12 ingɨ,

‘Awo nɨakʉgoza agoze,

aleng’we kʉona,

awo nɨakija, nɨije,

aleke kʉlɨnga.

Kunsoko anga alɨnge, akʉmʉsʉkɨla Itunda,

nʉyo ʉkʉalekela ɨmɨlandʉ ao."’

13 Ʉʉgwa, ʉ Yesʉi akaakolya, "Itɨɨ, nʉnyenye shanga mʉlɨngile mpyani ɨyɨ, Mʉhumile ʉlɨ, kʉlɨnga mpyani niing’wɨ? 14 Mʉmyagi ingɨ mʉtanantyi lʉkani lang’wi Itunda. 15 Antʉ ang’wɨ ɨhanga ɨmbeʉ nigwɨɨe mʉnzɨla, anga ije ʉdʉ lʉkani lang’wi Itunda, Shetani wɨzaa nʉkʉlʉheja ʉlʉkani nʉlʉtemewe mʉng’waao. 16 Antʉ ang’wɨ ɨhanga mbeʉ nɨgwɨɨe mitalagwe mihalʉ nisheehʉ. Anga ije ʉdʉ ʉlʉkani lang’wi Itunda ɨlʉsɨngɨɨlya kʉʉlowa. 17 Ingɨ ɨhanga ɨmɨli amɨmea, lʉkani lang’wi Itunda ɨlʉhʉɨɨla kitungo ikupɨ mʉnkolo yao. kʉlʉlo anga ligele lwago ang’wɨ wagigwi kʉnsoko alʉkani nʉlanso, itungo ʉdu ɨlʉleka ʉlʉkani. 18 Antʉ ang’wɨ ingɨ ɨhanga mbeʉ izo naɨigwɨe mʉmɨtɨ amija. Nianso ingɨ impyani nɨantʉ awo anga ije ʉlʉkani nʉlanso, 19 ingɨ mɨlɨmo amʉʉnkumbigʉlʉ nʉ ʉgoolya nʉwansao, nɨnsʉla amakani mangɨza anga yingɨɨle, yɨlʉsopa ʉlʉkani nʉlanso, shanga ɨlitʉmɨla anga mʉlɨmo. 20 Antʉ ang’wɨ, ɨhangaa mbeʉ nɨyigwɨɨe mʉmboto, ɨlɨjaa ʉlʉkani lang’wi Itunda ɨlʉsɨngɨɨlya, nʉkʉlʉhʉɨɨla, nʉkʉtugisa. Anga mbeʉ niyipesa, niying’wɨ makʉmi ataatʉ, niying’wɨ makʉmi mʉtandatʉ hangɨ niying’wɨ igana."

21 Yesʉ akalongoleka kʉatambʉɨla, "Itɨɨ, antʉ akɨlya lʉmʉlɨ mʉnyʉmba nʉkʉlʉkʉnɨkɨla na shʉngʉ ang’wɨ kʉɨka mʉʉlungu? Shanga ʉʉ! Lʉmʉlɨ lɨɨkwa paʉpagɨko. 22 Itɨ ʉʉgwa, kɨhi nɨkɨpihilwe kɨkʉpihʉʉlwa, hangɨ nɨkɨ nɨkɨkʉnɨkɨwe kɨkʉkʉnʉkʉlwa. 23 Ʉyʉ nʉkete ʉkʉtwɨ, nʉije."

24 Yesʉ akaaɨla hangɨ, "Tegeelyi kɨsa ɨkɨ nɨkʉmʉɨla. Itɨ nʉipumilye kʉtegeelya ʉlʉkani, itɨ ʉʉ Itunda ʉkʉongeelya kʉlɨnga ʉlʉkani ikʉlʉ. 25 Mʉntʉ ʉyʉ nʉkʉtegeelya ʉlʉkani lang’wi Itunda nʉkʉlʉlɨnga, Itunda ʉkʉmʉaɨɨlya nʉkʉmʉtenda walʉlɨnge lʉkʉlʉ. Mʉntu nɨshanga ʉkʉtegeelya lʉkani lang’wi Itunda, nʉlʉkani nʉlʉniino nʉlʉlɨngile ʉkʉhegeligwa."

26 Yesʉ akalongoleka kʉtambʉla, "Ʉtemi wang’wi Itunda wimpyani itɨ. Mʉntʉ ʉng’wɨ aɨʉmyagile mbeʉ mʉmʉgʉnda. 27 Ʉtɨkʉ wɨlala nʉ ng’ʉng’wɨ ɨza ʉpɨtilye ʉʉ, ɨmbeʉ yɨkʉhelʉka nʉ kʉkinda nʉwanso shanga iza ʉlɨngɨle nɨkɨkʉtendeka. 28 Ingɨ aɨ itɨ, kʉnsoko ihalʉ lyenso lɨhelʉkisa ɨmbeʉ nʉkʉkʉlya nʉkʉtula mimea nʉkʉpa ɨndya, landɨɨlya hanza kigela itina nidabʉ, wityata mʉmea nʉʉkindile, sʉnga ipemba nɨlɨpee inseke. 29 Nseke nɨanso anga ikonde, mʉntʉ wandya kʉogola wazetema na zolo kʉnsoko maogola apika.

30 Yesʉ aɨʉakoiye, "Ʉtemi wang’wi Itunda wimpyanigwe nɨ ntʉni? Kʉʉganʉle kʉmpyani kɨɨ? 31 Ingɨ wimpyani nɨmbeʉ a haladali nɨɨza niino kʉkɨla mbeʉ yɨhi nia mʉnkʉmbɨgʉlʉ. 32 Ingɨ anga ɨtemelwe ɨhelʉka, nʉkʉtula mɨtɨ mɨkʉlʉ kʉkɨla mɨtɨ ɨhi na nyenyi, ntambɨ yakwe yikʉla, nɨnyʉnyɨ yɨtuma iuyɨ mʉmilʉlɨ akwe,"

33 Yesʉ aɨʉatanantɨɨye inkani yakwe kʉmpyani yɨdʉ anga niyanso, aɨʉligitilye nɨenso anga naɨ ahumile kʉmʉlɨnga nʉkʉkɨtambʉla. 34 Shanga aɨʉligitilye nɨenso kɨntʉ kɨhi waze mʉgila mpyani, ingɨ nʉmolɨ nɨamanyisigwa akwe, akaakʉmʉɨla aya ɨhi.

35 Lʉhikʉ nʉlanso, naɨyaina tula mpɨndɨ, Yesʉ akaatambʉɨla amanyisigwa akwe, "Kʉpute kitʉmbɨ la lʉzɨ." 36 Ʉʉgwa, akaleka ʉmilʉndo waantʉ, akingɨla mibɨnɨ naɨʉmolɨ ʉ Yesʉi. Nɨ itɨga antʉ aʉya ɨkalongolania nɨenso azeamolɨ mʉ mabɨnɨ ao. 37 Ʉʉgwa, kɨkigela kɨntinkʉ kɨkʉlʉ, maɨngʉ akalɨkʉa ibɨnɨ naɨʉmolɨ ʉ Yesʉi lɨkatula izʉla mazɨ. 38 Yesʉ aɨʉmolɨ kʉnyuma ibɨnɨ, waze wilaɨɨye mʉkɨpalatʉ. Ʉʉgwa, amanyisigwa akwe akamʉʉsha nʉkʉmʉɨla, Mʉmanyisi, nɨkɨ shanga ʉkee kɨna kaakakapɨla mʉmazɨ?"

39 Yesʉ akaʉka, papo paapo akalagɨɨlya ɨkɨntinkʉ nɨkanso, "Kilaga! Ihɨtwɨɨ!" Kɨntinkʉ kɨkatɨga, maɨngʉ akatɨga. 40 Sʉnga ʉ Yesʉi akaaɨla amanyisigwa akwe, "Nɨkɨ mɨoa? Itɨɨ, mʉkɨlɨ mɨagila anga ʉhʉɨɨli?"

41 Amanyisigwa akwe akitumba ikʉlʉ, akatulikolya, "Ʉyʉ nyenyu gwa, kɨntinkʉ nʉ lʉzɨ yʉkʉmija!"