1 Yesʉ nɨamanyisigwa akwe ɨkapika kitʉmbɨ nɨla lʉzɨ nʉla Galilaya, kihɨɨ a Agelasi. 2 Yesʉ naɨ ʉsimile ʉdu mibɨnɨ, akatankana nʉmʉntʉ nʉkete hɨng’wɨ ʉpumɨe mʉibɨɨla. 3 Mʉntʉ nʉwanso aɨwishiɨ mʉibɨɨla aɨ kʉtilɨ anga mʉntʉ naɨ ʉhumile kʉmʉtunga mɨnyololo. 4 Nkʉa yɨdʉ aɨ wɨtungwa minyololo ni mpɨngu, ingɨ aɨ wɨdʉmʉla ɨmɨnyololo nʉkʉbunanga impɨngu niyanso, aɨ kʉtilɨ anga mʉntʉ nʉhumile kʉmʉamba. 5 Ʉtikʉ nʉ ng’ʉng’wɨ aɨwishiɨ mʉibɨɨla nʉ mʉmalʉgʉlʉ, wazekʉta nʉkikwalambʉla kʉ magwe.

6 Naɨ ʉmʉine ʉ Yesʉi kakʉlɨ akamʉmankɨɨla, akatugama ntongela akwe, 7 akakʉta akalʉnga, "Ʉewe Yesʉ Ng’wana wang’wi Itunda nʉwa kigʉlʉ, nɨkɨ ʉkʉningɨɨla? Kʉinena kʉlina lang’wi Itunda leka kʉnaja!" 8 Aɨʉtambʉe itɨ kʉnsoko Yesʉ aɨʉmʉkenee, "Ʉewe hɨng’wɨ, mʉmʉntʉ ʉyʉ hega!"

9 Yesʉ akamʉkolya "Lina lako wɨnyenyu?"

Hɨng’wɨ akasʉkɨɨlya, "Lina lane Anyambita, kʉnsoko ʉsese kɨdʉ." 10 Sʉnga ahɨng’wi nɨanso akaminena ʉ Yesʉi waleke kʉazunsa apume mihɨɨ nanso.

11 Pakupɨ nɨpang’wanso aɨlɨkolɨ idale ikʉlʉ nɨla ngulima lɨkʉdima. 12 Ʉʉgwa, ahɨng’wɨ nɨanso akaminena ʉ Yesʉi, "Kʉgombye kingɨle mʉngulima izo." 13 Yesʉ akaagombya. Ʉʉgwa, ahɨng’wɨ nɨanso akapuma, akingɨla mʉngulima nɨanso. Idale lɨhi nɨla ngulima lɨkahulumʉkɨla migɨɨlɨ nʉ kʉkapɨla mʉlʉzɨ nʉkʉsha, aɨ anga ngulima magana amagana abɨɨlɨ.

14 Ɨmɨɨli idale nɨla ngulima akamanka, akatanantya ikani nɨlanso mʉisalɨ niikʉlʉ nʉmʉɨsalɨ ni iniino. Antʉ ɨkaza kiloeela naɨ atendekile. 15 Naɨ apika kʉng’wa Yesʉ, akamʉona nʉyʉ naɨʉkete ʉhɨng’wɨ, wikiɨ pihɨ, ʉtugae matugalo aze ʉkete mahala akwe, akogopa. 16 Antʉ naɨ iloee ikani nɨlanso akaaganʉɨla nɨaʉya makani naɨ ʉtendewe mʉntʉ ʉyʉ naɨ ʉkete ahɨng’wɨ ninkani yidale nɨla ngulima. 17 Ʉʉgwa, antʉ akatulaminena ʉ Yesʉi wahege mihɨɨ ao.

18 Yesʉ naɨ ʉkʉnankɨla mibɨnɨ, mʉntʉ ʉyo naɨ ʉhegeigwe ahɨng’wɨ akaminena akamʉɨla "Ngombye kʉkʉile nʉewe!"

19 Ingɨ ʉ Yesʉi akamʉhitɨlya, akamʉɨla, "Longola kʉ antʉ ako wende ʉatambʉɨle anyandʉgʉ ako makani nɨmakʉlʉ Isekʉlʉ nʉkʉgunile, nʉkʉʉonela ɨkɨnyaʉwai."

20 Kʉlʉlo, mʉntʉ nʉwanso akalongola, akandya kʉtanantya mʉ Dekapoli ndogoelyo akwe isalɨ ikumi, Yesʉ naɨ ʉmʉponyile, antʉ ɨhi akakʉɨlwa.

21 Yesʉ naɨ watambʉka kʉtulya itʉmbɨ lakabɨɨlɨ nɨla lʉzɨ. Milʉndo waantʉ ɨdʉ akamʉpilima nʉwanso waze ʉmolɨ kʉmpelo alʉzɨ nʉlʉkʉlʉ. 22 Akapika mʉntʉ ʉng’wɨ mʉtongeli wa nyʉmba akʉtankanɨla Ayahudi, witangwaa Yailo, naɨ ʉmʉine ʉ Yesʉi, akigʉma pamɨgʉlʉ akwe, 23 akaminena, akalʉnga, "Mʉnanso wane mʉlwae ʉkʉhima nsha. Itʉnʉ kʉlompa nzʉ ʉmʉtonye wahume kʉkomya nʉ kʉpangataala." 24 Ʉʉgwa ʉ Yesʉi akalongolania nʉng’wenso. Antʉ ɨdʉ akamʉtyata, antʉ akamʉpingapinga.

25 Mʉng’wao aɨʉkolɨ mʉsʉngʉ ʉng’wɨ naɨwɨpuma sakami akɨsʉngʉ kʉ myaka ikʉmi na ɨbɨɨlɨ, 26 mʉsʉngʉ nʉwanso aɨwagile, kʉgenda kʉakilɨki ɨdʉ. Aɨwamaile nsao yakwe yɨhi kikilɨkɨla, ingɨ ndwala ɨkalongoleka kʉtula mbɨ. 27 Naɨ wigulye impola yang’wa Yesʉ, ʉʉgwa akakunkuma mʉantʉ, akagutya itugalo lang’wa Yesʉ kʉnyuma. 28 Aɨ witumile itɨ, kʉnsoko aɨ usɨgɨɨe mʉnkolo, "Anga ngutye itugalo lakwe, kʉkomya."

29 Ʉʉgwa naɨʉgutilye itugalo lang’wa Yesʉ ɨsakami ɨkapela kʉpuma, akamanya kɨna wakomyaa ʉlwae wakwe. 30 Yesʉ akalɨnga kɨna ngulu yakwe niaʉponyi yitʉmaa mʉlɨmo. Akapɨlʉkɨla milʉndo nua antʉ, akakolya, "Itɨɨ, nyenyu ʉngutilye itugalo lane?"

31 Amanyisigwa akwe akamʉsʉkɨɨlya, "Ʉine antʉ akʉʉpinga pinga, ʉkʉlɨnga nyenyu nʉkʉgutilye?"

32 Ingɨ ʉ Yesʉi akalaa lala mpande yɨhi wahume kʉmʉona ʉyo nʉmʉgutilye. 33 Papo gwa mʉsʉngʉ nʉwanso aɨʉlɨngɨle ayo nʉtendewe, akapumɨla akaze wogopile, akaza akagwɨla mʉmɨgʉlʉ ang’wa Yesʉ nʉkʉtambʉla ɨtai ntɨlɨ. 34 Yesʉ akamʉɨla, "Ng’waane, wagunwaa nʉ ʉhʉɨɨli wako kʉng’waane. Longola kʉʉlowa, lwago lako lahila lʉkʉlʉ."

35 Yesʉ aɨwakɨlɨ ʉkʉligitya, antʉ akaza kʉpuma kito la mʉtongeeli wanyʉmba akʉtankanɨla ɨa Yahudi, akamʉɨla, "Mʉnanso wako wakʉza. Nɨkɨ ʉlongoleke kʉmʉnyoma ʉ Mʉmanyisi?"

36 Ingɨ ʉ Yesʉi, naɨwigule ʉlʉkani nʉlanso naɨ lʉkʉtambʉlwa, akamʉɨla ʉ Yailo, "Leka kogopa, hʉɨɨla ʉdu." 37 Yesʉ akaahitɨlya antʉ angɨɨza ityate nʉng’wenso, Petelo nʉ Yohana nʉ Yohana mʉlʉna ang’wa Yakobo wawo du naɨ ʉagombilye kityata. 38 Akapika kito lang’wa Yailo Yesʉ akija iogo, nyangi nʉ ʉhongeelya. 39 Akingɨla mʉnyʉmba, akaaɨla, "Nɨkɨ mʉzogooye mʉkʉlɨla nʉkʉhongeelya? Mʉnanso ʉyʉ shanga ʉkʉle, ʉlae ʉdʉ!"

40 Nɨanso ingɨ akamʉheka. Ʉʉgwa, akaapumya ɨhi kʉnzi, akaahola ihe nʉ nyinya nɨa mʉnanso nʉwanso nɨ amanyisigwa akwe awo nɨataatʉ, akingɨlania nkɨka kaɨ alalɨkilye mʉimba nʉwa mʉnanso. 41 Ʉʉgwa akamʉamba mʉkono, akamʉɨla, "Talita, kumi," ndogoelyo akwe, "Kʉʉɨla, mʉnanso ʉka!"

42 Pumpulugu mʉnanso akimɨka, akandya kʉgenda. Mʉnanso ʉyʉ aɨʉkete ilika lamyaka ikʉmi na ɨbɨɨlɨ. Papo aleli nɨamanyisigwa naɨingɨe akakʉɨlwa ikʉlʉ. 43 Yesʉ akaagilya lʉkʉlʉ aleke kʉmʉɨla mʉntʉ ikani nɨlanso. Sʉnga akaaɨla ɨaleli amʉpe ʉmʉnanso nʉwanso indya walye.