Provérbios 4

সুশিক্ষা গ্ৰহণত পৰম লাভ।

1 হে মোৰ পুত্রসকল, পিতৃৰ উপদেশ শুনা,

আৰু মনোযোগ দিয়া, যাতে তুমি সুবিবেচনা বুজিব পাৰা।

2 মই তোমালোকক উত্তম কৰ্মবিধি দিওঁ।

মোৰ শিক্ষা প্রণালী পৰিত্যাগ নকৰিবা।

3 মই যেতিয়া মোৰ পিতৃৰ পুত্ৰ আছিলোঁ,

মোৰ মাতৃৰ মৰমৰ একমাত্র সন্তান আছিলোঁ।

4 তেওঁ মোক শিকাইছিল আৰু মোক কৈছিল,

"তোমাৰ হৃদয়ত মোৰ বাক্য ধৰি ৰাখা;

মোৰ আজ্ঞাবোৰ পালন কৰা আৰু জীৱন ধাৰণ কৰা।"

5 প্রজ্ঞা আৰু বিবেচনা শক্তি অৰ্জন কৰা;

মোৰ মুখৰ পৰা ওলোৱা বাক্য নাপাহৰিবা আৰু ত্যাগ নকৰিবা।

6 প্ৰজ্ঞাক ত্যাগ নকৰিবা, তেতিয়া তেওঁ তোমাৰ ওপৰত দৃষ্টি ৰাখিব;

তেওঁক প্ৰেম কৰা, আৰু তেওঁ তোমাক সুৰক্ষিত কৰি ৰাখিব।