25 ନାଟ୍ନାର୍କେ ପାଉଲ୍ ନୁ ଶୀଲା ପ୍ରାର୍ତନା ମାଡ଼ମାତ୍ତଡ଼୍, ଇଶ୍ୱର୍ ଉଦ୍ଦେଶ୍ୟତେ ପାଟା ପାରମାତ୍ତଡ଼୍ ନୁ ବାଗାତ୍ ବନ୍ଦିଡ଼୍ ଇଦ୍ କେଞ୍ଜ ମାତ୍ତଡ଼୍ । 26 ହଟାତ୍ ବୁମିକମ୍ପ ଆତ୍ତେ ନୁ ଜଇଲ୍ତେ ମୂଲଦୁଆତିଙ୍କ୍ ଉଃହୁତେ । ସାଙ୍ଗେ ସାଙ୍ଗେ ସାରେ ମାର୍ କୁଲେମ୍ ଆତ୍ତେ ନୁ ସାରେ ବନ୍ଦି ଆଦ୍ତନ୍ ଅଡ଼ାଦ୍ ଇକ୍ଲେମ୍ କୁସି ରାୟ୍ତା । 27 ତାନେରକ୍ଷା ମାଡ଼ାନଣ୍ଡ୍ ଉଞ୍ଜି ତେଏଦ୍ତଣ୍ଡ୍ ନୁ ଜଇଲ୍ତେ ମାର୍ କୁଲେମ୍ ମାନ୍ଦାନାଦ୍ ଉଡ଼ି ହାଲ୍ସ୍ତଣ୍ଡ୍ ଯେ ବନ୍ଦିଡ଼୍ ମିର୍ତ୍ତଡ଼୍; ଆଦିଙ୍କ୍ ଅଣ୍ଡ୍ ତାନ୍ ସାକୁ ପେସ୍ପିଇ ଆୱ୍କାନଙ୍କ୍ ତିଆର୍ ଆତ୍ତଣ୍ଡ୍ । 28 ଇତ୍କେ ପାଉଲ୍ ଗାଟି ଲେଙ୍ଗ୍ଦେ କେତ୍ତଣ୍ଡ୍, "ନିଜେ ବାତ୍ କ୍ଷତି ମାଡ଼୍ମା । ମାମ୍ ସାରେତମ୍ ଇଗେ ମିନ୍ଦେମ୍ !"
29 ତାନେରକ୍ଷା ମାଡ଼ାନଣ୍ଡ୍ ଡୁବିତାସ୍ ଉଡ଼୍ତଣ୍ଡ୍ ନୁ ଲୋପେ ମିରିୱାସ୍ ୱାଡ଼୍କି ୱାଡ଼୍କି ପାଉଲ୍ ନୁ ଶୀଲାନ୍ ଡେକେତ୍ ମଦଲ୍ ରାୟ୍ତଣ୍ଡ୍ । 30 ତାନ୍ ପେର୍କେ ଅଡ଼୍କିଂଙ୍କ୍ ବାୟିଦେ ଆସ୍ ପାଚ୍ରା ମାଡ଼୍ତଣ୍ଡ୍, "ଆଜ୍ଞାଲଡ଼ି ! ପରିତ୍ରାଣ୍ ପାଏମ୍ ଆଦାନଙ୍କ୍ ନାକିଂଙ୍କ୍ ବାତ୍ ମାଡ଼େ ୱେୟ୍ତିତ୍ ?"
31 ଅଡ଼୍ ଉତ୍ତର୍ ହିତ୍ତଡ଼୍, "ପ୍ରବୁ ଜିସୁନାଗ୍ ବିଶ୍ୱାସ୍ ମାଡ଼୍କେ ମିଇ ପରିବାର୍ତେ ସାରେ ତଡ଼୍କିଙ୍କ୍ ପରିତ୍ରାଣ୍ ଦର୍କିତ୍ ।" 32 ତାନ୍ପେର୍କେ ଅଡ଼୍ ଅଂକିଙ୍କ୍ ନୁ ତାମ୍ ଲନ୍ ତେତାନଡ଼୍କିଙ୍କ୍ ସାରେତଡ଼୍କ୍ ପ୍ରବୁନ୍ ଗଟ୍ କେତ୍ତଡ଼୍ । 33 ନାର୍କେତ୍ ଆଦେ ସାଙ୍ଗେ ସାଙ୍ଗେ ତାନେରକ୍ଷା ମାଡ଼ାନଣ୍ଡ୍ ଅଡ଼୍କିଂଙ୍କ୍ ଆସ୍ ଅଡ଼ାୱୁ ପୁଣ୍ଡ୍କ୍ ସାରେ ନର୍ସିତ୍ତଣ୍ଡ୍, ମେଣ୍ଡେ ପରିବାରତେ ସାରେତଡ଼୍ ସାଙ୍ଗେ ସାଙ୍ଗେ ଏର୍ଦିକ୍ଷା ଗ୍ରହନ୍ ମାଡ଼୍ତଡ଼୍ । 34 ତାନ୍ପେର୍କେ ଅଣ୍ଡ୍ ପାଉଲ୍ ନୁ ଶିଲାଙ୍କ୍ ତାନ୍ ନିଜେତ୍ ଲୋନ୍ ଆସ୍ ତିନ୍ଦାନଙ୍କ୍ ହିତ୍ତଣ୍ଡ୍ । ଇଶ୍ୱର୍ତାଗ୍ ବିଶ୍ୱାସ୍ ମାଡ଼ିମାନ୍ଦାନ୍ ମାଇଦିଙ୍କ୍ ଅଣ୍ଡ୍ ନୁ ତାନ୍ ପରିବାର୍ତେ ସାରେତଡ଼୍ ୱେଡ଼୍କ୍ତଡ଼୍ ।
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)