ପ୍ରେରିତ 28

ମାଲ୍‍ଟା ଗପ୍‍ତାଗ୍ ପାଉଲ୍

1 ବାତ୍ ଅସୁବିଦା ଆୟ୍‍ୟକଟ ଗେଲ୍ପାନଙ୍କ୍ ଆଞ୍ଚିନାଗ୍ ଏୱୁସ୍ ଉଡ଼୍‍ତମ୍ ଯେ, ମାମ୍‍ମେ ମାଲ୍‍ଟା ଗପ୍‍ତାଗ୍ ଏୱୁତମ୍ । 2 ଆଗେତ୍ ଗ୍ରୀକ୍‍ ଗଟ୍‍ ପୁନ୍‍ୱେ ମୁନେତ୍‍ ନାରୁଡ଼୍ ମାକିଂଙ୍କ୍ ଲେକେତ୍ ଉଡ଼୍‍ତଡ଼୍ । ଆସୁଟେ ୱାର୍‍ସାମ୍ ୱାସ୍ ଶାଲ୍ କାଲାମ୍ ଆସ୍‍ସ ମାତ୍‍ତେ । ଆଦିଙ୍କ୍ ଅଡ଼୍‌ କିସ୍ ନିଡ଼୍‍ସ୍‍ପି ମାକିଂଙ୍କ୍ କାର୍‍ଙ୍ଗୁତଡ଼୍ । 3 ପାଉଲ୍ ମପେନ୍ ୱେର୍‍କି ତେଇସ୍ କିସ୍‍ତାଗ୍ ୱାଟାନଙ୍କ୍ ଆଦାନ୍ ୱେଲେ ଆଗାକନ୍‍ସ୍ ଅଣ୍ଡୟ୍‌ ତାଡ଼ାମ୍ ପେୟ୍‍ତେ ନୁ କାମ୍‍କ୍‍ତାଗାଙ୍କ୍ ରକ୍ଷା ପାଏମ୍ ଆଦାନ୍ ସେଙ୍ଗେ ଅନ୍‌ କାୟ୍‍ଦେ ପର୍‍ର ତାର୍‍ରି ଆଗେ କାସି ଉତ୍‍ତି ମାତ୍‍ତେ । 4 ଆଗେତ୍ ମୁନେତ୍‍ ନାରୁଡ଼୍ ପାଉଲ୍‍ତେ କାୟ୍‍ଦାଗ୍ ଉଙ୍ଗମାନ୍ଦାନ୍ ତାଡ଼ାତିଙ୍କ୍ ଉଡ଼ି ତାମ୍‍ତାମ୍ କେତ୍‍ତଡ଼୍, "ଇଣ୍ଡ୍ ନିଜାମ୍ ୱେରଣ୍ଡ୍ ମାନେୟ୍‍କ୍ ହାୱ୍‍କାନଣ୍ଡ୍, ବେଲାଆୟି ଅଣ୍ଡ୍‌ ଗଦାଡ଼୍‍ତାଗ୍ ସିନା ଗେଲ୍ପାନଙ୍କ୍ ପାଏମ୍ ଆତ୍‍ତଣ୍ଡ୍ ଇତ୍‍କେ ବାଗ୍‍ୱାନ୍‍ତାଗାଙ୍କ୍ ଅଣ୍ଡ୍‌ ଜିୱେ ବାଦ୍‍କାନଙ୍କ୍ ପାର୍‍ୱଣ୍ଡ୍ ।" 5 ଇତ୍‍କେ ପାଉଲ୍ ନିଜେ ପୁଣ୍ଡ୍ ଆୟ୍‍ୟକଟ, ତାଡ଼ାମ୍‌ ତିଙ୍କ୍‌ କିସ୍‍ତାଗ୍ କାୟ୍‍ସିତ୍‍ତଣ୍ଡ୍ । 6 ପାଉଲ୍‍ତେ ମେନ୍ଦୁଲ୍ ତୟିତ୍ କି ଅଣ୍ଡ୍‌ ଡଲି ନେଲ୍ ରାୟିତଣ୍ଡ୍ ଇଞ୍ଜ ଆଲ୍‍ସି, ଅଡ଼୍‌ ସୁଦୁର୍ ସମୟ୍‍ କେପ୍‍ତଡ଼୍ । ଇତ୍‍କେ ନାର୍‍ଗେ ସମୟ୍‍ କେପି ଉଡ଼୍‍ତଡ଼୍ ଯେ, ପାଉଲ୍‍ତିଙ୍କ୍ ବାତ୍‍ମିକା ଆୟ୍‍ୟ, ଅଡ଼୍‌ ଗଟ୍‍ତିଙ୍କ୍ ବାଦ୍‍ଲା ମାଡ଼ି କେତ୍‍ତଡ଼୍, "ଇଣ୍ଡ୍ ୱେରଣ୍ଡ୍ ବାଗ୍‍ୱାନ୍ ଲେକେତ୍‍ ନାରୁଣ୍ଡ୍‍ !"

7 ଆଗାଙ୍କ୍ ସୁଦୁର୍ ଜେକେ ଆଦ୍ ଗପ୍‍ତେ ପେଦେର୍‍ ବେଡ଼ିୟି ରାଜ୍‍କର୍ମଚାରୀ ପବ୍ଲିୟସ୍‍ତେ ୱାୟେ ମାତ୍‍ତେ । ଅଣ୍ଡ୍‌ ମାକିଂଙ୍କ୍ ସ୍ୱାଗତ୍ ମାଡ଼୍‍ତଣ୍ଡ୍ ନୁ ମାମ୍‍ମେ ମୁଣ୍ଡ୍ ଦିନା ଯାକ କୁଟ୍‍ମାମ୍ ଲେକାମ୍ ତାମ୍ ଲୋନ୍‌ ମାତ୍‍ତମ୍ । 8 ପବ୍ଲିୟସ୍‍ତେ ବାବାଙ୍କ୍ ହେଡ଼୍‍କ୍ ନୁ ଡଙ୍କେନପ୍‍ ଆସ୍ ମାତ୍‍ତାଙ୍କ୍ ଅଣ୍ଡ୍‌ କାଟୁଲ୍‍ତାଗ୍ ପାଟି ମାତ୍‍ତଣ୍ଡ୍ । ପାଉଲ୍ ଅନ୍‌ ରୁମ୍‍ତାଗ୍ ଆତ୍‍ତଣ୍ଡ୍, ଅନ୍‌ ସେଙ୍ଗେ ପ୍ରାର୍ତନା ମାଡ଼ି ଅନ୍‌ ପର୍‍ର କାୟ୍ ୱାଟି ଅଂକିଙ୍କ୍‌ ସାୟେ ମାଡ଼୍‍ତଣ୍ଡ୍ । 9 ଇଦିନ୍ ପେର୍‍କେ ଆଦ୍ ଗପ୍‍ତେ ରୋଗୀଡ଼୍ ସାରେତଡ଼୍ ପାଉଲ୍‍ତେ ବକେତ୍ ୱାସ୍ ସୁସ୍ଥ ଆତ୍‍ତଡ଼୍ । 10 ଅଡ଼୍‌ ମାକିଂଙ୍କ୍ ନାର୍‍ଗେ ଉପହାର୍ ହିତ୍‍ତଡ଼୍ ନୁ ମାମ୍‍ମେ ଆଗାଙ୍କ୍ ଜାହାଜ୍‍ତାଗ୍ କୁଦି ଆଦାନ୍ ୱେଲେ ମାକିଂଙ୍କ୍ ଦର୍‍କାର୍ ଜିନିଷ୍ ସାରେ ଅଡ଼୍‌ ତାସ୍ ଜାହାଜ୍‍ତାଗ୍ ୱାଟିତ୍‍ତଡ଼୍ ।

ମାଲ୍‍ଟାତାଗାଙ୍କ୍ ରୋମ୍ ଦେଶ୍‍ ଆତ୍‍ତଡ଼୍

11 ଆଲେକ୍‍ଜାଣ୍ଡ୍ରିଆ ତାଗାଙ୍କ୍ ୱାସ୍‍ମାନ୍ଦାନ୍ "କାୱୁଲେ ଦେୟାକ୍," ପେଦେର୍‍ତେ ଅଣ୍ଡୟ୍‌ ଜାହାଜ୍ ମାଲ୍‍ଟା ଗପ୍‍ତାଗ୍ ଶାଲ୍‍ କାଲାମ୍ ଜିଡ଼୍‍ନା ମାତ୍‍ତେ । ଗପ୍‍ତାଗ୍ ମୁଣ୍ଡ୍ ନେଲ୍‍ଞ୍ଜ୍ ମାତ୍‍ତେ ପେର୍‍କେ ମାମ୍‍ମେ ଆଦ୍ ଜାହାଜ୍‍ତାଗ୍ କୁଦି ଆତ୍‍ତମ୍ । 12 ମୁନେନ୍ ସିରାକ୍ୟୁସ୍ ଟାୱୁନ୍‍ତାଗ୍ ଏୱୁସ୍ ଆଗେ ମୁଣ୍ଡ୍ ଦିନା ମାତ୍‍ତମ୍ । 13 ଆଗାଙ୍କ୍ ମେଣ୍ଡେ ଆଞ୍ଜ୍ ମାମ୍‍ମେ ରିଜିୟମ୍ ଟାୱୁନ୍‍ତାଗ୍ ଏୱୁତମ୍ । ମେଣ୍ଡନ୍ ଦିନ୍ ତିନ୍ଦେପାକ୍ କନ୍‍ସ୍ ଗାଲ୍ ୱାତ୍‍ତେ ନୁ ମେଣ୍ଡେ ରେଣ୍ଡ୍ ଦିନା ପେର୍‍କେ ପୁତିଓଲି ଟାୱୁନ୍‍ତାଗ୍ ଏୱୁତମ୍ । 14 ଆଗେ ବେସ୍‍କ୍‍ତୁଡ଼୍‍ କ୍ରିଷ୍ଟ ବିଶ୍ୱାସୀଡ଼୍ ତଡ଼୍ କାଇଲ୍‍ତମ୍ । ତାମ୍ ତଡ଼୍ ଅଣ୍ଡୟ୍‌ ଆଟ୍ ମାନ୍ଦାନ୍ ସେଙ୍ଗେ ଅଡ଼୍‌ ମାକିଂଙ୍କ୍ ଅନୁରଦ୍‌‍ ମାଡ଼୍‍ତଡ଼୍ । ପେର୍‍କେ ରୋମ୍‍ ଟାୱୁନ୍‍ତାଗ୍ ଆଞ୍ଜ୍ ଏୱୁତମ୍ । 15 ମାୱାଦ୍ କବର୍ ପାଏମ୍ ଆସ୍ ରୋମ୍‍ତେ ବିଶ୍ୱାସୀ ଦାଦାଲଡ଼୍‍ ନୁ ଏଲାସ୍କି ମାକିଂଙ୍କ୍ କାଇଲାନ୍ ସେଙ୍ଗେ "ଆପୀୟ ହାଟ୍ ନୁ ମୁଣ୍ଡ୍ ଦୁକାନ୍," ପେଦେର୍‍ତେ ଟାୱୁନ୍‍ତାଗ୍ ୱାତ୍‍ତଡ଼୍ । ଅଡ଼୍‌‍କିଂଙ୍କ୍ ଉଡ଼ି ପାଉଲ୍ ଇଶ୍ୱର୍‌ତିଙ୍କ୍ ଦନ୍ୟବାଦ୍ ହିତ୍‍ତଣ୍ଡ୍ ନୁ ଗାଟି ୱେଡ଼୍‍କ୍‍ତଣ୍ଡ୍ ।

ରୋମ୍‍ ନଗରୀତାଗ୍ ପାଉଲ୍

16 ମାମ୍‍ମେ ରୋମ୍‍ତାଗ୍ ଏୱୁତେ ପେର୍‍କେ, ପାଉଲ୍‍ତିଙ୍କ୍ ଆନୁମତି ଦର୍‍କ୍‍ତେ ଯେ, ଅଂକିଙ୍କ୍‌ କେପାନ୍ ସେଙ୍ଗେ ମାନ୍ଦାନ୍ ସୈନିକ୍ ତଡ଼୍ ଅଣ୍ଡ୍‌ ନିଜେତ୍ ଇଚ୍ଛାତେ ବେଗେଆୟି ମାନ୍ଦାନଙ୍କ୍ ପାର୍‍ଦ୍‍ତଣ୍ଡ୍ ।

17 ମୁଣ୍ଡ୍ ଦିନା ପେର୍‍କେ ପାଉଲ୍ ଆଗେତ୍ ଇହୁଦୀ ନେତାଲଡ଼୍‍କ୍ ଅଣ୍ଡୟ୍‌ ସବାତାଗ୍ କାର୍‍ଙ୍ଗ୍‍ତଣ୍ଡ୍ । ଅଡ଼୍‌ ଅଣ୍ଡୟାଗେ ଗୁଡ଼୍‍ତାଙ୍କ୍ ପାଉଲ୍ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍; "ଇଶ୍ରାଏଲ୍‍ତେ ଦାଦାଲଡ଼୍‍, ମାନ୍‍ ନାରୁଡ଼୍ ବିରୁଦ୍ଦ୍‍ତେ କି ମାନ୍‍ ଆନିଦାଦିଡ଼୍ ନିୟମ୍‍ ବିରୁଦ୍ଦ୍‍ତେ ନାନ୍ ବାତ୍ ମାଡ଼କଟ୍ ମାତ୍‍କେ ମିକା, ଯିରୁଶାଲେମ୍‍ତାଗ୍ ବନ୍ଦି ଆସ୍ ରୋମୀୟ ନାରୁଡ଼୍ କାୟ୍‍ଦାଗ୍ ସର୍ପା ଆତ୍‍ତାନ୍ । 18 ନାକିଂଙ୍କ୍ ପାଚ୍ରାମାଡ଼ି ଡଲାନ୍‍ଦଣ୍ଡ୍ ପାଏମ୍ ଆଦାନ୍ ଲେକାମ୍ ନାନ୍ ବାତ୍ ଅପରାଦି ମାଡ଼ନ୍ ଇଞ୍ଜ ପୁଞ୍ଜ୍ ରୋମୀୟ ନାରୁଡ଼୍ ନାକିଂଙ୍କ୍ ମୁକ୍ତି ହିଦାଙ୍କ୍ ହାଲ୍‍ସି ମାତ୍‍ତଡ଼୍ । 19 ✝୨୮:୧୯ ପ୍ରେରିତ ୨୫:୧୧.ଇତ୍‍କେ ଇହୁଦୀଡ଼ ଉପବାସ୍ ଇଦିନ୍ ବିରୁଦ୍ ମାଡ଼୍‍ତାଙ୍କ୍, ନା ନିଜେତ୍ ଦେଶ୍‍ତେ ବିରୁଦ୍ଦ୍‍ତେ ନାୟାଦ୍ ବାତ୍‍ମିକା ଅବିଯୋଗ୍ ଇଲ୍‍ୱାଙ୍କ୍, ନାନ୍ ମହାରାଜାଙ୍କ୍ ଆବେଦନ୍‍ ମାଡ଼୍‌ନଙ୍କ୍‌ କେତ୍‍ତାନ୍ । 20 ଆଦିନ୍ ସେଙ୍ଗେ ନାନ୍ ଇଦ୍ ବିଷୟ୍‍ତିଙ୍କ୍ ତିର୍‍ୟାନଙ୍କ୍ ମିକିଂଙ୍କ୍ କାର୍‍ଙ୍ଗି ଅନୁରଦ୍‌‍ ମାଡ଼୍‍ତନ୍‍ । ବେନନ୍ ପର‍ ଇସ୍ରାଏଲ୍‍ ନାରୁଡ଼୍ ଆଶେ ମାଡ଼ିମିନ୍ଦେଡ଼୍, ଅନ୍‌ ସେଙ୍ଗେ ନେଣ୍ଡ୍ ନାନ୍ ଇକ୍‍ଲେମ୍ ତଃହସ୍ ମିନ୍ଦେନ୍ ।"

21 ଅଡ଼୍‌ ଅଂକିଙ୍କ୍‌ କେତ୍‍ତଡ଼୍, "ମାମ୍‍ମେ ଯିହୁଦା ଦେଶ୍ କନ୍‍ସ୍ ନି ବିଷୟ୍‍ତେ ବାତ୍ ଚିଟି ଦର୍କ, କି ନିୟାଦ୍ କାବୁର୍ ଅସ୍ ନି ବିଷୟ୍‍ତେ ବାତ୍ ଅବିଯୋଗ୍ ମାଡ଼ି କେତ୍‍ତାନ୍ ସେଙ୍ଗେ ମା ଦାଦାଲଡ଼୍‍ ତାମୁଣ୍ଡ୍‍ ଲୋପେ ବେନ ଇଗେ ୱାଡ଼ଣ୍ଡ୍ । 22 ଆଦ୍ ବାତ୍ଆୟି ମାମ୍‍ମେ ନିୟାଦ୍ ଗଟ୍ କେଞ୍ଜିତମ୍, ବାତେଙ୍କ୍ଇତ୍‍କେ ସାରେତାଗ୍ ନାରୁଡ଼୍ ନି ମାନ୍ଦେ ବିରୁଦ୍ଦ୍‍ତେ ଗଟ୍ କେତୁତଡ଼୍ ।"

23 ଅଡ଼୍‌ ଅଣ୍ଡୟ୍‌ ଦିନ୍‍ ଟିକ୍ ମାଡ଼୍‍ତଡ଼୍ ନୁ ଅଡ଼୍‌ଆଗାଙ୍କ୍‌ ନାର୍‍ଗେ ଆଦ୍ ନାଣ୍ଡ୍ ପାଉଲ୍ ମାନ୍ଦାନ୍ ପଡ଼୍‍ୟେତାଗ୍ ୱାତ୍‍ତଡ଼୍ । ନାର୍କ କନ୍‍ସ୍ ନାର୍‍କେତ୍ ଯାକ ପାଉଲ୍ ଅଡ଼୍‌‍କିଂଙ୍କ୍ ଇଶ୍ୱର୍‌ତେ ରାଜ୍ୟ ବିଷୟ୍ କେତ୍‍ତାନ୍ ନୁ ମୋଶାନ୍‌ ନିୟମ୍‍ ନୁ ବାବବାଦୀଡ଼୍ ଲେକାତାଗାଙ୍କ୍ ବାକ୍ୟ କେସ୍ ଜିସୁନାଗ୍ ଅଡ଼୍‌‍କିଂଙ୍କ୍‍ ବିଶ୍ୱାସ୍ ମାଡ଼ାନଙ୍କ୍‍ ଚେଷ୍ଟା ମାଡ଼୍‍ତଣ୍ଡ୍ । 24 ଅଡ଼୍‌ ଲୋପେଙ୍କ୍ ବେସ୍‍କ୍‍ତୁଡ଼୍‍ ବିଶ୍ୱାସ୍ ମାଡ଼୍‍ତଡ଼୍, ଇତ୍‍କେ ମେଣ୍ଡେ ବାଗାତଡ଼୍ ବିଶ୍ୱାସ୍ ମାଡ଼ଡ଼୍‍ । 25 ଇଦ୍ ବିଷୟ୍‍ତେ ଅଡ଼୍‌ ଗାଟି ରାମ୍‍କ୍ ଆଦ୍‍ତଡ଼୍ । ଅଡ଼୍‌ ଆଦାନ୍ ମୁନେନ୍ ପାଉଲ୍ ଅଣ୍ଡୟ୍‌ ଗଟ୍‍ କେତ୍‍ତଣ୍ଡ୍, "ପବିତ୍ର ଆତ୍ମା ମିୱଡ଼୍ ଆନିଦାଦୀଡ଼୍‍କ୍ ବାବବାଦୀ ଯିଶାଇୟନ୍ ପାୟୁର୍‍ତାଲା ନିଜାତେ ଗଟ୍ କେସ୍‍ମାତ୍‍ତଣ୍ଡ୍ ! 26 ଅଣ୍ଡ୍‌ କେସ୍‍ମାତ୍‍ତଣ୍ଡ୍, ‘ଇଡ଼୍ ନାରୁଡ଼୍‍କିଂଙ୍କ୍ ଆଞ୍ଜ୍ କେଲ୍‍ମ୍, ମିଡ଼୍ କେଞ୍ଜିତିଡ଼୍, ଗାଟି କେଞ୍ଜିତିଡ଼୍ ଇତ୍‍କେ ବୁଜେମ୍ ଆୟ୍‍ୱିଡ଼୍ । ମିଡ଼୍ କଣ୍ଡା ନାଆକି ମାନ୍‍ତିଡ଼୍‍, ଇତ୍‍କେ ଉଡ଼ାନଙ୍କ୍ ପାର୍‍ୱିଡ଼୍ । 27 ବାତେଙ୍କ୍ଇତ୍‍କେ ଇ ନାରୁଡ଼୍‍ତେ ହୃଦୟ୍ ଜାମ୍‍ ବୁଜେମ୍‍ ଆଦ୍‍ତଡ଼୍‍ ମେଣ୍ଡେ ଅଡ଼୍‌ ତାମ୍‍ୱା କଣ୍ଡା ନୁ କେୱ୍‍କ୍ ବନ୍ଦ୍ ମାଡ଼୍‍ତଡ଼୍, ଆଦ୍ ଆୟ୍‍ୟକଟ ମାତ୍‍କେ, ଅଡ଼୍‌ କଣ୍ଡା ତେର୍‍ସ୍ ଉଡ଼ାନଙ୍କ୍ ପାର୍‍ୱେଡ଼୍ । ଅଡ଼ାଦ୍‌ ତାଲ୍‍ତାଗ୍ ବୁଜେମ୍ ଆଦ୍‍ଦାନ୍ ଶକ୍ତି ମାନ୍‍ନେଡ଼୍; ଅଡ଼୍‌ ଇଶ୍ୱର୍‌ତେ ପାକେ ମାଲ୍‍ସ୍ ଆନେଡ଼୍ ନୁ ନାନ୍ ଅଡ଼୍‌‍କିଂଙ୍କ୍ ସାୟେ ମାଡ଼େନ୍ ।’"

28 ମାଡ଼େଙ୍ଗ୍‍ ପାଉଲ୍ କେତ୍‍ତଣ୍ଡ୍, "ମିଡ଼୍ ପୁଞ୍ଜ୍‍ମାନୁଟ୍, ମୁକ୍ତି ସେଙ୍ଗେ ଇଶ୍ୱର୍‌ତେ ସାୟେତ୍ କାବୁର୍ ଅଣଇହୁଦୀଡ଼୍‍ ବକେତ୍ ରଅତଡ଼୍ । ଅଡ଼୍‌ ଆଦ୍ କେଞ୍ଜିତଡ଼୍ ।" 29 ପାଉଲ୍‍ ଇୱୁସାରେ ଗଟି କେତ୍‍ତେ ପେର୍‍କେ, ଇହୁଦୀଡ଼୍ ତାମ୍‍ତାମ୍ ରାମ୍‍କ୍ ଆସ୍ ବେନନଣ୍ଡ୍ ଲୋନ୍‌ ମାଲ୍‍ସ୍ ଆତ୍‍ତଡ଼୍ ।

30 ପାଉଲ୍ ଅଣ୍ଡୟ୍‌ ଲୋନ୍‌ ବାଡ଼ା ଅସ୍ ରେଣ୍ଡ୍ ହେଣ୍ଡ୍‍କ୍ ଯାକ ମାତ୍‍ତଣ୍ଡ୍ ନୁ ଅଂକିଙ୍କ୍‌ ଉଡ଼ାନଙ୍କ୍ ୱାଦାନଡ଼୍ ସାରେତଡ଼୍‌କିଂଙ୍କ୍ ଅଣ୍ଡ୍‌ ସ୍ୱାଗତ୍ ମାଡ଼ମାତ୍‍ତଣ୍ଡ୍ । 31 ଆରାମ୍‍ତେ ନୁ ସାହାସ୍ ତଡ଼୍ ଅଣ୍ଡ୍‌ ଇଶ୍ୱର୍‌ତେ ରାଜ୍ୟ ବିଷୟ୍ ପ୍ରଚାର୍ ମାଡ଼ି ପ୍ରବୁ ଜିସୁ କ୍ରିଷ୍ଟନ୍ ବିଷୟ୍ ଶିକ୍ଷା ହିସମାତ୍‍ତଣ୍ଡ୍ ।