ଇହୁଦୀ ମିଟିଙ୍କ୍ତାଗ୍ ପିତର୍ ନୁ ଯୋହନ୍
1 ପିତର୍ ନୁ ଯୋହନ୍ ନାରୁଡ଼୍କିଂଙ୍କ୍ ଇଦ୍ରକମ୍ ଶିକ୍ଷା ଇଦାନ୍ୱେଲେ ମନ୍ଦିର୍ତେ ବେସ୍କ୍ତୁଡ଼୍ ଜାଜକୀଡ଼୍, ମନ୍ଦିର୍ ପ୍ରହରିଡ଼୍ତେ ସେନାପତି ନୁ ସାଦୁକୀଡ଼୍ ୱାସ୍ ହେୱୁତଡ଼୍ । 2 ଅଡ଼୍ ବିଜାର୍ ଆତ୍ତଡ଼୍, ବାତେଙ୍କ୍ଇତ୍କେ ଜିସୁ ଡଲ୍ତାଗାଙ୍କ୍ ପୁନରୁତାନ୍ ଆତ୍ତନ୍ ଇଞ୍ଜ ଇର୍ୱୁଡ଼୍ ପ୍ରେରିତ ଶିଷ୍ୟଡ଼୍ ଶିକ୍ଷା ହିସମାତ୍ତଡ଼୍ ନୁ ଡଲ୍ତେନଡ଼୍ ମେଣ୍ଡେଅନ୍ଦାମ୍ ଜିୱେ ଆଦ୍ତଡ଼୍ ଇଞ୍ଜ ପ୍ରାମାନ୍ ମାଡ଼ମାତଡ଼୍ । 3 ଆଦିଙ୍କ୍ ଅଡ଼୍ ଇର୍ୱୁଡ଼୍ ପ୍ରେରିତ ଶିଷ୍ୟଡ଼୍କ୍ ଗିରାପ୍ ମାଡ଼୍ତଡ଼୍ ନୁ ମେଣ୍ଡନ୍ଦିନ୍ ଯାକ ଅଡ଼୍କ୍ ଜେଲ୍ତାଗ୍ ନେହେତଡ଼୍, ବାତେଙ୍କ୍ଇତ୍କେ ଆସୁଟେ ମୁଲ୍ପୁଟ୍ ଆସ୍ମାତ୍ତେ । 4 ଇତ୍କେ ଅଡ଼୍ୱାଦ୍ ଶିକ୍ଷା କେଞ୍ଜିମାନ୍ଦାନ୍ ନାର୍ଗେ ନାରୁଡ଼୍ ବିଶ୍ୱାସ୍ ମାଡ଼୍ତଡ଼୍ ନୁ ଅଡ଼୍ୱାଦ୍ ସଂକ୍ୟା ନାର୍ଗେ ଅସ୍ ମାତ୍ରମ୍ ପାଞ୍ଚ୍ ହଜାର୍ ଆତ୍ତେ ।
5 ମେଣ୍ଡନ୍ଦିନେ ଯିହୁଦି ନେତାଲଡ଼୍, ବୟସ୍କା ନାରୁଡ଼୍ ନୁ ଦର୍ମଗୁରୁଡ଼୍ ଯିରୁଶାଲେମ୍ତାଗ୍ ଅଣ୍ଡୟାଗେ ଗୁଡ଼୍ତଡ଼୍ । 6 ଆଗେ ଅଡ଼୍ ବେଡ଼୍ୟେ ଜାଜକ୍ ହାନାନ, କାୟାପା, ଯୋହନ୍, ଆଲେକ୍ଜାଣ୍ଡାର୍ ନୁ ବେଡ଼୍ୟେ ଜାଜକ୍ ପରିବାର୍ତେ ମେଣ୍ଡେବାଗାତଡ଼୍କିଙ୍କ୍ କାଇଲ୍ତଡ଼୍ । 7 ଅଡ଼୍ ପ୍ରେରତ ଶିଷ୍ୟଡ଼୍କ୍ ମୁନେ ତାସ୍ ପ୍ରଶ୍ନ ମାଡ଼୍ତଡ଼୍, "ମିଡ଼୍ ଇଦ୍ ସାରେ ବେଲା ମାଡ଼ୁତିଡ଼୍ ? ବେନନ୍ ଶକ୍ତିତେ ନୁ ବେନନ୍ ପେଦେର୍ତେ ଇଦ୍ ମାଡ଼ୁତିଡ଼୍ ?"
8 ଆସୁଟେ ପିତର୍ ପବିତ୍ର ଆତ୍ମାତେ ପୁର୍ଣ୍ଣ ଆସ୍ ଅଡ଼୍କିଂଙ୍କ୍ କେତ୍ତଣ୍ଡ୍, "ଏୟ୍ ନାରୁଡ଼୍ତେ ନେତାଲଡ଼୍ ନୁ ବୟସ୍କା ନାରୁଡ଼ି; 9 ନେଣ୍ଡ୍ ଯଦି ମାକିଂଙ୍କ୍ ଇ କୁଟାନ୍ ଲେକେତ୍ ଆତ୍ତେ ପାଡ଼ିୟି ବିଷୟ୍ତେ ପାଚ୍ରାମାଡ଼ିତଡ଼୍ ଜେ, ଇଣ୍ଡ୍ ନାରୁଣ୍ଡ୍ ବେଲା ଅସ୍ ସୁସ୍ଥ ଆତ୍ତଣ୍ଡ୍, 10 ଆଦିଙ୍କ୍ ମିଡ଼୍ ନୁ ଇସ୍ରାଏଲ୍ତେ ସାରେତଡ଼୍ ପୁନ୍ଦ୍ ୱେୟ୍ତିତ୍ ଜେ, ମିଇ ମୁନେ ନିସ୍ ମାନ୍ଦାନ୍ ଇ ନାରୁଣ୍ଡ୍ ମାତ୍ରମ୍ ନାଜରିତିୟ ଜିସୁ କ୍ରିଷ୍ଟନ୍ ପେଦେର୍ତେ ଶକ୍ତିତଡ଼୍ ସାରେ ସୁସ୍ଥ ଆତ୍ତଣ୍ଡ୍ । ବେନଙ୍କ୍ ମିଡ଼୍ କ୍ରୁଶତାଗ୍ ଆୱକ୍ତିଡ଼୍ ମେଣ୍ଡେ ଇଶ୍ୱର୍ ଅଂକିଙ୍କ୍ ଡଲ୍ତାଗାଙ୍କ୍ ମେଣ୍ଡନ୍ଦାମ୍ ଜିୱୁନ୍ ମାଡ଼୍ତଣ୍ଡ୍ । 11 ଜିସୁ ଆଦୁତନ୍ ୱେରଣ୍ଡ୍ ବେନଙ୍କ୍ ଦର୍ମଶାସ୍ତ୍ର କେତିତ୍, ‘ବେନ୍ କାଲ୍ଦିଙ୍କ୍ ଲକ୍ ତିଆର୍ମାଡ଼ାନଡ଼୍ ପାସ୍କ୍ତଡ଼୍, ଆଦ୍ କାଲ୍ ସାରେତିଙ୍କ୍ ଲେକେତ୍ ଆତ୍ତେ ।’ 12 ମାତ୍ରମ୍ ଅନ୍ ତଡ଼୍ ପରିତ୍ରାନ୍ ସମ୍ଭବ୍ ଆଦ୍ତେ, ବାତେଙ୍କ୍ଇତ୍କେ ଇଦ୍ ସ୍ୱର୍ଗତାଗ୍ ମାନ୍ଦାନ୍ ମେଣ୍ଡେଅନ୍ ପେଦେର୍ତଡ଼୍ ନାରୁଡ଼୍କିଂଙ୍କ୍ ମୁକ୍ତି ଦର୍କ ।"
13 ପିତର୍ ନୁ ଯୋହନ୍ ଅଶିକିତ୍ ନୁ ସାଦାରନ୍ ନାରୁଡ଼୍ ମାତ୍ତଡ଼୍ ଇଞ୍ଜ ବେଡ଼ିୟ୍ମିଟିଙ୍କ୍ତେ ସଦସ୍ୟଡ଼୍ ପୁଞ୍ଜ୍ମାତ୍ତଡ଼୍ । ଆଦିଙ୍କ୍ ଇର୍ୱୁଡ଼ାଦ୍ ସାହାସ୍ ଉଡ଼ି ଅଡ଼୍ କାବା ଆତ୍ତଡ଼୍ ମେଣ୍ଡେ ଅଡ଼୍ ଇର୍ୱୁଡ଼୍ ଜିସୁନ୍ ସାଙ୍ଗ ମାତ୍ତଡ଼୍ ଇଞ୍ଜ ଅଡ଼୍ ପୁତ୍ତଡ଼୍ । 14 ଇତ୍କେ ଅଡ଼୍ ବିରଦ୍ ମାଡ଼ି ବାଆତେ କେତାଙ୍କ୍ ପାର୍ୱଡ଼୍, ବାତେଙ୍କ୍ ଇତ୍କେ ସୁସ୍ଥ ଆସ୍ମାନ୍ଦାନ୍ ନାରୁଙ୍କ୍ ପିତର୍ ନୁ ଯୋହନ୍ ତଡ଼୍ ନିଶ୍ ମାନ୍ଦାନାଦ୍ ଅଡ଼୍ ଉଡ଼୍ତଡ଼୍ । 15 ଆଦିଙ୍କ୍ ନେତାଲଡ଼୍ ନାରୁଡ଼୍କିଂଙ୍କ୍ ମିଟିଙ୍ଗ୍ତାଗାଙ୍କ୍ ବାୟିଦେ ପେସ୍ପିସ୍ ଅଡ଼୍ ବିଷୟ୍ତେ ତାମ୍ତାମ୍ ଲୋପେ ତିର୍ୟାତିର୍ୟି ଆତ୍ତଡ଼୍ । 16 ଅଡ଼୍ କେତ୍ତଡ଼୍, "ମାମ୍ ଇଡ଼୍ ସେଙ୍ଗେ ବାଆତେ ମାଡ଼ିତାଡ଼୍ ? ଯିରୁଶାଲେମ୍ତାଗ୍ ସାରେତଡ଼୍ ଇଡ଼୍ ମାଡ଼୍ତେ ଆଶର୍ଯ୍ୟ ପାଡ଼୍ୟି ବିଷୟ୍ତେ ପୁତ୍ତଡ଼୍ । ମାମ୍ ଇଦ୍ ଅସ୍ୱୀକାର୍ ମାଡ଼ାନଙ୍କ୍ ପାର୍ୱମ୍ । 17 ବାତେଙ୍କ୍ ଇତ୍କେ ଇଦ୍ ଗଟ୍ ବେଲା ନାରୁଡ଼୍ ଲୋପେ ମେଣ୍ଡେ ଅଦିକ୍ ପ୍ରଚାର୍ ଆୟ୍ମାକି, ଇଦିନ୍ ସେଙ୍ଗେ ଜିସୁନ୍ ପେଦେର୍ତେ ମେଣ୍ଡେ ବେନଡ଼୍କିଂଙ୍କ୍ ବାଆତେ କେଲ୍ମାକିଡ଼୍ ଇଞ୍ଜ ଅଡ଼୍କିଂଙ୍କ୍ ସତର୍କ ମାଡ଼ିକାଡ଼୍ ।"
18 ଆଦିଙ୍କ୍ ଅଡ଼୍ ଅଡ଼୍କିଂଙ୍କ୍ କାର୍ଙ୍ଗି ଜିସୁନ୍ ପେଦେର୍ତେ ମେଣ୍ଡେ ବାଆତେ କେଲ୍ମାକିଡ଼୍ ବା ଶିକ୍ଷା ହିମାକିଡ଼୍ ଇଞ୍ଜ ଗଟ୍ ହିତ୍ତଡ଼୍ । 19 ବାତେଙ୍କ୍ଇତ୍କେ ପିତର୍ ନୁ ଯୋହନ୍ ଅଡ଼୍କିଂଙ୍କ୍ ଉତର୍ ହିତ୍ତଡ଼୍, "ମିୟାଦ୍ ଗଟ୍ କେଞ୍ଜୀତମ୍ ନା ଇଶ୍ୱର୍ତେ ଗଟ୍ କେଞ୍ଜିତମ୍, ବେନ୍ ବିଷୟ୍ ଇଶ୍ୱର୍ତେ କଣ୍ଡେତେ ସାୟେ, ଆଦ୍ ମିଡ଼୍ ନିଜେ ନିଜେ ଲୋପେ ବିଚାର୍ ମାଡ଼ାଟ୍ । 20 ବାତେଙ୍କ୍ଇତ୍କେ ମାମ୍ମେ ବାଆତେ ଉଡ଼୍ତମ୍ ନୁ କେଞ୍ଜ୍ତମ୍, ଆଦ୍ ବିଷୟ୍ କେଲ୍ୱେ ମାନ୍ଦାଙ୍କ୍ ପାର୍ୱମ୍ ।" 21 ଇତ୍କେ ମହାସବା ଅଡ଼୍କିଂଙ୍କ୍ ମେଣ୍ଡେ ଅଦିକ୍ ସତର୍କ ମାଡ଼ି ୱିଡ଼୍ସିତ୍ତେ । ଅଡ଼୍କିଂଙ୍କ୍ ଦଣ୍ଡ୍ ହିଦାନାଦ୍ ଦର୍କାର୍ ଆୟ୍ୟ ଇଞ୍ଜ ଅଡ଼୍ ପୁତ୍ତଡ଼୍, ବାତେଙ୍କ୍ଇତ୍କେ ବାଆତେ ଗଟେମ୍ ଆତ୍ତେ ଆଦିନ୍ ସେଙ୍ଗେ ନାରୁଡ଼୍ ସାରେତଡ଼୍ ଇଶ୍ୱର୍ତିଙ୍କ୍ ଦନ୍ୟବାଦ୍ ହିଦାଙ୍କ୍ ପସ୍ପ୍ତ୍ତଡ଼୍ । 22 ବେନ୍ ନାରୁଣ୍ଡ୍ ଇଦ୍ ଆଶର୍ଯ୍ୟ ପାଡ଼ିୟି ତଡ଼୍ ସୁସ୍ଥ ଆତ୍ତଣ୍ଡ୍, ଅନାଦ୍ ବୟସ୍ ଚାଲିଶ୍ ହେଣ୍ଡ୍କ୍ ପର୍ର ଆସ୍ମାତ୍ତେ ।
ବିଶ୍ୱାସୀଡ଼୍ ସାହାସ୍ ସେଙ୍ଗେ ପ୍ରାର୍ତନା ମାଡ଼୍ତଡ଼୍
23 ପିତର୍ ନୁ ଜହନ୍ ମୁକ୍ତି ଆତ୍ତେ ସାଙ୍ଗେ ସାଙ୍ଗେ ତାମ୍ ଦଲ୍ତାଗ୍ ମାଲ୍ସ୍ ଆଦ୍ତଡ଼୍ ମେଣ୍ଡେ ମୁକ୍ୟ ଜାଜକ୍ ନୁ ବୟସ୍କା ନାରୁଡ଼୍ ବାତେଏ କେସ୍ମାତ୍ତଡ଼୍, ଆଦ୍ ଅଡ଼୍କିଂଙ୍କ୍ କେତ୍ତଡ଼୍ । 24 ବିଶ୍ୱାସିଡ଼୍ ସାରେଗଟ୍ କେଞ୍ଜ୍ତେ ପେର୍କେ ସାରେତଡ଼୍ ଅଣ୍ଡୟାଗେ ଆସ୍ ଇଶ୍ୱର୍ତେ ଗାର୍ରେ ଇଦ୍ରକମ୍ ପ୍ରାର୍ତନା ମାଡ଼୍ତଡ଼୍, "ହଁ ପ୍ରବୁ, ନିମ୍ ସ୍ୱର୍ଗ, ପୃତିବିତାଗ୍, ସମୁଦ୍ର ନୁ ଆୱୁ ସାରେ ଲୋପେ ମାନ୍ଦାନ୍ ସାରେବିଷୟ୍ ତିଆର୍ ମାଡ଼୍ତିନ୍ । 25 ପବିତ୍ର ଆତ୍ମା ତଡ଼୍ ନିମ୍ ଆନିଦାଦୀ ଦାଉଦ୍, ନିୱଣ୍ଡ୍ ଦାସନ୍, ପାୟୁର୍ ଇସ୍ ଇଦ୍ ଗଟ୍ କେସ୍ମାତ୍ତି; ‘ଅଣଇହୁଦୀ ନାରୁଡ଼୍ ବାତେଙ୍କ୍ କାଡ଼ାମ୍ ଆଦ୍ତଡ଼୍, ମେଣ୍ଡେ ନାରୁଡ଼୍ ବାତେଙ୍କ୍ କାରାପ୍ ଚିନ୍ତେ ମାଡ଼ୁତଡ଼୍ ? 26 ପ୍ରବୁନ୍ ବିରୁଦ୍ତେ ନୁ ତାନ୍ ମସୀହାନ୍ ବିରୁଦ୍ତେ ପୃତିବିତାଗ୍ ରାଜାଲଡ଼୍ ନିଜେତିଙ୍କ୍ ତିଆର୍ ମାଡ଼୍ତଡ଼୍ ମେଣ୍ଡେ ଶାସନ୍ମାଡ଼ାନଡ଼୍ ଅଣ୍ଡୟାଗେ ଆଦ୍ତଡ଼୍ ।’ 27 ୪:୨୭ ଲୁକ ୨3:୭-୧୧; ମାତିଉ ୨୭:୧,୨; ମାର୍କ ୧୫:୧; ଲୁକ ୨3:୧; ଯୋହନ୍ ୧୮:୨୮,୨୯.ନିଜାମ୍ ହେରଦ୍ ନୁ ପନ୍ତୀୟ ପିଲାତ ଇଦ୍ ନାର୍ତାଗ୍ ଅଣଇହୁଦୀ ନୁ ଇସ୍ରାଏଲ୍ ନାରୁଡ଼୍ ତଡ଼୍ କାଇଲି ମିୱଣ୍ଡ୍ ପବିତ୍ର ଦାସ, ବେନଙ୍କ୍ ମିଡ଼୍ ମସୀହା ଇଞ୍ଜ ଏଞ୍ଚିମିନ୍ଦେଡ଼ି, ଅଣ୍ଡ୍ ଜିସୁନ୍ ବିରୁଦ୍ତେ ଷଡ଼ଜନ୍ତ୍ର ମାଡ଼୍ତଡ଼୍ । 28 ମିୟାଦ୍ ଶକ୍ତି ନୁ ଇଚ୍ଛା ଲେକାମ୍ ବାଆତେ ଗଟେମ୍ ଆତ୍ତେ ଇଞ୍ଜ ମିଡ଼୍ ତିଆର୍ ମାଡ଼ିମାତ୍ତିଡ଼୍, ଅଡ଼୍ ଅଣ୍ଡୟାଗେ ଆସ୍ ଆୱୁସାରେ ମାଡ଼ାଙ୍କ୍ ପସ୍ପ୍ତ୍ତଡ଼୍ । 29 ପ୍ରବୁ, ଅଡ଼୍ ମାକିଂଙ୍କ୍ ବେନ୍ ଦମକ୍ ହିତ୍ତଡ଼୍, ନିମ୍ମେ ଆଦ୍ ବିଷୟ୍ ସେଙ୍ଗେ ମନଯୋଗ୍ ମାଡ଼େ ନୁ ସାହାସ୍ ମାଡ଼ି ନିୟାଦ୍ ସୁସମାଚାର୍ ପ୍ରଚାର୍ ମାଡ଼ାଙ୍କ୍, ମିୱଡ଼୍ ଇ ଦାସଡ଼୍କିଂଙ୍କ୍ ସାହାସ୍ ହିମ୍ । 30 ନିୱଣ୍ଡ୍ ପବିତ୍ର ଦାସ ଜିସୁନ୍ ପେଦେର୍ତେ ସୁସ୍ଥ ମାଡ଼ାନ୍ ସେଙ୍ଗେ ନୁ ଆଦ୍ବୁତ୍ ନୁ ଆଶର୍ଯ୍ୟ ପାଡ଼୍ୟି ସାଦନା ମାଡ଼ାନ୍ ମାଇଦିଙ୍କ୍ ନିୟାଦ୍ କାୟି ହାଆମ୍ ।"
31 ଅଡ଼୍ ପ୍ରାର୍ତନା ମାଡ଼ାନ୍ ୱେଲେ ବେନ୍ ପଡ଼୍ୟେତାଗ୍ ଅଣ୍ଡୟାଗେ ଆସ୍ମାତ୍ତଡ଼୍, ଆଦ୍ ପଡ଼୍ୟି ଲେଙ୍ଗ୍ଦେ ବର୍ତ୍ତି ଆତ୍ତେ । ମେଣ୍ଡେ ସାରେତଡ଼୍ ପବିତ୍ର ଆତ୍ମା ତଡ଼୍ ପୁରା ଆସ୍ ସାହାସ୍ ତଡ଼୍ ଇଶ୍ୱର୍ତେ ବାକ୍ୟ କେତାଙ୍କ୍ ପସ୍ସ୍ପ୍ତଡ଼୍ ।
ବଶ୍ୱାସୀଡ଼୍ ତାମ୍ତାମ୍ଲୋପେ ସମ୍ପତିତିଙ୍କ୍ ସାମାନ୍ ତୁସ୍ତଡ଼୍
32 ୪:3୨ ପ୍ରେରିତ ୨:୪୪,୪୫. ବିଶ୍ୱାସୀଡ଼୍ ୱେରଡ଼୍ ମାନ୍ ନୁ ୱେରଡ୍ ହୃଦୟ ତେ ମାତ୍ତଡ଼୍ । ବେନଡ଼୍ ତାମ୍ ସମ୍ପତିତିଙ୍କ୍ ନିଜେତ୍ ସମ୍ପତି ଇଞ୍ଜ ଦାବୀ ମାଡ଼ଡ଼୍, ସାରେତଡ଼୍ୱାଦ୍ ସମ୍ପତିତିଙ୍କ୍ ଅଡ଼୍ ସାମାନ୍ ତୁହୁସ୍ତଡ଼୍ । 33 ବେଡ଼୍ୟାଦ୍ ଶକ୍ତି ତଡ଼୍ ପ୍ରେରିତ ଶିଷ୍ୟଡ଼୍ ପ୍ରବୁ ଜିସୁନ୍ ପୁନରୁତାନ୍ ବିଷୟ୍ତେ ସାକ୍ଷ୍ୟ ହିତ୍ତଡ଼୍ ନୁ ଇଶ୍ୱର୍ ଅଡ଼୍ ପର୍ର ନାର୍ଗେ ଅନୁଗ୍ରହ ମାଡ଼୍ତଣ୍ଡ୍ । 34 ଅଡ଼ାଦ୍ ମାନ୍ଦେତାଗ୍ ବେନ୍ ନାରୁଣ୍ଡ୍ ଅବାବ୍ ଇଲ୍ୱେମାତ୍ତଣ୍ଡ୍ । ବେନଡ଼ାୱୁ ୱାୟା ନୁ ଲନ୍ ମାତ୍ତା, ଅଣ୍ଡ୍ ଆୱୁସାରେ ୱାମି ଡାବ୍କ୍ ତାସ୍, 35 ଅଡ଼୍ ପ୍ରେରିତ ଶିଷ୍ୟଡ଼୍କ୍ ହିସମାତ୍ତଡ଼୍ ମେଣ୍ଡେ ଆୱୁ ଡାବ୍କ୍ ଅଡ଼୍ ଲୋପେ ସାରେତଡ଼୍ୱାଦ୍ ଦର୍କାର୍ ଲେକାମ୍ ତୁହୁସିସମାତ୍ତଡ଼୍ ।
36 ସାଇପ୍ରସ୍ ଜାଗେତାଗ୍ ଜନମ୍ ଆସ୍ମାନ୍ଦାନ୍ ଲେବୀୟ ବଂଶତଣ୍ଡ୍ ଯୋଷେଫ୍, ବେନଙ୍କ୍ ପ୍ରେରିତ ଶିଷ୍ୟଡ଼୍ ବର୍ଣ୍ଣବା ଇଞ୍ଜ ପେଦେର୍ ଇସ୍ମାତ୍ତଡ଼୍, ବର୍ଣ୍ଣବା ଇତ୍କେ ସାର୍ଦେତ୍ ମାର୍, 37 ଅନାଦ୍ ଅଣ୍ଡୟ୍ ୱାୟେ ମାତ୍ତେ, ଅଣ୍ଡ୍ ଆଦ୍ ୱାମିମିକା ଡାବ୍କ୍ ତାସ୍ ପ୍ରେରିତଶିଷ୍ୟଡ଼୍କ୍ ହିତ୍ତଣ୍ଡ୍ ।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)