1 ପାଉଲ୍ ବେଡ଼୍ୟେ ମିଟିଙ୍ଗ୍ତାକ୍ ଲେକେତ୍ ସତ୍କାମ୍ ଉଡ଼ି କେତ୍ତଣ୍ଡ୍, "ଏୟ୍ ଇଶ୍ରାଏଲୀୟ ଦାଦାଲଡ଼୍ ! ନେଣ୍ଡ୍ ଯାକ ଇଶ୍ୱର୍ତେ ମୁନ୍ନେ ନାନ୍ ବେଦ୍ରକମ୍ ଜିୱୁଣ୍ଡ୍ ବାଦ୍କ୍ତାନ୍, ଆଦ୍ ବିଷୟ୍ତେ ନାୟାଦ୍ ମନ୍ ସାରେ ସାୟେ ମିନ୍ଦେ ।" 2 ଇଦ୍ କେଞ୍ଜି ବେଡ଼୍ୟାଦ୍ ଯାଜକ୍ ଆନାନୀୟ ପାଉଲ୍ତେ ବୁକ୍ତାଗ୍ ଚାପ୍ଡ଼େ ରେହେତାନ୍ ସେଙ୍ଗେ ପାଉଲ୍ତେ ବକେତ୍ ନିସ୍ ମାନ୍ଦାନ୍ ନାରୁଡ଼୍କିଂଙ୍କ୍ ଆଦେଶ୍ ହିତ୍ତଣ୍ଡ୍ । 3 ୨3:3 ମାତିଉ ୨3:୨୭,୨୮.ପାଉଲ୍ ଇଶ୍ୱର୍ତିଙ୍କ୍ କେତ୍ତଣ୍ଡ୍, "ଏୟ୍ ଚୁନ୍ ଅହକ୍ତେ ପାଣ୍ଡ୍ରି ନେଟ୍ଟେ, ପ୍ରବୁ ନିଜାମ୍ ନିକିଂଙ୍କ୍ ରେହେତିତନ୍ । ମୋଶାନ୍ ନିୟମ୍ ଲେକାମ୍ ବିଚାର୍ ମାଡ଼ାନଙ୍କ୍ ନିମ୍ ଆଗେ କୁଦ୍ତି, ଆଗେକ୍ବା ନାକିଂଙ୍କ୍ ରେହେତାନ୍ ସେଙ୍ଗେ ଆଦେଶ୍ ଇସ୍ ନିମ୍ ଆଇନ୍ ବାଙ୍ଗା ମାଡ଼ୁତିନ୍ !"
4 ପାଉଲ୍ତେ ବକେତ୍ ମାନ୍ଦାନ୍ ନାରୁଡ଼୍ ଅଂକିଙ୍କ୍ କେତ୍ତଡ଼୍, "ନିମ୍ ଇଶ୍ୱର୍ତେ ବେଡ଼ିୟି ଯାଜକ୍ତିଙ୍କ୍ ଅପ୍ମାନ୍ ମାଡ଼ୁତିନ୍ !"
5 ପାଉଲ୍ ଉତ୍ତର୍ ହିତ୍ତଣ୍ଡ୍, "ହୋ ଇଶ୍ରାଏଲୀୟ ଦାଦାଲଡ଼୍, ଅଣ୍ଡ୍ ବେଡ଼ିୟି ଯାଜକ୍ ଇଞ୍ଜ ନାନ୍ ପୁନ୍ୱେ ମାତ୍ତାନ୍ । ଦର୍ମଶାସ୍ତ୍ରତାଗ୍ ଲେକ୍ତାଦ୍ ମିନ୍ଦେ, ‘ମିଇ ନିଜେର୍ ଜାତିତ୍ ନେତାନ୍ ବିଷୟ୍ତେ କାରାପ୍ ଗଟ୍ କେଲ୍ମାଟ୍ ।’"
6 ୨3:୬ ପ୍ରେରିତ ୨୬:୫; ଫିଲିପିୟ 3:୫. ଇହୁଦୀଡ଼୍ ମାନ୍ଦେତାଗ୍ ବେସ୍କ୍ତୁଡ଼୍ ପାରୂଶୀ ନୁ ମେଣ୍ଡେ ବେସ୍କ୍ତୁଡ଼୍ ସାଦୁକୀଡ଼୍ ମାନ୍ଦାନାଦ୍ ଉଡ଼ି ପାଉଲ୍ ବେଡ଼୍ୟେ ମିଟିଙ୍ଗ୍ତିଙ୍କ୍ କାର୍ଙ୍ଗି କେତ୍ତଣ୍ଡ୍, "ହଁ ଇଶ୍ରାଏଲୀୟତେ ଦାଦାଲଡ଼୍, ନାନ୍ ୱେରଣ୍ଡ୍ ପାରୂଶୀ, ପାରୂଶୀ ବଂଶତାଗ୍ ନାୟାଦ୍ ଜନମ୍ । ଡଲ୍ତେ ନାରୁଡ଼୍ ମେଣ୍ଡନ୍ନ୍ଦାମ୍ ପୁନରୁତାନ୍ ଆଦ୍ତଡ଼୍ ଇଞ୍ଜ ଆଶେ ମାଡ଼୍ତାଙ୍କ୍ ଇଗେ ନାୟାଦ୍ ବିଚାର୍ ମାଡ଼ୁତଡ଼୍ ।"
7 ଅଡ଼୍ ମାନ୍ଦେ ମାନ୍ଦେ ଆସ୍ ୱେକ୍ ୱେକ୍ ଆତ୍ତଡ଼୍ ନୁ ଅଣ୍ଡ୍ ଟିକ୍ ଇଦ୍ ଗଟ୍ କେତ୍ତେ ସାଙ୍ଗେ ସାଙ୍ଗେ ପାରୂଶୀ ନୁ ସାଦୁକୀଡ଼୍ ଲୋପେ ରାମ୍କ୍ ଆରାମ୍ ଆତ୍ତେ । 8 ୨3:୮ ମାତିଉ ୨୨:୨3; ମାର୍କ ୧୨:୧୮; ଲୁକ ୨୦:୨୭.ଇତ୍କେ ସାଦୁକୀଡ଼ାଗ୍ ଡଲ୍ତେନଡ଼୍ ମେଣ୍ଡନ୍ନ୍ଦାମ୍ ପୁନରୁତାନ୍, ସ୍ୱର୍ଗ ଦୂତ ବା ଆତ୍ମା ବାଆତେ ଇଲେ; ଇତ୍କେ ପାରୂଶୀଡ଼୍ ଇଦ୍ ମୁଣ୍ଡିଙ୍କ୍ ବିଶ୍ୱାସ୍ ମାଡ଼ିତଡ଼୍ । 9 ଅଡ଼୍ ଲୋପେ ଗାଟି ଗଲ୍କ୍ ଆତ୍ତଡ଼୍ ନୁ ପାରୂଶୀ ମାନ୍ଦେତେ ବେସ୍କ୍ତୁଡ଼୍ ଦର୍ମଗୁରୁ ନିଶ୍ମିକା ଗାଟି ପ୍ରତିବାଦ୍ ମାଡ଼ି କେତ୍ତଡ଼୍, "ମାମ୍ମେ ଇଣ୍ଡ୍ ନାରୁଣ୍ଡ୍ତାଗ୍ ବାତ୍ମିକା ଦଷ୍ ଦର୍ସ୍କାଙ୍କ୍ ପାର୍ୱମ୍ ! ନିଜାମ୍ ଅନ୍ ତଡ଼୍ ସ୍ୱର୍ଗ ଦୂତ ବା ଆତ୍ମା ଗଟ୍ କେସ ମାନ୍ତେ ।"
10 ଯୁକ୍ତିତର୍କ ଗାଟି ବେଡ଼୍ୟାଦ୍ ପୁଟୁଙ୍କ୍ ଦାରଣ୍ ମାଡ଼୍ତେ ଯେ, ନାରୁଡ଼୍ ପାଉଲ୍ତିଙ୍କ୍ କଇସ୍ ଦୁଡ଼ା ଦୁଡ଼ା ମାଡ଼ିତଡ଼୍ ଇଞ୍ଜ ସୈନ୍ୟଡ଼୍ ମୁକ୍ୟାଲ୍ ୱେର୍ତଣ୍ଡ୍ । ଆଦିଙ୍କ୍ ଅଣ୍ଡ୍ ରାମ୍କ୍ ଆଦାନ୍ ଲୋପେଙ୍କ୍ ପାଉଲ୍ତିଙ୍କ୍ ରକ୍ଷା ମାଡ଼ି ଅଂକିଙ୍କ୍ ଦୁର୍ଗତାଗ୍ ଲୋପେ ଆଦାନଙ୍କ୍ ସୈନ୍ୟଡ଼୍କିଙ୍କ୍ ଗଟ୍ ହିତ୍ତଣ୍ଡ୍ ।
11 ଆଦେନାଣ୍ଡ୍ ନାର୍କେ ପ୍ରବୁ ପାଉଲ୍ତେ ବକେତ୍ ନିଶ୍ମିକା କେତ୍ତାନ୍, "ସାହାସ୍ ଆୟ୍ମ୍ ! ନିମ୍ ଇଗେ ଯିରୁଶାଲେମ୍ତାଗ୍ ନା ସେଙ୍ଗେ ସାକ୍ଷ୍ୟ ହିତ୍ତିନ୍ । ରୋମ୍ତାଗ୍ ମିକା ନିମ୍ ନିଜାମ୍ ସାକ୍ଷ୍ୟ ହିଦ୍ତିନ୍ ।"
ପାଉଲ୍ତିଙ୍କ୍ ହାୱକାନଙ୍କ୍ ହାଲ୍ସ୍ତଡ଼୍
12 ମେଣ୍ଡନ୍ ଦିନ୍ ନାର୍କା ବେସ୍କ୍ତୁଡ଼୍ ଇହୁଦୀଡ଼୍ ଅଣ୍ଡୟାଗେ ଆସ୍ ଚିନ୍ତେ ମାଡ଼୍ତଡ଼୍ । ପାଉଲ୍ତିଙ୍କ୍ ହାୱକ୍ୱେ ଯାକ ଅଡ଼୍ ତିନଡ଼୍ କି ନାକଡ଼୍ ଇଞ୍ଜ ପାର୍ମାନ୍ ମାଡ଼୍ତଡ଼୍ । 13 ଚାଳିଶ୍ଜାନ୍ ଅଦିକ୍ ନାରୁଡ଼୍ ଇଦ୍ ଚିନ୍ତେ ମାଡ଼୍ତଡ଼୍ । 14 ଅଡ଼୍ ଆଞ୍ଜ୍ ମୁକ୍ୟ ଯାଜକ୍ ନୁ ଇହୁଦୀ ନେତାଲଡ଼୍କ୍ କେତ୍ତଡ଼୍, "ପାଉଲ୍ତିଙ୍କ୍ ହାୱକ୍ୱେ ଯାକ ବାତ୍ମିକା ତିନମ୍ କି ନାକମ୍ ଇଞ୍ଜ ମାମ୍ମେ ଅଣ୍ଡୟ୍ ଶପତ୍ ଆତ୍ତମ୍ । 15 ଆଦିଙ୍କ୍ ଅଣ୍ଡ୍ ବିଷୟ୍ତେ ମେଣ୍ଡେ ଅଦିକ୍ ତଥ୍ୟ ପୁନ୍ଦାନଙ୍କ୍ ଇଚ୍ଛା ମାଡ଼ି ବେଡ଼୍ୟେ ମିଟିଙ୍ଗ୍ ମୁନ୍ନେ ନୁ ମିଇ ବକେତ୍ ପାଉଲ୍ତିଙ୍କ୍ ମେଣ୍ଡନ୍ନ୍ଦାମ୍ ତାତାନ୍ ସେଙ୍ଗେ ରୋମୀୟ ସୈନ୍ୟଡ଼୍ ମାନ୍ଦେତିଙ୍କ୍ ଦନ୍ୟବାଦ୍ ମାଡ଼େ । ବାତେଙ୍କ୍ଇତ୍କେ ଅଣ୍ଡ୍ ଇଗେ ୱାଦାନ୍ ମୁନେନ୍ ହାର୍ଦାଗ୍ ମାମ୍ମେ ଅଂକିଙ୍କ୍ ହାୱ୍କାନଙ୍କ୍ ତିଆର୍ ଆସ୍ ମାନ୍ତମ୍ ।"
16 ଇତ୍କେ ପାଉଲ୍ତେ ବାଡ଼୍ଞ୍ଜାଲ୍ ଇଦ୍ ଚାଲାକି ଗଟ୍ କେଞ୍ଜି, ଦୁର୍ଗତାଗ୍ ଲୋପେ ଆଞ୍ଜ୍ ପାଉଲ୍ତିଙ୍କ୍ ଇଦ୍ କେତ୍ତଣ୍ଡ୍ । 17 ପାଉଲ୍ ରୋମୀୟ୍ କର୍ମଚାରୀଡ଼୍ ଲୋପେଙ୍କ୍ ଅର୍ତୁଙ୍କ୍ କାର୍ଙ୍ଗି କେତ୍ତଣ୍ଡ୍, "ଇଣ୍ଡ୍ ଲେୟଙ୍କ୍ ସୈନିକିଡ଼୍ ମୁକ୍ୟାନାକ୍ ଆୟ୍ମ୍, ଅଂକିଙ୍କ୍ ଅନାଦ୍ ବାତ୍ କେତାନାଦ୍ ମିନ୍ଦେ ।" 18 କର୍ମଚାରୀ ଅଂକିଙ୍କ୍ ସୈନିକିଡ଼୍ ମୁକ୍ୟାନାକ୍ ଆସ୍ କେତ୍ତଣ୍ଡ୍, "ବନ୍ଦି ପାଉଲ୍ ନାକିଂଙ୍କ୍ କାର୍ଙ୍ଗି ଇଣ୍ଡ୍ ଲେୟଙ୍କ୍ ନି ବକେତ୍ ତାତାନଙ୍କ୍ କେତ୍ତଣ୍ଡ୍ । ନିକିଂଙ୍କ୍ ଅଣ୍ଡ୍ ବାତ୍ କେତାନାଦ୍ ମିନ୍ଦେ ।"
19 ସୈନିକିଡ଼୍ ମୁକ୍ୟାଲ୍ ଅନାଦ୍ କାୟ୍ଦିଙ୍କ୍ ପଇସ୍ ଲୋପେ ଆତ୍ତଣ୍ଡ୍ ନୁ ପାଚ୍ରାମାଡ଼୍ତଣ୍ଡ୍, "ବାତ୍ କେତାନାଦ୍ ମିନ୍ଦେ, କେଲ୍ !"
20 ଲେୟଣ୍ଡ୍ କେତ୍ତଣ୍ଡ୍, "ଇହୁଦୀ ନେତାଲଡ଼୍ ଚିନ୍ତେ ମାଡ଼୍ତଡ଼୍ ଯେ, ବେଡ଼୍ୟେ ମିଟିଙ୍ଗ୍ ପାଉଲ୍ ବିଷୟ୍ତେ ଅଦିକ୍ ତଥ୍ୟ ପୁନ୍ଦାନଙ୍କ୍ ଇଚ୍ଛା ମାଡ଼ୁତେ ଇଞ୍ଜ ବଲି ଅଂକିଙ୍କ୍ ବେଡ଼୍ୟେ ମିଟିଙ୍କ୍ତାଗ୍ ଆଦାନ୍ ସେଙ୍ଗେ ନିକିଂଙ୍କ୍ ଅନୁରଦ୍ ମାଡ଼ିତଡ଼୍ । 21 ଇତ୍କେ ଅଡ଼ାଦ୍ ଗଟ୍ କେଞ୍ଜ୍ମା, ବାତେଙ୍କ୍ଇତ୍କେ ଚାଳିଶ୍ଜାନ୍ ଅଦିକ୍ ନାରୁଡ଼୍ ଅଂକିଙ୍କ୍ ହାୱକ୍ୱେ ଯାକ ତିନ୍ଦାନ୍ ଉନ୍ଦାନ୍ ମାଡ଼ଡ଼୍ ଇଞ୍ଜ ପ୍ରତିଜ୍ଞା ଆସ୍ ମିଞ୍ଜୀ ମିନ୍ଦେଡ଼୍ । ଇଞ୍ଜେ ଅଡ଼୍ ନିୟାଦ୍ ନିଷ୍ପତ୍ତିତିଙ୍କ୍ କେପି ମିକା ତିଆର୍ ଆସ୍ମିନ୍ଦେଡ଼୍ ।"
22 "ନିମ୍ ଇଦ୍ କେତ୍ତି ଇଞ୍ଜ ବେନଙ୍କ୍ କେଲ୍ମା ।" ସୈନିକିଡ଼୍ ମୁକ୍ୟାଲ୍ ଇଦ୍ କେସ୍ ଲେୟଙ୍କ୍ ରଅତଣ୍ଡ୍ ।
ପାଉଲ୍ତିଙ୍କ୍ ଶାସନ୍ କର୍ତ୍ତାଲ୍ ଫିଲିକ୍ସ୍ ବକେତ୍ ରହସିତ୍ତଡ଼୍
23 ସୈନିକିଡ଼୍ ମୁକ୍ୟାଲ୍ ଅଦିନ୍ତେ ମାନ୍ଦାନ୍ ଇର୍ୱୁଡ଼୍ କର୍ମଚାରୀଡ଼୍କ୍ କାର୍ଙ୍ଗି କେତ୍ତଣ୍ଡ୍, "ନେଣ୍ଡ୍ ନାର୍କେତ୍ ନଅଟା ଲୋପେ କାଇସରିଆତାଗ୍ ଆଦାନ୍ ସେଙ୍ଗେ ସତୁରିଜାନ୍ ଗୁରାକିନଡ଼୍ ନୁ ଦୁଇଶହ ବର୍ଚ୍ଛା ପୟ୍ତେନଡ଼୍ ତଡ଼୍ ଦୁଇଶହ ତାକି ଆଦାନ୍ ସୈନିକିଡ଼୍ ତିଆର୍ ମାଡ଼ାଟ୍ । 24 ପାଉଲ୍ ଆଦାନ୍ ସେଙ୍ଗେ ବେସ୍କ୍ ଗୁରାକ୍ ହିମୁଟ୍ ନୁ ନିରାପଦ୍ତେ ଅଂକିଙ୍କ୍ ରାଜ୍ୟପାଳ ଗେଲ୍ପାନଙ୍କ୍ ମାଡ଼ାନଙ୍କ୍ ଫେଲିକ୍ସ୍ତେ ଗାର୍ରେ ଆୟ୍ମୁଟ୍ ।" 25 ସୈନିକିଡ଼୍ ମୁକ୍ୟାଲ୍ ଇଦ୍ ରକମ୍ ଅଣ୍ଡୟ୍ ଚିଟି ଲେକ୍ତଣ୍ଡ୍ ।
26 "ମାନ୍ୟବର୍ ରାଜ୍ୟପାଳ ଫେଲିକ୍ସ୍ତିଙ୍କ୍ କ୍ଲଡିଅସ୍ ଲିସିଆସ୍ତେ ନମସ୍କାର୍ । 27 ଇହୁଦୀଡ଼୍ ଇଣ୍ଡ୍ ନାରୁଙ୍କ୍ ପଇସ୍ ଅଂକିଙ୍କ୍ ହାୱକାନ୍ ସେଙ୍ଗେ ତିଆର୍ ଆସ୍ ମାତ୍ତଡ଼୍ । ଅଣ୍ଡ୍ ୱେରଣ୍ଡ୍ ରୋମୀୟ ନାରୁଡ଼୍ ଇଞ୍ଜ ପୁତ୍ତାଙ୍କ୍ ନାନ୍ ନା ସୈନ୍ୟଡ଼୍ ତଡ଼୍ ଅଂକିଙ୍କ୍ ଉଦ୍ଦାର୍ ମାଡ଼୍ତାନ୍ । 28 ଅଡ଼୍ ବିରୁଦ୍ଦ୍ତେ ଅଣ୍ଡ୍ ବାତ୍ ଦଷ୍ ମାଡ଼ିମାତ୍ତଣ୍ଡ୍, ପୁନ୍ଦାନ୍ ସେଙ୍ଗେ ନାନ୍ ଅଂକିଙ୍କ୍ ଅଡ଼ାଦ୍ ବେଡ଼୍ୟେ ମିଟିଙ୍କ୍ତାଗ୍ ଅତ୍ତାନ୍ । 29 ବାତେଙ୍କ୍ଇତ୍କେ ଅଣ୍ଡ୍ ଡଲ୍ନାଦ୍ ଦଣ୍ଡ୍ ବା ବନ୍ଦି ଆଦ୍ତନ୍ କଷ୍ଟ ମାଡ଼ାନ୍ ଲେକେମ୍ ବାତ୍ ଦଷ୍ ମାଡ଼ଣ୍ଡ୍ ଇଞ୍ଜ ନାନ୍ ପୁତ୍ତାନ୍ । ମୋଶାନ୍ ନିୟମ୍ତେ ଆସ୍ ମାନ୍ଦାନ୍ ଅବିଯୋଗ୍ ସାରେ ତାମ୍ ଦର୍ମ ବିଷୟ୍ତେ । 30 ମେଣ୍ଡେ ଅନ୍ ବିରୁଦ୍ଦ୍ତେ ଅଣ୍ଡୟ୍ ଚକ୍ରାନ୍ତ ଆତ୍ତେ ଇଞ୍ଜ କବର୍ ପାଏମ୍ ଆସ୍ ସାଙ୍ଗେ ସାଙ୍ଗେ ଅଂକିଙ୍କ୍ ନି ବକେତ୍ ରହତାନଙ୍କ୍ ହାଲ୍ସ୍ତାନ୍ । ଅନ୍ ବିରୁଦ୍ଦ୍ତେ ମାନ୍ଦାନ୍ ଅବିଯୋଗ୍ ସାରେ ନି ମୁନ୍ନେ କେତାନଙ୍କ୍ ନାନ୍ ଅଂକିଙ୍କ୍ ଅବିଯୋଗ୍ ମାଡ଼୍ତେନଡ଼୍କିଙ୍କ୍ କେତ୍ତାନ୍ ।"
31 ସୈନିକିଡ଼୍ ଆଦ୍ ଆଦେଶ୍ ଲେକାମ୍ ପାଉଲ୍ତିଙ୍କ୍ ଆଦେନାଣ୍ଡ୍ ନାର୍କେ ଅନ୍ତିପଟ୍ରିସ୍ତାଗ୍ ହେୱୁସିତ୍ତଡ଼୍ । 32 ମେଣ୍ଡନ୍ ଦିନ୍ ତାକି ଆତ୍ତେ ସୈନିକିଡ଼୍ ଦୁର୍ଗତାଗ୍ ମାଲ୍ସ୍ ଆତ୍ତଡ଼୍ ନୁ ଗୁରାକିନ୍ ସୈନିକିଡ଼୍କ୍ ଅଂକିଙ୍କ୍ ଆଦାନଙ୍କ୍ କେତ୍ତଡ଼୍, 33 ଅଡ଼୍ ପାଉଲ୍ତିଙ୍କ୍ ଆସ୍ କାଇସରିଆତାଗ୍ ହେୱୁସିତ୍ତଡ଼୍ । ଆଗେ ସୈନିକିଡ଼୍ ମୁକ୍ୟାଙ୍କ୍ ଚିଟି ତଡ଼୍ ପାଉଲ୍ତିଙ୍କ୍ ହିତ୍ତଡ଼୍ । 34 ରାଜ୍ୟପାଳ ଚିଟିତିଙ୍କ୍ କାର୍ସ୍ ବେନ୍ ଦେଶ୍ କନ୍ସ୍ ୱାତ୍ତିନ୍ ଇଞ୍ଜ ପାଚ୍ରାମାଡ଼୍ତଣ୍ଡ୍ । ପାଉଲ୍ ସିଲିସିଆତଣ୍ଡ୍ ଇଞ୍ଜ ପୁଞ୍ଜ୍, 35 ଅଣ୍ଡ୍ କେତ୍ତଣ୍ଡ୍, "ନି ବିରଦିଡ଼୍ ହେୱୁତ୍ତେ ପେର୍କେ ନାନ୍ ନି ଗଟ୍ କେଞ୍ଜୀତାନ୍ ।" ତାନ୍ ପେର୍କେ ପାଉଲ୍ତିଙ୍କ୍ ହେରଦ୍ତେ ରାଜ୍ ପ୍ରାସାଦ୍ତାଗ୍ ବନ୍ଦି ମାଡ଼ି ନେହେତାନ୍ ସେଙ୍ଗେ ଆଦେଶ୍ ହିତ୍ତଣ୍ଡ୍ ।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)