ପ୍ରେରିତ 25

ମହାରାଜା କାଇୟସର୍‍ତେ ଗାର୍‍ରେ ପାଉଲ୍ ଆବେଦନ୍ ମାଡ଼୍‍ତଣ୍ଡ୍

1 ଫେଷ୍ଟସ୍ ଇଦ୍ ପ୍ରଦେଶ୍‍ତାଗ୍ ହେୱୁତେ ମୁଣ୍ଡ୍ ଦିନା ପେର୍‍କେ କାଇସରିଆ କନ୍‍ସ୍ ଯିରୁଶାଲେମ୍‍ ଆତ୍‍ତଣ୍ଡ୍ । 2 ଆଗେ ମୁକ୍ୟ ଯାଜକ୍ ନୁ ଇହୁଦୀ ନେତାଲଡ଼୍ ମେଣ୍ଡନ୍‍ନ୍ଦାମ୍ ପାଉଲ୍ ବିରୁଦ୍ଦ୍‍ତେ ଅବିଯୋଗ୍ ଅନୁରଦ୍‌‍ ମାଡ଼୍‍ତଡ଼୍ । 3 ପାଉଲ୍‍ତିଙ୍କ୍ ଯିରୁଶାଲେମ୍‍ତାଗ୍ ତାସ୍ ହେୱୁସାନ୍ ମାଇଦିଙ୍କ୍ ଅନୁଗ୍ରହ ମାଡ଼ିଣ୍ଡ୍‍ ଇଞ୍ଜ ଅଡ଼୍‌ ଫେଷ୍ଟସ୍‍ତିଙ୍କ୍ କେତ୍‍ତଡ଼୍, ଇତ୍‍କେ ଅଡ଼୍‌ ପାଉଲ୍‍ତିଙ୍କ୍ ଆର୍‍ଦାଗ୍ ହାୱକାଙ୍କ୍ ତିଆର୍ ଆସ୍ ମାତ୍‍ତଡ଼୍ । 4 ଫେଷ୍ଟସ୍‍ କେତ୍‍ତଣ୍ଡ୍, "ପାଉଲ୍‍ତିଙ୍କ୍ ୱେରଣ୍ଡ୍ ବନ୍ଦି ଲେକାମ୍ କାଇସରିଆତାଗ୍ ନେହେତ୍‍ତଡ଼୍ ନୁ ସିଟ୍‍ପାଟ୍ ନାନ୍ ନିଜେ ଆଗେ ମାଲ୍‍ସ୍ ଆଦ୍‍ତାନ୍ । 5 ଯଦି ଅଣ୍ଡ୍‌ ବାତ୍ ଦଷ୍ ମାଡ଼୍‍ତଣ୍ଡ୍, ଆଲେକେ ମିଇ ନେତାଲଡ଼୍ ନାତଡ଼୍ ସିସେରିଆତାଗ୍ ଆନିଡ଼୍ ନୁ ଅନ୍‌ ବିରୁଦ୍ଦ୍‍ତେ ଅଡ଼ାଦ୍‌ ଅବିଯୋଗ୍ କେଲିଡ଼୍ ।"

6 ଫେଷ୍ଟସ୍ ଅଡ଼୍‌ ତଡ଼୍ ଆଟ୍‌ ବା ଦଶ୍ ଦିନ୍ ପେର୍କେ ମାଞ୍ଜ୍ କାଇସରିଆ ମାଲ୍‍ତଣ୍ଡ୍ । ମେଣ୍ଡନ୍ ଦିନ୍ ଅଣ୍ଡ୍‌ ବିଚାର୍ ଲୋତ୍‍ତାଗ୍ କୁଦି ପାଉଲ୍‍ତିଙ୍କ୍ ତାତାନଙ୍କ୍ ଗଟ୍ ହିତ୍‍ତଣ୍ଡ୍ । 7 ପାଉଲ୍ ୱାତ୍‍ତେ ସାଙ୍ଗେ ସାଙ୍ଗେ ଯିରୁଶାଲେମ୍‍ତେ ଇହୁଦୀଡ଼୍ ଅନ୍‌ ତିଡ଼୍‍ୟିପାକ୍ ଚୁଟ୍ ନିତ୍‍ତଡ଼୍ ନୁ ଅନ୍‌‍ ବିରୁଦ୍‍ତେ ନାର୍ଗେ ଅବିଯୋଗ୍ ମାଡ଼ାନାଦ୍‍ ଶକ୍ତି ମାଡ଼୍‍ତଡ଼୍‍ । ଇତ୍‍କେ ଅଡ଼୍‌ ଇୱୁସାରେ ପ୍ରମାଣ୍ ମାଡ଼ାନଙ୍କ୍ ପାର୍‍ୱଡ଼୍ । 8 ଇତ୍‍କେ ପାଉଲ୍ ଆତ୍ମସମର୍ପଣ ମାଡ଼ି କେତ୍‍ତଣ୍ଡ୍, "ଇହୁଦୀ ନିୟମ୍‍ କି ମନ୍ଦିର୍‍ କି ରୋମ୍‍ତେ ମହାରାଜା, ମୋଶାନ୍‌ ନିୟମ୍‍ତେ ନାନ୍ ବାତ୍‍ମିକା ପାପାମ୍ ମାଡ଼ନ୍ ।"

9 ଇତ୍‍କେ ଫେଷ୍ଟସ୍ ଇହୁଦୀ ନାରୁଡ଼୍‍ତେ ଅନୁଗ୍ରହ ଆଦାନଙ୍କ୍ ଇଚ୍ଛା ମାଡ଼ି ପାଉଲ୍‍ତିଙ୍କ୍ ପାଚ୍ରାମାଡ଼୍‍ତଣ୍ଡ୍, "ଯିରୁଶାଲେମ୍‍ତାଗ୍ ଆଦାନଙ୍କ୍ ନୁ ଆଗେ ନା ମୁନ୍‍ନେ ଇୱୁସାରେ ଅବିଯୋଗ୍ ବିଚାର୍ ମାଡ଼ାନ୍ ସେଙ୍ଗେ ନିମ୍‍ ରାଜି ଆଦ୍‍ତି କି ?"

10 ପାଉଲ୍ କେତ୍‍ତଣ୍ଡ୍, "ନାନ୍ ମହାରାଜାନ୍‍ ନିଜେତ୍ ବିଚାର୍ ଲୋତ୍‍ତାଗ୍ ନିସ୍ ମିନ୍ଦେନ୍ । ଇଗେ ଆ ନାୟାଦ୍ ବିଚାର୍ ଆଦାନ୍ ଦର୍‍କାର୍ । ନିମ୍‍ ନିଜେ ସାୟେ ପୁତ୍‍ତିନ୍ ଯେ, ନାନ୍ ଇହୁଦୀଡ଼୍ ବିରୁଦ୍ଦ୍‍ତେ ବାତ୍ ଦଷ୍ ମାଡ଼ନ୍ । 11 ଯଦି ନାନ୍ ଉପବାସ୍‍ତିଙ୍କ୍ ମାନେମ୍‍ ଆୟ୍‍ୟକଟ ଡଲାନ୍‍ଦଣ୍ଡ୍ ଆଦାନ୍ ଲେକାମ୍ ବାତ୍ ମାଡ଼୍‍ତାନ୍, ଆଲେକେ ନାନ୍ ରାଜି ମିନ୍ଦେନ୍ । ଇତ୍‍କେ ଅଡ଼୍‌ ନା ବିରୁଦ୍ଦ୍‍ତେ ତାସ୍ ମାନ୍ଦାନ୍ ପ୍ରତିଶଦ୍‍ ସତ୍ ଆୟ୍‍ୟକଟ ମାତ୍‍କେ, ଆଲେକେ ବେନ ନାକିଂଙ୍କ୍ ଅଡ଼୍‌ କାୟ୍‍ଦେ ୱିଡ଼୍‍ସିୱଣ୍ଡ୍ । ମହାରାଜାନାଗ୍‌ ନାନ୍ ଇଦ୍ କେତୁତାନ୍ ।"

12 ତାନ୍‍ପେର୍କେ ଫେଷ୍ଟସ୍‍ ତାମ୍ ଉପବାସ୍ ସବାତ୍ ମୁକ୍ୟାଲଡ଼୍ ତଡ଼୍ କାୟ୍‍ଲି ଉତ୍ତର୍ ହିତ୍‍ତଣ୍ଡ୍, "ନିମ୍‍ ମହାରାଜ୍‍ନାଗ୍‌ କେତ୍‍ତିନ୍, ଆଦିଙ୍କ୍ ନିମ୍‍ ମହାରାଜାତେ ବକେତ୍ ଆଦ୍‍ତି ।"

ଆଗ୍ରୀପା ନୁ ବର୍ଣ୍ଣିସ୍‍ତେ ମୁନ୍‍ନେ ପାଉଲ୍

13 ବେସ୍‍କେ ଦିନା ପେର୍‍କେ ଆଗ୍ରୀପା ନୁ ବର୍ଣ୍ଣିସ୍ ଫେଷ୍ଟସ୍‍ତିଙ୍କ୍ କାଇଲାନଙ୍କ୍ କାଇସରିଆତାଗ୍ ୱାତ୍‍ତଡ଼୍ । 14 ଆଗେ ଅଡ଼୍‌ ବେସ୍‍କେ ଦିନା ମାତ୍‍ତେ ପେର୍‍କେ ଫେଷ୍ଟସ୍ ରାଜାଙ୍କ୍ ପାଉଲ୍‍ତେ ବିଷୟ୍ କେତ୍‍ତଣ୍ଡ୍, "ଫେଲିକ୍‍ସ୍‍ ବନ୍ଦି ମାଡ଼ି ନେହେତ୍‍ତେ ୱେରଣ୍ଡ୍ ନାରୁଡ଼୍ ଇଗେ ମିନ୍ଦେଣ୍ଡ୍ । 15 ନାନ୍ ବେସୁଟ୍‌ ଯିରୁଶାଲେମ୍‍ତାଗ୍ ଆଞ୍ଜ୍ ମାତ୍‍ତାନ୍, ଇହୁଦୀ ବେଡ଼ିୟି ଯାଜକ୍ ନୁ ଦର୍ମ ନେତାଲଡ଼୍ ଅନ୍‌ ବିରୁଦ୍ଦ୍‍ତେ ବେସର୍ ଅବିଯୋଗ୍ ତାତ୍‍ତଡ଼୍ ନୁ ନାକିଂଙ୍କ୍ ଅଂକିଙ୍କ୍‌ ଦଷି ମାଡ଼ାନଙ୍କ୍ କେତ୍‍ତଡ଼୍ । 16 ଇତ୍‍କେ ନାନ୍ ଅଡ଼୍‌‍କିଂଙ୍କ୍ କେତ୍‍ତାନ୍ ଯେ, ୱେରଣ୍ଡ୍ ଦୋଷୀଙ୍କ୍ ବିଚାର୍‍ଳୟତାଗ୍ ଅଂକିଙ୍କ୍‌ ଅବିଯୋଗ୍ ମାଡ଼୍‍ତେନଡ଼୍ ମୁନ୍‍ନେ ସର୍ପା ମାଡ଼ାନ୍ ସେଙ୍ଗେ ସୁଯୋଗ୍ ହିଦାନ୍ ମୁନେଙ୍କ୍ ଅଂକିଙ୍କ୍‌ ଦଷି ମାଡ଼ାନାଦ୍ ମାନ୍‍ ରୋମୀୟଡ଼ାଦ୍ ନିୟମ୍ ଆୟ୍‍ୟ । 17 ଅଡ଼୍‌ ଇଗେ ୱାତ୍‍ତେ ପେର୍‍କେ ନାନ୍ ଲେଟ୍ ମାଡ଼କଟ୍ ମେଣ୍ଡନ୍ ଦିନ୍ ବିଚାର୍ ଲୋତ୍‍ତାଗ୍ କୁଦ୍‍ତାନ୍ ନୁ ନାରୁଙ୍କ୍ ଲୋପେ ତାତାନଙ୍କ୍ ଆଦେଶ୍‍ ହିତ୍‍ତାନ୍ । 18 ଅନ୍‌ ଅବିଯୋଗନଡ଼୍‌ ଅନ୍‌ ବିରୁଦ୍ଦ୍‍ତେ କେତାନଙ୍କ୍ ନିତ୍‍ତଡ଼୍, ଇତ୍‍କେ ଅଡ଼୍‌ ବେଦ୍‍ରକମ୍‍ ଅବିଯୋଗ୍ ତାତିତଡ଼୍ ଇଞ୍ଜ ନାନ୍ ହେର୍କା ମାଡ଼ି ମାତ୍‍ତାନ୍, ଆଦ୍ ରକମ୍ ଅଡ଼୍‌ କେଲଡ଼୍ । 19 ଅଡ଼୍‌ ନିଜେର୍‍ ଦର୍ମ ବିଷୟ୍‍ତେ ନୁ ଜିସୁ ପେଦେର୍‍ତଣ୍ଡ୍ ଡଲ୍‍ତେ ନାରୁଙ୍କ୍ ପାଉଲ୍ ଜିୱୁନ୍‍ ମିନ୍ଦେଣ୍ଡ୍ ଇଞ୍ଜ ଦାବୀ ମାଡ଼ୁତଣ୍ଡ୍, ଆଦ୍ ବିଷୟ୍ ଆସ୍ ଯୁକ୍ତିତର୍କ ମାଡ଼୍‍ତଡ଼୍ । 20 ଇୱୁସାରେ ବିଷୟ୍ ସାୟେ ପୁନ୍ଦାନ୍ ସେଙ୍ଗେ ବାତ୍ ମାଡ଼ାନଙ୍କ୍ ଆଦ୍‍ତେ, ବାତ୍‍ମିକା ଟିକ୍ ମାଡ଼େ ପାର୍‍ୱାଙ୍କ୍ ଇଦ୍ ଅବିଯୋଗ୍ ବିଚାର୍ ମାଡ଼ାନ୍ ସେଙ୍ଗେ ପାଉଲ୍ ଯିରୁଶାଲେମ୍‍ ଆଦ୍‍ତନ୍ କି ଇଞ୍ଜ ନାନ୍ ଅଂକିଙ୍କ୍‌ ପାଚ୍ରାମାଡ଼୍‍ତାନ୍ । 21 ଇତ୍‍କେ ପାଉଲ୍, ନିଜେ ମହାରାଜାଲ୍ ଅନ୍‌ ନିଷ୍ପତି ବିଚାର୍‍ ମାଡ଼ିଣ୍ଡ୍ ଇଞ୍ଜ କେସ୍ କେପାନଡ଼୍ ତଡ଼୍ ପ୍ରାର୍ତନାତେ ସୁରକ୍ଷା ମାନ୍ଦାନଙ୍କ୍ ହାଲ୍‍ସ୍‍ତଣ୍ଡ୍ । ଆଦିଙ୍କ୍ ମହାରାଜାନ୍‍ ବକେତ୍ ରହତ୍‍ତାନ୍ ଯାକ ଅଂକିଙ୍କ୍‌ ବନ୍ଦି ମାଡ଼ି ନେହେତାନଙ୍କ୍ ନାନ୍ ଗଟ୍ ହିତ୍‍ତାନ୍ ।"

22 ଆଗ୍ରୀପା ଫେଷ୍ଟସ୍‍ତିଙ୍କ୍ କେତ୍‍ତଣ୍ଡ୍, "ନାନ୍ ନିଜେ ଇ ନାରୁନ୍ ଗଟ୍ କେଞ୍ଜାନଙ୍କ୍ ଇଚ୍ଛା ମାଡ଼ୁତାନ୍ ।" ଫେଷ୍ଟସ୍ ଉତ୍ତର୍ ହିତ୍‍ତଣ୍ଡ୍, "ନାଡ଼୍ ନିମ୍‍ ଅନାଦ୍‌ ଗଟ୍ କେଞ୍ଜୀତିନ୍ ।"

23 ମେଣ୍ଡନ୍ ଦିନ୍ ଆଗ୍ରୀପା ନୁ ବର୍ଣ୍ଣିସ୍ ସୈନ ବାହିନୀତେ ମୁକ୍ୟ ନୁ ନଗର୍‍ତେ ମୁକ୍ୟ ନାରୁଡ଼୍ ଗାଟି ୱେଡ଼୍‍କେତ୍ ୱାସ୍ ବିଚାର୍‍ଳୟତାଗ୍ ହସ୍‍ତଡ଼୍ । ଫେଷ୍ଟସ୍‍ତେ ଗଟ୍‍ତେ ପାଉଲ୍‍ତିଙ୍କ୍ ଲୋପେ ତାତ୍‍ତଡ଼୍ । 24 ଫେଷ୍ଟସ୍ କେତ୍‍ତଣ୍ଡ୍, "ରାଜାଲ୍ ଆଗ୍ରୀପା ନୁ ମାନ୍ଦାନ୍ ବେଡ଼୍‍ୟେ ନାରୁଡ଼୍, ମିଡ଼୍ ଇ ବେନ୍ ନାରୁଙ୍କ୍ ଉଡ଼ୁତିଡ଼୍, ଅନ୍‌ ବିରୁଦ୍ଦ୍‍ତେ ଇଗେତଡ଼୍ ନୁ ଯିରୁଶାଲେମ୍‍ ମାନ୍ଦାନ୍ ଇହୁଦୀଡ଼୍ ନା ଗାର୍‍ରେ ଅବିଯୋଗ୍ ମାଡ଼୍‍ତଡ଼୍ । ଅଡ଼୍‌ ଅଂକିଙ୍କ୍‌ ଜିୱୁନ୍‍ ମାନ୍ଦାନ୍‍ ଦର୍‍କାର୍‍ ଆୟ ଇଞ୍ଜ ଦାବୀ ମାଡ଼ି ମର୍‍ପୟ୍‍ତଡ଼୍ । 25 ଇତ୍‍କେ ଅଣ୍ଡ୍‌ ଡଲାନ୍‍ଦଣ୍ଡ୍ ପାଏମ୍ ଆଦାନ୍ ଲେକାମ୍ ମାଡ଼ିମାନ୍ଦାନ୍ ବାତ୍ ଅପରାଦ୍‌ ନାନ୍ ଉଡ଼ନ୍ । ଅଣ୍ଡ୍‌ ନିଜେ ସମ୍ରାଟ୍‍ତିଙ୍କ୍ କେତ୍‍ତାଙ୍କ୍, ନାନ୍ ଅଂକିଙ୍କ୍‌ ଆଗେ ଉପବାସ୍‍ତାଗ୍‍ ରହତାନଙ୍କ୍ ମାନ୍‍ ମାଡ଼୍‍ତାନ୍ । 26 ଇତ୍‍କେ ପ୍ରବୁନ୍‍ ବିଷୟ୍‍ତେ ସାୟେ ଲେକାନ୍ ସେଙ୍ଗେ ନାୟାଗ୍ ବାତ୍ ହିଲ୍‍ଲେ । ଆଦିଙ୍କ୍ ଅଂକିଙ୍କ୍‌ ମିଇ ମୁନ୍‍ନେ ନୁ ଇ ରାଜାଲ୍ ଆଗ୍ରୀପା, ମିଇ ମୁନ୍‍ନେ ତାତ୍‍ତଣ୍ଡ୍, ବେଦ୍‍ପୁଟୁଙ୍କ୍ କି ଅନ୍‌ ବିଷୟ୍ ସାୟେ ମାଡ଼ି ପାଚ୍ରାମାଡ଼୍‍ତେ ପେର୍‍କେ ନାନ୍ ବାତ୍‍ଆୟି ଲେକ୍‌ ପାର୍‍ଦ୍‍ତାନ୍ । 27 ଇତ୍‍କେ ୱେରଣ୍ଡ୍ ବନ୍ଦି ବିରୁଦ୍ଦ୍‍ତେ ମାନ୍ଦାନ୍ ଅବିଯୋଗ୍ ତାୱୁ ସାୟେ ଲେକକଟ୍‌ ଅଂକିଙ୍କ୍‌ ମହାରାଜାନ୍‍ ବକେତ୍ ରତାନାୱୁ ଟିକ୍ ଆୟ୍‍ୟ ଇଞ୍ଜ ନାନ୍ ହେର୍କା ମାଡ଼ୁତାନ୍ ।"