ଥେସଲନିକୀତାଗ୍ ସେବାପାଡ଼୍ୟି
1 ପାଉଲ୍ ନୁ ଶୀଲା ଆମ୍ପିପଲି ନୁ ଆପଲ୍ଲୋନିଆ ଇସ୍ ଥେସଲନିକୀତାଗ୍ ୱାତ୍ତଡ଼୍ । ଆଗେ ଅଣ୍ଡୟ୍ ଇହୁଦୀ ଉପାସନା ମାତ୍ତେ । 2 ପାଉଲ୍ ତାନ୍ ଦର୍ମଶାସ୍ତ୍ର ଲେକାମ୍ ଗୁଡ଼୍ୟିତାଗ୍ ଆତ୍ତଣ୍ଡ୍ । ଆଗେ ମୁଣ୍ଡ୍ ବିଶ୍ରାମ୍ବାର୍ତେ ନାରୁଡ଼୍ ତଡ଼୍ ଅଣ୍ଡ୍ ଆଲୋଚନା ମାଡ଼୍ତଣ୍ଡ୍, 3 ଦର୍ମଶାସ୍ତ୍ର ଉଲ୍ଲେଖ ନୁ ବାକ୍ୟା ମାଡ଼ି ପ୍ରମାଣ୍ ମାଡ଼୍ତଣ୍ଡ୍ ଯେ, ମସୀହ ଦୁକାମ୍ ବୋଗ୍ ଆଦାନାଦ୍ ନୁ ଡଲ୍ତାଗାଙ୍କ୍ ତେଏଦାନାଦ୍ ଦର୍କାର୍ ମାତ୍ତେ । ପାଉଲ୍ କେତ୍ତଣ୍ଡ୍, "ବେନ୍ ଜିସୁନ୍ ବିଷୟ୍ ନାନ୍ନେ ଗଷନା ମାଡ଼୍ତାନ୍, ଅଣ୍ଡ୍ ଆ ମସିହ ।" 4 ଅଡ଼୍ ଲୋପେଙ୍କ୍ ବେସ୍କ୍ତୁଡ଼୍ ଇଦ୍ ବିଶ୍ୱାସ୍ ପାଉଲ୍ ନୁ ଶୀଲା ତଡ଼୍ କାଇଲ୍ତଡ଼୍; ଆଦେପୁଟୁଙ୍କ୍ ନାର୍ଗେ ବାଡ଼୍ୟେ ନାଟାଙ୍କ୍ ନୁ ଇଶ୍ୱର୍ତିଙ୍କ୍ ଉପାସନା ମାଡ଼ାନ୍ ଗ୍ରୀକ୍ନାରୁଡ଼ାଦ୍ ଅଣ୍ଡୟ୍ ବେଡ଼୍ୟାଦ୍ ମାନ୍ଦେ ମିକା ଅଡ଼୍ ତଡ଼୍ କାଇଲ୍ତେ ।