1 ଏୟ୍‍ଙ୍ଗ୍ ଦିନା ପେର୍‍କେ ବେଡ଼ିୟି ଯାଜକ୍ ଆନାନୀୟ ବେସ୍‍କ୍‍ତୁଡ଼୍‍ ଇହୁଦୀ ନେତା ନୁ ତର୍ତ୍ତୁଲସ୍ ପେଦେର୍‍ତଣ୍ଡ୍ ୱେରଣ୍ଡ୍ ଓକିଲ୍‍ ତଡ଼୍ ସିସେରିଆତାଗ୍ ଆତ୍‍ତଣ୍ଡ୍ । ଅଡ଼୍‌ ଫେଲିକ୍‍ସ୍‍ତେ ମୁନ୍‍ନେ ନିଶ୍‍ମିକା ପାଉଲ୍‍ ବିରୁଦ୍ଦ୍‍ତେ ତାମାଦ୍ ଅବିଯୋଗ୍ ପେଶ୍ ମାଡ଼୍‍ତଡ଼୍ । 2 ତାନ୍‍ପେର୍କେ ପାଉଲ୍‍ତିଙ୍କ୍ ଆଗେ ତାତ୍‍ତଡ଼୍ ନୁ ତର୍ତ୍ତୁଲସ୍ ମଦଲ୍ ହିତ୍‍ତେ ତାନ୍ ଅବିଯୋଗ୍ ତଅତଣ୍ଡ୍, "ମହାଶୟ, ନିୟାଦ୍ ବୁଦ୍ଦ୍‍ତେ ଶାସନ୍‍ ତଡ଼୍ ମାମ୍‍ମେ ନାର୍‍ଗେ ଦିନା କନ୍‍ସ୍ ଶାନ୍ତିତଡ଼୍ ବାସେ ମାଡ଼ୁତମ୍ ନୁ ମାୟାଦ୍‌ ଦେଶ୍‍ତେ ଲେକେତ୍ ସେଙ୍ଗେ ନାର୍‍ଗେ ସଂସାର୍‌ ମାଡ଼୍‍ତଡ଼୍ । 3 ସାରେ ପଡ଼ିୟେତାଗ୍ ନୁ ସାରେଦାମ୍ ମାମ୍‍ମେ ଇଦିଙ୍କ୍ ସ୍ୱାଗତ୍ ମାଡ଼୍‍ତମ୍, ମାମ୍‍ମେ ଫେଲିକ୍‍ସ୍‍ ଗାଟି ଋଣୀ । 4 ଆଦ୍ ବାତ୍‍ଆଇ, ନାନ୍ ନିୟାଦ୍ ଅଦିକ୍‌ ସମୟ୍‍ ଆୟନ୍, ଆଦିଙ୍କ୍ ନିମ୍‍ ଦୟାମାଡ଼ି ମାୟାଦ୍‌ ସୁଦୁର୍ ଗଟ୍ କେଞ୍ଜାନ୍ ସେଙ୍ଗେ ନାନ୍ ଅନୁରଦ୍‌‍ ମାଡ଼ୁତାନ୍ । 5 ଇଣ୍ଡ୍ ନାରୁଣ୍ଡ୍‍ ଗାଟି ଗଲ୍‍କିନଣ୍ଡ୍ ଇଞ୍ଜ ମାମ୍‍ମେ ପୁତ୍‍ତମ୍; ଅଣ୍ଡ୍‌ ଜଗତ୍‍ ତାଗ୍ ସାରେପାକ୍ ଉଡି ଇହୁଦୀଡ଼୍ ଶାନ୍ତି ନଷ୍ଟ ମାଡ଼ାନଙ୍କ୍ କେତୁତଣ୍ଡ୍ । ଅଣ୍ଡ୍‌ ନାଜରିତିୟ ମାନ୍ଦେତଣ୍ଡ୍ ୱେରଣ୍ଡ୍ ନେତାଲ୍ । 6 ଅଣ୍ଡ୍‌ ମାୟାଦ୍‌ ମନ୍ଦିର୍‍ତିଙ୍କ୍ ଅପବିତ୍ର ମାଡ଼ାନଙ୍କ୍ ଚିନ୍ତେ ମାଡ଼୍‍ତେ ୱେଲେ ମାମ୍‍ମେ ଅଂକିଙ୍କ୍‌ ପୟ୍‍ତ୍‍ତମ୍‍ ।*୨୪:୬ ମାମ୍‍ ଅଂକିଙ୍କ୍‌ ମୋଶାନ୍‌ ନିୟମ୍‍ ଲେକାମ୍‌ ବିଚାର୍ ମାଡ଼ାନଙ୍କ୍‍ ଆଲ୍‍ସ୍‌ତମ୍‍, 7 ଇତ୍‍କେ ହଜାର୍‌ ହଜାର୍‌ ସେନାପତି ଲୂସିଆ ୱାସ୍ ଗାଟି ଜବର୍‍ଦସ୍ତି ମାଡ଼ି ଇଂକିଙ୍କ୍ ମା କାୟ୍‍ଦେ କନ୍‍ସ୍ ଉନ୍ଦି ଆତ୍‍ତଡ଼୍, 8 ମାମ୍‍ମେ ଇଣ୍ଡ୍ ବିରୁଦ୍ଦ୍‍ତେ ବେନ୍ ସାରେ ଅବିଯୋଗ୍ ମାଡ଼୍‍ତମ୍, ଆଦ୍ ନିମ୍‍ ନିଜେ ଇ ନାରୁଙ୍କ୍ ପାଚ୍ରାମାଡ଼ି ପୁନ୍ଦାନଙ୍କ୍ ପାର୍‍ଦ୍‍ତିନ୍ ।" 9 ଆଗେ ମାତ୍‍ତେ ଇହୁଦୀଡ଼୍ ଇଦ୍ ଅବିଯୋଗ୍ ସତ୍ ଇଞ୍ଜ ଗାଟି ସାହାସ୍ ତଡ଼୍ କେତ୍‍ତଡ଼୍ ।

10 ତାନ୍‍ପେର୍‍କେ ରାଜ୍ୟପାଳ ପାଉଲ୍‍ତିଙ୍କ୍ ଗଟ୍ କେତ୍‍ତାନ୍ ସେଙ୍ଗେ ଗଟ୍ ହିତ୍‍ତାଙ୍କ୍ ପାଉଲ୍ କେତ୍‍ତଣ୍ଡ୍, "ନାନ୍ ପୁତ୍‍ତାନ୍ ଯେ ନାର୍‍ଗେ ହେଣ୍ଡ୍‍କ୍ କନ୍‍ସ୍ ନିମ୍‍ ଇଦ୍ ଗଷ୍ଟିଡ଼୍ ବିଚାର୍‍ କର୍ତ୍ତାଲ୍ ଆତ୍‍ତିନ୍‍, ଆଦିଙ୍କ୍ ନି ମୁନ୍‍ନେ ଆତ୍ମସମର୍ତନ୍ ମାଡ଼ାନାଦ୍ ନାକିଂଙ୍କ୍ ସାୟେ ଆଦ୍‍ତେ । 11 ନିମ୍‍ ନିଜେ ମେହେକି ପୁନ୍ଦାନଙ୍କ୍ ପାର୍‍ଦ୍‍ତି ଯେ, ବାର ଦିନ୍ ମୁନେନ୍ ନାନ୍ ଯିରୁଶାଲେମ୍‍ତାଗ୍ ପୁଜା ମାଡ଼ାନଙ୍କ୍ ଆଞ୍ଜ୍‍ମାତ୍‍ତାନ୍ । 12 ମନ୍ଦିର୍‍ତାଗ୍ ବେନନ୍‌ ତଡ଼୍ ଯୁକ୍ତିତର୍କ ମାଡ଼ାନାଦ୍ ଇହୁଦୀଡ଼୍ ଉଡ଼୍‍ୱେ ମାତ୍‍ତଡ଼୍ ବା ପ୍ରାର୍ତନା ଲଅକିନାଗ୍ କି ସହର୍‍ତେ ମେଣ୍ଡେ ବେଗେ ନାକିଂଙ୍କ୍ ନାରୁଡ଼୍‍କିଂଙ୍କ୍ କେତାନାଦ୍ ଉଡ଼୍‍ୱେମାତ୍‍ତଡ଼୍ । 13 ଆଦିଙ୍କ୍ ନା ବିରୁଦ୍ଦ୍‍ତେ ତାସ୍ ମାନ୍ଦାନ୍ ଅବିଯୋଗ୍‍ତେ ସେଙ୍ଗେ ଅଡ଼୍‌ ପ୍ରମାଣ୍ ହିଦାନଙ୍କ୍ ପାର୍‍ୱଡ଼୍ । 14 ଆଗେକ୍‍ବା ନାନ୍ ନି ଆର୍‍ ଗାର୍‍ରେ ସ୍ୱୀକାର୍‍ ମାଡ଼ୁତାନ୍‍ ଯେ, ବେନ୍ ହିସାପ୍‍ତେ ଅଡ଼୍‌ ବୁସା ଇଞ୍ଜ କେତୁତଡ଼୍, ଆଦ୍ ହିସାପ୍‍ତେ ନାନ୍ ମା ଆନିଦାଦିଡ଼୍ ଇଶ୍ୱର୍‌ତିଙ୍କ୍ ଉପାସନା ମାଡ଼ୁତାନ୍ । ବାତେଙ୍କ୍ଇତ୍‍କେ ନାନ୍ ଗାଲା ମୋଶାନ୍‌ ନିୟମ୍‍ ନୁ ବାବବାଦୀଡ଼୍ ବଇତାଗ୍ କେତ୍‍ତାଦ୍ ସାରେ ବିଷୟ୍ ବିଶ୍ୱାସ୍ ମାଡ଼ୁତାନ୍ । 15 ଇଡ଼୍ ଲେକାମ୍ ଇଶ୍ୱର୍‌ତାଗ୍ ନାୟାଦ୍ ଆଶେ ମିନ୍ଦେ; ସାୟେତ୍ ନାରୁଡ଼୍ ନୁ ଆଦାର୍ମିକ୍ ନାରୁଡ଼୍ ସାରେତଡ଼୍ ଡଲ୍‍ତାଗାଙ୍କ୍ ପୁନରୁତାନ୍‍ତଡ଼୍ । 16 ଆଦିଙ୍କ୍ ଇଶ୍ୱର୍ ନୁ ନାରୁଡ଼୍‍ତେ ମୁନ୍‍ନେ ସାୟେତ୍ ମନ୍‍ମାଡ଼ି ଲେକେତ୍‍ କାମ୍ ମାଡ଼ାନ୍ ସେଙ୍ଗେ ନାନ୍ ସାରେଦାମ୍ ଆଲ୍‍ସି ମାଡ଼ୁତାନ୍ ।"

17 ✝ ୨୪:୧୭ ପ୍ରେରିତ ୨୧:୧୭-୨୮. "ନାର୍‍ଗେ ହେଣ୍ଡ୍‍କ୍ ଯାକ ଯିରୁଶାଲମ୍‍ତାଗାଙ୍କ୍ ଜେକେ ମାତ୍‍ତାଙ୍କ୍, ନା ନିଜେତ୍ ନାରୁଡ଼୍‍ ସେଙ୍ଗେ ବେସର୍ ଡାବ୍‍କ୍ ଆଦାନଙ୍କ୍ ନୁ ପୁଜ୍‍ ହିଦାନ୍ ସେଙ୍ଗେ ନାନ୍ ଆଗେ ଆଞ୍ଜ୍ ମାତ୍‍ତାନ୍ । 18 ନାନ୍ ଶୁଚିକରଣ୍‍ ବିଦି ମାଡ଼ି ତେର୍‍ସ୍ପାନ୍ ୱେଲେ ଅଡ଼୍‌ ନାକିଂଙ୍କ୍ ମନ୍ଦିର୍‍ତାଗ୍ ଉଡ଼୍‍ତଡ଼୍ । ଆସୁଟ୍‍ ନା ବକେତ୍ ନାରୁଡ଼୍ ହିଲ୍‍ୱେ ମାତ୍‍ତଡ଼୍ କି ବାତ୍ ଗଲ୍‍କ୍‍ ଆୟ୍‍ୱେ ମାତ୍‍ତେ । 19 ଇତ୍‍କେ ଏସିଆ ଦେଶ୍‍ତେ ବେସ୍‍କ୍‍ତୁଡ଼୍‍ ଇହୁଦୀ ଆଗେ ମାତ୍‍ତଡ଼୍; ଯଦି ନା ବିଷୟ୍‍ତେ ଅଡ଼୍‌ ବାତ୍ କେତାନାଦ୍ ମିନ୍ଦେ, ଅଡ଼୍‌ ନିଜେ ନି ମୁନ୍‍ନେ ୱାସ୍ ଅବିଯୋଗ୍ ମାଡ଼୍ ପାର୍‍ୱେଡ଼୍ । 20 ମେଣ୍ଡେ ନାନ୍ ବେସୁଟ୍‌ ବେଡ଼୍‍ୟେ ମିଟିଙ୍ଗ୍‍ତେ ମୁନ୍‍ନେ ନିଶ୍‍ମାତ୍‍ତାନ୍, ନାନ୍ ବେନ୍ ଅପରାଦ୍‌ତେ ଦଷି ଆତ୍‍ତାନ୍, ଆଦ୍ ଇଗେ ମାନ୍ଦାନ୍ ନାରୁଡ଼୍ କେଲିଡ଼୍ । 21 ✝୨୪:୨୧ ପ୍ରେରିତ ୨3:୬.ଆଗେକ୍‍ବା ନାନ୍ ଅଣ୍ଡୟ୍‌ ଗଟ୍ କେସ୍‍ମାତ୍‍ତାନ୍; ଅଡ଼୍‌ ମୁନ୍‍ନେ ନିଶ୍‍ମାନ୍ଦାନ୍ ୱେଲେ ନାନ୍ ଗାଡ଼୍‍ସ୍‍ଆସ୍ କେସ୍‍ମାତ୍‍ତାନ୍, ‘ଡଲ୍‍ତେନଡ଼୍ ମେଣ୍ଡନ୍‍ନ୍ଦାମ୍ ପୁନରୁତାନ୍ ଆଦ୍‍ତଡ଼୍ ଇଞ୍ଜ ବିଶ୍ୱାସ୍ ମାଡ଼୍‍ତାଙ୍କ୍ ନେଣ୍ଡ୍ ମିଇ ତଡ଼୍ ବିଚାର୍‍ ଆଦୁତାନ୍ ।’"

22 ଫେଲିକ୍‍ସ୍‍ ଆଦ୍ ଆର୍‍ ବିଷୟ୍‍ତେ ସାୟେ ପୁନ୍ଦାନଙ୍କ୍ ଇଚ୍ଛା ବନ୍ଦ୍ ମାଡ଼ି କେତ୍‍ତଣ୍ଡ୍, "ସେନାଲଡ଼୍ ମୁକ୍ୟାଲ୍ ଲିସିଆସ୍‍ ହେୱ୍‍ତେ ପେର୍‍କେ ନାନ୍ ମିୟାଦ୍‍ କେସ୍‍ତିଙ୍କ୍‍ ବିଚାର୍ ମାଡ଼ିତାନ୍ ।" 23 ପାଉଲ୍‍ତିଙ୍କ୍ ବନ୍ଦି ମାଡ଼ି ନେହେତାନଙ୍କ୍ ଅଣ୍ଡ୍‌ ସୈନିକିଡ଼୍‍କ୍ ଆଦେଶ୍‍ ହିତ୍‍ତଣ୍ଡ୍, ଇତ୍‍କେ ଅଂକିଙ୍କ୍‌ ନିଜର୍ ବନ୍ଦି ମାଡ଼ି ଅନ୍‌‍ୱାଦ୍ ସାଦନ୍ ଆଦାନ୍ ସେଙ୍ଗେ ତାନ୍ ସାଙ୍ଗଡ଼୍‍କ୍ ଆନୁମତି ହିଦାନଙ୍କ୍ ଅଣ୍ଡ୍‌ ଆଦେଶ୍‍ ହିତ୍‍ତଣ୍ଡ୍ ।

24 ବେସ୍କ୍‍ଦିନା ପେର୍‍କେ ଫେଲିକ୍‍ସ୍‍ ତାନ୍ ଇହୁଦୀୟା ମୁତ୍‍ତେ ଦ୍ରୁସିଲାନ୍ ତଡ଼୍ ୱାତ୍‍ତଣ୍ଡ୍, ଅଣ୍ଡ୍‌ ପାଉଲ୍‍ତିଙ୍କ୍ କାର୍‍ଙ୍ଗି ଜିସୁ କ୍ରିଷ୍ଟନାଗ୍ ବିଶ୍ୱାସ୍ ମାଡ଼ାନ୍ ବିଷୟ୍‍ତେ ଅନ୍‌ ଗଟ୍ କେଞ୍ଜ୍‍ତଣ୍ଡ୍ । 25 ଇତ୍‍କେ ବେସୁଟ୍‌ ପାଉଲ୍ ଦାର୍ମାମ୍‌, ନିଜେତ୍ ବିଷୟ୍ ନୁ ୱାଦାନ୍ ଦିନେତ୍ ବିଚାର୍ ଗଟ୍ ମିଟିଙ୍କ୍ ମାଡ଼୍‍ତଡ଼୍, ଫେଲିକ୍‍ସ୍‍ ୱେର୍‍ସ୍‍ମିକା କେତ୍‍ତଣ୍ଡ୍, "ନିମ୍‍ ଇଞ୍ଜେ ଆଦ୍ ପାର୍‍ଦ୍‍ତି । ସୁଯୋଗ୍ ଦରକ୍‍କେ, ମେଣ୍ଡନ୍‍ନ୍ଦାମ୍ ନିକିଂଙ୍କ୍ କାର୍‍ଙ୍ଗିତାନ୍ ।" 26 ଆଦ୍ ସମୟ୍‍ତେ ପାଉଲ୍ ଅଂକିଙ୍କ୍‌ ବେସର୍ ଡାବ୍‍କ୍ ହିଦ୍‍ତଣ୍ଡ୍ ଇଞ୍ଜ ଅଣ୍ଡ୍‌ ଆଶେ ମାଡ଼ିମାତ୍‍ତଣ୍ଡ୍, ଆଦିଙ୍କ୍ ଅଣ୍ଡ୍‌ ଅଣ୍ଡ୍‌‍ ଅଣ୍ଡୟ୍‌ଦାମ୍ ଅଂକିଙ୍କ୍‌ କାର୍‍ଙ୍ଗି ଅନ୍‌ ତଡ଼୍ ତ୍ରିୟାନଙ୍କ୍ ପସ୍‍ସ୍ପ୍‍ତଣ୍ଡ୍‍ ।

27 ଇଦ୍ ରକମ୍ ରେଣ୍ଡ୍ ହେଣ୍ଡ୍‍କ୍ ଆତ୍‍ତେ ପେର୍‍କେ ପୋର୍କିୟସ୍ ଫେଷ୍ଟସ୍ ଫେଲିକ୍‍ସ୍‍ତେ ପଡ଼୍‍ୟେତାଗ୍ ରାଜ୍ୟପାଳ ଲେକାମ୍‍ ନିଯୁକ୍ତ ଆତ୍‍ତଣ୍ଡ୍ । ଫେଲିକ୍‍ସ୍ ଇହୁଦୀଡ଼୍ ପ୍ରିୟ ନାରୁଡ଼୍ ଆଦାନ୍ ସେଙ୍ଗେ ଆଶେ ମାଡ଼ି ପାଉଲ୍‍ତିଙ୍କ୍ ମୁକ୍ତି ମାଡ଼୍‍ୱେ କନ୍‍ସ୍ ଜଇଲ୍‍ତାଗ୍ ୱିଡ଼୍‍ସି ଆତ୍‍ତଣ୍ଡ୍ ।