1 ଅଣ୍ଡୟ୍‌‍ଦିନ୍ ପିତର୍ ନୁ ଯୋହନ୍‌ ପ୍ରାର୍ତନା ସମୟ୍‍ତେ ପାୟାଲ୍ ମୁଣ୍ଡ୍ ଗାଣ୍ଟାତ୍‍ ୱେଲେ ପ୍ରାର୍ତନା ମାଡ଼ାନ୍ ମନ୍ଦିର୍‍ତାଗ୍ ଆଞ୍ଜମାତ୍‍ତଡ଼୍ । 2 ଆସୁଟେ ଆଗେ "ସୁନ୍ଦର୍," ପେଦେର୍‍ତାଦ୍ ମାର୍‍ତାଗ୍ ୱେରଣ୍ଡ୍ ନାରୁଣ୍ଡ୍‍ ମାତ୍‍ତଣ୍ଡ୍, ଅଣ୍ଡ୍‌ ଜନମ୍ କନ୍‍ସ୍ କୁଟାଲ୍ । ମନ୍ଦିର୍‍ତାଗ୍ ଆଞ୍ଜମାନ୍ଦାନ୍ ନାରୁଡ଼ାଗାଙ୍କ୍ ବିକ୍ୟା ତାଲ୍‍କାନ୍ ମାଇଦିଙ୍କ୍ ସାରେଦିନ୍ ଅଣ୍ଡ୍‌ ମାର୍ ଗାର୍‍ରେ କାଞ୍ଜୀ ଆଞ୍ଜମାତ୍‍ତଣ୍ଡ୍ । 3 ପିତର୍ ନୁ ଯୋହନ୍‌ତିଙ୍କ୍ ମନ୍ଦିର୍‍ ଲୋପେ ଆଦାନାଦ୍ ଉଡ଼ି, ଅଣ୍ଡ୍‌ ଅଡ଼୍‌‍କିଂଙ୍କ୍ ଅନୁରଦ୍‌‍ ମାଡ଼ି କେତ୍‍ତଣ୍ଡ୍ । 4 ଅଡ଼୍‌ ଯୋହନ୍‌ତିଙ୍କ୍ ଅଣ୍ଡୟ୍‌‍ କଣ୍ଡେତେ ଉଡ଼୍‍ତଡ଼୍ ନୁ ପିତର୍ କେତ୍‍ତଣ୍ଡ୍, "ମାୟାକ୍ ଉଡ଼େ !" 5 ଆସୁଟେ ଅଣ୍ଡ୍‌ ଅଡ଼୍‌ଆଗାଙ୍କ୍‌ ବାତେଆୟି ପାହେମ୍ ଆତ୍‍ତାଙ୍କ୍ ଆଶେମାଡ଼ି ଅଡ଼ାକ୍ ଉଡ଼ି ମାତ୍‍ତଣ୍ଡ୍ । 6 ଇତ୍‍କେ ପିତର୍ କେତ୍‍ତଣ୍ଡ୍, "ନାୟାଗ୍ ସୁନା ଡାବ୍‍କ୍ ଇଲା, ମାତ୍ରମ୍‍ ବାଆତେ ମିନ୍ଦେ, ନାନ୍ ନିକିଂଙ୍କ୍ ଇଦୁତାନ୍; ନାଜରିତିୟ ଜିସୁ କ୍ରିଷ୍ଟନ୍‍ ପେଦେର୍‍ତେ ନାନ୍ ନିକିଂଙ୍କ୍ ଗଟ୍ ଇଦୁତାନ୍ ତେଦ୍‍ଦେ ନୁ ତାଆକେ !" 7 ତାନ୍‍ପେର୍କେ ଅଣ୍ଡ୍‌ ଅନାଦ୍‌ ତିନ୍ଦେ କାଇଦିଙ୍କ୍ ପଇସ୍‍ ତେହେତ୍‍ତଣ୍ଡ୍ । ଆସୁଟେ ସାଙ୍ଗେ ସାଙ୍ଗେ ଅନ୍‌ ଡେକା ନୁ ଡେକ୍‍ଗାଟି ଶକ୍ତି ଆତ୍‍ତା । 8 ମେଣ୍ଡେ ଅଣ୍ଡ୍‌ ତୁଲି ତେଦ୍‍ତଣ୍ଡ୍, ମେଣ୍ଡେ ତାଆକାଙ୍କ୍ ପସ୍‍ପ୍‍ତଣ୍ଡ୍ । ତାନ୍‍ପେର୍କେ ଅଣ୍ଡ୍‌ ତାଆକି ତାଆକି, ତୁଲି ତୁଲି ମେଣ୍ଡେ ଇଶ୍ୱର୍‌ତିଙ୍କ୍ ପ୍ରସଂଶା ମାଡ଼ି ମାଡ଼ି ଅଡ଼୍‌ ତଡ଼୍ ମନ୍ଦିର୍‍ତାଗ୍ ଆତ୍‍ତଣ୍ଡ୍ । 9 ଆଗେତ୍‍ ନାରୁଡ଼୍ ସାରେତଡ଼୍ ଅଂକିଙ୍କ୍‌ ତାଆକାନାଦ୍ ନୁ ଇଶ୍ୱର୍‌ତିଙ୍କ୍ ପ୍ରସଂଶା ମାଡ଼ାନାଦ୍ ଉଡ଼୍‍ତଡ଼୍; 10 ଅଂକିଙ୍କ୍‌ ମନ୍ଦିର୍‍ତେ ସୁନ୍ଦର୍ ମାର୍‍ ଗାର୍‍ରେ କୁଦିମାନ୍ଦାନ୍ ବିକାରୀ ଇଞ୍ଜ ପୁତ୍‍ତଡ଼୍ ନୁ ଅନ୍‌ ସେଙ୍ଗେ ବାଆତେ ଗଟେମ୍ ଆତ୍‍ତେ, ସାରେ ଉଡ଼ି ଅଡ଼୍‌ ବାକ୍‍ୱା ନୁ କାବା ଆତ୍‍ତଡ଼୍ ।

11 ଆ ନାରୁଣ୍ଡ୍‍ ପିତର୍ ନୁ ଯୋହନ୍‌ତିଙ୍କ୍ ପୟିସ୍‍ମାନ୍ଦାନ୍ ୱେଲେ ନାରୁଡ଼୍ ସାରେତଡ଼୍ ଶଲୋମନ୍‍ତେ ମଣ୍ଡପ୍‍ତାଗ୍ ଉଡ଼ି କାବା ଆସ୍‍ ଅଡ଼୍‌ ଗାର୍‍ରେ ମିରି ୱାତ୍‍ତଡ଼୍ । 12 ପିତର୍ ଆଦ୍ ଉଡ଼ି ନାରୁଡ଼୍‍କିଂଙ୍କ୍ ଉତ୍ତର୍ ହିତ୍‍ତଣ୍ଡ୍, ହୋ ଇସ୍ରାଏଲୀୟ ନାରୁଡ଼ି, ବାତେଙ୍କ୍ ମିଡ଼୍ କାବା ଆଦୁତିଡ଼୍ ନୁ ମାକିଂଙ୍କ୍ ୱେରଡ଼୍ କଣ୍ଡେତେ ଉଡ଼ୁତିଡ଼୍ ? ମିଡ଼୍‍ ବାତ୍‍ ଆଲ୍‍ସୁତିଡ଼୍‍ ମାମ୍‍ ମାୱାଦ୍‍ ନିଜର୍‍ ବକ୍ତି ନୁ ଶକ୍ତି ତଡ଼୍ ଇଣ୍ଡ୍‍ ନାରୁଙ୍କ୍‍ ତାଆକାନ୍‍ ଶକ୍ତି ଇତ୍‍ତମ୍‍ ? 13 ଅବ୍ରାହାମ୍, ଇସ୍‍ହାକ୍ ନୁ ଯାକୁବ୍‍ତେ ଇଶ୍ୱର୍, ମାନ୍‍ ଆନିଦାଦିଡ଼୍‍ତେ ଇଶ୍ୱର୍, ତାମ୍ ଦାସ ଜିସୁଙ୍କ୍ ସ୍ୱର୍ଗୀୟ ଗୌରବ୍‍ ମାଡ଼୍‍ତଣ୍ଡ୍ । ଇତ୍‍କେ ମିଡ଼୍ ଅଂକିଙ୍କ୍‌ ପେଦାନ୍ କାଇଦେ ସମର୍‍ପନ୍ ମାଡ଼୍‍ତିଡ଼୍ । ଇଦ୍ ଲେକାମ୍ ପିଲାତ ଅଂକିଙ୍କ୍‌ ମୁକ୍ତି ମାଡ଼ାଙ୍କ୍ ବିଚାର୍ ମାଡ଼ିମାତ୍‍କେ ମିକା, ଅଂକିଙ୍କ୍‌ ପିଲାତନ୍ ମୁନେ ମନା ମାଡ଼୍‍ତିଡ଼୍ । 14 ✝3:୧୪ ମାତିଉ ୨୭:୧୫-୨3; ମାର୍କ ୧୫:୬-୧୪; ଲୁକ ୨3:୧3-୨3; ଯୋହନ୍‌ ୧୯:୧୨-୧୫.ଅଣ୍ଡ୍‌ ୱେରଣ୍ଡ୍ ପବିତ୍ର ନୁ ଦାର୍ମିକ୍ ନାରୁଣ୍ଡ୍‍, ଇତ୍‍କେ ମିଡ଼୍ ଅଂକିଙ୍କ୍‌ ମନା ମାଡ଼୍‍ତିଡ଼୍ ନୁ ଅନ୍‌ ବଦଲ୍‍ତେ ମିଡ଼୍ ୱେରଣ୍ଡ୍ ନାରୁଙ୍କ୍‌ ଆୱ୍‌କାନଙ୍କ୍‍ ମୁକ୍ତ ମାଡ଼ାନ୍ ସେଙ୍ଗେ ପୀଲାତଙ୍କ୍ କେତ୍‍ତିଡ଼୍‍ । 15 ବେନ ଜିୱୁଣ୍ଡ୍ ହାର୍ ତଅତିତଣ୍ଡ୍, ମିଡ଼୍ ଅଂକିଙ୍କ୍‌ ଆୱ୍‍କ୍‌ତିଡ଼୍‍, ଇତ୍‍କେ ଇଶ୍ୱର୍ ଅଂକିଙ୍କ୍‌ ଡଲ୍‍ତାଗାଙ୍କ୍ ମେଣ୍ଡେଜିୱେ ମାଡ଼୍‍ତଣ୍ଡ୍ ନୁ ମାମ୍‍ମେ ଅଦୁତମ୍ ଇଦିନାଦ୍ ସାକ୍ଷି । 16 ଅନ୍‌ ପେଦେର୍‍ତେ ଶକ୍ତି କେ ଇଣ୍ଡ୍ କୁଟାଙ୍କ୍ ସୁସ୍ଥ ମାଡ଼୍‍ତେ । ଆଦ୍ ମିଡ଼୍ ନିଜେ ଉଡ଼ି ନିଜାମ୍ ଇଞ୍ଜ ପୁତ୍‍ତିଡ଼୍, ଆଦ୍ ମାତ୍ରମ୍‍ ଅନ୍‌ ପେଦେର୍‍ତିଙ୍କ୍ ବିଶ୍ୱାସ୍ ମାଡ଼୍‍ତାଙ୍କ୍ ସମ୍ଭବ୍ ଆତ୍‍ତେ । ଜିସୁନାଗ୍ ବିଶ୍ୱାସ୍ ମାଡ଼୍‍ତାଙ୍କ୍ ଅଣ୍ଡ୍‌ ଜେ ସୁସ୍ଥ ଆତ୍‍ତଣ୍ଡ୍, ଇଦ୍ ମିଡ଼୍ ଉଡ଼୍‍ତିଡ଼୍‍ ।

17 "ଆଦିଙ୍କ୍ ଏୟ୍‍ ଇସ୍ରାଏଲୀୟ ଦାଦାଲଡ଼୍‍ ନୁ ଏଲାସ୍କ୍‍, ମିଡ଼୍ ନୁ ମିଇ ନେତାଲଡ଼୍ ଜିସୁନ୍‍ ସେଙ୍ଗେ ବାଆତେ ମାଡ଼୍‍ତିଡ଼୍, ଆଦ୍ ପୁନ୍‍ୱେକଟ ମାତ୍‍ତିଡ଼୍‍, ଇଦ୍ ନାନ୍ ପୁତ୍‍ତାନ୍ । 18 ନାର୍‍ଗେ ଦିନାତ୍ ମୁନେଙ୍କ୍ ସାରେ ବାବବାଦୀଡ଼୍‍ ପାୟୁର୍‍ତାଗାଙ୍କ୍ ଇଶ୍ୱର୍ ଗୋଷ୍‍ନା ମାଡ଼ିମାତ୍‍ତଣ୍ଡ୍ ଯେ, କ୍ରିଷ୍ଟଙ୍କ୍ ଦୁଃକାମ୍ କଷ୍ଟ ମାଡ଼୍‍ୱେୟ୍‍ତିତ୍‍ । ଇଦ୍ ରକମ୍ ଅଣ୍ଡ୍‌ ଆଦିଙ୍କ୍ ସାରେ ମାଡ଼୍‍ତଣ୍ଡ୍ । 19 ହେର୍କା ମାଡ଼ି ଇଶ୍ୱର୍‌ତେ ଗାର୍‍ରେ ମାଲ୍‍ସ୍ ୱାଡ଼ାଟ୍ । ଆସୁଟେ ଅଣ୍ଡ୍‌ ମିୟାଦ୍ ପାପ୍ କ୍ଷମା ମାଡ଼ିତନ୍ । 20 ଆଦିଙ୍କ୍ ପ୍ରବୁନାଗାଙ୍କ୍ ମିଡ଼୍ ପବିତ୍ର ଆତ୍ମାନ୍‍ ଶକ୍ତି ପାଏମ୍ ଆଦ୍‍ତିଡ଼୍, ଇଶ୍ୱର୍ ମିଇ ମାୟ୍‍ଦିଙ୍କ୍ ମୁନେନ୍ ଏଞ୍ଚ୍‍ତେ ମସୀହ ଜିସୁଙ୍କ୍ ମେଣ୍ଡନ୍‍ନ୍ଦାମ୍ ରହତିତଣ୍ଡ୍ । 21 ମୁନେତ୍ କାଲାମ୍‍ତେ ପବିତ୍ର ବାବବାଦୀଡ଼୍‍ ତଡ଼୍ ଇଶ୍ୱର୍‌ତେ ଗଷନା ଲେକାମ୍ ସାରେ ବିଷୟ୍ ପୁନେ ଆଦ୍‍ଦାନ୍ ଯାକ ଅଣ୍ଡ୍‌ ସ୍ୱର୍ଗତାଗ୍‍ ମାନ୍‍ତଣ୍ଡ୍ । 22 ଇଦ୍ ବିଷୟ୍‍ତେ ମଶାଲ୍‌‍ କେତ୍‍ତଣ୍ଡ୍, ‘ପ୍ରବୁ ଇଶ୍ୱର୍ ମିଇ ବକେତ୍ ନା ରକମ୍‍ ୱେରଣ୍ଡ୍ ବାବବାଦୀଙ୍କ୍ ରହତିତଣ୍ଡ୍ । ଅଣ୍ଡ୍‌ ମିଇ ନିଜେତ୍ ବିଶ୍ୱାସୀ ଲୋପେଙ୍କ୍ ୱେରଣ୍ଡ୍ । ଦାଦାଲ୍‌ ମିକିଂଙ୍କ୍ ବାତ୍ କେତିତଣ୍ଡ୍, ଆଦ୍ ସାରେ ବିଷୟ୍ ମିଡ଼୍ ପାଲନ୍ ମାଡ଼୍ ୱେୟ୍‍ତିତ୍ । 23 ବେନଆଇ ଆ ବାବବାଦୀନ୍ ବାକ୍ୟ ପାଲନ୍ ମାଡ଼ନ୍, ଅଂକିଙ୍କ୍‌’ ଇଶ୍ୱର୍‌ତେ ନାରୁଡ଼ାଗାଙ୍କ୍ ୱେରେ ମାଡ଼ି ଦଂସ ମାଡ଼ିତଡ଼୍ । 24 ଇଞ୍ଜେ ବାତ୍‍ ଗଟେମ୍‍ ଆଦୁତ୍‍ ଆଦ୍‍ ବିଷୟ୍‍ତେ ଶାମୁୟେଲ୍‍ ନୁ ଅଣ୍ଡ୍‌ ପେର୍‍କେ ବେସର୍ ବାବବାଦୀଡ଼୍‍ ଗଟ୍ କେତ୍‍ତଡ଼୍, ଅଡ଼୍‌ ସାରେତଡ଼୍ ମିକା ଇଦ୍ ଜୁଗ୍‍ ବିଷୟ୍‍ତେ ପ୍ରଚାର୍ ମାଡ଼୍‍ତଡ଼୍ । 25 ବାବବାଦୀଡ଼୍‍ ପାୟୁର୍‍ତାଗାଙ୍କ୍ ଇଶ୍ୱର୍ ବେନ୍‍ସାରେ ପ୍ରତିଜ୍ଞା ମାଡ଼୍‍ତଣ୍ଡ୍, ଆଦ୍ ମିଇ ସେଙ୍ଗେ ଟିକ୍, ମେଣ୍ଡେ ଇଶ୍ୱର୍ ମିଇ ଆନିଦାଦିଡ଼୍ ତଡ଼୍ ବେନ୍ ଚୁକ୍ତି ତିଆର୍ ମାଡ଼୍‍ତଣ୍ଡ୍, ମିଡ଼୍ ଆଗେତ୍ ବାଗୀଦାର୍ । ଇଶ୍ୱର୍ ଅବ୍ରାହାମ୍‌ତିଙ୍କ୍‍ କେସ୍‍ମାତ୍‍ତଣ୍ଡ୍, ‘ମିଇ ବଂଶତଡ଼୍‍ ତଡ଼୍ ନାନ୍‍ନେ ପୃତିବିତାଗ୍ ସାରେ ନାରୁଡ଼୍‍କିଙ୍କ୍ ଆର୍ଶିବାଦ୍ ମାଡ଼ିତାନ୍ ।’ 26 ଆଦିଙ୍କ୍ ଇଶ୍ୱର୍ ପ୍ରତମେ ମିଇ ସେଙ୍ଗେ ତାନ୍ ଦାସଡ଼୍‍କ୍‍ ଡଲ୍‍ତାଗାଙ୍କ୍‍ ତେଏସ୍‍ ରହତଣ୍ଡ୍, ବେଲାକି ଅଣ୍ଡ୍‌ ମିୟାଦ୍ ସାରେ ନାରୁଙ୍କ୍ ନିଜେତ୍ ନିଜେତ୍ କାରାପ୍ ହାର୍‍ତାଗାଙ୍କ୍ ମାଲ୍‍ପି ଆର୍ଶିବାଦ୍‍ ମାଡ଼ିତନ୍ ।"