Marcos 11

Jisas king mere yegl mogl, ede Jerusalem suna ugwa

1 Ana Jisas ye duglo beglkwa yagl bogl ede Jerusalem magigl udre, taun Betfage ya Betani muglo Oliv ibo yebrara ede magigl wigo, Jisas ye duglo biurka yoba suo dedidre, 2 ye yegl di togwa, Ene dumo ta yomara iro suna pidre, donki ta kane kogl padiglbi, tabre kanabrika. Donki i, yoba ege swara ta au sikrikwa. Ene donki i kandre, kane poko ede, yunabrika. 3 Te, yoba ta ene di pre, ene siragl pre donki i kane poko edibre? dibi, ene yegl diro, Yagl Kade kogonmo ta paugwa pre dugwa ba ye tabre te ikne edenabiwe di, ene yegl diro dugwa. 4 Yegl dugo, yagl suo i ede dumo ta dumara i suna pidre, donki nagigle ta konbauna bina, yugu dramugl dua yomara kane kogl padiglko, kanibrika. Kandre, kane poko ede miurko, 5 yoba tau magigl adigl meglkwa i ye di pre, Ene siragl pre donki nagigle i kane poko edibre? digwa. 6 Yegl digo, Jisas ye dinabredi di tomere i di tebriko, yoba pra we digwa. 7 Ana yagl suo i, ye donki nagigle yu Jisas moglmara edidre, ir gaglno gugl, donki moko bolamugl kiglbriko, Jisas donki au sidre, ede ogwa. 8 Te, ye ede omara i, yoba tau mere ir gaglno gugl, Jisas konbauna unabara kugl yeigo, te tau, ede bina dage pi, ede yaudo ya ki bru yu maginagle kugl yeigwa. 9 Yeigo, Jisas tebe ede pi moglkwa igne, yoba tau ede okna eigo, tau okuo wigo, Jisas yene suna ogwa. Eimara i, mudu aglage kaglkane ere, yegl digwa, God debie si tomniwa! Yagl ta Yagl Kade dedugo, ugwa i, God ye ere wakai ere tenabiwe!*11.9 Giglage 118.25-26 di, yegl didre, 10 ye ama yegl digwa, Devit gawamo ta ugwa, Devit okna ibo no kingno moglmere no kingno morabuka i, ye debie si tedre, God heven ibo moglkwa i, debie si tomniwe di, yegl digwa.

11 Ana Jisas ede Jerusalem suna pidre, ede tawa teigwa yugu yomara togl suna pi, kan winabo di, taragl mudu kan kodugo, min panagledi erukwa pre ye duglo beglkwa yagl 12-pela bogl aglke ede ikne pi dumo kebra Betani we dimara eigwa.