1 Kadyanshi ka Magono ma Zuba ka tuwa̱i ara Mika matsumate vuma u Moreshetu a kaci ka kuwene ka u wenei a kaci ka ilyuci i Samariya n Urishelima, a'ayin a ɗa Jotam n Ahazu n Hazakaya a ka lya tsugono tsu Yahuda.*

2 Panai na gba̱ ɗe, kakuma̱ ka ama,

panai na, gba̱ aza ɗa a'a̱ri a likimba!

A̱sa̱ka̱ Magono ma Zuba Uzapige

n kaci ne u woko uza ɗa

wenei ukuna vi a kaci ka ɗe,

panai kadyanshi ka ne ka ka wuta̱

a kuwa ka uwulukpi ka ne.

3 Weɓelei! Magono ma Zuba ma wuta̱

a asu u ndishi n ne wa tuwa̱,

wa tuwa̱ ta̱ iyamba

u wala a bilibili u nsasa n likimba.

4 Nsasa ma dara̱kpa ta̱ a kere ku ne

ara̱ra̱ kpam a ka ɓatsa ta̱ kure.

Nsasa kpam ma dara̱kpa ta̱

yavu akawa a ishigi a asuvu a akina,

yavu mini ma ma yene

a kakonguro ubana a asu u ara̱ra̱.

5 Gba̱ nala vi wa gita̱ ta̱

na̱ mmuku n tsikaya n Yakubu,

wata, aza a Isara'ila an a yain

unyushi u cingi kpam a 'ya̱nga̱sa̱ka̱i Kashila̱.

Ya zuwai Yakubu yain unyushi u cingi?

Aza a Samariya a ɗa, ilyuci i pige i ne!

Nte ɗa a asu u ulyasa̱ka ameli kayala a Yahuda?

Urishelima ɗa n kaci ka ne!

6 Magono ma Zuba ma danai,

<<Adama a nala ma wacinsa ta̱ Samariya

u woko akpongo hal u woko agbaji,

asu u ɗa a ka shigbusa̱ ashina a cinwi.

Ma wacinsa ta̱ atali a kuma ki a asuvu a kara̱ra̱,

n muɗa̱gbusa̱ kpam atali a kami ka kuma ku ne.

7 Gba̱ ameli a ne a ka ta̱sa̱sa̱ ta̱ a ɗa yuku-yuku;

gba̱ kune ka a tukusoi a kuwa ku ameli ku ne

a ka runukpa ta̱ ka n akina;

ma wacinsa ta̱ gba̱ a'ulu a ne.

An u wokoi u ɓolomgbonoi kune ku ne

a asu u katsupi ka tsu tsishankala,

a asu u tsishankala ɗa kpam ka kotso.>>

8 Adama a nala ma sa̱ ta̱,

n yain ndishi ma ulapa una̱;

ma foɗo ta̱ aminya

n tambi kataɓa kpam bawu akpata.

Ma wura̱ ta̱ yavu nshe n kakamba

n sa̱i yavu makuɓi.

9 Kpaci usa̱n u Samariya

usa̱n u ɗa bawu wa ta̱na̱.

U tambura ɗe hal a Yahuda,

u rawa ɗe a ilyuci i ama a va̱,

wata Urishelima dem.

10 Kotsu i tonuko atokulalu a tsunu a Gatu wa;

kotsu kpam i sa̱i wa ko kenu.

A Bete-leyafara ɗa ya gandala̱sa a iyamba.*

11 Aza a Shafiru, banai tsuwula̱,

i wala kataɓa n uwono.

Aza a ɗa i'a̱ri ndishi a Za'ana a ka wuta̱ wa.

Aza a Bete-ezelu a'a̱ ta̱ a asuvu a ulapa u una̱

kpaci a tsa̱ra̱ u ɓa̱nga̱ a asu u le wa.

12 Aza a ɗa a'a̱ri ndishi a Marotu

a ka vana tsa̱ra̱ a tsa̱ra̱ ili i shinga,

shegai Magono ma Zuba

ma zuwai mada̱ka̱ ma rukpa̱i a utsutsu u Urishelima.

13 Eɗa̱ aza a ɗa i'a̱ri ndishi a Lakishi,

foɓusoi nringongo ma adoki n ɗe, tsa̱ra̱ i suma.

Kpaci eɗa ilyuci i kagita̱ a Yahuda

i tonoi aza a Isara'ila a asu u 'ya̱nga̱sa̱ka̱ u le,

i zuwai kpam aza a Sihiyona a yain unyushi u cingi.

14 Adama a nala, aza a Yahuda

tonukoi aza a Moreshetu-gatu

u yan tsu ben i na̱ka̱ le kune.

Ngono ma Isara'ila a ka pityanangu ta̱

n ilyuci i Akiziba

shegai a ka tsa̱ra̱ u ɓa̱nga̱ wa.

15 Mpa Magono ma Zuba n danai,

eɗa̱ aza ɗa i'a̱ri ndishi a Maresha

ma doku ta̱ ma tuko uza ɗa wa lya ɗa̱ n kuvon.

Azapige a Isara'ila

a ka suma ta̱ ubana a Adulam.

16 Punai a'aci a ɗe asuvu a ulapa u una̱

adama a mmuku n ɗe aza ɗa ya ciga;

gonukoi kaci ka ɗe yavu kukpani ka kasakali,

kpaci mmuku n ɗe a ka laza ta̱ tsuwula̱.