1 Ɓolomgbono asoje a vunu, ilyuci i asoje,

kpaci a kyawan tsu ɗe n kuvon.

A ka lapa ta̱ tsugono tsa aza a Isara'ila

a kagbaguzu ka a ka lapa yi n kalangu.

2 Magono ma Zuba ma danai, <<Batalami Efurata,

avu ilyuci i kenu i'ya a asuvu a kumaci ku Yahuda.

Ma ɗanga̱sa ta̱ uza u te

a asuvu a ama a vunu u lyai tsugono tsu Isara'ila,

uza ɗa kagali ka ne ka̱ri tun caupa.>>*

3 Adama a nala, Magono ma Zuba ma neke ta̱

aza a Isara'ila a asu u atokulalu a le,

hal she a'ayin a ɗa uka ɗa wa̱ri

asuvu nkuɗi ma ilimaci u matsai maku ma vali.

Aku atoku a ne aza ɗa a buwai

a ka gono a asu u aza a Isara'ila.

4 Wa shamgba ta̱ ulina̱ka ushiga u ne,

n ucira n kala ka tsupige ka

Magono ma Zuba Kashila̱ ka ne.

Ama a ne a ka rongo ta̱ mai,

kpaci ureve u tsupige tsu ne wa rawa ta̱

hal a makorishi ma likimba.

5 Wa zuwa ta̱ tsu tsa̱ra̱ ndishi n shinga,

a'ayin a ɗa baci aza a Asiriya a uwai asuvu

a uyamba u tsunu n kuvon,

a ka wala ta̱ asu u ukpawan u asaga a pige.

Tsa ɗanga̱sa ta̱ azapige a asoje ama shindere

hal gba̱m kulla̱ a yain tsilala n ele.

6 A ka lya ta̱ tsugono tsu Asiriya n burundu,

uyamba u Nimurodu kpam n iburundu i le ufoɓusi.

Wa wauwa tsu ta̱ a asu u aza a Asiriya

a'ayin a ɗa baci a pasai karen ka tsunu

a tukoi uyamba u tsunu kuvon*.

7 Pini nala ama a Yakubu a ɗa buwai

a ka dusuku ta̱ asuvu a kakuma̱ ka ama

yavu cinza tsa tsu wuta̱i a asu u Magono ma Zuba

yavu mini ma zuba ma ma rukpusa̱ a mete,

ma bawu ma vana uza

ko kpam u pityanangu n vuma.

8 Ama a Yakubu a ɗa buwai a ka dusuku ta̱ a asuvu a kakuma̱ ka ama,

a mere ma ama ushani

a ka woko ta̱ n ucira yavu gabako a mere ma nnama a kutsu,

yavu gabako asuvu a ishiga i nlala,

a'ayin a ɗa baci u raɗugi u uwai a mere ma le

uza wa̱ la wa wauwa le wa.

9 A ka 'ya̱nga̱sa̱ ta̱ akere a ɗe a kaci ka atokulalu a ɗe.

kpam atokulalu a ɗe a ka wacinsa le ta̱.

10 Magono ma Zuba ma danai, <<A kain ka nala ki,

ma wacinsa ta̱ adoki a ɗe

n nangasa kpam nringongo ma adoki a ɗe.

11 Ma wacinsa ta̱ ilyuci i uyamba u ɗe,

n wa̱sa̱sa̱ asaga ɗa a'a̱ri ukyawin n ilyuci i ɗe.

12 Ma tuko ta̱ makorishi ma aza a ada̱bu a uyamba u ɗe,

ya doku ya tsa̱ra̱ aza a ukonduso wa.

13 Ma wacinsa ta̱ ameli a ɗe

n atali a ulyasa̱ka ameli kayala a ɗe.

Ya doku ya kuɗa̱nku

ili i'ya i yain n akere a ɗe i lyaka le kayala wa.

14 Ma muɗusa̱ ta̱ ashamkpatsu a ameli a Ashera asuvu a ɗe,

n wacinsa kpam ilyuci i ɗe.

15 Ma yan ta̱ katsupi ka va̱ n asuvu a shen n upan

a asu u kakuma̱ ka ama a ɗa gba̱ a tsu ꞌyuwain ugorimuko mu.>>