Mika 3

Azapige a cingi n atsumate a kaɓan

1 Aku n danai,

<<Eɗa̱ azapige a mmuku n tsikaya n Yakubu, panai na,

aza ɗa ya lya tsugono tsu Isara’ila.

U gan ta̱ i reve n afada a a’a̱ri dere,

2,3 eɗa̱ aza ɗa ya kovo ili i shinga aku ya ciga ukuna u cingi.

Ya muna ukpan u ikyamba u ama a va̱

n i kiɗa̱si inyama i ikyamba i le asuvu atele a le.

I koɗomgbonusoi kpam atele a le yuku-yuku,

i kiɗa̱sa i’ya yavu inyama aku i tsungu i’ya a magbodo

i takuma inyama i ama a va̱.

4 Pini nala ya sa̱ka̱ ta̱ Magono ma Zuba tsa̱ra̱ u ɓa̱nga̱ ɗa̱,

shegai wa wushunku ɗa̱ wa.

A’ayin a nala ɗa wa sokongu upetiwa’eshi a ne a asu ɗe

adama ukuna u cingi u ɗa i yain.>>

5 Ili i’ya Magono ma Zuba ma danai i’ya na:

<<A kaci ka ntsumate

n ɗa ma puwusa̱n ama a va̱,

a tsu 'ya̱nga̱sa̱ ta̱ ala̱ga̱tsu a le a dansa <Ukuna u ndishi n shinga,>

a’a̱ baci n ilikulya i’ya a ka lya.

Shegai a tsu foɓuso ta̱ kuvon

a asu a aza ɗa bawu a na̱ka̱ le ili i roku.

6 Adama a nala, kayin ka tuwa̱ ɗa̱ ta̱, bawu kuwene,

n karimbi ka aza a ukonduso bawu a ka wene ili.

Eɗa̱ ntsumate, a’ayin a ɗe a ka kotsu ta̱ kpaci kaara ka rukpa̱ ɗa̱ ta̱,

kaara ka woko ɗa̱ ta̱ karimbi cika.

7 Aza a kuwene a ka yan ta̱ uwono

n aza a ukonduso a ka pana ta̱ uwono.

A ka kimba̱ ta̱ upetiwa’eshi a le

kpaci Kashila̱ ka wushunku le wa.>>

8 Shegai mpa, n ma̱ ta̱ ushaɗangi n ucira,

n Kulu ku Magono ma Zuba,

u yain afada a maci n ucira.

Ma tonuko ta̱ mmuku n tsikaya n Yakubu unyushi u cingi u le,

aza a Isara’ila kpam unyushi u le.

9 Panai na, eɗa̱ azapige a mmuku n tsikaya n Yakubu,

eɗa̱ aza ɗa ya lya tsugono tsu Isara’ila,

aza ɗa i ꞌyuwain afada a maci

i gonukoi ili i’ya i’a̱ri dere i wokoi i cingi.

10 I yain uboku n mawunuka i tsa̱ra̱i ikebe i i’ya i mai Sihiyona,

i mai kpam Urishelima n ukuna u cingi.

11 Eɗa̱ azapige a Urishelima i tsu wusha ta̱ ukimba̱ u una̱ adama a afada.

Eɗa̱ aɗara̱kpi ya wenishike mele ma Kashila̱ adama u zami ikebe,

eɗa̱ kpam ntsumate ya konduso ili i’ya ya tuwa̱ ya gita̱ adama ikebe.

Gba̱ n nala i pityanangi n Magono ma Zuba wa, i danai,

<<Mada̱ka̱ ma tuwa̱ a asu tsunu wa

kpaci Magono ma Zuba ma̱ ta̱ kaɓolo n a̱tsu.>>

12 Adama a nala

a ka lima ta̱ Sihiyona u woko kashina adama a ɗe,

Urishelima wa woko ta̱ akpongo,

masasa ma Kuwa ku Kashila̱ ka̱ri ma woko ta̱ kutsu.*3:12 Kondo: Iri 26:18