1 Ter ɗe aza ɗa a tsu foɓuso tsicingi,

aza ɗa kpam a tsu foɓuso

ukuna u cingi a ivamkpatsu i le!

Kain ka wansa baci a tsu yan ta̱ i'ya a foɓusoi vi,

kpaci n ucira u le ɗa a tsu fuɗa ta̱ yain i'ya.

2 A tsu yan ta̱ maluwa ma gbani

n ashina n ama, a wusa a ɗa.

A tsu yan ta̱ kpam maluwa ma gbani

n a'uwa a ama, a wusa a ɗa.

A tsu ryafa ta̱ ama tsa̱ra̱ a wusa a'uwa a le n iyamba i le.

3 Adama a nala ili i'ya Magono ma Zuba ma danai i'ya na:

<<Ma foɓuso ta̱ uwacinsa a kaci ka ama yi,

ucun u ɗa bawu ya fuɗa ya wauwa kaci ka ɗe.

Ya doku ya wala n i yanyi ara̱ɗi wa,

kpaci wa woko ɗa̱ ta̱ a'ayin a mada̱ka̱.

4 A kain ka nala ki, ama a ka yanka ɗa̱ ta̱ majari,

a ka yanka ɗa̱ ta̱ majari a shipuka ɗa̱

ushipa u unamgbukatsuma̱, a dana,

<A nangasa tsu ɗe gba̱!

Magono ma Zuba ma wusa ɗe uyamba u tsunu!

U na̱ka̱i ashina a tsunu a asu u aza a ɗa a yinsa̱ tsu.> >>

5 Adama a nala, a'ayin a tuwa̱ baci

a ɗa a ka gonuko uyamba vi

a asu u ama a Magono ma Zuba,

ko uza u te asuvu a ɗe

wa̱ri n kapeci pini wa.

6 Ama ushani a danai,

<<Kotsu i yain kuɓari wa!

A̱sa̱ka̱ uyan kuɓari a kaci ka ili i nala yi,

ili i uwono i roku i'a̱ la ya gita̱ n a̱tsu wa.>>

7 Dere ɗa a dana nala, mmuku n tsikaya n Yakubu?

Ahankuri a Kulu ku Magono ma Zuba a gusa̱ ɗa?

Ko aya u yain ili i nala yi?

Kadyanshi ka Magono ma Zuba ka̱ri n kalen

a asu u uza ɗa wa tono yi n ukuna u maci wa?

8 Magono ma Zuba ma danai,

<<Shegai i tsu 'ya̱nga̱ ta̱ yavu atokulalu a asu u ama a va̱.

I tsu foɗo ta̱ ntogo ma aza ɗa a ka wura yaa,

aza ɗa a ka gono a asu u kuvon.

9 I tsu loko ta̱ aka a ama va̱

a wuta̱ a a'uwa a shinga a le.

I takpa kpam una̱ u shinga u va̱

a asu u mmuku n le ubana.

10 'Ya̱nga̱i, i laza!

Asu u na vi asu u uwunvuga u ɗe ɗa wa,

kpaci a zuwa ɗe asu vi u wokoi na̱ nshinda̱,

i nangasai u ɗa gba̱ gba̱.

11 Uza u kaɓan n uyinsa̱ u tuwa̱ baci u danai,

<Ma yan ta̱ kuɓari a kaci ka mini ma cinwi

n ili i'ya ya zuwa ugutukpa ushani,>

icun i uza u kuɓari u ɗa ama a ka ciga ɗa la vi!>>

12 Magono ma Zuba ma danai,

<<Mayun ma ɓolomgbono ɗa̱ ta̱ gba̱ ɗe,

mmuku n tsikaya n Yakubu;

ma ɓolomgbono ta̱ aza ɗa a buwai a Isara'ila.

Ma ɓolomgbono le ta̱ asu u te

yavu ncon a asu u ɗa a kanzai,

yavu ushiga u ncon a asu u kalina;

a woko kaɓolo ka pige ka ama.

13 Uza ɗa wa ɗapa kafon a kasaga, aya wa tono ta̱ n ele;

a ka ɓa̱tsa̱ ta̱ a utsutsu a laza.

Magono ma le ma uwa ta̱ a kapala ka le,

Magono ma Zuba ma ma tono n ele n kaci ka ne.>>