1 ଇଞ୍ଜାଁ ମାଦିୟ ଦାରିୟାବସ ଅଦିକାରାତି ମୂଲୁ ବାର୍ସାତା ନା଼ନୁ ଏ଼ୱାଣାଇଁ ସା଼ସା ଅ଼ଡ଼େ ବା଼ଡ଼୍‌ୟୁ କିହାଲି ନିତେଏଁ।

2 "ନୀଏଁ ନା଼ନୁ ନିଙ୍ଗେ ସାତା କାତା ତେଲ୍‌ହି କିୟାଇଁ। ମେହ୍‌ମୁ ପାରସ୍ୟତା ଅ଼ଡ଼େ ତୀନି ଜା଼ଣା ରାଜାୟାଁ ୱା଼ନେରି ଅ଼ଡ଼େ ସା଼ରି ଲମ୍ବର ରାଜା ଏ଼ ବାରେତି କିହାଁ ହା଼ରେକା ବାତ୍‌କୁ ଗାଟାସି ଆ଼ନେସି; ଅ଼ଡ଼େ ଏ଼ୱାସି ତାନି ବାତ୍‌କୁତା ବା଼ଡ଼୍‌ୟୁ ଆ଼ତିହିଁ, ଗ୍ରିସ୍‌ ରା଼ଜି କ଼ପାଟି ବାରେତି ହୁତୁରି ଉହ୍‌ନେସି।

3 ଏଚେଟିଏ ର଼ ବା଼ଡ଼୍‌ୟୁଗାଟି ରାଜା ନିଙ୍ଗିନେସି, ଏ଼ୱାସି କାଜା ଅଦିକାରା ତଲେ ସା଼ଲୱି କିନେସି ଅ଼ଡ଼େ ଜାହାରା ମ଼ନ ତଲେ କାମା କିନେସି। 4 ଏ଼ୱାସି ନିଙ୍ଗିତିହିଁ ଏ଼ୱାଣି ରା଼ଜି ଡୀହାହାନେ ଅ଼ଡ଼େ ହା଼ଗୁତି ସା଼ରି ୱାକି ବା଼ଗା ଆ଼ନେ; ସାମା ତାନି କୂଡ଼ା ତାକି କି ତାନି ସା଼ଲୱି କିନି ଲେହେଁ ସା଼ଲୱି କିହାଲି ଡ଼ୟେଏ; ଇଚିହିଁ ଏ଼ୱାରାକି ଆ଼ଏ, ସାମା ଏଟ୍‌କାତାରି ତାକି ଏ଼ୱାଣି ରା଼ଜି ଡୀହାହାନେ।"

5 "ଇଞ୍ଜାଁ ମିସର ଦେ଼ସାତି ରାଜା ବା଼ଡ଼୍‌ୟୁ ଆ଼ନେସି, ସାମା ତାମି କାଜାରି ବିତ୍ରାଟି ରଅସି ଏ଼ୱାରି କିହାଁ ହା଼ରେକା ବା଼ଡ଼୍‌ୟୁ ଆ଼ହାଁ ସା଼ଲୱି କିନି ପା଼ଣା ବେଟାଆ଼ନେସି; ଏ଼ୱାଣି ରା଼ଜି ର଼ କାଜା ରା଼ଜି ଆ଼ନେ। 6 ସାମା ଏଚେକା ବାର୍ସା ଡା଼ୟୁ ଏ଼ ରିଆରି ଆଣ୍ତ୍‌ୱି ଆ଼ନେରି ଅ଼ଡ଼େ ମିସର ଦେ଼ସାତି ରାଜା ମା଼ଙ୍ଗା ରା଼ଜିମା଼ନା ତୀରି କିହାଲି ସିରିୟା ରାଜା ତା଼ଣା ୱା଼ନେ; ସାମା ମା଼ଙ୍ଗା ତାନି ବା଼ଡ଼୍‌ୟୁ ଗେଲ୍‌ପାଲି ଆ଼ଡେଏ; ରାଜା ଇଞ୍ଜାଁ ଏ଼ୱାଣି ବା଼ଡ଼୍‌ୟୁ ତୀରି ଡ଼ୟେଏ; ସାମା ଏ଼ ମା଼ଙ୍ଗା ଅ଼ଡ଼େ ଆମିନି ଗାଟାରି ଏ଼ଦାଣି ତାତେରି ଇଞ୍ଜାଁ ତାମି ଆ଼ବା ଅ଼ଡ଼େ ଏ଼ଦାଣି ପ଼ହିକିତାରି ବାରେ ହେର୍‌ପି ଆ଼ନେରି। 7 ସାମା ମା଼ଙ୍ଗାନି ହୀରୁଟି ରଅସି ଏ଼ ଟା଼ୟୁତା ହ଼ନେସି, ଏ଼ୱାସି ରିଜାରି କ଼ସ୍‌କା ତଲେ ରେ଼ଚା ୱା଼ହାଁ ସିରିୟା ଦେ଼ସାତି ରାଜା ଗା଼ଡ଼ାତା ହ଼ଡ଼୍‌ନେସି ଅ଼ଡ଼େ ଏ଼ୱାଣି କ଼ପାଟି ଜୁଜୁ କିହାଁ ଜୀଣା ଆ଼ନେସି; 8 ଅ଼ଡ଼େ ଏ଼ୱାସି, ଏ଼ୱାରି ଗାରାତଲେ କିତି ବମାୟାଁ ତଲେ ତାମି ପେ଼ଣ୍‌କାଣି କାୟିଦି କିହାଁ ୱେଣ୍ତି ଅ଼ଡ଼େ ବାଂଗାରାତି ଅ଼ଜିତି ଗିନା ସିପା ତଲେ ମିସରତା ଅ଼ନେସି ଅ଼ଡ଼େ ଏଚର ବାର୍ସା ପାତେକା ସିରିୟା ଦେ଼ସାତି ରାଜା କ଼ପାଟି ଏ଼ୱାଣି କେୟୁ ଡ଼ୟିନେ। 9 ଇଞ୍ଜାଁ ସିରିୟାତି ରାଜା ମିସର ଦେ଼ସାତି ରାଜା ରା଼ଜିତା ୱା଼ନେସି, ସାମା ତାନି ଦେ଼ସାତା ଏ଼ୱାସି ୱେଣ୍ତା ହାନେସି।"

10 "ଅ଼ଡ଼େ, ତାନି ମୀର୍‌କା ଜୁଜୁ କିନେରି ଅ଼ଡ଼େ ରିଜାରି କ଼ସ୍‌କା କୂଡ଼ି କିନେରି, ଏ଼ୱାରି ୱା଼ରୁ ଲେହେଁ ୱା଼ହାଁ ତେ଼ଲାହାନେରି; ଅ଼ଡ଼େ ଏ଼ୱାରି ୱେଣ୍ତେ ତାନି କ଼ଟା ଇଲୁ ପାତେକା ଜୁଜୁ କିନେରି। 11 ଏଚେଟିଏ ମିସର ଦେ଼ସାତି ରାଜା କାର୍‌ବି ଆ଼ହାଁ ସିରିୟା ଦେ଼ସାତି ରାଜା କ଼ପାଟି ଜୁଜୁ କିନେସି; ଏଚେଟିଏ ସିରିୟା ଦେ଼ସାତି ରାଜା ହା଼ରେକା ମାନ୍ଦା କୂଡ଼ି କିନେସି, ସାମା ଏ଼ ମାନ୍ଦା ମିସର ଦେ଼ସାତି ରାଜା କେୟୁତା ହେର୍‌ପି ଆ଼ନେରି। 12 ଏ଼ ମାନ୍ଦାତି ଜୀଣା ଆ଼ତିସାରେ ଏ଼ୱାଣି ହିୟାଁ ବଡପଣ ଆ଼ନେ ଇଞ୍ଜାଁ ଏ଼ୱାସି ମା଼ଣା ମା଼ଣା ଲ଼କୁଣି ପା଼ୟିନେସି; ଆ଼ତି ଜିକେଏ ଏ଼ୱାସି ଜୀଣା ଆ଼ଅସି।"

13 "ଅ଼ଡ଼େ ସିରିୟା ଦେ଼ସାତି ରାଜା ୱେଣ୍ତେ ତଲିତି କିହାଁ ଗାଡି ମାନ୍ଦା ରୁଣ୍ତା କିନେସି; ଇଞ୍ଜାଁ ଏ଼ କା଼ଲାତା ଇଚିହିଁ ବାର୍ସାତି ରା଼ନି ବେ଼ଲାତା ହା଼ରେକା ରିଜାରି କ଼ସ୍‌କା ଅ଼ଡ଼େ ହା଼ରେକା ଆ଼ସ୍ତି ତାଚିହିଁ ୱା଼ନେସି। 14 ଇଞ୍ଜାଁ, ଏ଼ ବେ଼ଲାତା ହା଼ରେକା ଲ଼କୁ ମିସର ଦେ଼ସାତି ରାଜା କ଼ପାଟି ନିଙ୍ଗିନେରି; ଇଞ୍ଜାଁ ମୀ ଲ଼କୁ ବିତ୍ରା ଲାଗେଏ କିନାରି ମୀର୍‌କା ଈ ସେୟାଁଣା ହାପାନା ପୂରା କିହାଲି ଜାହାରାଇଁ ପାଡିକିନେରି; ସାମା ଏ଼ୱାରି ହା଼ରୱି ଆ଼ନେରି। 15 ଇଲେକିହିଁ ସିରିୟା ଦେ଼ସାତି ରାଜା ୱା଼ନେସି ଅ଼ଡ଼େ ଗା଼ଡ଼ାତି ଗୂର୍‌ଚାହାଁ ଆ଼ଟ୍‌ୱା ଗା଼ଡ଼ାତି ତାନି କେୟୁତା ଅ଼ନେସି; ଏଚେଟିଏ ମିସର ଦେ଼ସାତି ସା଼ୟେମି କିନାରି ଅ଼ଡ଼େ ଆ଼ଚାମାନି ଲ଼କୁ ନିଚାଲି ଆ଼ଡଅରି; କି ନିଚାଲି ତାକି ଏ଼ନି ବା଼ଡ଼୍‌ୟୁ ଡ଼ୟେଏ। 16 ସାମା ଆମ୍ବାଆସି ଏ଼ୱାଣି କ଼ପାଟି ୱା଼ନେସି, ଏ଼ୱାସି ଜାହାରା ମ଼ନ ତଲେ କାମା କିନେସି ଅ଼ଡ଼େ ଏ଼ୱାଣି ନ଼କିତା ଆମ୍ବାଆସି ନିଅସି; ଅ଼ଡ଼େ ଏ଼ୱାସି ଅ଼ଜିତି* ଦେ଼ସାତା ନିନେସି, ଅ଼ଡ଼େ ଏ଼ୱାଣି କେୟୁତା ନା଼ସା କିନାୟି ଡ଼ୟିନେ।"

17 "ଇଞ୍ଜାଁ ସିରିୟା ଦେ଼ସାତି ରାଜା ତାନି ବାରେ ରା଼ଜିତି ବା଼ଡ଼୍‌ୟୁ ତଲେ ୱା଼ହାଲି ମ଼ନ କିନେସି ଅ଼ଡ଼େ ତୀର୍‌ପୁତି ଲ଼କୁ ଏ଼ୱାଣି ତଲେ ୱା଼ନେରି; ଏ଼ୱାସି ତାନି ମ଼ନ ତଲେ କାମା କିନେସି; ଇଞ୍ଜାଁ ଏ଼ୱାସି ମିସର ଦେ଼ସାତି ରାଜାକି ର଼ ମା଼ଙ୍ଗାନି ଈଦାଆଁତାକି ହୀନେସି; କି ଏ଼ୱାଣି ରା଼ଜି ନା଼ସା ଆ଼ନେ; ସାମା ଏ଼ ମା଼ଙ୍ଗା ତୀରି ଆ଼ହାଁ ଡ଼ୟାଲି ଆ଼ଡେଏ, କି ଏ଼ ରାଜାକି ଆ଼ଏ। 18 ଏଚେଟିଏ ଏ଼ୱାସି ସାମ୍‌ଦୁରି ମାଦି ମାନି ଟା଼ୟୁ କ଼ପାଟି ହାଜାହାଁ ହା଼ରେକାତି ତାନି କେୟୁତା ତାନେସି; ସାମା ର଼ କ଼ସ୍‌କାତି କାଜାସି ଏ଼ୱାଣି ଲାଜା ସାପି କିନେସି; ଅ଼ଡ଼େ ଏ଼ୱାସି ତାନି ଲାଜା ତାନି ଲାକ ଏକ୍‌ନେସି। 19 ଏଚେଟିଏ ଏ଼ୱାସି ତାନି ଦେ଼ସାତି କ଼ଟା କାତି ୱାକି ୱେଣ୍ତିନେସି; ସାମା ଏ଼ୱାସି ପୁଟିକିହାଁ ରିହା ହାନେସି; ଇଞ୍ଜାଁ ଏ଼ୱାସି ତ଼ଞ୍ଜା ଆ଼ଅସି।"

20 "ଏଚେଟିଏ ଆମ୍ବାଆସି ଏ଼ୱାଣି ପା଼ଣା ବେଟାଆ଼ନେସି, ଏ଼ୱାସି ରା଼ଜିତି ଅ଼ଜିତି ଟା଼ୟୁ ମାଦିଟି ଲ଼କୁଣି ଆଜି ତ଼ସାଲି ପାଣ୍ତିନେସି; ସାମା ଗା଼ଡ଼େକା ଦିନା ଡା଼ୟୁ କାର୍‌ବି କି ଜୁଜୁ ହିଲାଆନା ନା଼ସା ଆ଼ନେସି।"

21 "ଇଞ୍ଜାଁ ଆମ୍ବାଆରାଇଁ ଏ଼ୱାରି ରାଜାତି ମା଼ନି କିହାହିଲାଆତେରି, ଇଲେତି ର଼ ହୀଣି ଗାଟାସି ଏ଼ୱାଣି ପା଼ଣା ବେଟାଆ଼ନେସି; ସାମା ଏ଼ୱାସି ଅଣ୍‌ପା ହିଲାଆ ବେ଼ଲାତା ୱା଼ନେସି ଅ଼ଡ଼େ ଡ଼ାକ୍‌ନି କାତା ତଲେ ରା଼ଜି ବେଟାଆ଼ନେସି। 22 ଗା଼ଲି ପିୟୁ ଲେହେଁ ରିଜାରି କ଼ସ୍‌କା ମାନ୍ଦା ତଲେ ଏ଼ୱାରି ଏ଼ୱାଣି ନ଼କିଟି ନା଼ସା ଆ଼ନେରି; ଅ଼ଡ଼େ ରା଼ଜିମା଼ନାତି କାଜାସି ଜିକେଏ ନା଼ସା ଆ଼ନେସି। 23 ଇଞ୍ଜାଁ ଏ଼ୱାଣି ତଲେ ରା଼ଜିମା଼ନା ତୀରି କିତି ଡା଼ୟୁ ଏ଼ୱାସି ନା଼ଡ଼ିକିତି ଲେହେଁ କାମା କିନେସି; ଇଚିହିଁ ଏ଼ୱାସି ୱା଼ହାଁ ଇଚରା ଲ଼କୁ ତଲେ ବା଼ଡ଼୍‌ୟୁ ଆ଼ନେସି। 24 ଏ଼ୱାସି ଅଣ୍‌ପା ହିଲାଆ ବେ଼ଲାତା ଦେ଼ସାତି ହା଼ରେକା ନେହିଁ ଟା଼ୟୁତା ହ଼ଡ଼୍‌ନେସି, ଅ଼ଡ଼େ ତାମି ଆକୁ ଇଞ୍ଜାଁ ତାମି ଆକୁତି ଆ଼ବାୟାଁ ଏ଼ନାଆଁ କିହା ହିଲାଆତେରି, ଏ଼ଦାଆଁ ଏ଼ୱାସି କିନେସି; ଏ଼ୱାସି ଏ଼ୱାରି ବିତ୍ରା ସ଼ରୁ କିତି ଆ଼ସ୍ତି ଅ଼ଡ଼େ ମୀଞ୍ଜିତି ଦିଣ୍‌ସୁ ଅ଼ଡ଼େ ଦ଼ନ ଡ଼ାଞ୍ଜିନେସି, ଅ଼ଡ଼େ ଏଚେକା କା଼ଲମି ଆ଼ଟ୍‌ୱା ଗା଼ଡ଼ାତି ଅ଼ହାଲି ଅଣ୍‌ପିହିଁ ଡ଼ୟିନେସି।

25 ଇଞ୍ଜାଁ ଏ଼ୱାସି ରିଜାରି କ଼ସ୍‌କା ମାନ୍ଦା ତାନି ତଲେ ଅ଼ହାଁ ମିସର ଦେ଼ସାତି ରାଜା କ଼ପାଟି ତାନି ବା଼ଡ଼୍‌ୟୁ ଅ଼ଡ଼େ ସା଼ସା ପାଡିକିନେସି; ଏଚେଟିଏ ମିସର ଦେ଼ସାତି ରାଜା କାଜା ବା଼ଡ଼୍‌ୟୁଗାଟି ରିଜାରି କ଼ସ୍‌କା ଆସାହାଁ ଏ଼ୱାଣି ତଲେ ଜୁଜୁ କିନେସି; ସାମା ଏ଼ୱାସି ତୀରି ଆ଼ହାଁ ଡ଼ୟଅସି; ଇଚିହିଁ ଏ଼ୱାରି ଏ଼ୱାଣି କ଼ପାଟି ଲାଗେଏ କିହାଲି ଅଣ୍‌ପିନେରି। 26 ଆମ୍ବାଆରି ଏ଼ୱାଣି କା଼ଦି ତିନେରି, ଏ଼ୱାରି ଏ଼ୱାଣାଇଁ ନା଼ସା କିନେରି, ଇଞ୍ଜାଁ ଏ଼ୱାଣି ରିଜାରି କ଼ସ୍‌କା କାଡା ଲେହେଁ ୱା଼ନେରି, ଆ଼ତି ଜିକେଏ ହା଼ରେକା ଲ଼କୁ ହା଼ନେରି। 27 ଇଞ୍ଜାଁ ଈ ରୀ ରାଜାତି ହିୟାଁ ରଅଣି ଲାଗେଏ କିହାଲି ଅଣ୍‌ପିନେରି ଅ଼ଡ଼େ ଏ଼ୱାରି ରଣ୍ତିଏ କୁର୍‌ଚିତା କୁଗାହାଁ ମିଚି କାତା ଜ଼ଲିନେରି; ସାମା ଏ଼ଦି ପୂରା ଆ଼ଏ; ଇଚିହିଁ ଏଚିବେ଼ଲା ଜିକେଏ ତୀରି କିହାମାନି କା଼ଲା କା଼ଚା ଡ଼ୟିନେ। 28 ଏଚିବେ଼ଲା ଏ଼ୱାସି ହା଼ରେକା ଦ଼ନ ଆସାହାଁ ତାନି ଦେ଼ସାତା ୱେଣ୍ତା ହାନେସି ଅ଼ଡ଼େ ତାନି ହିୟାଁ ସୁଦୁ ରା଼ଜିମା଼ନା କ଼ପାଟି ହ଼ନେ; ଅ଼ଡ଼େ ଏ଼ୱାସି ଜାହାରା ମ଼ନ ତଲେ କାମା କିହାଁ ତାନି ଦେ଼ସାତା ୱେଣ୍ତା ହାନେସି।

29 ତୀରି କିହାମାନି କା଼ଲାତା ଏ଼ୱାସି ୱେଣ୍ତେ ମିସର ଦେ଼ସାତା ହ଼ଡ଼୍‌ନେସି; ସାମା ତଲି କା଼ଲାତା ଏ଼ନିକିଁ ଆ଼ହାମାଚେ, ଡା଼ୟୁ କା଼ଲାତା ଏଲେକିଁ ଆ଼ଏ। 30 ଇଚିହିଁ କିତିମତି ଜା଼ଜାୟାଁ ବାରେ ଏ଼ୱାଣି କ଼ପାଟି ୱା଼ନୁ, ଏ଼ଦାଆଁତାକି ଏ଼ୱାସି ଦୁକୁ ଆ଼ହାଁ ୱେଣ୍ତା ହାନେସି ଅ଼ଡ଼େ ସୁଦୁ ରା଼ଜିମା଼ନା କ଼ପାଟି କାର୍‌ବି ଆ଼ହାଁ ଜାହାରା ମ଼ନ ତଲେ କାମା କିନେସି; ଏ଼ୱାସି ୱେଣ୍ତା ହାନେସି ଅ଼ଡ଼େ ସୁଦୁ ରା଼ଜିମା଼ନା ପିସାମାନି ଲ଼କୁ ତା଼ଣା ମ଼ନ ହୀନେସି। 31 ତାନି ୱାକିତି ରିଜାରି କ଼ସ୍‌କା ନିଙ୍ଗାହାଁ ଦାର୍ମୁ ଗାଟାଣି ଇଚିହିଁ, ପାଡା ଆ଼ତି ଟା଼ୟୁତି ଲାଗେଏ କିନେରି ଅ଼ଡ଼େ କା଼ଲେଏତି ପୂଜା ସାପି କିନେରି, ଅ଼ଡ଼େ ବାରେ ନା଼ସା କିନି ଅ଼ପାଆଗାଟି ଆ଼ସ୍ତି ଇଟିନେରି। 32 ଇଞ୍ଜାଁ ଆମିନିଗାଟାରି ରା଼ଜିମା଼ନା କ଼ପାଟି ଲାଗେଏତି କାମା କିନେରି, ଏ଼ୱାସି ନା଼ଡ଼ିକିନି କାତା ତଲେ ଏ଼ୱାରାଇଁ ଏଟ୍‌କା ଜିରୁଟି ଅ଼ନେସି; ସାମା ଆମିନିଗାଟାରି ଜାହାରା ମାହାପୂରୁଇଁ ପୁନେରି, ଏ଼ୱାରି ବା଼ଡ଼୍‌ୟୁ ଆ଼ନେରି ଅ଼ଡ଼େ ହା଼ରେକା କାଜା କାମା କିନେରି। 33 ଅ଼ଡ଼େ ଲ଼କୁତି ବିତ୍ରା ବୁଦିଗାଟାରି ହା଼ରେକା ଲ଼କୁଣି ଜା଼ପ୍‌ନେରି; ଆ଼ତି ଜିକେଏ ହା଼ରେକା ଦିନା ପାତେକା ଏ଼ୱାରି କାଣ୍ତା ତଲେ, ହିଚୁ ଗୁଦ୍‌ୱାତା, କାୟିଦି ଇଲୁତା ସ଼ରୁ କିନାରି ତା଼ଣା ହେର୍‌ନେରି। 34 ଏଚିବେ଼ଲା ଏ଼ୱାରି ଦୁକୁ ବେଟାଆ଼ନେରି, ଏଚିବେ଼ଲା ଏ଼ୱାରି ଇଚାଣି ସା଼ୟେମି ବେଟାଆ଼ନେରି; ସାମା ହା଼ରେକା ନା଼ଡ଼ିକିନି କାତା ତଲେ ଏ଼ୱାରି ତା଼ଣା ଆଣ୍ତିନେରି। 35 ଇଞ୍ଜାଁ ଏ଼ୱାରି ବିତ୍ରାଟି ବୁଦିଗାଟାରି ଏ଼ୱାରାଇଁ ସୁଦୁ, ଅଟ୍‌ହାରି ଅ଼ଡ଼େ ଦବ୍‌ଲା କିହାଲି ତାକି ତୀରି କିହାମାନି ବେ଼ଲା ପାତେକା ଦୁକୁ ବେଟାଆ଼ନେରି; ଇଚିହିଁ ଏ଼ଦି ତୀରି କିହାମାନି କା଼ଲାତି କା଼ଚାହାଁ ଡ଼ୟିନେ।

36 ଅ଼ଡ଼େ, ରାଜା ତାନି ମ଼ନ ତଲେ କାମା କିନେସି ଅ଼ଡ଼େ ବାରେ ପେ଼ଣ୍‌କା କିହାଁ ଜାହାରାଇଁ କାଜାସି ଇଞ୍ଜିଁ ବଡପଣ କିନେସି, ଇଞ୍ଜାଁ ମାହାପୂରୁତି ମାହାପୂରୁ କ଼ପାଟି କାଜା କାଜା କାତା ଜ଼ଲିନେସି ଅ଼ଡ଼େ କାର୍‌ବି ପୂରା ଆ଼ନି ପାତେକା ପାଡା ଆ଼ନେସି; ଇଚିହିଁ ଏ଼ନାୟି ତୀରିକିୱି ଆ଼ହାମାନେ, ଏ଼ଦାଆଁ କିୱିଆ଼ନେ। 37 ଏ଼ୱାସି ତାମି ଆକୁ ଆ଼ବାୟାଁତି ପେ଼ଣ୍‌କାଣି ମା଼ନୱି ଆ଼ଅସି; ଅ଼ଡ଼େ ଆୟାସିକା ଅଣ୍‌ପୁ କି ଏ଼ନି ପେ଼ନୁତି ମା଼ନୱି ଆ଼ଅସି; ଇଚିହିଁ ଏ଼ୱାସି ଜାହାରାଇଁ ବାରେ କିହାଁ କାଜାସି କିହା କଡିନେସି। 38 ସାମା ତାନି ଟା଼ୟୁତା ପାଡାଆ଼ତି ଟା଼ୟୁତି ପେ଼ନୁଇଁ ମା଼ନି କିନେସି ଅ଼ଡ଼େ ତାମି ଆକୁୟାଁ ପୁନାଆତି ପେ଼ନୁତି ବାଂଗାରା, ୱେଣ୍ତି, ଦାରାଗାଟି ୱାଲ୍‌କା ଅ଼ଡ଼େ ଅ଼ଜିତି ଆ଼ସ୍ତି ତଲେ ମା଼ନି କିନେସି। 39 ଇଞ୍ଜାଁ ଏ଼ୱାସି ଏଟ୍‌କା ଦେ଼ସାତି ପେ଼ନୁତି ସା଼ୟେମି ତଲେ ପାଡାଆ଼ତି ଟା଼ୟୁ କ଼ପାଟି କାମା କିନେସି, ଆମ୍ବାଆସି ଏ଼ଦାଣି ମା଼ନି କିନେସି, ଏ଼ୱାସି ଏ଼ୱାଣି ଗା଼ୱୁରମି ପାଡିକିନେସି ଅ଼ଡ଼େ ହା଼ରେକା ଲ଼କୁତି ମୁହେଁ ଏ଼ୱାରାଇଁ ସା଼ଲୱିକିନି ପା଼ଣା ହୀନେସି ଅ଼ଡ଼େ ତାନି ଲା଼ବା ତାକି ତାନି ଦେ଼ସାତି ବୂମି ବା଼ଗା କିହା ହୀନେସି।

40 ଅ଼ଡ଼େ, ଡା଼ୟୁ କା଼ଲାତା ମିସର ଦେ଼ସାତି ରାଜା ଏ଼ୱାଣି କ଼ପାଟି ନିଙ୍ଗିନେସି ଅ଼ଡ଼େ ସିରିୟା ଦେ଼ସାତି ରାଜା ରାତାୟାଁ ଅ଼ଡ଼େ ଗ଼ଡ଼ାୟାଁଣା ହ଼ଚାମାନାରାଇଁ ଅ଼ଡ଼େ ହା଼ରେକା ଜା଼ଜାୟାଁ ଅ଼ହାଁ ଏ଼ୱାଣି କ଼ପାଟି ରୁୱାଗା଼ଲି ଲେହେଁ ୱା଼ନେସି, ଅ଼ଡ଼େ ଏ଼ୱାସି ହା଼ରେକା ଦେ଼ସାତା ହ଼ଡାହାଁ କାଡା ୱା଼ରୁ ଲେହେଁ କିହା ହାନେସି। 41 ଏ଼ୱାସି ଜିକେଏ ଅ଼ଜିତି* ଦେ଼ସାତା ହ଼ଡ଼୍‌ନେସି, ଏଚେଟିଏ ହା଼ରେକା ଦେ଼ସାୟାଁ ହା଼ରୱି ଆ଼ନୁ; ସାମା ଇଦମ, ମୟାବ ଅ଼ଡ଼େ ଅମ୍‌ମନ ମୀର୍‌କା ବିତ୍ରାଟି ଏଚେକା ଏ଼ୱାଣି କେୟୁଟି ଗେଲ୍‌ପି ଆ଼ନେରି। 42 ଅ଼ଡ଼େ, ଏ଼ୱାସି ହା଼ରେକା ଦେ଼ସାତା ତାନି କେୟୁ ଦା଼ହ୍‌ନେସି ଅ଼ଡ଼େ ମିସର ଦେ଼ସା ଗେଲ୍‌ପି ଆ଼ଏ। 43 ସାମା ମିସରତି ବାଂଗାରା ଅ଼ଡ଼େ ୱେଣ୍ତିତି ବାରେ ଗା଼ଦେୟିକା, ଅ଼ଡ଼େ ହା଼ରେକା ଦାରାଗାଟି ବାରେ ଆ଼ସ୍ତି ଏ଼ୱାଣି କେୟୁତା ଆ଼ନେ; ଅ଼ଡ଼େ ଲୁବିୟ, କୁସିୟ ଲ଼କୁ ଏ଼ୱାଣି ଜେ଼ଚ ହାନେରି। 44 ସାମା ୱେ଼ଡ଼ା ହ଼ପୁ ଅ଼ଡ଼େ ସିରିୟା ଦେ଼ସାତି କାବ୍ରୁ ଏ଼ୱାଣାଇଁ କିଲିବିଲି କିନେ; ଏଚେଟିଏ ଏ଼ୱାସି କାର୍‌ବି ଆ଼ହାଁ ହା଼ରେକା ଲ଼କୁଇଁ ନା଼ସା କିହାଲି ହ଼ନେସି। 45 ଇଞ୍ଜାଁ ଏ଼ୱାସି ସାମ୍‌ଦୁରି ଅ଼ଡ଼େ ଅ଼ଜିତି ସୁଦୁ ହ଼ରୁତା ଜିକେଏ ତାନି ରା଼ଜିତି ତୂମୁ କେ଼ପିନେସି; ଆ଼ତି ଜିକେଏ ତାନି ରା଼ନି କା଼ଲା ଏଗାୱା଼ନେ, ଅ଼ଡ଼େ ଆମ୍ବାଆସି ଏ଼ୱାଣାଇଁ ସା଼ୟେମି କିଅସି।"