1 ବାବିଲତି ରାଜା ବେଲ୍‌ସସ୍‌ଚର ସା଼ଲୱି କିହିମାଚି ମୂଲୁ ବାର୍ସାତା ଦାନିୟେଲ ତାନି ପା଼ସ୍‌ପନି ଲାକ ହାପାନା ଅ଼ଡ଼େ ମ଼ନତି ଅଣ୍‌ପୁ ମେସ୍ତେସି; ଏଚେଟିଏ ଏ଼ୱାସି ଏ଼ ହାପାନା ରା଼ଚାହାଁ କାତାତି ଅର୍ତ ୱେ଼କ୍‌ହେସି। 2 ଦାନିୟେଲ ଏଲେଇଚେସି, "ନା଼ନୁ ଲା଼ଆଁୟାଁ ହାପାନାତା ମେସ୍ତେଏଁ, ମେହ୍‌ଦୁ, କାଜା ସାମ୍‌ଦୁରି ଲାକ ହା଼ଗୁତି ସା଼ରି ୱାକିଟି ଗା଼ଲି ହା଼ରେକା ୱା଼ତେ। 3 ଇଞ୍ଜାଁ, ରଣ୍ତି ରଣ୍ତାଣି କିହାଁ ଅ଼ର ର଼ଲେତି କାଜା ସା଼ରିଗଟା ଜ଼ନ୍ତ ସାମ୍‌ଦୁରିଟି ହ଼ଚା ୱା଼ତୁ। 4 ମୂଲୁ ଜ଼ନ୍ତ ସିହଁ ଲେହେଁତାୟି ଅ଼ଡ଼େ ଡେ଼ଗା ଲେହେଁ ତାନି ମା଼ରାୟାଁ ମାଚୁ; ନା଼ନୁ ମେସି ମେସି ଏ଼ଦାନି ଏ଼ ମା଼ରାୟାଁତି କେଲ୍‌କା ଡୁଲାହାଚୁ, ଅ଼ଡ଼େ ଏ଼ ଦାର୍‌ତିଟି ନିକ୍‌ହାଁ ମାଣ୍‌ସି ଲେହେଁ ରୀ ପାଃଆନା ତଲେ ଏ଼ଦାନି ନିପ୍‌ୱି ଆ଼ତେ, ଇଞ୍ଜାଁ ଏ଼ଦାନି ମାଣ୍‌ସିତି ହିୟାଁ ହୀପ୍‌କି ଆ଼ତେ।"

5 ଏଚେଟିଏ ମେହ୍‌ଦୁ, ଅ଼ଡ଼େ ରଣ୍ତି, ଇଚିହିଁ, ରୀ ଲମ୍ବର ଜ଼ନ୍ତ ଅଃଅଡ଼ି ଲେହେଁ ମାଚେ, ଏ଼ଦି ର଼ ଟଟତା ନିଙ୍ଗିତେ ଅ଼ଡ଼େ ତାନି ଗୂତିତି ପାଲୁ ବିତ୍ରା ତୀନିଗଟା ପାନ୍ଦ୍ରାୟାଁ ମାଚୁ; ଅ଼ଡ଼େ, ଏ଼ଦାନି ଈ କାତା ୱେସ୍‌ପି ଆ଼ତେ, "ନିଙ୍ଗାମୁ, ହା଼ରେକା ଊଙ୍ଗା ତିନାମୁ।"

6 ଏଚେଟିଏ ନା଼ନୁ ମେସ୍ତେଏଁ, ମେହ୍‌ଦୁ, ତୀରିରେଙ୍ଗ୍‌ଣା ଲେହେଁ ଅ଼ଡ଼େ ର଼ ଜ଼ନ୍ତ, ତାନି ଜେ଼ନୁତା ପଟାତି ସା଼ରିଗଟା ମା଼ରାୟାଁ ମାଚୁ; ଇଞ୍ଜାଁ ଏ଼ ଜ଼ନ୍ତତି ସା଼ରିଗଟା ତା଼ର୍କା ମାଚୁ, ଅ଼ଡ଼େ ଏ଼ଦାନାକି ଅଦିକାରା ହୀପ୍‌କି ଆ଼ତେ।

7 ଏଚେଟିଏ ନା଼ନୁ ଲା଼ଆଁୟାଁ ସେୟାଁଣା ହାପାନାତା ମେସ୍ତେଏଁ, ମେହ୍‌ଦୁ, ସା଼ରି ଲମ୍ବର ଜ଼ନ୍ତ, ଏ଼ଦି ଆଜିହ଼ପେତି ଅଦିକାରା ଗାଟାୟି ଅ଼ଡ଼େ ହା଼ରେକା ବା଼ଡ଼୍‌ୟୁ ଗାଟାୟି ଅ଼ଡ଼େ ଏ଼ଦାନାକି କାଜା କାଜା ଲ଼ହ ପାଲ୍‌କା ମାଚୁ; ଏ଼ଦି ଗୂସ୍ତେ ଅ଼ଡ଼େ ଡିକ୍‌ହାଁ ଗୁଣ୍ତା କିତେ ଅ଼ଡ଼େ ଏ଼ନାୟି ମାଚେ, ଏ଼ଦାଆଁ ପାଃଆନା ଡ଼଼ଇକା ୱିସ୍ତେ; ଅ଼ଡ଼େ, ଏ଼ଦି ତାନି ତଲିତି ବାରେ ଜ଼ନ୍ତୟାଁ କିହାଁ ଏଟ୍‌କା; ଇଞ୍ଜାଁ ଏ଼ଦାନାକି ଦସଗଟା କମ୍‌କା ମାଚୁ। 8 ନା଼ନୁ ଏ଼ କମ୍‌କାତି କାତା ଅଣ୍‌ପି ଅଣ୍‌ପିହିଁ ମେହ୍‌ଦୁ, ଏ଼ ବାରେ ବିତ୍ରା ଅ଼ଡ଼େ ର଼ କମୁ ନିଙ୍ଗିତେ, ଏ଼ଦି ଊଣା, ଏ଼ଦାନି ନ଼କିତା ମୂଲୁ କମ୍‌କା ବିତ୍ରାଟି ତୀନିଗଟା କମ୍‌କା ଡାକିଟି ମେପ୍‌କି ଆ଼ତୁ; ଇଞ୍ଜାଁ ମେହ୍‌ଦୁ, ଈ କମୁତା ମାଣ୍‌ସିତି କାନୁ ଲେହେଁତି କାନୁ ଅ଼ଡ଼େ ଡା଼ହାରା ବ଼ଲୁ ଗାଟି ଗୂତି ମାଚେ।

9 "ନା଼ନୁ ମେସି ମେସି, ଏଚରଗଟା ସିଂଗାସାଣି କିୱିଆ଼ତୁ, ଇଞ୍ଜାଁ ହା଼ରେକା କା଼ଲାତି ଦୂତି ବୁଡ଼୍‌ହା କୁଗିତେସି। ଏ଼ୱାଣି ବାସ୍ତେରି ପେଣ୍ତି ଲେହେଁ ଦବ୍‌ଲା; ଏ଼ୱାଣି ତା଼ର୍ୟୁଁତି ବା଼ଣାୟାଁ ଅପ୍‌ହି ମେ଼ଣ୍ତାତି ବା଼ଣାୟାଁ ଲେହେଁ ମାଚୁ। ଏ଼ୱାଣି ସିଂଗାସାଣି ହିଚୁ ଲେହେଁତାୟି, ଅ଼ଡ଼େ ଏମ୍ବାତି ବିଲାୟାଁ ଡ଼ୀଞ୍ଜିମାନି ହିଚୁ ଗୁଦ୍‌ୱା। 10 ତାନି ନ଼କିଟି ହିଚୁତି କାଡା ହ଼ଚା ୱା଼ତେ; ମା଼ଣା ମା଼ଣା ଏ଼ୱାଣି ସେ଼ବା କିତେରି ଅ଼ଡ଼େ ଦସ ମା଼ଣା ଲ଼କୁ ଏ଼ୱାଣି ନ଼କିତା ନିତେରି। ନୀହାଁୟି କୁଗିତେ, ଅ଼ଡ଼େ ପତିୟାଁ ଦେପି ଆ଼ତୁ।"

11 ଏ଼ କମୁ ୱେସ୍ତି ବଡପଣ ବ଼ଲୁତି ହା଼ଡା ତାକି ଏଚିବେ଼ଲାତା ନା଼ନୁ ସିନିକିତେଏଁ; ନା଼ନୁ ମେସ୍ତେଏଁ, ଡା଼ୟୁ ଏ଼ ଜ଼ନ୍ତ ପା଼ୟ୍‌ୱି ଆ଼ତେ ଅ଼ଡ଼େ ତାନି ଆଙ୍ଗା ନା଼ସା ଆ଼ତେ ଅ଼ଡ଼େ ଏ଼ଦି ହିଚୁତା ହୂଡ୍‌କି ଆ଼ହାଲି ହେର୍‌ପି ଆ଼ତେ। 12 ଇଞ୍ଜାଁ, ଏଟ୍‌କା ଜ଼ନ୍ତ ତା଼ଣାଟି ତାମି ସା଼ଲୱି କିନି ଅଦିକାରା ଅ଼ୱିଆ଼ତେ; ଆ଼ତିଜିକେଏ ର଼ ତୀରି କିହାମାନି ବେ଼ଲା ପାତେକା ନୀଡାଲି ତାମି ବାର୍ସା ପାଡି କିୱିଆ଼ତେ।

13 ନା଼ନୁ ଲା଼ଆଁୟାଁ ସେୟାଁଣା ହାପାନାତା ମେସ୍ତେଏଁ, ଅ଼ଡ଼େ ମେହ୍‌ଦୁ, ମାଣ୍‌ସି ମୀର୍‌ଏସି ସମାନା ର଼ ମାଣ୍‌ସି ହା଼ଗୁତି ଦୂନ୍ଦ୍ରାତା ୱା଼ତେସି; ଏ଼ୱାସି ହା଼ରେକା କା଼ଲାତି ଦୂତି ବୁଡ଼୍‌ହା ନ଼କିତା ୱା଼ତେସି, ଏ଼ୱାରି ଏ଼ୱାଣାଇଁ ତାନି ନ଼କିତା ତାତେରି। 14 ଇଞ୍ଜାଁ, ବାରେ କୂଡ଼ା, ଦେ଼ସାତା ବାସା କିହାମାନି ଲ଼କୁ, ହା଼ରେକା ବା଼ସାଗାଟି ଲ଼କୁ ଏ଼ନିକିଁ ଏ଼ୱାଣାଇଁ ସେ଼ବା କିନେରି, ଏ଼ଦାଆଁତାକି ଏ଼ୱାଣାକି ଅଦିକାରା ଗା଼ୱୁରମି ଅ଼ଡ଼େ ରା଼ଜି ହୀପ୍‌କି ଆ଼ତେ; ଏ଼ୱାଣି ସା଼ଲୱି କିନାୟି କା଼ଲାକା଼ଲା ତାକି ଡ଼ୟିନେ ଏ଼ଦି ଏଚେଲା ଡ଼ୁଗେଏ, ଅ଼ଡ଼େ ତାନି ରା଼ଜି ନା଼ସା ଆ଼ଆଗାଟାୟି।

15 ନା଼ନୁ ଦାନିୟେଲ ନା଼ ଜୀୱୁ ନା଼ ଆଙ୍ଗାତା ଡ଼ୀକି ଆ଼ତେ ଅ଼ଡ଼େ ନା଼ ଅଣ୍‌ପୁତି ସେୟାଁଣା ହାପାନା ନାଙ୍ଗେ କିଲିବିଲି କିୟାତେ। 16 ନା଼ ଟଟତା ଆମ୍ବାଆରି ନିଚାମାଚେରି, ଏ଼ୱାରି ବିତ୍ରାଟି ରଅଣି ତା଼ଣା ନା଼ନୁ ହାଜାହାଁ ଈ ବାରେ କାତା ୱେଚେଏଁ। ଏଚେଟିଏ ଏ଼ୱାସି ନାଙ୍ଗେ ଈ ବାରେତି ଅର୍ତ ତେଲ୍‌ହି କିହାଁ ୱେସ୍ତାତେସି। 17 "ଏ଼ ସା଼ରି କାଜା ଜ଼ନ୍ତୟାଁ ଆ଼ହିମାନୁ ସା଼ରି ଜା଼ଣା ରାଜାୟାଁ, ଏ଼ୱାରି ଦାର୍‌ତିଟି ହ଼ନେରି। 18 ସାମା ବାରେତି ଲାକ ମାନାଣି ସୁଦୁ ଲ଼କୁତି ରା଼ଜି ବେଟାଆ଼ନେରି, ଅ଼ଡ଼େ କା଼ଲାକା଼ଲା ତାକି, ଇଚିହିଁ, କା଼ଲେଏ ତାକି ରା଼ଜି ସା଼ଲୱି କିନେରି।"

19 ଏଚିବେ଼ଲା ଏମିନି ସା଼ରି ଲମ୍ବର ଜ଼ନ୍ତ, ଏଟ୍‌କାତି ଜ଼ନ୍ତ କିହାଁ ଏଟ୍‌କା, ହା଼ରେକା ଆଜିହ଼ପେତାୟି, ଏମିନିଗାଟାଣି ପାଲୁ ଲ଼ହ ଅ଼ଡ଼େ ଗ଼ର୍‌କା ବାରେ ପିତାଡ଼ା ମାଚୁ, ଏମିନିଗାଟାୟି ଗୂସ୍ତେ, ଡିକ୍‌ହାଁ ଗୁଣ୍ତା କିତେ ଅ଼ଡ଼େ ମାଚି ବାରେତି ପାଃଆନା ଡ଼଼ଇକା ୱିସ୍ତେ, ଏ଼ଦାନି କାତା ନା଼ନୁ ପୁଞ୍ଜାଲି ମ଼ନ କିତେଏଁ; 20 ଇଞ୍ଜାଁ, ତାନି ତା଼ର୍ୟୁଁତା ଏମିନି ଦସଗଟା କମ୍‌କା ମାଚୁ ଅ଼ଡ଼େ ଏଟ୍‌କା ଏମିନି କମୁ ନିଙ୍ଗିତେ ଅ଼ଡ଼େ ଏମିନି ଗାଟାଣି ନ଼କିତା ତୀନିଗଟା କମ୍‌କା ରିହାହାଚୁ; ଇଚିହିଁ, ଏ଼ ଏମିନି କମୁତି କାନୁ ଅ଼ଡ଼େ ଡା଼ହାରା ବ଼ଲୁଗାଟି ଗୂତି ମାଚେ, ଆମ୍ବାଆରି ୱା଼ଣା ତାନି ତ଼ଣେସିଙ୍ଗା କିହାଁ ଆଜିହ଼ପେ ମାଚେ, ଏ଼ଦାନି କାତା ପୁଞ୍ଜାଲି ନା଼ନୁ ମ଼ନ କିତେଏଁ।

21 ନା଼ନୁ ମେସ୍ତେଏଁ, ଅ଼ଡ଼େ ଏ଼ କମୁ ସୁଦୁଗାଟାରି ତଲେ ଜୁଜୁ କିତେ ଅ଼ଡ଼େ ଏ଼ୱାରାଇଁ ଜୀଣା ଆ଼ତେ; 22 ଡା଼ୟୁ ଏ଼ ହା଼ରେକା କା଼ଲାତି ଦୂତି ବୁଡ଼୍‌ହା ୱା଼ତେସି ଅ଼ଡ଼େ ବାରେ କିହାଁ ଲାକ ମାନି ସୁଦୁ ଗାଟାରାକି ନୀହାଁୟି ବ଼ଜୁ ହୀପ୍‌କି ଆ଼ତେ ଅ଼ଡ଼େ ସୁଦୁଗାଟାରି ରା଼ଜିକିନି ବେ଼ଲା ଏଦାତେ।

23 ଏ଼ୱାସି ଇଲେକିଁ ଏଲେଇଚେସି, "ସା଼ରି ଲମ୍ବର ଜ଼ନ୍ତ ଦାର୍‌ତିତା ସା଼ରି ଲମ୍ବର ରା଼ଜି ଆ଼ନେ, ଏ଼ଦି ଏଟ୍‌କା ବାରେ ରା଼ଜି କିହାଁ ଏଟ୍‌କା ଆ଼ନେ ଅ଼ଡ଼େ ବାରେ ଦାର୍‌ତିତି ଗୂହ୍‌ନେ, ଅ଼ଡ଼େ ୱିସାହାଁ ଗାଣ୍ତ୍ରା ଗାଣ୍ତ୍ରା କିନେ ଅ଼ଡ଼େ ଏ଼ଦି ଡିକ୍‌ହା ତୁହ୍‌ନେ। 24 ଇଞ୍ଜାଁ, ଏ଼ ଦସଗଟା କମ୍‌କାତି କାତା ଈଦି, ଏ଼ ରା଼ଜିଟି ଦସ ଜା଼ଣା ରାଜାୟାଁ ହ଼ନେରି; ଏ଼ୱାରି ଡା଼ୟୁ ଅ଼ଡ଼େ ରଅସି ହ଼ନେସି। ଏ଼ୱାସି ମୂଲୁତାରା କିହାଁ ଏଟ୍‌କା ଆ଼ନେସି ଅ଼ଡ଼େ ଏ଼ୱାସି ତୀନି ଜା଼ଣା ରାଜାୟାଁଣି ହା଼ରୱି କିନେସି। 25 ଇଞ୍ଜାଁ, ଏ଼ୱାସି ମାହାପୂରୁ କ଼ପାଟି କାତା ଜ଼ଲିନେସି ଅ଼ଡ଼େ ମାହାପୂରୁତି ସୁଦୁ ଲ଼କୁଣି ହା଼ରୱି କିନେସି; ଅ଼ଡ଼େ, ଏ଼ୱାସି କା଼ଲମି ଇଞ୍ଜାଁ ମେ଼ରାତି ତିରିମ୍ଣିପ୍‌ହାଲି ଅଣ୍‌ପିନେସି; ଇଞ୍ଜାଁ, ର଼ କା଼ଲମି ରୀ ସୁଦୁ ପାର୍ବୁ ଅ଼ଡ଼େ ର଼ ପାର୍ବୁତି ଆଦା* ପାତେକା ଏ଼ୱାରି ତାନି କେୟୁତା ହେର୍‌ପି ଆ଼ନେରି। 26 ସାମା ନୀହାଁୟି କୁଗିନେ, ଅ଼ଡ଼େ ଏ଼ୱାରି ଡା଼ୟୁ ପାତେକା ତାନି ସା଼ଲୱି କିନାଣି ତା଼ଣା ନା଼ସା କିହାଲି ଏ଼ୱାଣି ତା଼ଣାଟି ଏ଼ଦାଆଁ ଅ଼ନେରି। 27 ସା଼ଲୱି କିନି ବାର୍ସା ଅ଼ଡ଼େ ବା଼ଡ଼୍‌ୟୁ ଅ଼ଡ଼େ ହା଼ଗୁପା଼କା ଡ଼଼ଇତି ରା଼ଜିୟାଁତି ଗା଼ୱୁରମି, ବାରେ କିହାଁ କାଜା ମାହାପୂରୁତି ଲ଼କୁକି ହୀପ୍‌କିଆ଼ନେ; ତାନି ରା଼ଜି କା଼ଲେଏତାୟି, ରା଼ଜି ଅ଼ଡ଼େ ସା଼ଲୱି କିନାରି ତାନି ସେ଼ବା କିନେରି ଅ଼ଡ଼େ ମା଼ନୱି ଆ଼ନେରି।"

28 ଈଦି ଈ କାବ୍ରୁତି କାତା ରା଼ତେ, ନା଼ନୁ ଦାନିୟେଲ, ନା଼ ଅଣ୍‌ପୁ ନାଙ୍ଗେ କିଲିବିଲି କିୟାତେ ଅ଼ଡ଼େ ନା଼ ମୂମ୍ବୁ ୱା଼ଡ଼ିତେ ସାମା ନା଼ନୁ ଏ଼ କାତା ନା଼ ମ଼ନତା ଇଟିତେଏଁ।