ବେଲ୍ସସ୍ଚର ତାକି କୂଡୁତା ରା଼ଚିତାୟି
1 ରାଜା ବେଲ୍ସସ୍ଚର ର଼ ଦିନା ଲା଼ଆଁୟାଁ ତାନି ର଼ ମା଼ଣା କାଜାରି ତାକି ର଼ କାଜା ବ଼ଜି କିତେସି ଅ଼ଡ଼େ ଏ଼ ର଼ ମା଼ଣା ଲ଼କୁ ନ଼କିତା ଅଙ୍ଗୁରି ରାସା ଗସ୍ତେସି। 2 ଅଙ୍ଗୁରି ରାସା ଗସି ଗସିହିଁ ବେଲ୍ସସ୍ଚର ହୁକୁମି ହୀତେସି ବାଂଗାରା ଅ଼ଡ଼େ ୱେଣ୍ତିତି ଏମିନି ଆ଼ସ୍ତି ନା଼ ଆ଼ବା ନବକୁଦ୍ନିସ୍ଚର ଜିରୁସାଲମ ଦେ଼ୱୁଡ଼ିଟି ତାଚାମାଚେସି, ଏ଼ୱାଆଁ ତାଦୁ, ରାଜା ଅ଼ଡ଼େ ତାନି କାଜାରି, ଇଞ୍ଜାଁ ତାନି ଡକ୍ରିସିକା ଅ଼ଡ଼େ ଊଣା ଡକ୍ରିସିକା ତଲେ ଗହ୍ନେସି। 3 ଏଚେଟିଏ ଜିରୁସାଲମ ଦେ଼ୱୁଡ଼ିଟି, ଇଚିହିଁ, ମାହାପୂରୁ ଇଲୁଟି ଏମିନି ବାଂଗାରାତି ବାରେ ଆ଼ସ୍ତି ତାପି ଆ଼ହାମାଚୁ, ଏ଼ୱାଆଁ ଲ଼କୁ ତାତେରି; ଇଞ୍ଜାଁ ରାଜା ଅ଼ଡ଼େ ତାନି କାଜାରି, ତାନି ଡକ୍ରିସିକା ଅ଼ଡ଼େ ଊଣା ଡକ୍ରିସିକା ଏ଼ ବାରେ ତା଼ଣା ଗସ୍ତୁ। 4 ଏ଼ୱାରି ଅଙ୍ଗୁରି ରାସା ଗସି ଗସିହିଁ ବାଂଗାରା, ୱେଣ୍ତି, ପିତାଡ଼ା, ଲ଼ହ, ଗୁଟୁ ଅ଼ଡ଼େ ୱାଲି ତଲେ କେ଼ପିତି ପେ଼ନୁଇଁ ରା଼ହାଁ କିତେରି।
5 ଏ଼ ଦେବୁଣିଏ ମାଣ୍ସି କେୟୁତି ୱାଞ୍ଜୁ ୱା଼ହାଁ ରାଜା ଇଲୁତି କୂଡୁତି ଦୀୱଁ ଉଜେଡ଼ି ମିଣ୍ସିମାଚି ତା଼ଣା ରା଼ଚିତେ, ଅ଼ଡ଼େ ରାଜା ଏ଼ ରା଼ଚି ମାଚି କେୟୁତି ମେସ୍ତେସି। 6 ଏଚେଟିଏ ରାଜା ମୂମ୍ବୁ ହାପ୍ଲି ଆ଼ତେ ଅ଼ଡ଼େ ତାନି ଅଣ୍ପୁ ଏ଼ୱାଣାଇଁ କିଲିବିଲି କିତେ; ଇଞ୍ଜାଁ ତାନି ହାନ୍ଦିବନ୍ଦି ଡ଼ହଡ଼ାହା ଆ଼ହାଁ ମେଣ୍ତାୟାଁ ତୀର୍ଗାଲି ମା଼ଟ୍ହୁ। 7 ଏଚେଟିଏ ରାଜା ଗୂଣିୟାଙ୍ଗା, କଲ୍ଦିୟ ଅ଼ଡ଼େ ପା଼ଞ୍ଜି ସିନିକିନାରାଇଁ ତାଚାଲି ତାକି କାଜା ଗିୟାଁ ତଲେ ହା଼ଟିତେସି। ରାଜା ବାବିଲତି ବୁଦିଗାଟି ଲ଼କୁଣି ଏଲେଇଚେସି, ଆମ୍ବାଆସି ଈ ରା଼ଚିତାଣି ପ଼ଡ଼ୱି ଆ଼ନେସି ଅ଼ଡ଼େ ନାଙ୍ଗେ ଏମ୍ବାତି ଅର୍ତ ୱେସ୍ତାନେସି, ଏ଼ୱାସି ହେୟାଁ ୱା଼ଣାଗାଟି ବାସ୍ତେରି ତୁର୍ୱି କିୱିଆ଼ନେସି ଅ଼ଡ଼େ ତାନି ହେର୍କିତା ବାଂଗାରା ପୂସାୟାଁ ତୁର୍ୱି ଆ଼ନୁ, ଅ଼ଡ଼େ ଏ଼ୱାସି ରା଼ଜିତି ତୀନି ଲମ୍ବର ସା଼ଲୱି କିନାସି ଆ଼ନେସି। 8 ଏଚେଟିଏ ରାଜାତି ବାରେ ବୁଦିଗାଟି ଲ଼କୁ ବିତ୍ରା ୱା଼ତେରି; ସାମା ଏ଼ୱାରି ରା଼ଚିତାଣି ପ଼ଡ଼ୱି ଆ଼ହାଲି ଆ଼ଡାଆତେରି, କି ରାଜାଇଁ ଏମ୍ବାତି ଅର୍ତ ପୁଣ୍ମ୍ବି କିହାଲି ଆ଼ଡାଆତେରି। 9 ଏ଼ଦାଆଁତାକି ରାଜା ବେଲ୍ସସ୍ଚର ହା଼ରେକା କିଲିବିଲି ଆ଼ତେସି ଅ଼ଡ଼େ ତାନି ମୂମ୍ବୁ ହାପ୍ଲି ଆ଼ତେ, ଅ଼ଡ଼େ ତାନି କାଜାରି କାବା ଆ଼ତେରି।
10 ଈ ବେ଼ଲାତା ରାଜା ଅ଼ଡ଼େ ତାନି କାଜାରି କାତା ତାକି ରା଼ଣି ତିନି ତା଼ଣା ୱା଼ତେ; ରା଼ଣି ଏଲେଇଚେ, "ହେ଼ ରାଜା, କା଼ଲେଏ ତାକି ନୀଡାମୁ; ନୀ ଅଣ୍ପୁ ନିଙ୍ଗେ କିଲିବିଲି କିୟାଆପେ, କି ନୀ ମୂମ୍ବୁ ହାପ୍ଲି ଆ଼ଆପେ। 11 ନୀ ରା଼ଜିତା ରଅସି ମାନେସି, ତାନି ହିୟାଁତା ସୁଦୁ ମାହାପୂରୁତି ଜୀୱୁ ମାନେ; ଇଞ୍ଜାଁ, ନୀ ତାଞ୍ଜି ବେ଼ଲାତା ମାହାପୂରୁତି ବୁଦି ଲେହେଁ ବୁଦିତି ଉଜେଡ଼ି ତାନି ତା଼ଣା ତ଼ଞ୍ଜା ଆ଼ହାମାଚେ; ଅ଼ଡ଼େ, ନୀ ତାଞ୍ଜି ରାଜା ନବକୁଦ୍ନିସ୍ଚର, ହାଅ, ନୀ ତାଞ୍ଜି ରାଜା, ଏ଼ୱାଣାଇଁ ଗୂର୍କା, କଲ୍ଦିୟ, ପା଼ଞ୍ଜି ସିନିକିନାରି ଅ଼ଡ଼େ ସ଼ଗୁ ସିନିକିନାରି ଲାକ କାଜାସି କିହାଁ ଆ଼ଚାମାଚେସି; 12 ଇଚିହିଁ ଏ଼ ଦାନିୟେଲତି ହିୟାଁତା କାଜା ଜୀୱୁ, ବୁଦି, ହାପାନା ଅର୍ତ କିହାଲି ଅ଼ଡ଼େ ଡ଼ୁଗାମାନି କାତା ତେଲ୍ହି କିହାଲି ଅ଼ଡ଼େ ଆନାମାନାତି ହେକ କିହାଲି ବା଼ଡ଼୍ୟୁ ମାନେ, ରାଜା ଏ଼ୱାଣାଇଁ ବେଲଟ୍ସସ୍ର ଦ଼ରୁ ଇଟାମାଚେସି। ନୀଏଁ ଦାନିୟେଲଇଁ ହା଼ଟ୍କି ଆ଼ପେ, ଏ଼ୱାସି ଅର୍ତ ୱେ଼କ୍ନେସି।"
ଦାନିୟେଲ ରା଼ଚି ତାଣି ଅର୍ତ ୱେହ୍ନାୟି
13 ଏଚେଟିଏ ଦାନିୟେଲଇଁ ରାଜା ତା଼ଣା ତାପିଆ଼ତେ, ରାଜା ଦାନିୟେଲଇଁ ଏଲେଇଚେସି, "ନା଼ ଆ଼ବା ରାଜା ଜୀହୁଦା ଦେ଼ସାଟି ଆମ୍ବାଆରାଇଁ ତାଚା ମାଚେସି, ଏ଼ ଦସ୍ପି ଆ଼ତି ଜୀହୁଦି ଲ଼କୁ ବିତ୍ରା ଏମିନି ଦାନିୟେଲ ମାଚେସି, ଏ଼ୱାତି କି ନୀନୁ ? 14 ନା଼ନୁ ନୀ କାତାତି ୱେଞ୍ଜାମାଇଁ, ନୀ ହିୟାଁତା ମାହାପୂରୁତି ଜୀୱୁ ମାନେ, ବୁଦି ଅ଼ଡ଼େ ଉଜେଡ଼ି, ବୁଦି ଅ଼ଡ଼େ କାଜା ବୁଦି ନୀ ତା଼ଣା ତ଼ଞ୍ଜାଆ଼ନେ। 15 ନୀଏଁ ଈ ରା଼ଚିତାଣି ପ଼ଡ଼ୱି ଆ଼ହାଲି ଅ଼ଡ଼େ ଏମ୍ବାତି ଅର୍ତ ନାଙ୍ଗେ ୱେସାଲି ବୁଦିଗାଟି ଲ଼କୁ ଅ଼ଡ଼େ ଗୂର୍କା ନା଼ ତା଼ଣା ତାପି ଆ଼ହାମାନେରି; ସାମା ଏ଼ୱାରି ଏମ୍ବାତି ଅର୍ତ ୱେ଼କ୍ହାଲି ଆ଼ଡାଆତେରି। 16 ସାମା ନୀ କାତା ନା଼ନୁ ୱେଞ୍ଜାମାଇଁ, ନୀନୁ ଅର୍ତ ୱେ଼କ୍ହାଲି ଅ଼ଡ଼େ ଆନାମାନା ହେକ କିହାଲି ଆ଼ଡିଦି; ନୀଏଁ ଈ ରା଼ଚିତାଣି ପ଼ଡ଼ୱି ଆ଼ହାଁ ଏମ୍ବାତି ଅର୍ତ ନାଙ୍ଗେ ୱେସାଲି ଆ଼ଡାଦି, ଆତିହିଁ ନୀନୁ ହେୟାଁ ୱା଼ଣାତି ବାସ୍ତେରି ତୁର୍ୱିଆ଼ଦି, ଇଞ୍ଜାଁ ନୀ ହେର୍କିତା ବାଂଗାରା ପୂସାୟାଁ ହୀପ୍କି ଆ଼ନୁ ଅ଼ଡ଼େ ନୀନୁ ରା଼ଜିତି ତୀନି ଲମ୍ବର ସା଼ଲୱି କିନାତି ଆ଼ଦି।"
17 ଏଚିବେ଼ଲା ଦାନିୟେଲ ରାଜାଇଁ ଏଲେଇଚେସି, ନୀ ଦା଼ନା ନିଙ୍ଗେ ମାଣ୍ମ୍ବେ ଅ଼ଡ଼େ ନୀ ଦା଼ନା ଏଟ୍କାତାରାକି ହୀମୁ; ଆ଼ତିଜିକେଏ ନା଼ନୁ ରାଜା ନ଼କିତା ଈ ରା଼ଚିତାଣି ପ଼ଡ଼ୱି ଆ଼ଇଁ ଅ଼ଡ଼େ ଅର୍ତ ନିଙ୍ଗେ ୱେସ୍ତାଇଁ।
18 ହେ଼ ରାଜା, ବାରେ କିହାଁ କାଜା ମାହାପୂରୁ ନୀ ଆ଼ବା ନବକୁଦ୍ନିସ୍ଚରକି ରା଼ଜି, ସାମ୍ବ୍ରମି, ଗା଼ୱୁରମି ଅ଼ଡ଼େ ବା଼ଡ଼୍ୟୁ ହୀତେସି; 19 ଅ଼ଡ଼େ, ଏ଼ୱାସି ଏ଼ୱାଣାକି ଇଲେତି ସାମ୍ବ୍ରମି ହୀତାକି ବାରେ କୂଲୁ, ବାରେ ଦେ଼ସା ଅ଼ଡ଼େ ବା଼ସାଗାଟି ଲ଼କୁ ତାନି ନ଼କିତା ତୀର୍ଗାହାଁ ଆଜିତେରି; ଆମ୍ବାଆରାଇଁ ତାନି ମ଼ନ, ଏ଼ୱାଣାଇଁ ଏ଼ୱାସି ପା଼ୟିତେସି ଅ଼ଡ଼େ ଆମ୍ବାଆରାଇଁ ତାନି ମ଼ନ, ଏ଼ୱାଣାଇଁ ଏ଼ୱାସି ଜୀୱୁ ତଲେ ଇଟିତେସି; ଇଞ୍ଜାଁ, ଆମ୍ବାଆରାଇଁ ତାନି ମ଼ନ, ଏ଼ୱାସି ଏ଼ୱାଣାଇଁ ପେର୍ହେସି ଅ଼ଡ଼େ ଆମ୍ବାଆରାଇଁ ତାନି ମ଼ନ, ଏ଼ୱାଣାଇଁ ଏ଼ୱାସି ହୀଣି କିତେସି। 20 ସାମା ଏ଼ୱାସି ବଡପଣ ଆ଼ତାକି, ତାନି ହିୟାଁ ଆ଼ଟ୍ୱା ଆ଼ହାଁ ଏ଼ୱାସି ଡା଼ହାରା ତଲେ ଲେ଼ମ୍ବାଲିଏ, ଏ଼ୱାସି ତାନି ରାଜା ସିଂଗାସାଣିଟି କୁତ୍ପି ଆ଼ତେସି ଅ଼ଡ଼େ ତାନି ମା଼ନି ତାନି ତା଼ଣାଟି ଜା଼କ୍ହେସି। 21 ଇଞ୍ଜାଁ ଏ଼ୱାସି ମାଣ୍ସି କୁଟମିଟିଏ ହେକ ଆ଼ତେସି, ଅ଼ଡ଼େ ତାନି ହିୟାଁ ଜ଼ନ୍ତ ଲେହେଁ ଆ଼ତେ ଅ଼ଡ଼େ ଜା଼ଡ଼ାତି ଗା଼ଡ଼୍ଦେ ତଲେ ବାସା କିତେସି; ଏ଼ୱାସି ଡ଼ୁକି କ଼ଡି ଲେହେଁ ହାରା ମେୟିଁତେସି, ଅ଼ଡ଼େ ତାନି ଆଙ୍ଗା ହା଼ଗୁତି ମାଚୁ ତଲେ ଊଦିତେ; ଡା଼ୟୁ ଏ଼ୱାସି ପୁଚେସି ବାରେକିହାଁ କାଜା ମାହାପୂରୁ ମାଣ୍ସିୟାଁ ରା଼ଜିତା ସା଼ଲୱି କିନେସି ଅ଼ଡ଼େ ଆମ୍ବାଆରାକି ଏ଼ୱାଣି ମ଼ନ ଏ଼ୱାଣାକି ହୀନେସି।
22 "ହେ଼ ବେଲ୍ସସ୍ଚର ନୀନୁ ତାନି ମୀର୍ଏଣାତି, ଈ ବାରେ ନୀନୁ ପୁଚି ଜିକେଏ, ନୀନୁ ନୀ ମ଼ନ ଊଣା କିହାହିଲଅତି। 23 ସାମା ଲାକପୂରୁତି କାଜାଣି କ଼ପାଟି ଜାହାରାଇଁ କାଜାତି କିହାମାଞ୍ଜି ଅ଼ଡ଼େ ତାନି ଇଲୁତି ବାରେ ଆ଼ସ୍ତି ନୀ ନ଼କିତା ତାପି ଆ଼ହାଲିଏ, ନୀନୁ ଅ଼ଡ଼େ ନୀ ତା଼ଣା ମାନି କାଜାରି, ନୀ ଡକ୍ରିସିକା ଊଣା ଡକ୍ରିସିକା ତଲେ ଅଙ୍ଗୁରି ରାସା ଗସାମାଞ୍ଜେରି; ଇଞ୍ଜାଁ ୱେଣ୍ତି, ବାଂଗାରା, ପିତାଡ଼ା, ଲ଼ହ, ଗୁଟୁ ଅ଼ଡ଼େ ୱାଲିତି ଏମିନି ପେ଼ଣ୍କା ମେହ୍ଉ, କି ୱେନାଉ, କି ପୁନାଉ, ଏ଼ୱାସିକାଇଁ ନୀନୁ ରା଼ହାଁ କିହାମାଞ୍ଜି; ଇଞ୍ଜାଁ, ନୀ ନେସ୍ତେରି ଆମ୍ବାଆରି କେୟୁତା ମାନେ, ନୀନୁ ଏ଼ ମାହାପୂରୁତି ଗା଼ୱୁରମି କିହାହିଲଅତି। 24 ଈ ବେ଼ଲାତା ତାନି ତା଼ଣାଟି କେୟୁତି ବା଼ଗା ପାଣ୍ତ୍କି ଆ଼ତେ, ଅ଼ଡ଼େ ଈ ରା଼ଚିନାୟି ରା଼ସ୍କି ଆ଼ତେ।"
25 "ଇଞ୍ଜାଁ, ଏ଼ନାୟି ରା଼ସ୍କି ଆ଼ତେ, ଏ଼ଦି ଈଦି, ‘ମିନେ ମିନେ, ତକେଲ, ଉପାରସିନ।’ 26 ଈଦାନି ଅର୍ତ ଈଦି ‘ମିନେ,’ ମାହାପୂରୁ ନୀ ରା଼ଜିତି ଏଜି କିହାମାନେସି ଅ଼ଡ଼େ ଏ଼ଦାଆଁ ରା଼ପ୍ହା ମାନେସି। 27 ‘ତକେଲ,’ ନୀନୁ କେ଼ଜିତା ତୂପ୍କି ଆ଼ହାମାଞ୍ଜି ଇଞ୍ଜାଁ ତୂକା ଊଣା ତ଼ଞ୍ଜାଆ଼ତି। 28 ‘ଉପାରସିନ,’ ନୀ ରା଼ଜି ବା଼ଗା ଆ଼ହାମାନେ, ମାଦିୟ ଅ଼ଡ଼େ ପାରସିକ ଲ଼କୁକି ହୀପ୍କି ଆ଼ହାମାନେ।"
29 ଏଚିବେ଼ଲା ବେଲ୍ସସ୍ଚର ହୁକୁମି କିହାଲିଏ, ଲ଼କୁ ଦାନିୟେଲଇଁ ହେୟାଁ ୱା଼ଣାତି ବାସ୍ତେରି ତୁର୍ୱି କିତେରି ଅ଼ଡ଼େ ତାନି ହେର୍କିତା ବାଂଗାରା ପୁସାଁ ହୀତେରି ଅ଼ଡ଼େ ଏ଼ୱାସି ରାଜାତି ତୀନି ଲମ୍ବର ସା଼ଲୱି କିନାସି ଆ଼ନେସି ଇଞ୍ଜିଁ ଏ଼ୱାଣି କାତା ୱେ଼କ୍ହେରି। 30 ଏ଼ ଲା଼ଆଁୟାଁ କଲ୍ଦିୟତି ରାଜା ବେଲ୍ସସ୍ଚର ପା଼ୟ୍ୱି ଆ଼ତେସି।
ଅ଼ଡ଼େ ମାଦିୟ ଦାରିୟାବସ ରା଼ଜି ସା଼ଲୱି କିହାଲି ତାକି ପା଼ଣା ବେଟାଆ଼ତେସି, ଏଚିବେ଼ଲାତା ଏ଼ୱାଣାକି ତୀନି କ଼ଡ଼ି ରୀ ବାର୍ସା ଆ଼ହାମାଚେ।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)