1 ମାଦିୟ କୂଡ଼ାତା ଜାର୍ନାଆ଼ତି ଅକେସରସ ମୀର୍‌ଏସି ଦାରିୟାବସ କଲ୍‌ଦିୟ ରା଼ଜିତା ସା଼ଲୱି କିହାଲି ତାକି ହୀପ୍‌କି ଆ଼ହାମାଚେ। 2 ଏ଼ୱାଣି ସା଼ଲୱି କିତି ମୂଲୁ ବାର୍ସାତା ନା଼ନୁ, ଦାନିୟେଲ, ସା଼ସ୍ତେରି ତଲେ ବାର୍ସାତି ଲେକା ଇଚିହିଁ, ଜିରୁସାଲମତି ନା଼ସାଆ଼ତି ବେ଼ଲାତି ତୀନି କ଼ଡ଼ି ଦସ ବାର୍ସା ଆ଼ନି କାତା ପ୍ରବୁତି ଏମିନି ମାହାପୂରୁ ବ଼ଲୁ ୱେହ୍‌ନି ଜିରିମିୟ ତା଼ଣା ୱା଼ହାମାଚେ, ଏ଼ଦାଆଁ ନା଼ନୁ ତେଲ୍‌ହିତେଏଁ। 3 ଏ଼ଦାଆଁତାକି ନା଼ନୁ ଗ଼ଣି ତୁର୍‌ହାଁ ଅ଼ଡ଼େ ଦାର୍‌ମ୍ବୁ ରୁବାକଡାହାଁ ଉପାସା ଅ଼ଡ଼େ ପ୍ରା଼ତାନାତା ବାତିମା଼ଲିହିଁ ପ୍ରବୁ ମାହାପୂରୁଇଁ ପାରାଲି ତାକି ଏ଼ୱାଣି ୱାକି ସିନିକିତେଏଁ। 4 ଇଞ୍ଜାଁ, ନା଼ନୁ ପ୍ରବୁ ନା଼ ମାହାପୂରୁ ତା଼ଣା ପ୍ରା଼ତାନା କିତେଏଁ ଅ଼ଡ଼େ ପା଼ପୁ ୱେ଼କ୍‌ହାନା ଏଲେଇଚେଏଁ, "ଏ଼ ପ୍ରବୁ, ନୀନୁ କାଜାତି ଅ଼ଡ଼େ ଆଜିହ଼ପେତି ମାହାପୂରୁ, ଆମ୍ବାଆରି ନିଙ୍ଗେ ଜୀୱୁ ନୟାଁନେରି ଅ଼ଡ଼େ ନୀ ହୁକୁମି ମା଼ନୱି ଆ଼ନେରି, ନୀନୁ ନୀ ରା଼ଜିମା଼ନା ତୀରି କିହାଁ ଇଟିଦି ଅ଼ଡ଼େ ଏ଼ୱାରାଇଁ କା଼ଲେଏ କାର୍ମା ମେହ୍‌ଦି।"

5 "ମା଼ମ୍ବୁ ପା଼ପୁ ଅ଼ଡ଼େ ଲାଗେଏତି ମାଣ୍‌କି, ଲାଗେଏ କାମା କିହାଁ ସାତ୍ରୁ ଆ଼ହା ମାନମି, ଅ଼ଡ଼େ ନୀ ମେ଼ରା ଇଞ୍ଜାଁ ସା଼ଲୱି କିନି ଜିରୁ ପିସା ମାନମି। 6 ଇଞ୍ଜାଁ, ନୀ ଏମିନି ହ଼ଲିୟାଙ୍ଗା ମାହାପୂରୁ ବ଼ଲୁ ୱେହ୍‌ନାରି, ମା଼ ରାଜାୟାଁ, ମା଼ ସା଼ଲୱି କିନାରି ଅ଼ଡ଼େ ଆକୁ ଆ଼ବାୟାଁ, ଅ଼ଡ଼େ ଦେ଼ସାତି ଲ଼କୁଣି ନୀ ଦ଼ରୁ ତଲେ କାତା ଆ଼ତେରି, ମା଼ମ୍ବୁ ଏ଼ୱାରି କାତା ୱେନାଆତମି। 7 ହେ଼ ପ୍ରବୁ ନୀନୁ କା଼ଲେଏ ଦାର୍ମୁତି କାମା କିନାତି, ସାମା ମା଼ମ୍ବୁ କା଼ଲେଏ ଲାଜା ବେଟାଆ଼ହି ମାନମି, ଇଚିହିଁ ଜିରୁସାଲମତା ବାସା କିହାମାନି ବାରେ ଜୀହୁଦା, ଡାଗେ ଅ଼ଡ଼େ ହେକତି ବାରେ ଇସ୍ରାୟେଲ ଲ଼କୁ ନୀ ସାତାତି ଊରାମାନାକି, ଦେ଼ସା ଦେ଼ସାତା ସିନାସାତ୍ରା କିହାମାଞ୍ଜି ଏ଼ ବାରେ ଲାଜା ଆ଼ହିମାନେରି। 8 ହେ଼ ପ୍ରବୁ ମା଼ ରାଜାୟାଁ, ମା଼ ସା଼ଲୱି କିନାରି ଅ଼ଡ଼େ ମା଼ ଆକୁ ଆ଼ବାୟାଁ ତଲେ ନୀ କ଼ପାଟି ପା଼ପୁ କିହାମାନେରି, ଏ଼ଦାଆଁତାକି ମାଙ୍ଗେ ଲାଜା ହ଼ଚିମାଞ୍ଜାନେ। 9 ହା଼ରେକା କାର୍ମା ଅ଼ଡ଼େ ପା଼ପୁ ମ୍ଣେକ୍‌ନାୟି ମା଼ ପ୍ରବୁ ମାହାପୂରୁୱାୟି; ଇଚିହିଁ ମା଼ମ୍ବୁ ନୀ କ଼ପାଟି ଗଡ଼୍‌ହା କିହାମାନମି 10 ଏ଼ୱାସି ମାହାପୂରୁ ବ଼ଲୁ ୱେହ୍‌ନାରି ତା଼ଣାଟି ତାନି ଏମିନି ମେ଼ରା ମା଼ ନ଼କିତା ଇଟିତେସି, ଏ଼ ମେ଼ରା ତଲେ ତା଼କାଲି ମା଼ମ୍ବୁ ପ୍ରବୁ ମା଼ ମାହାପୂରୁ ହା଼ଡା ମା଼ନୱି ଆ଼ହାହିଲଅମି। 11 ବାରେ ଇସ୍ରାୟେଲ ନୀ ମେ଼ରା ଊରାମାନେରି, ନୀ ହା଼ଡାତା ଏ଼ନିକିଁ ଏ଼ୱାରି ମ଼ନ ହୀଅରି, ଏ଼ଦାଆଁତାକି ଏ଼ୱାରି ଏଟ୍‌କା ଜିରୁ ହାଜିମାନେରି, ଏ଼ଦାଆଁତାକି ବା଼କା ଅ଼ଡ଼େ ମାହାପୂରୁତି ସେ଼ବା କିନି ମ଼ସାତି ମେ଼ରାତା ରା଼ସ୍‌କି ଆ଼ତି ପାର୍‌ମାଣା ମାଙ୍ଗେ ହୀପ୍‌କି ଆ଼ହାମାନେ; ଇଚିହିଁ ମା଼ମ୍ବୁ ତାନି କ଼ପାଟି ପା଼ପୁ କିହାମାନମି। 12 ଏ଼ୱାସି ମାଙ୍ଗେ ହା଼ରେକା ଲାଗେଏ କିହାମାନାକି ମା଼ କ଼ପାଟି ଏମିନି ବିଚାରା କିନାରି ମାଙ୍ଗେ ବିଚାରା କିୟାତେରି, ଏ଼ୱାରି କ଼ପାଟି ଏ଼ନାଆଁ ୱେସାମାଚେରି, ତାନି ଏ଼ ବ଼ଲୁ ଏ଼ୱାସି ପୂରା କିହାମାନେସି; ଇଚିହିଁ ଜିରୁସାଲମତା ଏ଼ନାଆଁ କିୱି ଆ଼ହାମାନେ, ବାରେ ହା଼ଗୁ ଡ଼଼ଇ ଏଲେକିୱି ଆ଼ହାହିଲେଏ। 13 ମ଼ସା ମେ଼ରାତା ରା଼ସ୍‌କି ଆ଼ତି ଲେହେଁ ଈ ବାରେ ଲାଗେଏତାୟି ମାଙ୍ଗେ ଆ଼ହାମାଞ୍ଜାନେ; ଆ଼ତିଜିକେଏ ମା଼ର ମା଼ ଲାଗେଏତି କାମାଟି ୱେଣ୍ତାଲି ତାକି ଅ଼ଡ଼େ ନୀ ସାତାତି ତେଲ୍‌ହାଲି ତାକି ପ୍ରବୁ ମା଼ ମାହାପୂରୁ ନ଼କିତା ବାତିମା଼ଲା ହିଲାଆୟି। 14 ଈଦାଆଁତାକି ପ୍ରବୁ ନେହିକିଁ ଅଣ୍‌ପାହାଁ ମାଙ୍ଗେ କସ୍ତ ହୀହାମାଞ୍ଜାନେସି; ଇଚିହିଁ ମା଼ ପ୍ରବୁ ମାହାପୂରୁ ଏମିନି କାମା କିନେସି, ଏ଼ ବାରେ କାମାତା ଦାର୍ମୁଗାଟାସି, ସାମା ମା଼ମ୍ବୁ ଏ଼ୱାଣି ହା଼ଡା ୱେନାଆତମି।"

15 "ହେ଼ ପ୍ରବୁ, ମା଼ ମାହାପୂରୁ, ନୀ ବା଼ଡ଼୍‌ୟୁଗାଟି କେୟୁଟି ମିସର ଦେ଼ସାଟି ନୀ ଲ଼କୁଣି ହ଼ପ୍‌ହା ତାଚାହାଁ ନୀଞ୍ଜୁତି ନୀହାଁୟି କିନି ପା଼ଣା ବେଟାଆ଼ହାମାଞ୍ଜି; ମା଼ମ୍ବୁ ପା଼ପୁ କିହାମାନମି, ମା଼ମ୍ବୁ ଲାଗେଏତି କାମା କିହାମାନମି। 16 ହେ଼ ପ୍ରବୁ, ବାତିମା଼ଲି ମାଞ୍ଜାଇଁ, ନୀ ବାରେ ଦାର୍ମୁ ତଲେ ନୀ ଗା଼ଡ଼ା ଜିରୁସାଲମ, ନୀ ସୁଦୁ ହ଼ରୁତି ନୀ କାର୍‌ବି ଅ଼ଡ଼େ କ଼ପା ସାପି ଆ଼ପେ; ଇଚିହିଁ ମା଼ ପା଼ପୁ ଅ଼ଡ଼େ ମା଼ ଆକୁ ଆ଼ବାୟାଁ କିତି ଲାଗେଏତି କାମା ତାକି ଜିରୁସାଲମ ଅ଼ଡ଼େ ନୀ ଲ଼କୁ ମା଼ ସା଼ରିସୁଟୁ ମାନି ଲ଼କୁତି ନିନ୍ଦାଗାଟାରି ଆ଼ହାମାନେରି। 17 ଏ଼ଦାଆଁତାକି ହେ଼ ମା଼ ମାହାପୂରୁ, ନୀଏଁ ନୀ ହ଼ଲେଏଣା ପ୍ରା଼ତାନା ଅ଼ଡ଼େ ବାତିମା଼ଲିନାଣି କିର୍ୟୁଁ ଅଡାହାଁ ୱେନାମୁ ଅ଼ଡ଼େ ନୀ ଈ ଏମିନି ଦାର୍ମୁ ଟା଼ୟୁ ନା଼ସା ଆ଼ହାମାନେ, ଏ଼ଦାଆଁତାକି ପ୍ରବୁ ନୀ ମୂମ୍ବୁତି ଉଜେଡ଼ି ତ଼ସାହାଁ ନୀ ଦ଼ରୁ ତାକି କିମୁ। 18 ହେ଼ ନା଼ ମାହାପୂରୁ, କିର୍ୟୁଁ ଅଡାହାଁ ୱେନାମୁ; ନୀ କାନୁ ଦେଚାହାଁ ମା଼ ନା଼ସା ଆ଼ହାମାନି ଦେ଼ସା ଅ଼ଡ଼େ ନୀ ଦ଼ରୁଟି ୱେ଼ଙ୍ଗିତି ଗା଼ଡ଼ା ସିନିକିମୁ; ଇଚିହିଁ ମା଼ମ୍ବୁ ମା଼ ଦାର୍ମୁ ତାକି ଆ଼ଏ, ସାମା ନୀ କାଜା କାର୍ମା ମେହ୍‌ନାଣି ତାକି ମା଼ମ୍ବୁ ନିଙ୍ଗେ ବାତିମା଼ଲି ମାଞ୍ଜାନମି। 19 ହେ଼ ପ୍ରବୁ, ୱେନାମୁ, ହେ଼ ପ୍ରବୁ, ପା଼ପୁ ମ୍ଣେକ୍‌ହାମୁ; ହେ଼ ପ୍ରବୁ ମ଼ନ ହୀହାଁ କାମା କିମୁ; ୱେ଼ଡ଼ା କିଆନି; ହେ଼ ନା଼ ମାହାପୂରୁ, ନୀ ତାକି କାମା କିମୁ, ଇଚିହିଁ ନୀ ଗା଼ଡ଼ା ଅ଼ଡ଼େ ନୀ ଲ଼କୁ ନୀ ଦ଼ରୁତା ୱେ଼ଙ୍ଗିତାରି।"

20 ଇଲେକିଁ ନା଼ନୁ ବାତିମା଼ଲିହିଁ ପ୍ରା଼ତାନା କିହି ମାଚେଏଁ, ଇଞ୍ଜାଁ ନା଼ ପା଼ପୁ ଅ଼ଡ଼େ ନା଼ ଇସ୍ରାୟେଲ ଲ଼କୁତି ପା଼ପୁ ୱେ଼କ୍‌ହି ମାଚେଏଁ, ଅ଼ଡ଼େ ନା଼ ମାହାପୂରୁତି ସୁଦୁ ହ଼ରୁ ତାକି ପ୍ରବୁ ନା଼ ମାହାପୂରୁଇଁ ନା଼ନୁ ବାତିମା଼ଲି ମାଚେଏଁ; 21 ଇଲେକିଁ ନା଼ନୁ ପ୍ରା଼ତାନା କିହିଁ କିହିଁ ତଲିତି ସେୟାଁଣା ହାପାନାତା ନା଼ନୁ ଆମ୍ବାଆରାଇଁ ମେସାମାଚେଏଁ, ଏ଼ ମାଣ୍‌ସି ଗାବ୍ରିୟେଲ ତବେ ଊମ୍ବାଲି ହୁକୁମି ବେଟାଆ଼ହାଁ ମିଡ଼୍‌ଅଲା ପୂଜା କିନି ବେ଼ଲାତା ୱା଼ହାଁ ନାଙ୍ଗେ ଡୀଗାତେସି। 22 ଇଞ୍ଜାଁ ଏ଼ୱାସି ନାଙ୍ଗେ ଜା଼ପ୍‌ହାତେସି ଅ଼ଡ଼େ ନା଼ ତଲେ କାତା ଆ଼ହାଁ ଏଲେଇଞ୍ଜାତେସି, "ହେ଼ ଦାନିୟେଲ ନା଼ନୁ ନୀଏଁ ନିଙ୍ଗେ ୱା଼ହିମାନି ଦିନାତି କାତା ତେଲ୍‌ହି କିହାଲି ୱା଼ହାମାଇଁ। 23 ନୀ ବାତିମା଼ଲିନି ବେ଼ଲାତା ହୁକୁମି ଆ଼ତେ, ଅ଼ଡ଼େ ନିଙ୍ଗେ ୱେସାଲି ନା଼ନୁ ୱା଼ହାମାଇଁ, ଇଚିହିଁ ନୀନୁ ଜୀୱୁତି ଲ଼କୁ; ଈଦାଆଁତାକି ଈ କାତା ଅଣ୍‌ପାମୁ ଅ଼ଡ଼େ ଈ ସେୟାଁଣା ହାପାନାତି କାତା ତେଲ୍‌ହାମୁ।"

24 "ହୁକୁମି ଊରିନାଣି ରା଼ପ୍‌ହାଲି ଅ଼ଡ଼େ ପା଼ପୁତି ରା଼ପ୍‌ହାଲି ଲାଗେଏତି କାମାତି ପୂଜା ଅ଼ଡ଼େ କା଼ଲେଏ ଡ଼ୟିନି ଦାର୍ମୁ ତାଚାଲି ଇଞ୍ଜାଁ ସେୟାଁଣା ହାପାନା ଅ଼ଡ଼େ ନ଼କିତା ଆ଼ନି ବ଼ଲୁ ବୁଟୁ ମୁଦ୍ରା କିହାଲି ଅ଼ଡ଼େ ସୁଦୁ ଟା଼ୟୁତି ବ଼ର ହୀହାଲି ନୀ ଲ଼କୁ ଅ଼ଡ଼େ ନୀ ସୁଦୁ ଗା଼ଡ଼ା ତାକି ତୀନି କ଼ଡ଼ି ଦସା ୱା଼ରା ତୀରି ଆ଼ହାମାନେ। 25 ଏ଼ଦାଆଁତାକି ନୀନୁ ପୁନାମୁ ଅ଼ଡ଼େ ତେଲ୍‌ହାମୁ, ଜିରୁସାଲମତି ୱେଣ୍ତେ ତୀରି କିହାଲି ଅ଼ଡ଼େ ତିୟାରା କିହାଲି ହୁକୁମି ହୀପ୍‌କିଆ଼ତି ଦିନାଟିଏ ସା଼ଲୱି କିନାସି, ବ଼ରଗାଟି ମାଣ୍‌ସିତି ପାତେକା ସା଼ତା ୱା଼ରା ଆ଼ନେ; ଇଞ୍ଜାଁ, କସ୍ତତି ବେ଼ଲାତା ଏ଼ଦି ସାହ୍‌ଡ଼ା ଅ଼ଡ଼େ ତାୟିପାରି କିନାଣି ତଲେ ତୀନି କ଼ଡ଼ି ରୀ ୱା଼ରା ୱେଣ୍ତେ ତିୟାରା ଆ଼ନେ। 26 ଇଞ୍ଜାଁ, ତୀନି କ଼ଡ଼ି ରୀ ୱା଼ରା ଡା଼ୟୁ ଆ଼ଚିତି ମାଣ୍‌ସି ପା଼ୟ୍‌ୱି ଆ଼ନେସି ଅ଼ଡ଼େ ଏ଼ୱାସି ଏ଼ନାଆଁ କିହାଲି ଆ଼ଡଅସି; ଅ଼ଡ଼େ, ଡା଼ୟୁ ସା଼ଲୱି କିହାଲି ୱା଼ନାଣି ଲ଼କୁ ଗା଼ଡ଼ା ଅ଼ଡ଼େ ଦାର୍ମୁତି ଇଲୁ ନା଼ସା କିନେରି ଅ଼ଡ଼େ ଏ଼ ସା଼ଲୱି କିନାସି ରା଼ଜି ବୀଡ଼ୱି ଆ଼ନିଲେହେଁ ନା଼ସା ଆ଼ନେସି, ଇଞ୍ଜାଁ ରା଼ନି ପାତେକା ଜୁଜୁ ଆ଼ନେ; ଅ଼ଡ଼େ ଏ଼ୱାଣି ନା଼ସା ଆ଼ନାୟି ତୀରି ଆ଼ହାମାନେ। 27 ଇଞ୍ଜାଁ, ଏ଼ୱାସି ର଼ ୱା଼ରା ପାତେକା ହା଼ରେକା ତଲେ ଆ଼ଟ୍‌ୱା ରା଼ଜିମା଼ନା କିନେସି ଅ଼ଡ଼େ ୱା଼ରାତି ଆଦା ଦିନା ହୂଡିନି ପୂଜା ପିସ୍‌ପି କିନେସି; ଅ଼ଡ଼େ, ଅ଼ପାଆଗାଟି ଦିଣ୍‌ସୁ ବାରେ ନା଼ସା କିନାସି ରଅସି ୱା଼ନେସି; ଇଞ୍ଜାଁ, ତୀରି କିହାମାନାୟି ଆ଼ନି ପାତେକା ନା଼ସା କିନାଣି ଲାକ କାର୍‌ବି ୱା଼କ୍‌ନେସି।"