ଦାନି 12

ରା଼ନି ବେ଼ଲା

1 "ଏଚିବେ଼ଲାତା ମୀ ଲ଼କୁତି ମୀର୍‌କାଣି ସା଼ୟେମି କିନି କାଜା ଦୂତୁ ମିକାୟେଲ ନିନେ, ଅ଼ଡ଼େ ମାଣ୍‌ସି କୂଡ଼ାତି ତୀରିତି କା଼ଲାଟିଏ ଏ଼ କା଼ଲା ପାତେକା ଏ଼ନିଲେହେଁତି କସ୍ତତି ଦିନା ଏଚେଲା ଆ଼ହାହିଲେଏ, ଇଲେତି କସ୍ତତି କା଼ଲା ୱା଼ନେ, ଅ଼ଡ଼େ ମୀ କୂଡ଼ାତି ଏମିନି ବାରେତି ଦ଼ର୍‌କା ପତିତା ରା଼ସ୍‌କି ଆ଼ହାମାନେ, ଏ଼ୱାରି ବାରେ ଏ଼ ବେ଼ଲାତା ଗେଲ୍‌ପି ଆ଼ନେରି। 2 ଇଞ୍ଜାଁ ଦାର୍‌ତିତି ଦୂଡ଼ିତା ଆମିନିଗାଟାରି ଡୂରିନେରି, ଏ଼ୱାରି ବିତ୍ରାଟି ହା଼ରେକା ତେଃଏଲିନେରି; ଏଚର ଜା଼ଣା କା଼ଲେଏତି ଜୀୱୁ ଅ଼ଡ଼େ କଚେକା ଲାଜା ଇଞ୍ଜାଁ କା଼ଲେଏତି ଡଣ୍ତ ବେଟାଆ଼ହାଲି ତାକି ନିଙ୍ଗିନେରି।