1 ଏଚେଟିଏ ନବକୁଦ୍‌ନିସ୍‌ଚର ସା଼ଲୱି କିହିମାଚି କା଼ଲାତି ରୀ ବାର୍ସାତା, ନବକୁଦ୍‌ନିସ୍‌ଚର ହାପାନା ହେ଼ଟେସି; ଏଚେଟିଏ ତାନି ଜୀୱୁ କିଲିବିଲି ଆ଼ତେ ଅ଼ଡ଼େ ଏ଼ୱାଣାକି ଇଦା ୱା଼ଆତେ। 2 ଏଚେଟିଏ ରାଜା ତାନି ହାପାନାତି କାତା ୱେସାଲି ତାକି ରାଜା ଗୂର୍‌କା, ସ଼ଗୁ ସିନିକିନାରାଇଁ ଗାର୍‌ଡ଼ି କିନାରାଇଁ ଅ଼ଡ଼େ କଲ୍‌ଦିୟ ଲ଼କୁଣି ହା଼ଟାଲି ତାକି ହୁକୁମି ହୀତେସି। ଏଚେଟିଏ ଏ଼ୱାରି ୱା଼ହାଁ ରାଜା ନ଼କିତା ନିତେରି। 3 ଏଚେଟିଏ ରାଜା ଏ଼ୱାରାଇଁ ଏଲେଇଚେସି, "ନା଼ନୁ ର଼ ହାପାନା ହେ଼ଣ୍ତାମାଇଁ, ଅ଼ଡ଼େ ଏ଼ ହାପାନାତି କାତା ପୁଞ୍ଜାଲି ତାକି ନା଼ ମ଼ନ ଅଣ୍‌ପିମାନେ।"

4 ଏଚେଟିଏ କଲ୍‌ଦିୟ ଲ଼କୁ ଅରାମିୟ ହା଼ଡା ତଲେ ରାଜାଇଁ ଏଲେଇଚେରି, "ଏ଼ ରାଜା କା଼ଲେଏ ତାକି ନୀଡାମୁ; ନୀ ହ଼ଲିୟାଙ୍ଗାଣି ହାପାନା ୱେହ୍‌ମୁ, ମା଼ମ୍ବୁ ଏମ୍ବାତି ଅର୍ତ ୱେହ୍‌ନମି।"

5 ରାଜା କଲ୍‌ଦିୟ ଲ଼କୁଣି ଏଲେଇଚେସି, "ନା଼ ତା଼ଣାଟି କାତା ହ଼ଚା ହ଼ଚାମାନେ; ମୀରୁ ଏ଼ ହାପାନା ଅ଼ଡ଼େ ଏମ୍ବାତି ଅର୍ତ ନାଙ୍ଗେ ୱେସ୍ତାଆସାରେ, ମୀରୁ ଗାଣ୍ତ୍ରା ଗାଣ୍ତ୍ରା କିହିଁ ଦା଼ପି ଆ଼ଦେରି ଅ଼ଡ଼େ ମୀ ଇଲ୍‌କା ଗାତାକ଼ଟି କିୱିଆ଼ନୁ। 6 ସାମା ମୀରୁ ହାପାନା ଅ଼ଡ଼େ ଏମ୍ବାତି ଅର୍ତ ୱେସ୍ତାଦେରି, ଆତିହିଁ ମୀରୁ ନା଼ ତା଼ଣାଟି ଦା଼ନା ଅ଼ଡ଼େ କାଜା ମା଼ନି ବେଟାଆ଼ଦେରି; ଏ଼ଦାଆଁତାକି ଏ଼ ହାପାନା ଅ଼ଡ଼େ ଏମ୍ବାତି ଅର୍ତ ନା଼ ତା଼ଣା ୱେସ୍ତାଦୁ।"

7 ଏ଼ୱାରି ରୀ ଦେବାତାକି ଏଲେଇଚେରି, "ରାଜା, ନୀ ହ଼ଲିୟାଙ୍ଗାଣି ହାପାନା ୱେହ୍‌ମୁ, ଏଚେଟିଏ ମା଼ମ୍ବୁ ଅର୍ତ ୱେହ୍‌ନମି।"

8 ରାଜା ଏଲେଇଚେସି, "ନା଼ ତା଼ଣାଟି କାତା ହ଼ଚାମାନେ, ଈଦାଆଁ ମେସାହାଁ ମୀରୁ ୱେ଼ଡ଼ା କିହାଲି ଅଣ୍‌ପିମାଞ୍ଜେରି, ଈ କାତା ନା଼ନୁ ସାତେଏ ପୁଞ୍ଜିମାଇଁ। 9 ସାମା ମୀରୁ ଏ଼ ହାପାନା ନାଙ୍ଗେ ୱେସ୍ତଅତେରି; ଆତିହିଁ ମୀ ତାକି ର଼ ହୁକୁମି ମାନେ; ଇଚିହିଁ ବେ଼ଲା ତିରିମ୍ଣିନି ପାତେକା ମୀରୁ ନା଼ ନ଼କିତା ମିଚି ଅ଼ଡ଼େ ନା଼ଡ଼ିକିନି କାତା ୱେସାଲି ତେଗା ମାଞ୍ଜେରି; ଏ଼ଦାଆଁତାକି ହାପାନାତି ୱେସ୍ତାଦୁ, ଆତିହିଁ ମୀରୁ ଏମ୍ବାତି ଅର୍ତ ନା଼ ନ଼କିତା ୱେସାଲି ଆ଼ଡିଦେରି, ଈଦାଆଁ ନା଼ନୁ ପୁଇଁ।"

10 କଲ୍‌ଦିୟ ଲ଼କୁ ରାଜାଇଁ ଏଲେଇଚେରି, "ରାଜାତି କାତା ୱେସାଲି ଆ଼ଡିନେସି, ଇଲେତି ମାଣ୍‌ସି ଦାର୍‌ତିତା ଆମ୍ବାଆସି ହିଲଅସି; ଇଚିହିଁ ଏମିନି ରାଜା, ପ୍ରବୁ କି ସା଼ଲୱି କିନାସି ଜିକେଏ ଏମିନି ଗୂର୍‌କାଣି, ପା଼ଞ୍ଜି ସିନିକିନାରାଇଁ କି କଲ୍‌ଦିୟ ଲ଼କୁଣି ଇଲେତି କାତା ୱେଞ୍ଜାହିଲଅରି। 11 ରାଜା ଏ଼ନାଆଁ ୱେଞ୍ଜି ମାନେସି ଏ଼ଦି ପୁନାଆତି କାତା ଆମ୍ବାଆରି ଆଙ୍ଗାତା ଊଙ୍ଗା ହିଲାଉ, ଏ଼ ପେ଼ଣ୍‌କା ପିସ୍‌ପେ ଅ଼ଡ଼େ ଆମ୍ବାଆରି ରାଜା ନ଼କିତା ଏ଼ଦାଆଁ ୱେସାଲି ଆ଼ଡଅରି।"

12 ଈଦାଆଁତାକି ରାଜା ହା଼ରେକା କାର୍‌ବି ଆ଼ହାଁ ବାବିଲତି ବାରେ ବୁଦି ଗାଟାରାଇଁ ପା଼ୟାଲି ହୁକୁମି ହୀତେସି। 13 ଏଚେଟିଏ ହୁକୁମି ହୀପ୍‌କିଆ଼ତେ କି ବୁଦିଗାଟି ଲ଼କୁ ପା଼ୟ୍‌ୱି ଆ଼ନେରି; ଅ଼ଡ଼େ ଲ଼କୁ ଦାନିୟେଲ ଇଞ୍ଜାଁ ତାନି ତ଼ଣେସିଙ୍ଗାଣି ପା଼ୟାଲି ତାକି ପାରିତେରି।

14 ବାବିଲତି ବୁଦି ଗାଟାରାଇଁ ପା଼ୟାଲି ହ଼ଚାମାନି ରାଜାଇଁ କା଼ଃନାରି କିହାଁ କାଜାସି ଅରିୟକ୍‌ଇଁ ଦାନିୟେଲ ନେହିକିଁ ଅଣ୍‌ପାହାଁ ବୁଦି ତଲେ ଏଲେଇଚେସି; 15 ଦାନିୟେଲ ରାଜାତି କା଼ଃନାରି କିହାଁ କାଜାସି ଅରିୟକ୍‌ଇଁ ଏଲେଇଚେସି, "ରାଜା ହୁକୁମି ଇଚେକା ତବେ ଏ଼ନାଆଁକି ?" ଏଚେଟିଏ ଅରିୟକ୍‌ ଦାନିୟେଲଇଁ ବାରେ କାତା ୱେସ୍ତେସି।

16 ଏଚେଟିଏ ଦାନିୟେଲ ରାଜା ତା଼ଣା ହାଜାହାଁ ତାଙ୍ଗେ ତାକି ର଼ ବେ଼ଲା ତୀରି କିହାଲି ବାତିମା଼ଲିତେସି, ଏଲେ କିତିସାରେ ରାଜାତି ନ଼କିତା ହାପାନାତି ଅର୍ତ ୱେହ୍‌ଇଁ ଇଞ୍ଜିଁ ଇଚେସି। 17 ଏଚେଟିଏ ଦାନିୟେଲ ତାନି ଇଲୁତା ହାଚେସି, ଅ଼ଡ଼େ, ଏ଼ୱାସି ଇଞ୍ଜାଁ ତାନି ତ଼ଣେସିଙ୍ଗା ଏ଼ନିକିଁ ବାବିଲତି ବାରେ ବୁଦିଗାଟାରି ତଲେ ନା଼ସା ଆ଼ଅରି, 18 ଏ଼ଦାଆଁତାକି ଈ ଡ଼ୁଗାମାନି କାତାତାକି ଲାକପୂରୁ ମାହାପୂରୁ କାର୍ମା ମେସାଲି ପ୍ରା଼ତାନା କିହାଲି ତାକି ତାନି ତ଼ଡ଼ୁ ହନାନିୟ, ମିସାୟେଲ, ଅ଼ଡ଼େ ଅସରିୟଇଁ ଏ଼ କାତା ପୁଣ୍‌ମ୍ବି କିତେସି। 19 ଏ଼ ଲା଼ଆଁୟାଁ ବେ଼ଲାତା ଏ଼ ଡ଼ୁଗାମାନି କାତା ଦାନିୟେଲକି ତ଼ଞ୍ଜାଆ଼ତେ। ଏଚେଟିଏ ଦାନିୟେଲ ଲାକପୂରୁତି ମାହାପୂରୁଇଁ ଜହରା କିତେସି। 20 ଦାନିୟେଲ ଏଲେଇଚେସି,

"ମାହାପୂରୁତି ଦ଼ରୁ କା଼ଲେଏ ଜହରା ଆ଼ପେ;

ଇଚିହିଁ ବୁଦି ଅ଼ଡ଼େ ବା଼ଡ଼୍‌ୟୁ ତାନିୱାୟି;

21 ଅ଼ଡ଼େ, ଏ଼ୱାସି ବେ଼ଲା ଅ଼ଡ଼େ କା଼ଲମି ବାଦ୍‌ଲି କିନେସି;

ଏ଼ୱାସି ରାଜାୟାଁଣି ପା଼ଣାଟି ରେ଼ପ୍‌ନେସି ଅ଼ଡ଼େ ରାଜାୟାଁଣି ପା଼ଣା ହୀନେସି;

ଏ଼ୱାସି ବୁଦି ଗାଟାରାକି ବୁଦି ଅ଼ଡ଼େ ତେଲ୍‌ହିନାଣି ହୀନେସି;

22 ଏ଼ୱାସି ବିତ୍ରାତି ଡ଼ୁଗାମାନି କାତା ବାରେ ୱେ଼କ୍‌ନେସି;

ଆନ୍ଦେରିତା ଏ଼ନାୟି ମାନେ, ଏ଼ଦାଆଁ ଏ଼ୱାସି ପୁନେସି ଅ଼ଡ଼େ ତାନି ତା଼ଣା ଉଜେଡ଼ି ବାସା କିନେ।

23 ଏ଼ ନା଼ ଆକୁ ଆ଼ବାୟାଁତି ମାହାପୂରୁ, ନା଼ନୁ ନିଙ୍ଗେ ଜହରା ଅ଼ଡ଼େ ଗା଼ୱୁରମି କିହିମାଞ୍ଜାଇଁ,

ଏ଼ନାଆଁତାକି ଇଚିହିଁ ନୀନୁ ନାଙ୍ଗେ ବୁଦି ଅ଼ଡ଼େ ବା଼ଡ଼୍‌ୟୁ ହୀହାମାଞ୍ଜାଦି,

ଅ଼ଡ଼େ ନୀ ତା଼ଣା ମା଼ ବାତିମା଼ଲିତି କାତା ନୀଏଁ ନାଙ୍ଗେ ପୁଣ୍‌ମ୍ବି କିହାମାଞ୍ଜାଦି; ଇଚିହିଁ ନୀନୁ ରାଜାତି କାତା ମାଙ୍ଗେ ପୁଣ୍‌ମ୍ବି କିହାମାଞ୍ଜାଦି।"

24 ଏଚେଟିଏ ବାବିଲତି ବୁଦି ଗାଟାରାଇଁ ନା଼ସା କିହାଲି ତାକି ରାଜା ହେର୍‌ପାମାନି ଅରିୟକ୍‌ ତା଼ଣା ଦାନିୟେଲ ହାଚେସି; ଏ଼ୱାସି ହାଜାହାଁ ଏ଼ୱାଣାଇଁ ଇଲେକିଁ ଏଲେଇଚେସି, "ବାବିଲତି ବୁଦି ଗାଟାରାଇଁ ପା଼ୟାଆନି; ରାଜା ତା଼ଣା ନାଙ୍ଗେ ଅୟାମୁ, ନା଼ନୁ ରାଜା ତା଼ଣା ହାପାନାତି ଅର୍ତ ୱେହ୍‌ଇଁ।"

25 ଏଚେଟିଏ ଅରିୟକ୍‌ ଦାନିୟେଲଇଁ ତବେ ରାଜା ତା଼ଣା ଅ଼ହାଁ ରାଜାଇଁ ଏଲେଇଚେସି, "ଦସ୍‌ପି ଆ଼ହାଁ ୱା଼ହାମାନି ଜୀହୁଦା ମୀର୍‌କା ବିତ୍ରା ନା଼ନୁ ର଼ ମାଣ୍‌ସିଇଁ ବେଟାଆ଼ହାମାଇଁ, ଏ଼ୱାସି ରାଜାଇଁ ଅର୍ତ ପୁଣ୍‌ମ୍ବି କିନେସି।"

26 ରାଜା ଏ଼ ଦାନିୟେଲ, ଆମିନିଗାଟାଣି ଦ଼ରୁ ବେଲଟ୍‌ସସ୍‌ର ମାଚେ, ଏ଼ୱାଣାଇଁ ଏଲେଇଚେସି, "ନା଼ନୁ ଏମିନି ହାପାନା ହେ଼ଣ୍ତାମାଇଁ, ନୀନୁ କି ଏ଼ଦାଆଁ ଅ଼ଡ଼େ ଏମ୍ବାତି ଅର୍ତ ନାଙ୍ଗେ ୱେସାଲି ଆ଼ଡାଦି ?"

27 ଦାନିୟେଲ ରାଜା ନ଼କିତା ଏଲେଇଚେସି, "ରାଜା ଏମିନି ଡ଼ୁଗାମାନି କାତା ୱେଞ୍ଜାମାନେସି, ଏ଼ଦାଆଁ ବୁଦିଗାଟି ଲ଼କୁ କି ପା଼ଞ୍ଜି ସିନିକିନାରି, ଗୂର୍‌କା ଇଞ୍ଜାଁ ୱା଼ନି ଦିନାତି କାତା ୱେହ୍‌ନାରି ରାଜା ନ଼କିତା ୱେଞ୍ଜାମାନି କାତା ୱେସାଲି ଆ଼ଡଅରି; 28 ସାମା ଆମ୍ବାଆସି ଡ଼ୁଗାମାନି କାତା ୱେ଼କ୍‌ନେସି, ଇଲେତି ର଼ ମାହାପୂରୁ ଲାକପୂରୁ ମାନେସି, ଅ଼ଡ଼େ ରା଼ନି କା଼ଲାତା ଏ଼ନା ଏ଼ନାୟି ଆ଼ନେ, ଏ଼ଦାଆଁ ଏ଼ୱାସି ରାଜା ନବକୁଦ୍‌ନିସ୍‌ଚରଇଁ ୱେସାମାନେସି। ନୀ ହାପାନା ଅ଼ଡ଼େ ପା଼ସ୍‌ପନିତା ହେ଼ଟି ସେୟାଁଣା ହାପାନା ଈଦି।"

29 ଏ଼ ରାଜା, ପା଼ସ୍‌ପନି ଲାକ ନୀ ମ଼ନତା ୱା଼ନି ଦିନାତି କାତା ଅଣ୍‌ପୁ ୱା଼ତେ; ଅ଼ଡ଼େ ଆମ୍ବାଆସି ଡ଼ୁଗାମାନାଣି ତ଼ହ୍‌ନେସି, ଏ଼ନାୟି ଆ଼ନେ, ଏ଼ଦାଆଁ ଏ଼ୱାସି ନିଙ୍ଗେ ତାକି ତ଼ସାମାଞ୍ଜାନେସି। 30 ସାମା ଏ଼ନି ଜୀୱୁଗାଟି ଲ଼କୁତି ବୁଦି କିହାଁ ନା଼ ବୁଦି ହା଼ରେକା ମାନେ ଇଞ୍ଜିଁ ଈ ଡ଼ୁଗାମାନି କାତା ୱେ଼ପ୍‌କି ଆ଼ହିମାନେ, ଏ଼ଦି ଆ଼ଏ, ସାମା ରାଜାକି ଏ଼ନିକିଁ ଅର୍ତ ପୁଣ୍‌ମ୍ବି କିୱିଆ଼ନେ ଅ଼ଡ଼େ ନୀନୁ ଏ଼ନିକିଁ ନୀ ମ଼ନତି ଅଣ୍‌ପୁ ପୁଞ୍ଜି, ଏ଼ଦାଆଁତାକି ଏ଼ଦି ନା଼ ତା଼ଣା ତ଼ସ୍‌ପି ଆ଼ହାମାନେ।

31 ହେ଼ ରାଜା, ନୀନୁ ମେସି ମେସି କାଜା ବମା ମେସ୍ତି, ହା଼ରେକା ଅପ୍‌ହାୟି ଅ଼ଡ଼େ ମିଣ୍‌ସିମାଚି ଏ଼ ବମା ନୀ ନ଼କିତା ନିତେ ଅ଼ଡ଼େ ଏ଼ଦି ୱା଼ଣା ଆଜିହ଼ପେତାୟି ମାଚେ। 32 ଏ଼ ବମାତି ତା଼ର୍ୟୁଁ ଅଟ୍‌ହି ବାଂଗାରା, ତାନି ବକ ଅ଼ଡ଼େ ବାହାୟାଁ ୱେଣ୍ତି, ତାନି ବାଣ୍ତି ଅ଼ଡ଼େ କୁଦ୍‌ଗୁୟାଁ ପିତାଡ଼ା, 33 ତାନି କଡାୟାଁ ଲ଼ହ ଅ଼ଡ଼େ ତାନି ପାଃଆନାୟାଁ ର଼ ବା଼ଗା ଲ଼ହ, ଅ଼ଡ଼େ ର଼ ବା଼ଗା ଇର୍‌ଆ ମାଚେ। 34 ନୀନୁ ସିନି କିହିଁ କିହିଁ ଡା଼ୟୁ ଆମ୍ବାଆସି ଡୀଗାଆତି ର଼ ୱାଲି ଏ଼ ବମାତି ଲ଼ହ ଅ଼ଡ଼େ ଇର୍‌ଆଗାଟି ପାଃଆନା ଲାକ ରିହାଁ ଗାଣ୍ତ୍ରା ଗାଣ୍ତ୍ରା କିହିଁ ଡିକ୍‌ହାତୁସ୍ତେ। 35 ଏଚେଟିଏ ଲ଼ହ, ଇର୍‌ଆ, ପିତାଡ଼ା, ୱେଣ୍ତି ଅ଼ଡ଼େ ବାଂଗାରା ରହେଁଏ ଗାଣ୍ତ୍ରା ଗାଣ୍ତ୍ରା ଆ଼ହିଁ ଡ଼ିଗାହାଚୁ, ଅ଼ଡ଼େ କାରା ବେ଼ଲାତି କା଼ଡ଼୍‌ନୁତି ପ଼ଡ଼ୁ ଲେହେଁ ଆ଼ତେ; ଅ଼ଡ଼େ ଗା଼ଲି ଏ଼ ବାରେତି ଊପ୍‌ହା ଆ଼ତେ, ଏ଼ ବାରେ ତାକି ଟା଼ୟୁ ମେ଼ଡ଼ା ଆ଼ଆତେ; ଇଞ୍ଜାଁ, ଏ଼ ବମାଇଁ ରିହାମାଚି ଏମିନି ୱାଲି, ଏ଼ଦି ପାଡା ଆ଼ହାଁ ର଼ କାଜା ହ଼ରୁ ଲେହେଁ ପାଡା ଆ଼ତେ, ଅ଼ଡ଼େ ବାରେ ଦାର୍‌ତି ପିଡ଼୍‌କ୍‌ହେ।

36 "ଈଦି ଏ଼ ହାପାନା; ନୀଏଁ ନା଼ନୁ ରାଜା ନ଼କିତା ଏମ୍ବାତି ଅର୍ତ ପୁଣ୍‌ମ୍ବି କିଇଁ। 37 ଏ଼ ରାଜା, ନୀନୁ ରାଜା କିହାଁ ରାଜାତି; ଲାକପୂରୁତି ମାହାପୂରୁ ନିଙ୍ଗେ ରା଼ଜି, ବା଼ଡ଼୍‌ୟୁ, ଅଦିକାରା ଅ଼ଡ଼େ ଗା଼ୱୁରମି ହୀହା ମାଞ୍ଜାନେସି। 38 ଏମିନି ଟା଼ୟୁତା ମାଣ୍‌ସି ମୀର୍‌କା ବାସା କିନେରି, ଏ଼ ଟା଼ୟୁତି ଜା଼ଡ଼ା ଜ଼ନ୍ତ ଅ଼ଡ଼େ ହା଼ଗୁତି ପଟା କା଼ଟି ଏ଼ୱାସି ନୀ କେୟୁତା ହେର୍‌ପା ମାଞ୍ଜାନେସି ଅ଼ଡ଼େ ଏ଼ ବାରେତି ଲାକ ନିଙ୍ଗେ ସା଼ଲୱି କିହାଲି ହୀହାମାଞ୍ଜାନେସି; ନୀନୁ ଏ଼ ବାଂଗାରାଗାଟି ତା଼ର୍ୟୁଁତି। 39 ଇଞ୍ଜାଁ ନୀ ଡା଼ୟୁ ନୀ କିହାଁ ଊଣା ର଼ ରା଼ଜି ନିଙ୍ଗିନେ ଅ଼ଡ଼େ ଏ଼ଦାନି ଡା଼ୟୁ ପିତାଡ଼ାତି ତୀନି ଲମ୍ବର ର଼ ରା଼ଜି ନିଙ୍ଗିନେ, ଏ଼ଦି ବାରେ ଦାର୍‌ତିତି ସା଼ଲୱି କିନେ। 40 ଇଞ୍ଜାଁ, ସା଼ରି ଲମ୍ବର ରା଼ଜି ଲ଼ହ ଲେହେଁ ଆ଼ଟ୍‌ୱା ଆ଼ନେ; ଇଚିହିଁ ଲ଼ହ ଏ଼ନିକିଁ ବାରେ ଦିଣ୍‌ସୁଇଁ ଗାଣ୍ତ୍ରା ଗାଣ୍ତ୍ରା କିନେ ଅ଼ଡ଼େ ଲ଼ହ ଏ଼ନିକିଁ ଈ ବାରେ ଗୁଣ୍ତା କିନେ, ଏଲେକିହିଁ ଏ଼ ରା଼ଜି ଗାଣ୍ତ୍ରା ଗାଣ୍ତ୍ରା କିହିଁ ଡିକ୍‌ହାଁ ବାରେ ଗୁଣ୍ତା କିନେ। 41 ଅ଼ଡ଼େ ନୀନୁ ଏ଼ନିକିଁ ମେସ୍ତି, ପାଃଆନା ଅ଼ଡ଼େ ପାଃଆନାତି ୱାସ୍‌କା ଇଚାୟି କା଼ଦ ଇର୍‌ଆ ଅ଼ଡ଼େ ଇଚାୟି ଲ଼ହ ମାଚେ, ଏଲେକିହିଁ ଏ଼ ରା଼ଜି ବା଼ଗା ଆ଼ନେ; ସାମା ଏମ୍ବାଆଁ ଲ଼ହତି ଆ଼ଟ୍‌ୱା ଡ଼ୟିନେ, ଇଚିହିଁ କା଼ଦତା ଲ଼ହ ଆଣ୍ତାମାନାଣି ନୀନୁ ମେସ୍ତି। 42 ଇଞ୍ଜାଁ, ପାଃଆନାତି ୱାସ୍‌କା ବାରେ ଏ଼ନିକିଁ ଇଚାୟି ଲ଼ହ ଅ଼ଡ଼େ ଇଚାୟି କା଼ଦ ମାଚେ, ଏଲେକିହିଁ ରା଼ଜିତି ର଼ ବା଼ଗା ଆ଼ଟ୍‌ୱା ଅ଼ଡ଼େ ର଼ ବା଼ଗା ଆ଼ଟ୍‌ୱା ହିଲାଆଗାଟାୟି ଆ଼ନେ। 43 ଅ଼ଡ଼େ ନୀନୁ ଏ଼ନିକିଁ କା଼ଦ ତଲେ ଲ଼ହ ଆଣ୍ତାମାନାଣି ମେସ୍ତି, ଏଲେକିହିଁଏ ମାଣ୍‌ସିୟାଁତି କୂଡ଼ା ଏ଼ ଦେ଼ସାତା ଆଣ୍ତ୍‌ୱି ଆ଼ହାଁ ଡ଼ୟିନେରି; ସାମା ଲ଼ହ ଏ଼ନିକିଁ କା଼ଦତା ଆଣ୍ତେଏ, ଏଲେକିହିଁ ଏ଼ୱାରି ରହେଁଏ ଆଣ୍ତ୍‌ୱି ଆ଼ହାଁ ଡ଼ୟଅରି। 44 ଇଞ୍ଜାଁ ଏ଼ ରାଜାୟାଁ ବେ଼ଲାତା ଲାକପୂରୁତି ମାହାପୂରୁ ର଼ ରା଼ଜି କେ଼ପିନେସି, ଏ଼ଦି ଏଚେଲା ଜିକେଏ ନା଼ସା ଆ଼ଏ, କି ଏମ୍ବାତି ସା଼ଲୱି କିନି ପା଼ଣା ଏଟ୍‌କା କୂଡ଼ାତି କେୟୁତା ପିସ୍‌ପି ଆ଼ଏ; ସାମା ଏ଼ଦି ବାରେ ରା଼ଜିତି ଗାଣ୍ତ୍ରା ଗାଣ୍ତ୍ରା ଅ଼ଡ଼େ ନା଼ସା କିହାଁ ତା଼ନୁଏ କା଼ଲେଏ ଡ଼ୟିନେ। 45 ଇଚିହିଁ ହ଼ରୁଟି ଆମ୍ବାଆସି ଡୀଗାଆନା ର଼ ୱାଲି ଏ଼ ଲ଼ହ, ପିତାଡ଼ା, ଇର୍‌ଆ, ୱେଣ୍ତି ଅ଼ଡ଼େ ବାଂଗାରାତି ଗୁଣ୍ତା କିତେ, ଈଦାଆଁ ନୀନୁ ମେସ୍ତି; ଏ଼ନାୟି ଈଦାଆଁ ଡା଼ୟୁ ଆ଼ନେ, ଏ଼ଦାଆଁ କାଜା ମାହାପୂରୁ ରାଜାଇଁ ପୁଣ୍‌ମ୍ବି କିହାମାନେସି; ଇଞ୍ଜାଁ, ଈ ହାପାନା ସାତା ଅ଼ଡ଼େ ଏମ୍ବାତି ଅର୍ତ ସାତା।"

46 ଏଚିବେ଼ଲା ରାଜା ନବକୁଦ୍‌ନିସ୍‌ଚର ମୁନୁ କୁତାହାଁ ଦାନିୟେଲଇଁ ଜହରା କିତେସି ଅ଼ଡ଼େ ଲ଼କୁ ଏ଼ନିକିଁ ଏ଼ୱାଣି ନ଼କିତା ପୂଜା ଅ଼ଡ଼େ ଗାନ୍ଦା ଦୁପ୍‌ଣି ହୂଡିନେରି ଈଦାଆଁ ହୁକୁମି ହୀତେସି। 47 ରାଜା ଦାନିୟେଲଇଁ ଏଲେଇଚେସି, "ନୀନୁ ଈ ଡ଼ୁଗାମାନି କାତା ୱେ଼କ୍‌ହାଲି ଆ଼ଡାମାଞ୍ଜି, ଏ଼ଦାଆଁତାକି ସାତେଏ ନୀ ମାହାପୂରୁ, ମାହାପୂରୁୟାଁତି ମାହାପୂରୁ ଅ଼ଡ଼େ ରାଜାୟାଁତି ପ୍ରବୁ ଅ଼ଡ଼େ ଡ଼ୁଗାମାନାଣି ତ଼ହ୍‌ନାସି।" 48 ଏଚେଟିଏ ରାଜା ଦାନିୟେଲଇଁ କାଜା ପା଼ଣା ହୀହାଁ ହା଼ରେକା ଦାରାଗାଟି ଦା଼ନା ହୀତେସି, ଅ଼ଡ଼େ ବାବିଲତି ବାରେ ରା଼ଜି ଲାକ ସା଼ଲୱି କିନି ପା଼ଣା ହୀହାଁ ବାବିଲତି ବାରେ ବୁଦିଗାଟି ଲ଼କୁ କିହାଁ ଏ଼ୱାଣାକି କାଜା ଅଦିକାରା ହୀତେସି। 49 ଇଞ୍ଜାଁ ଦାନିୟେଲ ରାଜା ତା଼ଣା ବାତିମା଼ଲାଲିଏ, ରାଜା ସଦ୍ରକ, ମେୟିସକ୍‌ ଅ଼ଡ଼େ ଅବେଦ୍‌ନଗଇଁ ବାବିଲ ରା଼ଜିତି କାମାତା ହେର୍‌ପିତେସି; ସାମା ଦାନିୟେଲ ରାଜା ଦୁୱେରିତା ଡ଼ୟିତେସି।