ନବକୁଦ୍ନିସ୍ଚରତି ବାଂଗାରା ବମା
1 ରାଜା ନବକୁଦ୍ନିସ୍ଚର ତୀନି କ଼ଡ଼ି ହା଼ତା ପାଡ୍ଣି ଅ଼ଡ଼େ ସ଼ ହା଼ତା ଅ଼ସାରା ର଼ ବାଂଗାରା ବମା କେ଼ପିତେସି; ବାବିଲ ରା଼ଜିତି ଦୁରା ଇନି ବାଟାତା ଏ଼ୱାସି ଏ଼ଦାଆଁ କେ଼ପିତେସି। 2 ଏଚେଟିଏ ରାଜା ନବକୁଦ୍ନିସ୍ଚର ଏମିନି ବମା କେ଼ପାମାଚେସି, ଏ଼ଦାଆଁ ହେର୍ପାଲି ତାକି କାଜା ପା଼ଣା ଗାଟାରାଇଁ, ରାଜା ତଲେ ନିନାରାଇଁ ଅ଼ଡ଼େ ଦେ଼ସା ଅଦିକାରା ଗାଟାରାଇଁ, ନୀହାଁୟି କିନାରାଇଁ, ଗୁମୁସ୍ତା, ମେ଼ରା ଗାଟାରାଇଁ, ଗୂର୍କାଣି ଅ଼ଡ଼େ ରା଼ଜିତି ବାରେ ସା଼ଲୱି କିନାରାଇଁ ରୁଣ୍ତା କିହାଲି ତାକି ରାଜା ନବକୁଦ୍ନିସ୍ଚର ଲ଼କୁଣି ପାଣ୍ତିତେସି। 3 ଏଚେଟିଏ କାଜା ପା଼ଣା ଗାଟାରି, ରା଼ଜିତା କାମାକିନାରି ଅ଼ଡ଼େ ଦେ଼ସାତା କାମାକିନାରି, ନୀହାଁୟି କିନାରି, ଗୁମୁସ୍ତା, ମେ଼ରା ଗାଟାରି, ଗୂର୍କା ଅ଼ଡ଼େ ରା଼ଜିତି ବାରେ ସା଼ଲୱି କିନାରି, ରାଜା ନବକୁଦ୍ନିସ୍ଚର କେ଼ପାମାନି ବମା ହେର୍ପାଲି ରୁଣ୍ତା ଆ଼ତେରି ଅ଼ଡ଼େ ଏ଼ୱାରି ନବକୁଦ୍ନିସ୍ଚର କେ଼ପିତି ବମା ନ଼କିତା ନିତେରି, 4 ୱେ଼କ୍ନାସି କାଜା ଗିୟାଁ ତଲେ ୱେ଼କ୍ହେସି, "ବାରେ ଦେ଼ସାତି ଲ଼କୁ, ବାରେ କୂଡ଼ା, ଅ଼ଡ଼େ ବାରେ ହା଼ଡା ଗାଟାତେରି! ମିଙ୍ଗେ ଈ ହୁକୁମି ହୀପ୍କି ଆ଼ହିମାଞ୍ଜାନେ, 5 ଏମିନି ବେ଼ଲାତା ମୀରୁ କମୁ, ପୀରୁଡ଼ି, ରାମଗଂଟ, ଅ଼ଡ଼େ ନେବଲ, ମଡ଼୍ଦଲି ଅ଼ଡ଼େ ବାରେ କୂଡ଼ାତି ବା଼ଜା ହା଼ଡା ୱେଞ୍ଜେରି, ଏଚିବେ଼ଲା ମୀରୁ ରାଜା ନବକୁଦ୍ନିସ୍ଚର କେ଼ପିତି ବାଂଗାରା ବମା ନ଼କିତା ମୁନୁ କୁତାହାଁ ଜହରା କିଦେରି। 6 ଇଞ୍ଜାଁ, ଏମିନି ମାଣ୍ସି ମୁନୁ କୁତାହାଁ ଜହରା କିଅସି, ଏ଼ୱାସି ଏ଼ ବେ଼ଲାତେଏ ଡ଼ୀଞ୍ଜିମାନି ହିଚୁ ଗା଼ଡ଼୍ୟୁତା ମେତ୍ପି ଆ଼ନେସି।" 7 ଏ଼ଦାଆଁତାକି ଏଚିବେ଼ଲା ବାରେ ଲ଼କୁ କମୁ, ପୀରୁଡ଼ି, ରାମଗଂଟ, ନେବଲ ଅ଼ଡ଼େ ବାରେ ବାଜା ହା଼ଡା ୱେଚେରି, ଏଚିବେ଼ଲା ବାରେ ଲ଼କୁ, ବାରେ କୂଲୁ ଅ଼ଡ଼େ ବାରେ ହା଼ଡା ଗାଟାରି ରାଜା ନବକୁଦ୍ନିସ୍ଚର କେ଼ପିତି ବମାଇଁ ମୁନୁ କୁତାହାଁ ଜହରା କିତେରି।
ଡ଼ୀଞ୍ଜିମାନି ହିଚୁତା ତୀନି ଜା଼ଣା ଦାଂଗ୍ଣାୟାଁ
8 ଏ଼ଦାଆଁତାକି ଏଚିବେ଼ଲା ଏଚେକା କଲ୍ଦିୟ ଲ଼କୁ ଡାଗେ ୱା଼ହାଁ ଜୀହୁଦି ଲ଼କୁ କ଼ପାଟି ନିନ୍ଦା କାତା ତାତେରି। 9 ଏ଼ୱାରି ନବକୁଦ୍ନିସ୍ଚର ରାଜାଇଁ ଏଲେଇଚେରି, "ହେ଼ ରାଜା, କା଼ଲେଏ ତାକି ନୀଡାମୁ। 10 ହେ଼ ରାଜା, ନୀନୁ ହୁକୁମି ହୀହାମାଞ୍ଜି, ଆମ୍ବାଆସି କମୁ, ପୀରୁଡ଼ି, ରାମଗଂଟ, ନେବଲ ମଡ଼୍ଦଲି ଅ଼ଡ଼େ ବାରେ କୂଡ଼ାତି ବା଼ଜା ୱେନେସି, ଏ଼ୱାସି ମୁନୁ କୁତାହାଁ ବାଂଗାରା ବମାତି ଜହରା କିନେସି; 11 ଇଞ୍ଜାଁ, ଆମିନି ମାଣ୍ସି ମୁନୁ କୁତାହାଁ ଜହରା କିଅସି, ଏ଼ୱାସି ଡ଼ୀଞ୍ଜିମାନି ହିଚୁ ଗା଼ଡ଼୍ୟୁତା ମେତ୍ପି ଆ଼ନେସି; 12 ଇମ୍ବାଆଁ ସଦ୍ରକ, ମେୟିସକ୍ ଅ଼ଡ଼େ ଅବେଦ୍ନଗ ଇନି ଏଚେକା ଜୀହୁଦି ଲ଼କୁ ମାନେରି, ଏ଼ୱାରାଇଁ ନୀନୁ ବାବିଲ ରା଼ଜିତି ରାଜା କାମାତା ହେର୍ପାମାଞ୍ଜି; ହେ଼ ରାଜା, ଏ଼ ଲ଼କୁ ନିଙ୍ଗେ ମା଼ନି କିହାମାଞ୍ଜଅରି, ଏ଼ୱାରି ନୀ ପେ଼ଣ୍କାତି ସେ଼ବା କିଅରି କି ନୀନୁ କେ଼ପିତି ବାଂଗାରା ବମାତି ଜହରା କିହାହିଲଅରି।"
13 ଏଚେଟିଏ ରାଜା ନବକୁଦ୍ନିସ୍ଚର ହା଼ରେକା କାର୍ବି ଅ଼ଡ଼େ କ଼ପାଟି ସଦ୍ରକ, ମେୟିସକ୍ ଅ଼ଡ଼େ ଅବେଦ୍ନଗଇଁ ତାଚାଲି ହୁକୁମି ହୀତେସି। ଏଚେଟିଏ ଲ଼କୁ ଏ଼ୱାରାଇଁ ରାଜା ତା଼ଣା ତାତେରି। 14 ନବକୁଦ୍ନିସ୍ଚର ଏ଼ୱାରାଇଁ ଏଲେଇଚେସି, "ହେ଼ ସଦ୍ରକ, ମେୟିସକ୍ ଅ଼ଡ଼େ ଅବେଦ୍ନଗ, ମୀରୁ ଏମିନି ମ଼ନ ତଲେ ନା଼ ପେ଼ଣ୍କାତି ସେ଼ବା କିହି ହିଲଅତେରି, ଅ଼ଡ଼େ ନା଼ କେ଼ପିତି ବାଂଗାରା ବମାତି ଜହରା କିହି ହିଲଅତେରି ? 15 ନୀଏଁ କମୁ, ପୀରୁଡ଼ି, ରାମଗଂଟ, ନେବଲ, ମଡ଼୍ଦଲି ଅ଼ଡ଼େ ବାରେ କୂଡ଼ାତି ବା଼ଜା ୱେଚିସାରେ, ମୀରୁ ମୁନୁ କୁତାହାଁ ନା଼ କେ଼ପିତି ବମାତି ଜହରା କିହାଲି ତେଗିଦେରି, ଆତିହିଁ ନେହେଁ; ସାମା ମୀରୁ ଜହରା କିଅତେରି, ଆତିହିଁ ଦେବୁଣିଏ ମୀରୁ ଡ଼ୀଞ୍ଜିମାନି ହିଚୁ ଗା଼ଡ଼୍ୟୁତା ମେତ୍ପି ଆ଼ଦେରି; ଅ଼ଡ଼େ ଇଲେତି ଏମିନି ପେ଼ନୁ ମାନେ ନା଼ କେୟୁଟି ମିଙ୍ଗେ ଗେଲ୍ପାନେ ?"
16 ସଦ୍ରକ, ମେୟିସକ୍ ଅ଼ଡ଼େ ଅବେଦ୍ନଗ ରାଜାଇଁ ଏଲେଇଚେରି, "ହେ଼ ନବକୁଦ୍ନିସ୍ଚର, ଈ କାତାତି ନିଙ୍ଗେ ୱେସାଲି ମାଙ୍ଗେ ଲ଼ଡ଼ା ହିଲେଏ। 17 ଏଲେ ଆ଼ତିସାରେ, ମା଼ମ୍ବୁ ଆମ୍ବାଆରି ସେ଼ବା କିହିମାନମି, ମା଼ ଏ଼ ମାହାପୂରୁ ମାଙ୍ଗେ ଡ଼ୀଞ୍ଜିମାନି ହିଚୁ ଗା଼ଡ଼୍ୟୁଟି ଗେଲ୍ପାଲି ଆ଼ଡାନେସି; ଅ଼ଡ଼େ ହେ଼ ରାଜା, ଏ଼ୱାସି ମାଙ୍ଗେ ନୀ କେୟୁଟି ଗେଲ୍ପାନେସି। 18 ସାମା ଏ଼ୱାସି ଗେଲ୍ପଅସି, ଆ଼ତି ଜିକେଏ ହେ଼ ରାଜା, ମା଼ମ୍ବୁ ନୀ ପେ଼ଣ୍କାତି ସେ଼ବା କିଅମି, କି ନୀନୁ କେ଼ପିତି ବାଂଗାରା-ବମାତି ଜହରା କିଅମି, ଈଦାଆଁ ନୀନୁ ପୁନାମୁ।"
ଦାନିୟେଲ ତ଼ଣେସିଙ୍ଗାଣି ହା଼କି ଡଣ୍ତ
19 ଏଚେଟିଏ ନବକୁଦ୍ନିସ୍ଚର ସଦ୍ରକ, ମେୟିସକ୍, ଅ଼ଡ଼େ ଅବେଦ୍ନଗ କ଼ପାଟି ତାନି ମୂମ୍ବୁ ହା଼ରେକା କାର୍ବି ଆ଼ତେ। ଏ଼ଦାଆଁତାକି ହିଚୁ ଗା଼ଡ଼୍ୟୁତି ସମାନା ଡ଼ୀଞ୍ଜିମାନି କିହାଁ ସା଼ତା ଗୂଣୁ ହିଚୁ ଡ଼ୀଞ୍ଜିକିହାଲି ତାକି ହୁକୁମି ହୀତେସି। 20 ଇଞ୍ଜାଁ, ଏ଼ୱାସି ତାନି ଜୁଜୁ କିନାରି ବିତ୍ରାଟି ଏଚେକା ବା଼ଡ଼୍ୟୁଗାଟି ଲ଼କୁଣି ସଦ୍ରକ, ମେୟିସକ୍, ଅ଼ଡ଼େ ଅବେଦ୍ନଗଇଁ ଦସାହାଁ ଡ଼ୀଞ୍ଜିମାନି ହିଚୁତା ମେତ୍ହାଲି ହୁକୁମି ହୀତେସି। 21 ଏଚେଟିଏ ଏ଼ୱାରି ତା଼ମ୍ବୁ ତୁର୍ହାମାନି ସକାୟାଁ, ପା଼ତାଡ଼ା ହିମ୍ବରି ଅ଼ଡ଼େ ଏଟ୍କାତି ବାସ୍ତେରିକା ତଲେ ଦସାହାଁ ଡ଼ୀଞ୍ଜିମାନି ହିଚୁ ଗା଼ଡ଼୍ୟୁତା ମେତ୍ପି ଆ଼ତେରି। 22 ରାଜାତି ହୁକୁମି ହା଼ରେକା ଅ଼ଡ଼େ ହିଚୁମାଣ୍ତା ହା଼ରେକା ଡ଼ୀଞ୍ଜିମାଚେ, ଏ଼ଦାଆଁତାକି ଏମିନି ଲ଼କୁ ସଦ୍ରକ, ମେୟିସକ୍ ଅ଼ଡ଼େ ଅବେଦ୍ନଗଇଁ ପେ଼ର୍ହା ଆସାମାଚେରି, ଏ଼ୱାରି ହିଚୁ ଗୁଦ୍ୱାତା ୱେହାହାଚେରି। 23 ସଦ୍ରକ, ମେୟିସକ୍ ଅ଼ଡ଼େ ଅବେଦ୍ନଗ, ଈ ତୀନି ଜା଼ଣା ଦସ୍ପି ଆ଼ହାଁ ଡ଼ୀଞ୍ଜିମାନି ହିଚୁତା ମେତ୍ପି ଆ଼ତେରି।
24 ଏଚେଟିଏ ରାଜା ନବକୁଦ୍ନିସ୍ଚର କାବା ଆ଼ହାଁ ତବେ ନିଙ୍ଗିତେସି। ଏ଼ୱାସି ତାନି ମନ୍ତ୍ରିୟାଁଣି ଏଲେଇଚେସି, "ମା଼ର କି ତୀନି ଜା଼ଣା ଲ଼କୁଣି ଦସାହାଁ ହିଚୁତା ମେତ୍ହା ହିଲାଆତାୟି ?" ଏ଼ୱାରି ରାଜାଇଁ ଏଲେଇଚେରି, "ସାତେଏ ରାଜା।" 25 ରାଜା ଏଲେଇଚେସି, "ମେହ୍ଦୁ, ନା଼ନୁ ହିଚୁତା ସା଼ରି ଜା଼ଣା ଦସ୍ପି ଆ଼ଆନା ରେ଼ଜିମାନି ଲ଼କୁଣି ମେସିମାଇଁ ଅ଼ଡ଼େ ଏ଼ୱାରି ଏ଼ନାୟି ନା଼ସା ଆ଼ହାହିଲେଏ; ଇଞ୍ଜାଁ, ଅ଼ର ରଅଣି ୱା଼ଣା ମାହାପୂରୁତି ମୀର୍ଏସି ଲେହେଁ।"
ନବକୁଦ୍ନିସ୍ଚର ମାହାପୂରୁଇଁ ଗା଼ୱୁରମି କିନାୟି
26 ଏଚିବେ଼ଲା ନବକୁଦ୍ନିସ୍ଚର ଡ଼ୀଞ୍ଜିମାନି ହିଚୁ ଗା଼ଡ଼୍ୟୁତି ଟଟତା ହାଜାହାଁ ଏଲେଇଚେସି, "ହେ଼ କାଜା ମାହାପୂରୁତି ହ଼ଲିୟାଙ୍ଗା, ସଦ୍ରକ, ମେୟିସକ୍ ଅ଼ଡ଼େ ଅବେଦ୍ନଗ, ମୀରୁ ହ଼ଚାହାଁ ଇମ୍ବାଆଁ ୱା଼ଦୁ। ଏଚେଟିଏ ସଦ୍ରକ ମେୟିସକ୍, ଅ଼ଡ଼େ ଅବେଦ୍ନଗ ହିଚୁଟି ହ଼ଚାୱା଼ତେରି।" 27 ଇଞ୍ଜାଁ, କାଜା ପା଼ଣା ଗାଟାରି, ରା଼ଜି ସା଼ଲୱି କିନାରି ଅ଼ଡ଼େ ଦେ଼ସା ସା଼ଲୱି କିନାରି ଅ଼ଡ଼େ ରାଜାତି ମନ୍ତ୍ରିୟାଁ ରୁଣ୍ତା ଆ଼ହାଁ ଏ଼ ତୀନି ଜା଼ଣାଇଁ ସିନିକିତେରି, ହିଚୁ ତାମି ଆଙ୍ଗା ଲାକ ଏ଼ନି ବା଼ଡ଼୍ୟୁ ତ଼ସାଲି ଆ଼ଡାଆତେ, କି ତାମି ତା଼ର୍କା ବା଼ଣାୟାଁ ଜିକେଏ ୱେଆତୁ କି ଏ଼ୱାରି ବାସ୍ତେରି ଏ଼ନାଆଁ ଆ଼ହାହିଲାଉ, କି ତାମି ଆଙ୍ଗାତା ହିଚୁତି ଗାନ୍ଦା ହିଲେଏ।
28 ନବକୁଦ୍ନିସ୍ଚର ଏଲେଇଚେସି, ସଦ୍ରକ ମେୟିସକ୍ ଅ଼ଡ଼େ ଅବେଦ୍ନଗ ମାହାପୂରୁ ଜହରା, ଇଚିହିଁ ଏ଼ୱାସି ତାନି ଦୂତୁ ପାଣ୍ତାତେସି, ଏମିନି ଗାଟାରି ତାନି ତା଼ଣା ନାମିତେରି ଅ଼ଡ଼େ ତାମି ମାହାପୂରୁ ପିସ୍ପେ ଏ଼ନି ପେ଼ନୁତି ସେ଼ବା କି ଜହରା କିଅରି, ଏ଼ଦାଆଁତାକି ରାଜା ବ଼ଲୁ ମା଼ନୱି ଆ଼ଆନା ଜାହାରା ଆଙ୍ଗାତି ହେର୍ପିତେରି, ଏ଼ୱାସି ଏ଼ୱାରାଇଁ ଗେଲ୍ପିତେସି।
29 ଏ଼ଦାଆଁତାକି ନା଼ନୁ ଈ ହୁକୁମି କିହିମାଇଁ, ଏମିନି ବାରେ କୂଡ଼ା, ଦେ଼ସାତି ବାରେ ବା଼ସାଗାଟି ଲ଼କୁ, ସଦ୍ରକ, ମେୟିସକ୍ ଅ଼ଡ଼େ ଅବେଦ୍ନଗତି ମାହାପୂରୁତି କ଼ପାଟି ଏ଼ନି କାତା ଜ଼ଲିନେରି, ଏ଼ୱାରି ଗାଣ୍ତ୍ରା ଗାଣ୍ତ୍ରା ଦା଼ପି ଆ଼ନେରି ଅ଼ଡ଼େ ତାମି ଇଲୁ ଗାତାକ଼ଟି ଆ଼ନେ; ଇଚିହିଁ ଇଲେକିଁ ଗେଲ୍ପାଲି ଆ଼ଡିନି ଏ଼ନି ପେ଼ନୁ ହିଲେଏ।
30 ଏଚେଟିଏ ରାଜା ସଦ୍ରକ, ମେୟିସକ୍ ଅ଼ଡ଼େ ଅବେଦ୍ନଗତି ପା଼ଣା ବାବିଲ ରା଼ଜିତା ପାଡିକିତେସି। 31 ଆଜ୍ଞାମାନେ ଲେଖ 32 ଆଜ୍ଞାମାନେ ଲେଖ 33 ଆଜ୍ଞାମାନେ ଲେଖ ।
/images/a/a0208299-6f37-40a0-66e1-2576b9435f00)
/images/a/Tcg2NiV7ce24OT6kCIQGR)