Daniel 6

ସିହଁୟାଁ ଗା଼ଡ଼୍‌ୟୁତା ଦାନିୟେଲ

1 ଦାରିୟାବସ ବାରେ ରା଼ଜିତା ସ଼କ଼ଡ଼ି ଜା଼ଣା ସା଼ଲୱି କିନାରାଇଁ ରା଼ଜିତା ହେର୍‌ପିତେସି। 2 ଅ଼ଡ଼େ ଏ଼ ସା଼ଲୱି କିନେରି ଏ଼ନିକିଁ ଲେକା ହୀନେରି ଅ଼ଡ଼େ ରାଜାତି ଏ଼ନିକିଁ ଇଚାୟିୱା ନା଼ସା ଆ଼ଏ, ଏ଼ଦାଆଁତାକି ଏ଼ୱାରି ଲାକ ତୀନି ଜା଼ଣା ସା଼ଲୱି କିନାରାଇଁ ହେର୍‌ପାଲି ନେହେଁ ଅଣ୍‌ପିତେସି; ଈ ତୀନି ଜା଼ଣା ବିତ୍ରା ଦାନିୟେଲ ରଅସି ମାଚେସି। 3 ଈ ଦାନିୟେଲ ହିୟାଁତା ନେହିଁ ଜୀୱୁ ମାନାକି ଏ଼ୱାସି କାଜାରି ଅ଼ଡ଼େ ସା଼ଲୱି କିନାରି କିହାଁ ୱେ଼ଙ୍ଗାମାଚେସି; ଅ଼ଡ଼େ, ରାଜା ଏ଼ୱାଣାଇଁ ବାରେ ରା଼ଜି ହେର୍‌ପାଲି ମ଼ନ କିତେସି। 4 ଏମ୍ବାଟିଏ କାଜାରି ଅ଼ଡ଼େ ସା଼ଲୱି କିନାରି ରାଜା କାମାତି କାତାତା ଦାନିୟେଲତି ଦ଼ହ ପାରିତେରି; ସାମା ଏ଼ୱାରି ଏ଼ନି ଦ଼ହ କି ପା଼ପୁ ବେଟାଆ଼ଆତେରି, ଇଚିହିଁ ଏ଼ୱାସି ମା଼ନିଗାଟାସି ମାଚେସି ଅ଼ଡ଼େ ଏ଼ୱାଣି ଦ଼ହ କି ପା଼ପୁ ତ଼ଞ୍ଜା ଆ଼ଆତେ। 5 ଏଚେଟିଏ ଏ଼ୱାରି ଏଲେଇଚେରି, "ମା଼ର ଦାନିୟେଲତି ମାହାପୂରୁ ମେ଼ରାତି କାତାତା ଏ଼ୱାଣି ଦ଼ହ ଆହ୍‌ଆସାରେ ଅ଼ଡ଼େ ଏ଼ନି କାତାତା ଦ଼ହ ବେଟାଆ଼ହାଲି ଆ଼ଡାଆୟି।"

6 ଏଚେଟିଏ କାଜାରି ଅ଼ଡ଼େ ସା଼ଲୱି କିନାରି ରାଜା ତା଼ଣା ରୁଣ୍ତା ଆ଼ହାଁ ରାଜାଇଁ ଏଲେଇଚେରି, ରାଜା ଦାରିୟାବସ, କା଼ଲେଏ ତାକି ନୀଡାମୁ। 7 ରା଼ଜିତି କାଜାରି, ରାଜା ମାଦି ନୀନାରି ଅ଼ଡ଼େ ସା଼ଲୱି କିନାରି, ମନ୍ତ୍ରି ଅ଼ଡ଼େ ଦେ଼ସା ଅଦିକାରା ଗାଟାରି ବାରେ ରହେଁଏ କାତା ଆ଼ହାଁ ଇଲେତି ର଼ ରାଜାତି ହୁକୁମି ଅ଼ଡ଼େ ଏ଼ନାଆଁ କିଆ ଆ଼ଟ୍‌ୱାତି ମେ଼ରା ତୀରିକିହାଲି ଅଣ୍‌ପା ମାନେରି, ଆମ୍ବାଆସି କଡ଼େ ଦସ ଦିନା ପାତେକା ରାଜାତି ପିସ୍‌ପେ ଏ଼ନି ପେ଼ନୁତି କି ମାଣ୍‌ସି ତା଼ଣା ପ୍ରା଼ତାନା କିନେସି, ଏ଼ୱାସି ସିହଁୟାଁ ଗା଼ଡ଼୍‌ୟୁତା ମେତ୍‌ପି ଆ଼ନେସି। 8 ନୀଏଁ ଏ଼ ରାଜା, ମାଦିୟ ଅ଼ଡ଼େ ପାରସିକ ଲ଼କୁତି ଆ଼ଟ୍‌ୱାତି ମେ଼ରା ତଲେ ଈ କିଆ ମେ଼ରା ଏ଼ନିକିଁ ତିରିମ୍ଣିଏ ଈଦାଆଁତାକି ଏ଼ଦାଆଁ ତୀରି କିମୁ ଅ଼ଡ଼େ ଈ ରା଼ଚିତି ତା଼ଣା ସନ୍ତକି କିମୁ। 9 ଏଚେଟିଏ ରାଜା ଦାରିୟାବସ ଏ଼ କିଆ-ମେ଼ରାତା ସନ୍ତକି କିତେସି। 10 ଏଚେଟିଏ ଈ ରା଼ଚିତି ତା଼ଣା ସନ୍ତକି ଆ଼ହାମାନେ ଇଞ୍ଜିଁ ପୁଞ୍ଜାହାଁ ଦାନିୟେଲ ତାନି ଇଲୁତା ହାଚେସି; ତାନି ବାକ୍ରାତି କିଡ଼୍‌କି ଜିରୁସାଲମ ୱାକି ଦେପି ଆ଼ହାମାଚେ; ଇଞ୍ଜାଁ, ଏ଼ୱାସି ତଲି ଏ଼ନିକିଁ କିହିମାଚେସି, ଏଲେକିହିଁଏ ଦିନାତାକି ତୀନି ଦେବା ମେଣ୍ତା କୁତାହାଁ ପ୍ରା଼ତାନା କିତେସି ଅ଼ଡ଼େ ଜାହାରା ମାହାପୂରୁ ନ଼କିତା ଜହରା କିତେସି।

11 ଏଚେଟିଏ ଏ଼ୱାରି ରହେଁଏ ଦାନିୟେଲଇଁ ତାନି ମାହାପୂରୁ ତା଼ଣା ପ୍ରା଼ତାନା ଅ଼ଡ଼େ ବାତିମା଼ଲି ମାନାଣି ମେସ୍ତେରି। 12 ଏଚିବେ଼ଲା ଏ଼ୱାରି ରାଜା ତା଼ଣା ହାଜାହାଁ ରାଜାତି କିଆ ମେ଼ରା କାତାତି ଏ଼ୱାଣି ନ଼କିତା ଏଲେଇଚେରି, "ହେ଼ ରାଜା, ଏମିନି ଲ଼କୁ କଡ଼େ ଦସ ଦିନା ବିତ୍ରା ନୀ ପିସ୍‌ପେ ଏ଼ନି ପେ଼ନୁ କି ମାଣ୍‌ସି ତା଼ଣା ପ୍ରା଼ତାନା କିନେସି, ଏ଼ୱାସି ସିହଁୟାଁ ଗା଼ଡ଼୍‌ୟୁତା ମେତ୍‌ପି ଆ଼ନେସି, ଇଲେକିଁ ର଼ କିଆଗାଟି ଆ଼କୁତା କି ନୀନୁ ସନ୍ତକି କିହା ହିଲଅତି ?" ରାଜା ଏଲେଇଚେସି, "ମାଦିୟ ଅ଼ଡ଼େ ପାରସିକ ଲ଼କୁତି ମେ଼ରାତା ଏ଼ଦି ତୀରି ଆ଼ହାମାନେ।"

13 ଏଚେଟିଏ ଏ଼ୱାରି ରାଜା ନ଼କିତା ଏଲେଇଚେରି, "ହେ଼ ରାଜା, ଦସ୍‌ପି ଆ଼ହାଁ ୱା଼ହାମାନି ଜୀହୁଦି ମୀର୍‌କା ବିତ୍ରା ରଅସି ଦାନିୟେଲ, ଏ଼ୱାସି ନିଙ୍ଗେ କି ନୀ ସନ୍ତକି କିତି କିଆଗାଟି ଆ଼କୁତି ମା଼ନି କିଅସି, ସାମା ଦିନାତାକି ତୀନି ଦେବା ପ୍ରା଼ତାନା କିନେସି।"

14 ଏଚେଟିଏ ରାଜା ଈ କାତା ୱେଞ୍ଜାହାଁ ହା଼ରେକା ଦୁକୁ ଆ଼ତେସି, ଇଞ୍ଜାଁ ଦାନିୟେଲଇଁ ଗେଲ୍‌ପାଲି ତାକି ଏ଼ୱାଣି କାତାତି ଅଣ୍‌ପିତେସି; ଅ଼ଡ଼େ, ଏ଼ୱାଣାଇଁ ଗେଲ୍‌ପାଲି ତାକି ୱେ଼ଡ଼ା କୂଡ଼୍‌ନି ପାତେକା ଅଣ୍‌ପିତେସି। 15 ଏଚେଟିଏ ଏ଼ ଲ଼କୁ ରାଜା ତା଼ଣା ରୁଣ୍ତା ଆ଼ହାଁ ରାଜାଇଁ ଏଲେଇଚେରି, "ହେ଼ ରାଜା, ନୀନୁ ପୁନାମୁ, ରାଜା ଏମିନି କିଆଗାଟି ହୁକୁମି କି ମେ଼ରା ତୀରି କିତିସାରେ, ଏ଼ଦି ତିରିମ୍ଣିପ୍‌ହାଲି ଆ଼ଏ, ମାଦିୟ ଅ଼ଡ଼େ ପାରସିକ ଲ଼କୁତି ଇଲେତି ମେ଼ରା ମାନେ।"

16 ଏଚେଟିଏ ରାଜା ହୁକୁମି କିହାଲିଏ, ଏ଼ୱାରି ଦାନିୟେଲଇଁ ତାଚାହାଁ ସିହଁୟାଁ ଗା଼ଡ଼୍‌ୟୁତା ମେତ୍‌ହେରି। ଇଞ୍ଜାଁ, ରାଜା ଦାନିୟେଲଇଁ ଏଲେଇଚେସି, "ନୀନୁ କା଼ଲେଏ ଏମିନି ମାହାପୂରୁତି ସେ଼ବା କିହିମାଞ୍ଜି, ଏ଼ୱାସି ନିଙ୍ଗେ ଗେଲ୍‌ପାନେସି।" 17 ଇଞ୍ଜାଁ, ର଼ ୱାଲି ତାପି ଆ଼ହାଁ ଗା଼ଡ଼୍‌ୟୁ ଦୁୱେରିତା ଇଟ୍‌କି ଆ଼ତେ; ଅ଼ଡ଼େ, ଦାନିୟେଲତି କାତା ଏ଼ନିକିଁ ଏ଼ନି ତିରିମ୍ଣିଏ, ଏ଼ଦାଆଁତାକି ରାଜା ତାନି ମୁଦି ତଲେ ଅ଼ଡ଼େ ତାନି ସା଼ଲୱି କିନାରି ମୁଦି ତଲେ ଏ଼ଦାଆଁ ବୁଟୁ ମୁଦ୍ରା କିତେସି। 18 ଏଚେଟିଏ ରାଜା ତାନି ଇଲୁତା ହାଜାହାଁ ଉପାସା କିହାଁ ଲା଼ଆଁୟାଁ ଡ଼ୟିତେସି ଅ଼ଡ଼େ ବା଼ଜାଗା଼ଜା ତାନି ତା଼ଣା ତାପିଆ଼ଆତୁ; ଅ଼ଡ଼େ, ଏ଼ୱାଣାକି ଇଦା ଆ଼ଆତେ।

19 ଏଚେଟିଏ ରାଜା ଲା଼ଇ ନିଙ୍ଗାହାଁ ତବେ ସିହଁୟାଁ ଗା଼ଡ଼୍‌ୟୁ ଡାଗେ ହାଚେସି। 20 ଇଞ୍ଜାଁ, ଏ଼ୱାସି ଗା଼ଡ଼୍‌ୟୁ ଡାଗେ ଦାନିୟେଲ ଦାରିତା ୱା଼ହାଁ ଡ଼ୀକି ଗିୟାଁ ତଲେ ହା଼ଟିତେସି; ରାଜା ଦାନିୟେଲଇଁ ଏଲେଇଚେସି, "ହେ଼ ଜୀୱୁଗାଟି ମାହାପୂରୁତି ସେ଼ବା କିନି ଦାନିୟେଲ, ନୀନୁ କା଼ଲେଏ ଆମ୍ବାଆରି ସେ଼ବା କିହିମାଞ୍ଜି, ନୀ ଏ଼ ମାହାପୂରୁ ସିହଁୟାଁ ତା଼ଣାଟି ନିଙ୍ଗେ ଗେଲ୍‌ପାଲି ଆ଼ଡାନେସି କି ?" 21 ଏଚେଟିଏ ଦାନିୟେଲ ରାଜାଇଁ ଏଲେଇଚେସି, "ହେ଼ ରାଜା, କା଼ଲେଏ ତାକି ନୀଡାମୁ।"

22 ନା଼ ମାହାପୂରୁ ତାନି ଦୂତୁ ପାଣ୍ତାହାଁ ସିହଁୟାଁତି ଗୂତି ମୁଚା ମାନେସି ଅ଼ଡ଼େ ଏ଼ୱି ନାଙ୍ଗେ ଏ଼ନାଆଁ କିହାମାଞ୍ଜାଉ; ଇଚିହିଁ ତାନି ନ଼କିତା ନା଼ ଦ଼ହ ହିଲାଆତାୟି ତ଼ଞ୍ଜାଆ଼ତେ; ଇଞ୍ଜାଁ, ଏ଼ ରାଜା, ନା଼ନୁ ନୀ ନ଼କିତା ଜିକେଏ ଏ଼ନାଆଁ ଲାଗେଏ କିହାହିଲଅଁ।

23 ଏଚେଟିଏ ରାଜା ହା଼ରେକା ରା଼ହାଁ ଆ଼ହାଁ ଦାନିୟେଲଇଁ ଗା଼ଡ଼୍‌ୟୁଟି ପାଙ୍ଗାତା ତାଚାଲି ହୁକୁମି ହୀତେସି। ଏଚେଟିଏ ଦାନିୟେଲ ଗା଼ଡ଼୍‌ୟୁଟି ହ଼ଚାୱାତେସି ଅ଼ଡ଼େ ତାନି ଆଙ୍ଗାତା ଏ଼ନି ଗା଼ହାଁ ତ଼ଞ୍ଜାଆ଼ଆତେ, ଇଚିହିଁ ଏ଼ୱାସି ତାନି ମାହାପୂରୁ ତା଼ଣା ନାମା ମାଚେସି। 24 ଏମ୍ବାଟିଏ ରାଜା ହୁକୁମି ହୀହାଲିଏ, ଲ଼କୁ ଦାନିୟେଲଇଁ ବା଼ଦ୍ରି ଆ଼ତାରାଇଁ ତାଚାହାଁ, ଏ଼ୱାରାଇଁ, ତାମି କକାରି ପ଼ଦାଁଣି ଅ଼ଡ଼େ ତାମି ଡକ୍ରିସିକାଣି ସିହଁୟାଁ ଗା଼ଡ଼୍‌ୟୁତା ମେତ୍‌ହେରି; ଇଞ୍ଜାଁ, ଏ଼ୱାରି ଗା଼ଡ଼୍‌ୟୁତି ଡ଼଼ଇ ଏଆନେଏ ସିହଁୟାଁ ଏ଼ୱାରାଇଁ ରିହାଁ ତାମି ପେ଼ଡ଼୍‌କା ଡୁମ୍‌କା ତଲେ ଏ଼ୱାରାଇଁ ତିଚୁ।

25 ଏଚିବେ଼ଲା ଦାରିୟାବସ ବାରେ ଦାର୍‌ତିତା ବାସା କିହାମାନାରାଇଁ, ବାରେ କୂଡ଼ା, ଦେ଼ସାତା ବାସା କିହାମାନାରାଇଁ ଅ଼ଡ଼େ ବା଼ସା ଗାଟାରାଇଁ ଆ଼କୁ ରା଼ଚିତେସି; "ମିଙ୍ଗେ ତାକି ହା଼ରେକା ହିତ୍‌ଡ଼ି ଆୟାପେ। 26 ନା଼ନୁ ଈ ହୁକୁମି କିହିମାଇଁ, ନା଼ ରା଼ଜିତି ବାରେ ଲ଼କୁ ଦାନିୟେଲତି ମାହାପୂରୁ ତା଼ଣା ତୀର୍‌ଗିହିଁ ଆଜାପେରି;

ଇଚିହିଁ ଏ଼ୱାସି ଜୀୱୁଗାଟି ମାହାପୂରୁ

ଅ଼ଡ଼େ କା଼ଲେଏ ଡ଼ୟିନାସି ଅ଼ଡ଼େ ତାନି ରା଼ଜି ନା଼ସା ଆ଼ଆଗାଟାୟି;

ଇଞ୍ଜାଁ ତାନି ସା଼ଲୱି କିନାୟି ରା଼ନି ପାତେକା ଡ଼ୟିନେ।

27 ଏ଼ୱାସି ଗେଲ୍‌ପିନାସି ଅ଼ଡ଼େ ପିସ୍‌ପି କିନାସି,

ଇଞ୍ଜାଁ ଏ଼ୱାସି ଲାକପୂରୁ ଅ଼ଡ଼େ ଦାର୍‌ତିତା ସିନା ଅ଼ଡ଼େ କାବାଆ଼ନି କାମା କିନେସି;

ଏ଼ୱାସି ଦାନିୟେଲଇଁ ସିହଁୟାଁ ତା଼ଣାଟି ଗେଲ୍‌ପା ମାନେସି।"

28 ଇଲେକିହିଁ ଦାନିୟେଲ ଦାରିୟାବସ ସା଼ଲୱି କିତି ବେ଼ଲାତା ଅ଼ଡ଼େ ପାରସିକ 29 କରସ ସା଼ଲୱି କିତି ବେ଼ଲାତା ହା଼ରେକା ପା଼ଣା ବେଟାଆ଼ତେସି।