1 ବେଲ୍‌ସସ୍‌ଚର ରାଜାତି ସା଼ଲୱି କିହିମାଚି ତୀନି ବାର୍ସାତା ନା଼ନୁ ଦାନିୟେଲ ମୂଲୁ ସେୟାଁଣା ହାପାନା ଡା଼ୟୁ ଅ଼ଡ଼େ ର଼ ସେୟାଁଣା ହାପାନା ବେଟାଆ଼ତେଏଁ। 2 ଇଞ୍ଜାଁ, ନା଼ନୁ ସେୟାଁଣା ହାପାନାତା ମେସ୍ତେଏଁ; ନା଼ନୁ ଏଲମ୍‌ ରା଼ଜିତି ସୁସନ୍‌ ରାଜା ଇଲୁତା ମାଇଁ; ଅ଼ଡ଼େ, ଏ଼ ସେୟାଁଣା ହାପାନାତା ମେସ୍ତେଏଁ, ନା଼ନୁ ଉଲୟ କାଡା ଟଟତା ମାଇଁ। 3 ଏଚେଟିଏ ନା଼ନୁ କାନୁ ଦେଚାହାଁ ମେସ୍ତେଏଁ, ମେହ୍‌ଦୁ, କାଡା ଟଟତା ରୀ କମ୍‌କାଗାଟି ର଼ ମେ଼ଣ୍ତା ନିଚାମାନେ, ଏ଼ଦାନି ରୀ କମ୍‌କା ପାଡାଆ଼ତାଇ; ସାମା ଏ଼ୱାଆଁ ବିତ୍ରା ର଼ କମୁ ଗାଡି ପାଡାଆ଼ତାୟି, ଇଞ୍ଜାଁ ଏମିନାୟି ପାଡାଆ଼ତାୟି, ଏ଼ଦି ଡା଼ୟୁ ହ଼ତେ। 4 ନା଼ନୁ ଏ଼ ମେ଼ଣ୍ତାତି ୱେ଼ଡ଼ା ହାନିୱାକି, ଟିଃନି, ଟେ଼ବ୍ରି ୱାକି ପାଡା ଆ଼ହିମାନାଣି ମେସ୍ତେଏଁ; ଅ଼ଡ଼େ, ଏ଼ନି ଜ଼ନ୍ତ ତାନି ନ଼କିତା ନିଚାଲି ଆ଼ଡାଆତୁ, କି ତାନି କେୟୁଟି ଗେଲ୍‌ପାଲି ଆମ୍ବାଆସି ହିଲାଆତେସି; ସାମା ଏ଼ଦି ତାନି ମ଼ନ ତଲେ କାମା କିହିଁ ପାଡା ଆ଼ହିମାଚେ।

5 ଇଞ୍ଜାଁ, ନା଼ନୁ ଈ କାତା ଅଣ୍‌ପି ଅଣ୍‌ପି ମେସ୍ତେଏଁ, ମେହ୍‌ଦୁ, ର଼ ଗରି ୱେ଼ଡ଼ା ହାନି ୱାକିଟି ବାରେ ଦାର୍‌ତି ଗା଼ଣ୍‌ଚାହାଁ ୱା଼ତେ ଅ଼ଡ଼େ ଏ଼ଦି ବୂମିତି ଡୀଗାଆତେ; ଅ଼ଡ଼େ, ଏ଼ ଗରିତି ରୀ କାଣ୍‌କା ମାଦି ର଼ ମେହ୍‌ନି କାଜା କମୁ ମାଚେ। 6 ଅ଼ଡ଼େ, ନା଼ନୁ ଏମିନି ରୀ କମ୍‌କାଗାଟି ମେ଼ଣ୍ତାତି କାଡା ଦାରିତା ନିଚାମାନାଣି ମେସ୍ତେଏଁ, ଏ଼ଦାନି ୱାକି ଏ଼ଦି ୱା଼ହାଁ ତାନି ବା଼ଡ଼୍‌ୟୁତି ଆ଼ଟ୍‌ୱା ତଲେ ଏ଼ଦାନି ୱାକି ହଟେ। 7 ଇଞ୍ଜାଁ, ନା଼ନୁ ମେସ୍ତେଏଁ, ଏ଼ଦି ଏ଼ ମେ଼ଣ୍ତା ଟଟତା ୱା଼ତେ ଅ଼ଡ଼େ ହା଼ରେକା କାର୍‌ବିଟି ଏ଼ ମେ଼ଣ୍ତାଇଁ ୱେ଼ତେ ଅ଼ଡ଼େ ତାନି ରୀ କମ୍‌କାଣି ଡିକ୍‌ହାତୁସ୍ତେ ଅ଼ଡ଼େ ଏ଼ଦାନି ନ଼କିତା ନିଚାଲି ଏ଼ ମେ଼ଣ୍ତାକି ଅ଼ଡ଼େ ବପୁ ଡ଼ୟାଆତେ; ସାମା ଏ଼ ଗରି ମେ଼ଣ୍ତାତି ବୂମିତା ତ୍ରକ୍‌ହାଁ ପାଃଆନା ତଲେ ୱିସ୍ତେ, ଅ଼ଡ଼େ ତାନି କେୟୁଟି ଏ଼ ମେ଼ଣ୍ତାଇଁ ଗେଲ୍‌ପାଲି ଆମ୍ବାଆସି ହିଲାଆତେସି।

8 ଏଚେଟିଏ ଏ଼ ଗରି ଜାହାରାଇଁ ହା଼ରେକା କାଜାୟି କିହିଁ ତ଼ସାକଡିତେ ଅ଼ଡ଼େ ଏ଼ଦି ବା଼ଡ଼୍‌ୟୁ ମାଚାଟି ତାନି କାଜା କମୁ ଡୀହାହାଚେ; ଅ଼ଡ଼େ, ଏମ୍ବାତି ବାଦୁଲି ହା଼ଗୁତି ସା଼ରିୱାକି ସା଼ରିଗଟା ମେହ୍‌ନି କମ୍‌କା ହ଼ତୁ। 9 ଇଞ୍ଜାଁ, ଏ଼ କମ୍‌କା ବିତ୍ରାଟି ର଼ ଊଣା କମୁ ହ଼ଚାହାଁ ଟିଃନି ଅ଼ଡ଼େ ୱେ଼ଡ଼ା ହ଼ନି ୱାକି ଅ଼ଜିତି* ଦେ଼ସା ୱାକି ହା଼ରେକା ପାଡାଆ଼ତେ। 10 ଅ଼ଡ଼େ, ଏ଼ଦି ହା଼ଗୁ ଲାକତି ଜୁଜୁ କିନାରି ପାତେକା ପାଡା ଆ଼ତେ ଅ଼ଡ଼େ ଏ଼ ଜୁଜୁ କିନାରି ଅ଼ଡ଼େ ହୁକାୟାଁତି ଏଚରଗଟା ବୂମିତା ମେତ୍‌ହାଁ ଏ଼ୱାଆଁ ପାଃଆନା ଡ଼଼ଇକା ୱିସ୍ତେ। 11 ଜୁଜୁ କିନାରି କାଜାଣି କ଼ପାଟି ଜାହାରାଇଁ ପାଡିକିହାଁ ତାନି ତା଼ଣାଟି କା଼ଲେଏ ହୂଡିନି ପୂଜା ମୀଞ୍ଜିତେ ଅ଼ଡ଼େ ତାନି ଦାର୍ମୁ ଟା଼ୟୁ ନା଼ସା ଆ଼ତେ। 12 ଇଞ୍ଜାଁ, ହୁକୁମି ଊରିତାକି କା଼ଲେଏ ହୂଡିନି ପୂଜା ତଲେ ଜୁଜୁ କିନାରି ତାନି କେୟୁତା ହେର୍‌ୱି ଆ଼ତୁ ଅ଼ଡ଼େ ଏ଼ ସାତାତି ବୂମିତା ନା଼ସା କିତେ, ଅ଼ଡ଼େ ଜାହାରା ମ଼ନତି କାମା କିହାଁ କାମା ପୂରା କିତେ।

13 ଏଚେଟିଏ ନା଼ନୁ ର଼ ସୁଦୁ ମାଣ୍‌ସି କାତା ଆ଼ହିମାନାଣି ୱେଚେଏଁ; ଅ଼ଡ଼େ, ଆମ୍ବାଆସି କାତା ଆ଼ତେସି, ଏ଼ୱାଣାଇଁ ଅ଼ର ସୁଦୁ ମାଣ୍‌ସି ୱେଚେସି, କା଼ଲେଏ ହିଚୁତା ହୂଡିତି ପୂଜା ଅ଼ଡ଼େ ନା଼ସା କିନି ହୁକୁମି ଊରିନାଣି ଅ଼ଡ଼େ ପାଃଆନା ଡ଼଼ଇକା ୱିହ୍‌ନି ଦାର୍ମୁ ଟା଼ୟୁ ଅ଼ଡ଼େ ଜୁଜୁ କିନାରି ହେର୍‌ପି ଆ଼ନି ଏମିନି ସେୟାଁଣା ହାପାନା, ଏ଼ଦି ଏଚର କା଼ଲା ପାତେକା ଆ଼ନେ ?

14 ଏଚେଟିଏ ଏ଼ୱାସି ନାଙ୍ଗେ ଏଲେଇଞ୍ଜାତେସି, ରୀ ମା଼ଣା ତୀନି ୱାଞ୍ଜା ମିଡ଼୍‌ଅଲା ଅ଼ଡ଼େ ଲା଼ଇ ପାତେକା ପୂଜା ହୀପ୍‌କି ଆ଼ଆତେ; ଏଚେଟିଏ ଦାର୍ମୁ ଟା଼ୟୁ ଅଟ୍‌ପି ଆ଼ନେ।

15 ଏଚେଟିଏ ନା଼ନୁ ଦାନିୟେଲ, ଈ ସେୟାଁଣା ହାପାନା ବେଟାଆ଼ତି ଡା଼ୟୁ, ଏ଼ଦାଆଁ ତେଲ୍‌ହାଲି ତାକି ଅଣ୍‌ପିତେଏଁ; ଅ଼ଡ଼େ ମେହ୍‌ଦୁ, ମାଣ୍‌ସି ଲେହେଁତାସି ରଅସି ନା଼ ନ଼କିତା ନିତେସି। 16 ଇଞ୍ଜାଁ, ଉଲୟ କାଡା ମାଦିଟି ନା଼ନୁ ମାଣ୍‌ସିତି ହା଼ଡା ୱେଚେଏଁ, ଏ଼ୱାସି ହା଼ଟାହାଁ ଏଲେଇଞ୍ଜାତେସି, "ଏ଼ ଗାବ୍ରିୟେଲ, ଈ ମାଣ୍‌ସିଇଁ ସେୟାଁଣା ହାପାନାତି ଅର୍ତ ତେଲ୍‌ହି କିମୁ।" 17 ଏଚେଟିଏ ନା଼ନୁ ଏମିନି ଟା଼ୟୁତା ନିଚା ମାଚେଏଁ, ଏ଼ ଟା଼ୟୁ ଡାଗେ ଏ଼ୱାସି ୱା଼ତେସି; ଇଞ୍ଜାଁ ଏ଼ୱାସି ୱା଼ହାଲିଏ, ନା଼ନୁ ଆଜିତେଏଁ ଅ଼ଡ଼େ ମୁନୁ କୁତାହାଁ ରିତେଏଁ; ସାମା ଏ଼ୱାସି ନାଙ୍ଗେ ଏଲେଇଞ୍ଜାତେସି, ଏ଼ ମାଣ୍‌ସି ମୀର୍‌ଏଣାତି, ତେଲ୍‌ହାମୁ; ଇଚିହିଁ ଈ ସେୟାଁଣା ହାପାନା ରା଼ନି କା଼ଲାତି କାତା। 18 ଏ଼ୱାସି ନାଙ୍ଗେ କାତା ଆ଼ହିମାଚାଟି ନା଼ନୁ ବୂମି ୱାକି ମୂମ୍ବୁ କିହାଁ ବା଼ରୁ ଇଦା କିତେଏଁ; ସାମା ଏ଼ୱାସି ନାଙ୍ଗେ ଡୀଗାହାଁ ନିକ୍‌ହାତେସି। 19 ଅ଼ଡ଼େ, ଏ଼ୱାସି ନାଙ୍ଗେ ଏଲେଇଞ୍ଜାତେସି, ମେହ୍‌ମୁ, କାର୍‌ବିତି ବେ଼ଲାତା ଏ଼ନାୟି ଆ଼ନେ, ଏ଼ଦାଆଁ ନା଼ନୁ ନିଙ୍ଗେ ୱେସ୍ତାଇଁ; ଇଚିହିଁ ରା଼ନି ବେ଼ଲାତା ଈ ବାରେ ପୂରା ଆ଼ନେ।

20 ନୀନୁ ଏମିନି ମେ଼ଣ୍ତା ମେସ୍ତି, ଏ଼ଦାନି ରୀ କମ୍‌କା ମାଦିୟ ଅ଼ଡ଼େ ପାରସିକ ରାଜା। 21 ଇଞ୍ଜାଁ, ଏ଼ ବା଼ଣାୟାଁ ଗାଟି ଗରି ଗ୍ରିସ୍‌* ଦେ଼ସାତି ରାଜା ଅ଼ଡ଼େ ତାନି ରୀ କାଣ୍‌କା ମାଦି ମାନି କାଜା କମୁ ମୂଲୁ ରାଜା। 22 ଅ଼ଡ଼େ, ଏମିନି କମୁ ଡୀହାଁ ଏମ୍ବାତି ଟା଼ୟୁତା ସା଼ରିଗଟା କମ୍‌କା ହ଼ତୁ, ଏମ୍ବାତି କାତା ଈଦି ଏ଼ ଦେ଼ସାଟି ସା଼ରି ଜା଼ଣା ରାଜାୟାଁ ହ଼ନେରି, ସାମା ବା଼ଡ଼୍‌ୟୁତା ଏ଼ୱାଣି ଲେହେଁ ଆ଼ଅରି।

23 ଇଞ୍ଜାଁ ଏ଼ୱାରି ରା଼ଜି ରା଼ନି କା଼ଲାତା ଏଚିବେ଼ଲା ହୁକୁମି ଊରିନାରି ହୁକୁମି ଊରିନାୟି ରା଼ନେ, ଏଚିବେ଼ଲାତା ଆଜିହ଼ପେତି ର଼ କାର୍‌ବି ଗାଟି ହିୟାଁ ଅ଼ଡ଼େ ଡ଼ୁଗାମାନି କାତା ପୁନି ବୁଦିଗାଟି ର଼ ରାଜା ହ଼ନେସି। 24 ଏ଼ୱାସି ବା଼ଡ଼୍‌ୟୁତା ଆ଼ଟ୍‌ୱା ଆ଼ନେସି, ସାମା ତାନି ବା଼ଡ଼୍‌ୟୁ ତଲେ ଆ଼ଏ; ଅ଼ଡ଼େ, ଏ଼ୱାସି କାବାଆ଼ନି ଲେହେଁ ନା଼ସା କିନେସି ଅ଼ଡ଼େ ପାଡା ଆ଼ହାଁ ଜାହାରା ମ଼ନ ତଲେ କାମା କିନେସି; ଅ଼ଡ଼େ, ଏ଼ୱାସି ବା଼ଡ଼୍‌ୟୁ ଗାଟାରାଇଁ ଅ଼ଡ଼େ ସୁଦୁ ଲ଼କୁଣି ନା଼ସା କିନେସି। 25 ଇଞ୍ଜାଁ, ତାନି ସୁତ୍ରମି ତଲେ ତାନି କେୟୁତା ନା଼ଡ଼ି କିନାୟି ପୂରା ଆ଼ନେ ଅ଼ଡ଼େ ଏ଼ୱାସି ତାନି ହିୟାଁତା ଜାହାରାଇଁ ବଡପଣ କିନେସି ଅ଼ଡ଼େ ଏ଼ୱାରି ଏ଼ନାଆଁ ପୁନାଆ ବେ଼ଲାତା ହା଼ରେକାତି ନା଼ସା କିନେସି; ଅ଼ଡ଼େ, ଏ଼ୱାସି ସା଼ଲୱି କିନାରାଇଁ ସା଼ଲୱି କିନାରା କ଼ପାଟି ନିଙ୍ଗିନେସି; ସାମା ଏ଼ୱାସି ଆମ୍ବାଆରି କେୟୁଟି ପା଼ୟ୍‌ୱି ଆ଼ଆନା ନା଼ସା ଆ଼ନେସି। 26 ମିଡ଼୍‌ଅଲା ଅ଼ଡ଼େ ଲା଼ଇ କା଼ଲା କାତାତି ୱେସ୍ତି ସେୟାଁଣା ହାପାନା ସାତା; ସାମା ନୀନୁ ଈ ସେୟାଁଣା ହାପାନାତି ବୁଟୁ ମୁଦ୍ରା କିହାଁ ଇଟାମୁ; ଇଚିହିଁ ଏ଼ଦି ୱା଼ହିମାନି ହା଼ରେକା ଦିନାତି କାତା।

27 ଏଚେଟିଏ ନା଼ନୁ ଦାନିୟେଲ, ୱା଼ହିତେଏଁ ଅ଼ଡ଼େ ହା଼ରେକା ଦିନା ପାତେକା ଆ଼ଡାଆତେଏଁ; ଏଚେଟିଏ ଡା଼ୟୁ ନା଼ନୁ ନିଙ୍ଗାହାଁ ରାଜା ହିୟାତି କାମା କିତେଏଁ; ଅ଼ଡ଼େ, ନା଼ନୁ ଏ଼ ସେୟାଁଣା ହାପାନାତା କାବା ଆ଼ତେଏଁ, ସାମା ଆମ୍ବାଆସି ଏ଼ ସେୟାଁଣା ହାପାନା ତେଲ୍‌ହାଲି ଆ଼ଡାଆତେସି।