ଗାବ୍ରିୟେଲ ୱା଼ନି ଦିନାତି କାତା ୱେହ୍ନାୟି
20 ଇଲେକିଁ ନା଼ନୁ ବାତିମା଼ଲିହିଁ ପ୍ରା଼ତାନା କିହି ମାଚେଏଁ, ଇଞ୍ଜାଁ ନା଼ ପା଼ପୁ ଅ଼ଡ଼େ ନା଼ ଇସ୍ରାୟେଲ ଲ଼କୁତି ପା଼ପୁ ୱେ଼କ୍ହି ମାଚେଏଁ, ଅ଼ଡ଼େ ନା଼ ମାହାପୂରୁତି ସୁଦୁ ହ଼ରୁ ତାକି ପ୍ରବୁ ନା଼ ମାହାପୂରୁଇଁ ନା଼ନୁ ବାତିମା଼ଲି ମାଚେଏଁ; 21 ଇଲେକିଁ ନା଼ନୁ ପ୍ରା଼ତାନା କିହିଁ କିହିଁ ତଲିତି ସେୟାଁଣା ହାପାନାତା ନା଼ନୁ ଆମ୍ବାଆରାଇଁ ମେସାମାଚେଏଁ, ଏ଼ ମାଣ୍ସି ଗାବ୍ରିୟେଲ ତବେ ଊମ୍ବାଲି ହୁକୁମି ବେଟାଆ଼ହାଁ ମିଡ଼୍ଅଲା ପୂଜା କିନି ବେ଼ଲାତା ୱା଼ହାଁ ନାଙ୍ଗେ ଡୀଗାତେସି। 22 ଇଞ୍ଜାଁ ଏ଼ୱାସି ନାଙ୍ଗେ ଜା଼ପ୍ହାତେସି ଅ଼ଡ଼େ ନା଼ ତଲେ କାତା ଆ଼ହାଁ ଏଲେଇଞ୍ଜାତେସି, "ହେ଼ ଦାନିୟେଲ ନା଼ନୁ ନୀଏଁ ନିଙ୍ଗେ ୱା଼ହିମାନି ଦିନାତି କାତା ତେଲ୍ହି କିହାଲି ୱା଼ହାମାଇଁ। 23 ନୀ ବାତିମା଼ଲିନି ବେ଼ଲାତା ହୁକୁମି ଆ଼ତେ, ଅ଼ଡ଼େ ନିଙ୍ଗେ ୱେସାଲି ନା଼ନୁ ୱା଼ହାମାଇଁ, ଇଚିହିଁ ନୀନୁ ଜୀୱୁତି ଲ଼କୁ; ଈଦାଆଁତାକି ଈ କାତା ଅଣ୍ପାମୁ ଅ଼ଡ଼େ ଈ ସେୟାଁଣା ହାପାନାତି କାତା ତେଲ୍ହାମୁ।"