1 Coríntios 13

4 Maynini ya bet na utaw na awun pagginawa nan sa kanan eped: Matadeng magtagen sa kadaman nan aw magpakatagad sakanan. Magkallat sa eped magi sa kanimbet nan. Diliꞌ mati-ingaꞌ sa eped nan. Diliꞌ sakanan magpalibantug aw diliꞌ uman magpatastas. 5 Diliꞌ malatay ya bet nan adti manga eped, aw diliꞌ nan pagleges ya kanan pagkaliman, aw diliꞌ maksay magkadaman, aw diliꞌ nan gayed anenganengen ya manga salaꞌ na eped adti kanan. 6 Aw diliꞌ sakanan pagkatutukan sa malatay manang pagleya͡an nan baling ya matinaw. 7 Kun pigginawa͡an na utaw ya eped nan, diliꞌ nan paglukasan pangkay unu ya dumateng, aw gayed nan pagsaligan, aw imanen nan na matulid ya imo-unun na eped aw gayed nan ti-isen.

8 Ya tengteng na paggaginawa͡ay walaꞌ ya tyamanan. Manang ya pag-ubat-ubat sa un pa-edeꞌ na Tyumanem, awun saba tyamanan. Aw tumeneng uman ya paglong sa sangkapungan na tingeg na walaꞌ pa na utaw lemena paglongan. Aw pangkay ya katadeng na utaw sa paglong sa lekat adti Ispiritu Santo, awun saba tyamanan.