Pigpan-imoꞌ 4

Si Pédro aw si Juan adti asdangan na manga mag-usayay

1 Sa walaꞌ pa katigkas ni Pédro aw ni Juan ya pag-ubat-ubat adti manga utaw dun ni pamanag na Témplo, dyumulud adti kanilan ya manga magdadugsu-ay, aw ya kapitan na manga magtatunggu-ay sa Témplo, aw ya manga Sadusiyo. 2 Aw nyadaman silan to-o kay pigpalna-uwan ni Pédro aw ni Juan ya manga utaw aw pig-ubat-ubat nilan ya pagkataw ni Jisus aw ya pagkataw uman na manga utaw lekat adti pagkamatay.*4:2 Ya manga Sadusiyo, walaꞌ silan pangintu-u na awun pagkataw na manga utaw lekat adti pagkamatay. 3 Yanagaw pigdakep nilan si Pédro aw si Juan. Aw asuntu na gabi la, pigpakalabusu nilan taman na maselem.