Hebreus 1

Matas pa si Jisu-Kristu kay sa manga propita

1 Asini muna, madég ya manga allaw na miglong ya Tyumanem adti kanaten mangkabaklegay magi sa manga propita nan, aw madég ya pa-agi na paglong nan kanilan. 2 Manang adun na manga kamoliyan na allaw, miglong ya Tyumanem kanaten magi sa kanan Iseꞌ. Kay magi sa kanan Iseꞌ pig-imoꞌ nan ya kadakulaꞌ na banwa, aw yan ya pigpatagtun nan sa kadég. 3 Dun ni kanan, pagkita-en ya kalalamdag na katulus na Tyumanem. Aw kun unu ya Ama, maynan uman ya Iseꞌ. Aw magi sa katulus na kanan tingeg, ya kadég na pig-imoꞌ nan asini muna, kenneꞌ nan migpadeleg taman adun. Aw awun pa pig-imoꞌ nan pada kalinisan ya manga utaw sa manga salaꞌ nilan, aw tigkas yan nyingkud sakanan adti kalintu na trunu na Tyumanem na awun ni tas na langit.