1 ଜିବନ୍‌ନୋନି ଉଣ୍ତିଙ୍ଗ୍‌ ମିର୍‌ ୱେଡ଼ିକା ଆଦୁ, ମାରି ଆତ୍ମିକ ଦାନ୍‌ ୱିଜୁ ପୟ୍‌ନି ଉଣ୍ତିଙ୍ଗ୍‌, ବିସେସ୍‍କିଜି ବାବବାଣି ମାଟା ପ୍ରଚାର୍‌ କିନିକା, ମି ଜିବନ୍‌ତୁ ପୁରା ଆପିତ୍‌ । 2 ଇରିଙ୍ଗ୍‌ ଏନ୍‌ ଆଇ ବାସାଦାନ୍‍ ମାଟା ଇନାନ୍‌, ୱାନ୍‌ ଲୋକ୍‌ତିଙ୍ଗ୍‌ ମାଟା ଇନ୍‌ଏନ୍‌, ମାତର୍‌ ମାପୁରୁଦି ଉଦେସ୍‌ତାନ୍‌ ଇନାନ୍‌, ୱାନି ମାଟା ଏନ୍‌ ବୁଜାଦେଙ୍ଗ୍‌ ଆଟ୍‍ଏର୍‍, ୱାନ୍‌ ଆତ୍ମାଦି ସାକ୍ତିଦାନ୍‌ ମାର୍‌ଗିତିମାନି ସତ୍‍ ବିସୟ୍‌କୁ ୱିଜୁ ଇନାନ୍‌ । 3 ମାତର୍‌ ଏନ୍‌ ମାପୁରୁଦି ବାକ୍ୟ ପ୍ରଚାର୍‌ କିନାନ୍‌, ୱାନ୍‌ ଆକା ଲୋକାଙ୍ଗ୍‌ ଇନାନ୍‌, ଆୟାମାଣୁକୁ ୱାରିଙ୍ଗ୍ ସାହାଜ୍ୟ, ୱେଡ଼ିକା ମାରି ସାନ୍ତି ସିନାତ୍‌ । 4 ଏନ୍‌ ଆଇ ବାସାଦାନ୍‍ ମାଟା ଇନାନ୍‌, ୱାନ୍‌ କେବଲ ନିଜେଦି ଉଣ୍ତିଙ୍ଗ୍‌ ସାହାଜ୍ୟ କିନାନ୍‌; ମାତର୍‌ ଏନ୍‌ ମାପୁରୁଦି ବାକ୍ୟ ପ୍ରଚାର୍‌ କିନାନ୍‌, ୱାନ୍‌ ୱିଜୁ ମଣ୍ତଲିଦିଙ୍ଗ୍‌ ସାହାଜ୍ୟ କିନାନ୍‌ ।

5 ମିର୍‌ ୱିଜିଦେର୍‌ ଜେ ଆଇ ବାସାଦାନ୍‍ ମାଟା ଇନ୍‍ଡ୍ରୁ, ଇକା ନା ଇଚ୍ଛା, ମାତର୍‌ ମିର୍‌ ଜେ ମାପୁରୁଦି ବାକ୍ୟ ପ୍ରଚାର୍‌ କିଦୁ, ଇକା ନା ନାଣ୍ତ ଇଚ୍ଛା । ଏନ୍‌ ଆଇ ବାସାଦାନ୍‍ ମାଟା ଇନିକା, ମଣ୍ତଲିଦି ଉଣ୍ତିଙ୍ଗ୍‌ ନେଗେତ୍‌ ଆନାତ୍‌; ଜଦି ଏନ୍‌ ଆୟାତାନି ଅର୍ତ ନେଗେନ୍‌ତାନ୍‌ ବୁଜାକିଜି ୱେର୍‌ନାନ୍‌, ସିଲିତିଙ୍ଗ୍‌ ଆଇ ବାସାଦାନ୍‍ ୱାର୍‌ଗିନିମାଣୁକୁ ମାପୁରୁଦି ମାଟା ପ୍ରଚାର କିନିକା ନେଗେତ୍‌ । 6 ଏ ତଡ଼ାନ୍‌କୁ, ନାନ୍‌ ଜଦି ମି ଲାକ୍‌ତୁ ସୋଲ୍‌ସି ମାପୁରୁଦିମାଣୁକୁ ୱେର୍‌ଆୟ୍‌ଏତି ବାକ୍ୟ, ମାରି ବୁଦି, ମାରି କାବୁର୍‌ ମାରି ସିକିୟାଦି ମାଟା ୱେର୍‌ଏଣ୍‌ଗା କେବଲ ଆଇ ବାସାଦାନ୍‍ ୱାର୍‌ଗିନା, ଆର୍‌ତିଙ୍ଗ୍‌ ଆବେନ୍‌ ନାନ୍‌ ମିଙ୍ଗିଁ ଇନି ସୁବିଦା କିନା ।

7 ପିରଡ଼ି ଆପିତ୍‌ ସିଲ୍‌ତିଙ୍ଗ୍‌ ଟଇଲା ଆପିତ୍‌, ଜିବନ୍‌ସିଲି ଅଡ଼୍‌ନିକା ଜଦି ନେଗି ସର୍‌ତାନ୍‌ ଅଡ଼୍ଏତେ, ଆର୍‌ତିଙ୍ଗ୍‌ ପିରଡ଼ିଦୁ ଇନିକା ଅଡ଼୍‌ଜିନାତ୍ ମାରି ଟଇଲାଦୁ ଇନିକା ଅଡ଼ଜିନାତ୍‌, ଆକା ଏନ୍‌ ଇନିକା ନେସ୍ତେଙ୍ଗ୍ ଆଟ୍‍ନାନ୍ ? 8 ମାରି, ମରି ଆଉଲିଦି ସ୍ୱର୍‌ ଟିକ୍‌ତାନ୍‌ ଆଏତିଙ୍ଗ୍‍, ଆର୍‌ତିଙ୍ଗ୍‌ ଏନ୍‌ ଜୁଦ୍‌ଦି ଉଣ୍ତିଙ୍ଗ୍‌ ତିଆର୍‌ ଆନାନ୍‌ ? 9 ଆୟାୱାଜା ମିର୍‌ ବା ଜଦି ଆଇ ବାସାଦାନ୍‍ ନେସ୍‌ନିନାନି ମାଟା ଇନ୍‌ଏତିଙ୍ଗ୍‌, ଆର୍‌ତିଙ୍ଗ୍‌ ଇନିକା ଇଜିନିଦେର୍‌, ଆକା ଏଣ୍ତେସ୍‌ ଜଣାପଡ଼ାନାତ୍‌ ? ଇରିଙ୍ଗ୍‌ ମିର୍‌ ଗାଲିଦିଙ୍ଗ୍‌ ୱେର୍‌ତି ୱାଜା ଆନାତ୍‌ । 10 ଦୁନିଆଦୁ ଗାଦି ଜାତିଦି ବାସେଙ୍ଗ୍‌ ମାନେ, ମାରି ଆୟାୱିଜୁ ମାଣ୍‌କୁ ଉନ୍‌ଡ୍ରି ଶବ୍ଦବା ଅର୍ତସିଲିକେଙ୍ଗ୍ ଆଉ । 11 ଜଦି ନା ୱାଲେ ୱାର୍‌ଗିସାଜି ମାନି ଲୋକ୍‌ତି ବାସା ନାନୁ ବୁଜାଦେଙ୍ଗ୍ ଆଟ୍ଏ, ଆର୍‌ତିଙ୍ଗ୍‌ ଆୟା ଲୋକୁ ନା ଲାକ୍‌ତୁ ନେସ୍‌ଇନାନି ଲୋକୁ ୱାଜା ଆନାନ୍‌, ନାନୁ ବା ୱାନି ଲାକ୍‌ତୁ ନେସ୍‌ଇନାନି ଲୋକୁ ୱାଜା ଆନା । 12 ମିର୍‌ ଆଇ ଆଇ ପବିତ୍ରଆତ୍ମାଦି ଦାନ ପୟ୍‌ଦେଙ୍ଗ୍‌ ୱେଡ଼ିକାମାନିଙ୍ଗ୍, ତାନିମାଣୁକୁ ଏମେ ୱିଜୁ ମଣ୍ତଲିଦି ନେଗି ଉଣ୍ତିଙ୍ଗ୍‌ ପୁରା କିଦେଙ୍ଗ୍‌ ଆଟ୍‍ନାତ୍ ଆୟାୱିଜୁ ନାଣ୍ତଇସାବ୍‌ତାନ୍‌ ପୟ୍‌ଦେଙ୍ଗ୍‌ ଚେଷ୍ଟାକିଦୁ । ବାଜାଦି ସାମାନ୍‌କୁ

13 ଏନ୍‌ ଆଇ ବାସାଦାନ୍ ୱାର୍‌ଗିନାନ୍‌, ୱାନ୍‌ ଇୟାତାନି ଅର୍ତ ୱେର୍‍ତେଙ୍ଗ୍‍ ଦାନ୍‌ ପୟ୍‌ଦେଙ୍ଗ୍‌ ପାର୍‌ତାନା କିପିନ୍ । 14 ଜଦି ନାନୁ ଆଇ ବାସାଦାନ୍ ପାର୍‌ତାନା କିନା, କେବଲ ନା ମୋନତି ଆତ୍ମା ଆକା କିନାତ୍, ନା ବୁଜାନି ସାକ୍ତି ଆବେନ୍‌ ତିର୍‌ ମୋନ୍‌ତାନ୍ ତେବାଏତ୍ । 15 ଆର୍‌ତିଙ୍ଗ୍‌ ନାନୁ ଇନିକା କିନା ? ନାନୁ ନା ଆତ୍ମାଦାନ୍‌ ପାର୍‌ତାନା କିନା, ମାରି ନାନ୍‌ ବୁଜାନିୱାଜା ପାର୍‌ତାନା କିନା । ନାନ୍‌ ନା ଆତ୍ମାଦାନ୍‌ ପାଟା ପାର୍‍ନା, ମାତର୍‌ ତାନି ୱାଲେ ମୋନ୍‌ ଦିୟାନ୍‌ ସିଜି ପାଟା ପାର୍‌ନା । 16 ଆକା ଆଏତିଙ୍ଗ୍‍ ମାପୁରୁଙ୍ଗୁଁ କେବଲ ମି ଆତ୍ମାଦାନ୍‌ ଦନ୍ୟବାଦ୍‌ ସିଦୁ, ଆବେନ୍‌ ମାନି ଅରେନ୍ ସାମାନ୍‌ତି ଲୋକୁ ଏଣ୍ତେସ୍ ମି ୱାଲେ ଆମେନ୍‍ ଇନାନ୍‌ । ଇରିଙ୍ଗ୍‌ ମିର୍‌ ଇନିକା ଇଜିନିଦେର୍‌, ଆକା ୱାନ୍‌ ନେସ୍‌ତେଙ୍ଗ୍‌ ଆଟ୍‍ଏନ୍ । 17 ମିର୍‌ ନେଗେନ୍‌ତାନ୍‌ ମାପୁରୁଙ୍ଗୁଁ ଦନ୍ୟବାଦ୍‌ ସିତିମାରିଙ୍ଗ୍‌ ବା, ୱାନି ମାଣ୍‌କୁ ଆଇ ଲୋକ୍‌ତି ଇନି ରକମ୍‌ତି ପାଣି ଆଦେଙ୍ଗ୍‍ଁ ଆଟ୍ଏତ୍ ।

18 ନାନ୍‌ ମାପୁରୁଙ୍ଗୁଁ ଦନ୍ୟବାଦ୍‌ ସିଜିନା, ଇରିଙ୍ଗ୍‌ ନାନ୍‌ ମି ୱିଜେରିମାନୁ ନାଣ୍ତଦାନ୍‌ ଆଇବାସା ମାଟା ୱେର୍‍ତେଙ୍ଗ୍ ଆଟ୍‍ନା । 19 ମାତର୍‌ ମଣ୍ତଲିଦି ଉପାସନାଦୁ ଆଇ ବାସାଦାନ୍‍ ହାଜାର୍‌ ହାଜାର୍‌ ବଲ୍‌କୁ ୱେର୍‌ଏଣ୍‌ଗା ମାରି ୱିଜେରି ବୁଦିଦି ୱାଲେ ପାସ୍‌ଗୋଟା ବଲ୍‌କୁ ୱେର୍‌ନିକା ନେଗିକା ।

20 ଏ ତଡ଼ାନ୍‌କୁ, ବୁଦିଦୁ ଇସ୍ରିକଡ଼ରି ୱାଜା ଆମାଟ୍, ମାତର୍‌ ତାଗ୍‌ଇ ବିସୟ୍‌ତିଙ୍ଗ୍ ଇସ୍ରିକଡ଼ରି ୱାଜା ଆଦୁ; ମାତର୍‌ ବୁଦିଦୁ ମିର୍‌ ପୁରା ବୟସ୍‌ତି ଲୋକା ୱାଜା ଆନିକା ମାନାତ୍‌ । 21 ଦାର୍ମୁସାସ୍ତ୍ରଦୁ ରାସାତା ମାନାତ୍‌ :

"ପ୍ରବୁ ଇନାନ୍‌, ଆଇବାସା ୱାର୍‌ଗିଜିମାନି

ଆଇଦେସ୍‌ତିଲୋକା ମକମ୍‌ତୁ

ନାନ୍‌ ଇୟା ଲୋକା ୱାଲେ ୱାର୍‌ଗିନା,

ମାରିବା ୱାର୍‌ ମା ମାଟା ୱେନ୍‌ଏର୍‌ ।"

22 ଆଦେଙ୍ଗ୍‌ ଆଇ ବାସାଦାନ୍‍ ୱାର୍‌ଗିନି ବିସ୍‌ବାସ୍‌ସିରି ଉଣ୍ତିଙ୍ଗ୍‌ ସିନାଦି ୱାଜା ଆଏତ୍‍, ମାତର୍‌ ଅବିସ୍‍ବାସିରି ଉଣ୍ତିଙ୍ଗ୍‌ ସିନାଦି ୱାଜା ଆନାତ୍‌; ଆଇତରିନ୍‍, ମାପୁରୁଦି ବାକ୍ୟ ପ୍ରଚାର୍‌ କିନି ଅବିସ୍‍ବାସିରି ଉଣ୍ତିଙ୍ଗ୍‌ ସିନାଦି ୱାଜା ଆଏତ୍‍, ମାତର୍‌ ବିସ୍‌ବାସିରି ଉଣ୍ତିଙ୍ଗ୍‌ ସିନାଦି ୱାଜା ଆନାତ୍‌ ।

23 ମାରିବା ମଣ୍ତଲିଦି ୱିଜେରେ ଉନ୍‌ଡ୍ରେମାନୁ ଆନାର୍‌ ମାରି ୱିଜେରେ ଆଇ ବାସାଦାନ୍‍ ୱାର୍‌ଗିନିନାର୍‌, ମାରି ସାମାନ୍‌ତି ଲୋକୁ ମାରି ଅବିସ୍‌ବାସ୍‌ତି ଲୋକୁ ୱାନାର୍‌, ଆର୍‌ତିଙ୍ଗ୍‌ ମିର୍‌ ବାୟା ଇଜି ଇନିକା ୱାର୍‌ ଇନ୍‌ଏର୍‌ ? 24 ମାତର୍‌ ୱାର୍‌ ଜଦି ମାପୁରୁଦି ବାକ୍ୟ ୱେର୍‌ନାର୍‌, ମାରି ଅରେନ୍‍ ଅବିସ୍‌ବାସି ମାରି ସାମାନ୍‌ତି ଲୋକୁ ୱାନାନ୍, ଆର୍‌ତିଙ୍ଗ୍‌ ୱାନ୍‌ ୱିଜେରି ମାଣାନ୍‌ ପାପ୍‌ତିକାନ୍‌ ଇଜି ନେସ୍‌ତେଙ୍ଗ୍‌ ଆଟ୍‍ନାନ୍‍, ୱିଜେରି ମାଣାନ୍‌ ବିଚାର୍‌ ଆନାନ୍‌ । 25 ୱାନି ଜିବନ୍‌ତୁ ମାର୍‌ଗିତିମାନି ବିସୟ୍‌କୁ ୱିଜୁ ତରାନାତ୍‌; ଆବେନ୍‌ ୱାନ୍‌ ମକମ୍ ପାଡ଼ିକ୍‌ସି ମାରି "ସତ୍‌ତାନ୍‌ ମାପୁରୁ ଜେ ପୁରା ମି ଲୋଇ ମାନାନ୍‌," ଇକା ମାନାଜି ୱାନିଙ୍ଗ୍‌ ମାଡ଼ିସ୍‌ କିନାନ୍‌ ।

26 ଏ ତଡ଼ାନ୍‌କୁ ନି ତାଙ୍ଗିଁ, ମିଙ୍ଗିଁ ନାନ୍‌ ୱେର୍‌ନି ମାଟା; ଉପାସନା କିନି ଉଣ୍ତିଙ୍ଗ୍‌ ଉଣ୍ତାନି ୱାଲେ ଏନ୍‌ ଅରେନ୍‍ ପାଟା ପାରିନ୍‌, ମାରି ଅରେନ୍‍ ସିକିୟା ସିପିନ୍‌, ଏନ୍‌ ଅରେନ୍‍ ମାପୁରୁଦି ୱେର୍‌ତି ବାକ୍ୟ ୱେର୍‌ନି, ମାରି ଅରେନ୍‍ ଆଇ ବାସାଦାନ୍‍ ୱାର୍‌ଗିପିନ୍‌ ମାରି ଏନ୍‌ ଇୟା ନେସ୍‌ଇ ବାସାଦି ଅର୍ତ ବୁଜା କିପିନ୍‌ । ଇୟାୱିଜୁ ମଣ୍ତଲିଦି ନେଗି ଉଣ୍ତିଙ୍ଗ୍‌ କିନିକା ଦର୍‌କାର୍‌ । 27 ଜଦି ଏନ୍‌ ଆଇ ବାସାଦାନ୍‍ ୱାର୍‌ଗିନାନ୍‌, ଆର୍‌ତିଙ୍ଗ୍‌ ଅରେନ୍‍ ୱେନ୍‌କା ମାରି ଅରେନ୍‍ ଇୟାୱାଜା ରିଏର୍‌ ସିଲିତିଙ୍ଗ୍‌ ଅଦିକ୍‍ନାଣ୍ତ ଆତିଙ୍ଗ୍‌, ମୁଏର୍‌ ୱେର୍‌ରି ମାରି ଅରେନ୍‍ ତାନି ଅର୍ତ ବୁଜାକିଜ ସିପିନ୍‌ । 28 ଜଦି ଅର୍ତ ବୁଜା କିଦେଙ୍ଗ୍‌ ଏନ୍‌ ସିଲେତିଙ୍ଗ୍‌, ଆର୍‌ତିଙ୍ଗ୍‌ ୱାନ୍‌ ପାର୍‌ତାନାଦି ମଣ୍ତଲିଦୁ ଆଲେଜ ତେବାପିନ୍‌ ମାରି ସୁନ୍‌ସାନ୍‌ ବାଡିଦୁ ମାପୁରୁଙ୍ଗୁଁ ଇନିନ୍‌ । 29 ମାରି, ରିଏର୍‌ ସିଲିତିଙ୍ଗ୍‌ ମୁଏର୍‌ ମାପୁରୁଦି ବାକ୍ୟ ବାବବାଦି ୱେର୍‌ରି, ମାରି ଆଇକାର୍‌ ବିଚାର୍‌ କିପିର୍‌ । 30 ମାତର୍‌ ଉପାସନାଦୁ ତେବାତିମାନିକାନ୍‌ ଏନ୍‌ ଜଦି ଦାପ୍ରେନେ ମାପୁରୁଦିମାଣାନ୍‌ ଇନି ବାକ୍ୟ ୱାନାତ୍, ଆର୍‌ତିଙ୍ଗ୍‌ ଆଗ୍‌ଡ଼ି ୱେର୍‍ସି ମାନିକାନ୍‌ ଆଲେପିନ୍‌ । 31 ଇରିଙ୍ଗ୍‌ ଏଣ୍ତେସ୍‌ ୱିଜେରେ ସିକିୟା ପୟ୍‌ନାର୍‌, ମାରି ୱିଜେରେ ସେତେନା ଆନାର୍‌, ଇୟାଉଣ୍ତିଙ୍ଗ୍‌ ମିର୍‌ ୱିଜିଦେର୍‌ ଅରେନ୍‍ ୱେନ୍‌କା ଅରେନ୍‍ ମାପୁରୁଦି ବାକ୍ୟ ୱେର୍‍ତେଙ୍ଗ୍‍ ଆଟ୍‌ନିଦେର୍‌ । 32 ମାତର୍‌ ବାବବାଦି ବାକ୍ୟ ପ୍ରଚାର୍‌ କିନି ଦାନ୍‌ ପ୍ରଚାର୍‌କିନିୱାନି ଆଡ୍‍ଗି ଆନିକା ମାନାତ୍‌ । 33 ଇରିଙ୍ଗ୍‌ ମାପୁରୁ ସାନ୍ତିସିଲି ମାପୁରୁ ଆଏନ୍‍, ମାତର୍‌ ସାନ୍ତିଦି ମାପୁରୁ ।

ମାତର୍‌ ୱିଜୁ ମଣ୍ତଲିଆଙ୍ଗାଁ ଏଣ୍ତେସ୍‌ ଆନାମାନାତ୍‍ । 34 ଆୟାୱାଜା ମି ମଣ୍ତଲିଦି ଉପାସନାଦୁ ଆଇମେକ୍‍ ଆଲେଜ ମାନିଉ, ଆବେନ୍‌ ୱାର୍‌ଗିନି ଉଣ୍ତିଙ୍ଗ୍‌ ୱାକ୍‌ ସାରି ପୟ୍‌ଉ, ଜିହୁଦିରି ନିୟମ୍‌ତି ଇସାବ୍‌ତାନ୍‌ ୱାକ୍‌ ଆଡ୍‍ଗି ତେବାଜି ମାନିୱି । 35 ୱାକ୍‌ ଜଦି ଇନି ବିସୟ୍‌ ବୁଜାଦେଙ୍ଗ୍‌ ଇଚ୍ଛା କିନେ, ଆର୍‌ତିଙ୍ଗ୍‌ ଇନ୍‌ଡ୍ର ନିଜେ ନିଜେଦି କନ୍‌ଲିରିଙ୍ଗ୍‌ ୱେନ୍‌ବାପିୱି, ଇରିଙ୍ଗ୍‌ ମଣ୍ତଲି ଲୋଇ ୱାର୍‌ଗିନିକା ଆଇମେକା ଉଣ୍ତିଙ୍ଗ୍‌ ସେମାର୍‌ତିମାଟା ।

36 ମାପୁରୁଦି ବାକ୍ୟ ଇନିକା ମିମାଣାନ୍‌କୁ ସତାମାନାତ୍‌ ? ଇକା ଇନିକା କେବଲ ମି ଲାକ୍‌ତୁ ୱାତାମାନାତ୍‌ ? 37 ଏନ୍‌ ଜଦି ନିଜେଦିଙ୍ଗ୍‌ ଅରେନ୍‍ ବାବବାଦି ନି ଆତ୍ମିକ ଦାନ୍‌ ପୟ୍‌ତି ଲୋକ୍‌ ଇଜି ଅଡ଼୍‌ବିନାନ୍‌, ଆର୍‌ତିଙ୍ଗ୍‌ ନାନ୍‌ ମିଙ୍ଗିଁ ଆମାକା ଆମାକା ରାସ୍‌ସିନା, ଆୟାୱିଜୁ ଜେ ପ୍ରବୁଦି ଆଦେସ୍‌, ଇକା ୱାନ୍‌ ନେସିନ୍‌ । 38 ମାତର୍‌ ୱାନ୍‌ ଜଦି ମାନାଏନ୍‌, ଆର୍‌ତିଙ୍ଗ୍‌ ୱାନିଙ୍ଗ୍‌ ମିର୍‌ ମାନାମାଟ୍‌ ।

39 ଆଦେଙ୍ଗ୍‌ ଏ ନା ତଡ଼ାନ୍‌କୁ ନି ତାଙ୍ଗିଁକି, ମାପୁରୁଦି ବାକ୍ୟ ପ୍ରଚାର୍‌ କିନି ଉଣ୍ତିଙ୍ଗ୍‌ ୱେଡ଼ିକା ଆଦୁ; ମାରି ଆଇ ବାସାଦାନ୍‍ ୱାର୍‌ଗିନି ଉଣ୍ତିଙ୍ଗ୍‌ ଏଙ୍ଗ୍‌ବା ମାନା କିମାଟ୍‌ । 40 ୱିଜୁ ପାଣି ନେଗେନ୍‌ତାନ୍‌ ମାରି ସାନ୍ତିଦାନ୍‌ କିଆନିକା ଦର୍‌କାର୍‌ ।