1 ସାନ୍ତି ମାଟା ରିସାଦିଙ୍ଗ୍‌ ଉଣା କିନାତ୍‌;

ମାତର୍‌ ବାଦେଆନି ମାଟା ରିସା ସପ୍‌ନାତ୍‌ ।

2 ବୁଦିମାନି ଲୋକା ୱେୟୁ ବୁଦିଦି ମାଟା ୱାର୍‌ଗିନାତ୍‌;

ମାତର୍‌ ବୁଦିସିଲି ଲୋକ୍‌ତି ୱେୟୁ ବୁଦିସିଲି ମାଟା ସପ୍‌ନାତ୍‌ ।

3 ପ୍ରବୁଦି କାଣୁକୁ ୱିଜୁମାନୁ ମାନ୍‌ଜି ତାଗ୍‌ଇ ଲୋକାଙ୍ଗ୍‌

ମାରି ନେଗି ଲୋକାଙ୍ଗ୍‌ ସୁଡ଼ୁନାତ୍‌ ।

4 ସାନ୍ତିଦି ୱେୟୁ ଜିବନ୍‌ତି ମାରାନୁ ୱାଜା;

ମାରି, କୁଟ୍‌ ମାଟେଙ୍ଗ୍‌ ୱାର୍‌ଗିନି ୱେୟୁ ଜିବନ୍‌ତିଙ୍ଗ୍‌ ଦୁଃକ୍ କିନାତ୍‌ ।

5 ବୁଦିସିଲିକାନ୍‌ ନିଜେଦି ବୁବା ନେଗି ଉଣ୍ତିଙ୍ଗ୍‌ ଲାଗାନି ମାଟାଦିଙ୍ଗ୍‌ ଏଡ଼ା କିନାନ୍‌;

ମାରି, ୱେର୍‌ତି ମାଟା ଏନ୍‌ ଆସ୍‌ନାନ୍‌, ୱାନ୍‌ ବୁଦି ପୟ୍‌ନାନ୍‌ ।

6 ଦାର୍ମୁଦି ଲୋକା ଇଲୁଦୁ ନାଣ୍ଡ ଦନ୍‌ ତେବାନାତ୍‌;

ମାରି, ତାଗ୍‌ଇୱାରି ଉଣ୍ତା କିନିକା ନାସ୍ଟୁ ଆନାସନାତ୍‌ ।

7 ବୁଦିଦି ଲୋକ୍‌ତି ୱେୟୁ ବିଦ୍ୟା ୱେର୍‌ନାତ୍‌;

ମାତର୍‌ ବୁଦିସିଲି ଲୋକ୍‌ତି ମନ୍‌ ଆୟାୱାଜା କିଏତ୍‌ ।

8 ତାଗ୍‌ଇୱାରି ପୁଜା ସିନିକା ପ୍ରବୁଦି ଲାକ୍‌ତୁ କାଡ଼୍‌ନି ବିସୟ୍‌;

ମାତର୍‌ ନେଗି ଲୋକା ପାର୍‌ତନା ୱାନି ୱେଡ଼ିକା ମାଟା ।

9 ସେଇ ଲୋକ୍‌ତି ବୁଲାନିକା ପ୍ରବୁଦି କାଡ଼୍‌ନି ମାଟା; ମାତର୍‌ ଦାର୍ମୁଦୁ ବୁଲାନି ଲୋକାଙ୍ଗ୍‌ ୱାନ୍‌ ଜିବନ୍‌ନୋନାନ୍‌ ।

10 ତାଗ୍‌ଇସାରିଦୁ ସନି ଲୋକା ଉଣ୍ତିଙ୍ଗ୍‌ ଦୁକ୍‌ତି ସାସ୍ତି ଗଟାନାତ୍‌; ମାରି, ଆମାକାନ୍‌ ନେଗି ଉଣ୍ତିଙ୍ଗ୍‌ ଲାଗାନି ମାଟାଦିଙ୍ଗ୍‌ କାଡ଼୍‌ନାନ୍‌, ୱାନ୍‌ ସାନାନ୍‌ ।

11 ଆଡ୍‌ଗିପୁର୍‌ ମାରି ସାନି ବାଡି ପ୍ରବୁଦି ଆଗ୍‌ଡ଼ି ମାର୍‌ଗିଜି ତେବାଏତ୍‌; ଆର୍‌ତିଙ୍ଗ୍‌ ଲୋକା ମନ୍‌ ଇନିକା ମାର୍‌ଗିଜି ତେବାଦେଙ୍ଗ୍‌ ଆଟ୍‌ନାତ୍‌ ?

12 ନିନ୍ଦାଦିକାନ୍‌ ନେଗି ଉଣ୍ତିଙ୍ଗ୍‌ ୱେର୍‌ନି ମାଟା ୱେନ୍‌ଏନ୍‌, ୱାନ୍‌ ବୁଦିଦି ଲୋକ୍‌ତି ଲାକ୍‌ତୁ ସଲ୍‌ଏନ୍‌ ।

13 ୱେଡ଼ିକାଦି ମନ୍‌ ମକମ୍‌ତିଙ୍ଗ୍‌ ୱେଡ଼ିକା କିନାତ୍‌; ମାତର୍‌ ମନ୍‌ତି ଦୁକ୍‌ତାନ୍‌ ଜିବନ୍‌ ରୁଙ୍ଗ୍‌ନାତ୍‌ ।

14 ବୁଦିଦି ଲୋକା ମନ୍ ଗ୍ୟାନ୍‌ ରେବାନାନ୍‌; ମାତର୍‌ ବୁଦିସିଲି ଲୋକ୍‌ତି ୱେୟୁ ବୁଦିସିଲିକା ତିନାତ୍‌ ।

15 ଦୁଃକ୍‌ ଲୋକ୍‌ତି ୱିଜୁ ଦିନ୍‌ ସେଇକା; ମାତର୍‌ ଆମାୱାନି ୱେଡ଼ିକାଦି ମନ୍‌, ୱାନ୍‌ ୱିଜୁଦିନ୍‌ ୱେଡ଼ିକା ତେବାନାନ୍‌ ।

16 ଅସାନ୍ତିଦି ନାଣ୍ଡ ଦନ୍‌ ସମ୍ପତି ମାନି ବାଦ୍‌ଲୁ ପ୍ରବୁଦିଙ୍ଗ୍‌ ତିଲାଜି ଉଣା ଦନ୍‌ ମାନିକା ନେଗେଣ୍ଡ୍‌ ।

17 ରିସାଦାନ୍‌ ବାଲ୍‌ସ୍ତି କଡି କାଣ୍ତା ତିନି ବାଦ୍‌ଲୁ

ଜିବନ୍‌ନୋନିକା ମାନି ବାଡିଦୁ କୁସାପୁଲା ତିନିକା ନେଗେଣ୍ଡ୍‌ ।

18 ରିସାଦି ଲୋକୁ ଜାଟିଜଗ୍‌ଡ଼ା କିନାନ୍‌;

ମାରି, ରିସା କିଦେଙ୍ଗ୍‌ ସାନ୍ତି ଲୋକୁ ଜାଟିଜଗ୍‌ଡ଼ା ତିର୍‌ କିନାନ୍‌ ।

19 ଗାଡ଼ିଆ ଲୋକ୍‌ତି ସାରି ସାମ୍‌କାକୋଟି ୱାଜା,

ମାତର୍‌ ନେଗି ଲୋକ୍‌ତି ସାରି ପେରିଜାରି ୱାଜା କିଆଇଆନାତ୍‌ ।

20 ଗ୍ୟାନ୍‌ଦି ମାରିନ୍‌ ବୁବାଦି ୱେଡ଼ିକା କିନାନ୍‌;

ମାତର୍‌ ବୁଦିସିଲି ମାରିନ୍‌ ନିଜେଦି ୟାୟାଙ୍ଗ୍‌ କାଡ଼୍‌ନାନ୍‌ ।

21 ବୁଦିସିଲି ଲୋକ୍‌ତି ଉଣ୍ତିଙ୍ଗ୍‌ ବୁଦିସିଲିକା ୱେଡ଼ିକାଦିକା ଆନାତ୍‌;

ମାତର୍‌ ବୁଦିଦି ଲୋକ୍‌ ନିଜେଦି ସାରି ନେଗିକା କିନାନ୍‌ ।

22 ନେଗି ମାଟା ୱେର୍‌ନିକା ଉଣା ଉଣ୍ତିଙ୍ଗ୍‌ ମନ୍‌ତୁ ଅଡ଼୍‌ବିନି ମାଟା ୱିଜୁ ପୁରା ଆଏତ୍‌;

ମାତର୍‌ ନାଣ୍ତ ଲୋକା ୱେର୍‌ନି ମାଣାନ୍‌ ଆକା ପୁରା ଆନାନ୍‌ ।

23 ନିଜେଦି ୱେୟୁଦି ମାଟାଦାନ୍‌ ଲୋକ୍‌ତି ୱେଡ଼ିକା ଆନାତ୍‌,

ମାରି ଟିକ୍‌ ବେଡ଼ାଦି ମାଟା ଏମେଜାକୁ ନେଗିକା !

24 ଆଡ୍‌ଗିରି ପାତାଲ୍‌ତିଙ୍ଗ୍‌ ଡ଼ିସ୍‌ନି ଉଣ୍ତିଙ୍ଗ୍‌

ବୁଦିଦି ଲୋକ୍‌ ଉଣ୍ତିଙ୍ଗ୍‌ ଜିବନ୍‌ତି ସାରି ମୁସ୍‌କୁ ଅନାତ୍‌ ।

25 ପ୍ରବୁ ଗର୍ବ ଲୋକ୍‌ତି ଇଲୁଦିଙ୍ଗ୍‌ ବାସ୍‌ଡ଼ାକିନା ପକ୍‌ନାନ୍‌;

ମାତର୍‌ ରାଣ୍ଡି ଆଇମେକା ସାନ୍ଦି ୱାନ୍‌ ତିର୍‌ କିନାନ୍‌;

26 ତାଗ୍‌ଇସିନ୍ତା କିନିକା ପ୍ରବୁଦି ଲାକ୍‌ତୁ କାଡ଼୍‌ନି ମାଟା; ମାତର୍‌ ୱେଡ଼ିକାଦି ମାଟା ନେଗେଣ୍ଡ୍‌ ଆନାତ୍‌ ।

27 କାଟ୍‌କା ଲୋକ୍‌ ନିଜେଦି ଇଲୁଦି ଲୋକାଙ୍ଗ୍‌ ଦୁଃକ୍‌ ସିନାନ୍‌, ମାତର ଆମା ଲୋକୁ ଲାସ୍‌ ଅନିକା କାଡ଼୍‌ନାନ୍‌, ୱାନ୍‌ ଜିନାନ୍‌ ।

28 ଦାର୍ମୁ ଲୋକ୍‌ ମନ୍‌ତୁ ଅଡ଼୍‌ବିଜି ମାଟା ୱେର୍‌ନାନ୍‌; ମାତର୍‌ ତାଗ୍‌ଇୱାରି ୱେୟୁ ସେଇ ମାଟା ସପ୍‌ନାତ୍‌ ।

29 ପ୍ରବୁ ତାଗ୍‌ଇୱାରି ମାଣାନ୍‌ ଆକ ତେବାନାନ୍‌; ମାରି, ଦାର୍ମୁ ଲୋକା ପାର୍‌ତନା ୱାନ୍‌ ୱେନାନ୍‌ ।

30 ସିକ୍‌ନି ମକମ୍‌ ମନ୍‌ତିଙ୍ଗ୍‌ ୱେଡ଼ିକା କିନାତ୍‌; ମାରି, ନେଗି ମାଟା ପେଡ଼େନ୍‌ଦିଙ୍ଗ୍‌ ସାକ୍‌ତି କିନାତ୍‌ ।

31 ଏନ୍‌ ନେଗି ଉଣ୍ତିଙ୍ଗ୍‌ ୱେର୍‌ନି ମାଟା ୱେନାନ୍‌, ୱାନ୍‌ ଜିବନ୍‌ ପୟ୍‌ନାନ୍‌ ମାରି ୱାନ୍‌ ବୁଦିଦି ଲୋକା ଲାକ୍‌ତୁ ବାସାନାନ୍‌ ।

32 ଆମା ଲୋକୁ ନେଗି ଉଣ୍ତିଙ୍ଗ୍‌ ୱେର୍‌ନି ମାଟା ୱେନ୍‌ଏନ୍‌, ୱାନ୍‌ ନିଜେଦି ଜିବନ୍‌ତିଙ୍ଗ୍‌ କାଡ଼୍‌ନାନ୍‌; ମାତର୍‌ ଆମାକାନ୍‌ ନେଗି ଉଣ୍ତିଙ୍ଗ୍‌ ୱେର୍‌ନି ମାଟା ୱେନାନ୍‌, ୱାନ୍‌ ବୁଦି ପୟ୍‌ନାନ୍‌ ।

33 ବୁଦିଦି ନେଗି ମାଟା ଆଜିନାତ୍‌ ପ୍ରବୁଙ୍ଗ୍‌ ତିଲାନିକା; ମାରି, ସାନ୍ତି ସନ୍‌ମାନ୍‌ତି ଆଗ୍‌ଡ଼ି ମାନାତ୍‌ ।