1 ସେଇ ଲୋକ୍‌ ଏନ୍‌ ଉଲ୍‌ପେଏତିଙ୍ଗା ବା ଉରୁକ୍‌ନାନ୍‌; ମାତର୍‌ ଦାର୍ମୁଦିକାର୍‌ ପାର୍ଟାନରେସ୍‌ ୱାଜା ବପୁ ଆନାର୍‌ ।

2 ଦେସ୍‌ତି ଅଦାର୍ମୁ ଉଣ୍ତିଙ୍ଗ୍‌ ଆବେଣି ପେରିକାର୍‌ ନାଣ୍ଡ ଆନାର୍‌; ମାତର୍‌ ବୁଦିଦିକାର୍‌ ମାରି ଗ୍ୟାନ୍‌ଦି ଲୋକା ମାଣାନ୍‌ ଆବେଣି ସାସନ୍‌ ନାଣ୍ତ ଦିନ୍‌ ତିର୍‌ ତେବାନାତ୍‌ ।

3 ଆମା କାକୁର୍ତି ଲୋକ୍‌ ସିଲିସାତି ଲୋକ୍‌ତିଙ୍ଗ୍‌ କାସ୍ଟୁ ସିନାନ୍‌, ୱାନ୍‌ ପାସି ନାସ୍ଟୁ କିଜିମାନି ପିରୁ ୱାଜା ଆନାନ୍‌; ଆବେନୁ କାଦି ଉଣା ଆନାତ୍‌ ।

4 ନିୟମ୍‌ ମାନାଇକାର୍‌ ସେଇ ଲୋକାଙ୍ଗ୍‌ ୱେଡ଼ିକା କିନାର୍‌, ମାରି, ନିୟମ୍‌ ମାନାନି ଲୋକୁ ୱାରିଙ୍ଗ୍‌ ବିରୁଦ୍‌ କିନାର୍‌ ।

5 ସେଇ ଲୋକୁ ନିୟାଇ ବୁଜାଏର୍‌, ମାତର୍‌ ପ୍ରବୁଙ୍ଗ୍‌ ରେବାନିକାର୍‌ ୱିଜୁ ବିସୟ୍‌ ବୁଜାନାର୍‌ ।

6 ରିଆଙ୍ଗାଁ ବୁଲାନି କୁଟ୍‌ ମାଜନ୍‌ ଲୋକ୍‌ ବାଦ୍‌ଲୁ ନିଜେଦି ଦାର୍ମୁଦାନ୍‌ ବୁଲାନି ସିଲିସାତି ଲୋକ୍‌ ନେଗେତ୍‌ ।

7 ଆମାକାନ୍‌ ନିୟମ୍‌ ମାନାନାନ୍‌, ୱାନ୍‌ ବୁଦିଦି ମାରିନ୍‌; ମାରି, ଆମାକାନ୍‌ କାଉରାରି ୱାଲେ ସଙ୍ଗ୍‌ ଆନାନ୍‌, ୱାନ୍‌ ନିଜେଦି ବୁବେଙ୍ଗ୍‌ ସେମାର୍‌ କିବିସ୍‌ କିନାନ୍‌ ।

8 ଆମା ଲୋକୁ କଲନ୍ତର୍‌ ଅସି ନିଜେଦି ଦନ୍‌ ନାଣ୍ତ କିନାନ୍‌, ୱାନ୍‌ ସିଲିସାତି ଲୋକା ଉଣ୍ତିଙ୍ଗ୍‌ ଦୟାକିନିୱାରି ଉଣ୍ତିଙ୍ଗ୍‌ ଆକା ଉଣ୍ଡା କିନାନ୍‌ ।

9 ଆମା ଲୋକ୍‌ ନିୟମ୍‌ ୱେଣ୍ଡ୍ରେଙ୍ଗ୍‌ ନିଜେଦି ଗିତଣିଦାନ୍‌ ୱେନ୍‌ଏନ୍‌, ୱାନି ପାର୍‌ତନା ନେ କାଡ଼୍‌ନି ବିସୟ୍‌ ଆନାତ୍‌ ।

10 ଆମା ଲୋକ୍‌ ନେଗି ଲୋକାଙ୍ଗ୍‌ ସେଇ ସାରିଦୁ ସଣ୍ଡ୍ରେଙ୍ଗ୍‌ ଇନାନ୍‌, ୱାନ୍‌ ନିଜେ କାରିତି ଗୁଟାଦୁ ଆର୍‌ନାନ୍‌; ମାତର୍‌ ସତ୍‌ଦି ଲୋକୁ ନେଗିକା ଅଦିକାର୍‌ କିନାର୍‌ ।

11 ମାଜନ୍‌ ଲୋକ୍‌ ନିଜେଦି କାଣ୍‌ଗାଦୁ ବୁଦିମାନିକାନ୍‌ ଇଜି ଅଡ଼୍‌ବିନାନ୍‌; ମାତର୍‌ ବୁଦିମାନ୍‌ ସିଲିସାତି ଲୋକ୍‌ ମାଜନ୍‌ ଲୋକ୍‌ତି ମନ୍‌ ବିସୟ୍‌ ନେସ୍‌ନାନ୍‌ ।

12 ଦାର୍ମୁଦିକାର୍‌ ଜିଣାତିଙ୍ଗ୍‌ ନାଣ୍ତୱେଡ଼ିକା ଆନାତ୍‌; ମାତର୍‌ ତାଗ୍‌ଇକାର୍‌ ଜିଣାତିଙ୍ଗା ଲୋକୁ ନିଜେଦିଙ୍ଗ୍‌ ଆଡ଼ାକ୍‌ନାର୍‌ ।

13 ଆମାକାନ୍‌ ନିଜେଦି ପାପ୍‌ ପିଡ଼ିକାନାନ୍‌, ୱାନ୍‌ ନେଗିକା ପୟ୍‌ଏନ୍‌; ମାତର୍‌ ଆମା ଲୋକ୍‌ ଆକା ମାନାଜି ଡ଼ିସ୍‌ନାନ୍‌, ୱାନ୍‌ ଦୟା ପୟ୍‌ନାନ୍‌ ।

14 ଆମା ଲୋକ୍‌ ୱିଜୁବେଡ଼ାଦୁ ତିଲାନାନ୍‌, ୱାନ୍‌ ଦନ୍ୟ; ମାତର୍‌ ଆମାକାନ୍‌ ନିଜେଦି ମନ୍‌ତିଙ୍ଗ୍‌ ଆଟ୍‌ୱା କିନାନ୍‌, ୱାନ୍‌ ବାଦାଦୁ ଆର୍‌ନାନ୍‌ ।

15 ଆମାଜାକୁ ଗାର୍ଜାନି ପାର୍ଟାନରେସ୍‌ ମାରି ବୁଲାନି ଅଡ଼୍‍ଜୁ; ଆୟାୱାଜା ସିଲିସାତି ଲୋକା ମୁସ୍‌କୁ ସେଇ ସାସନ୍‌କିନିକାନ୍‌ ମାନାନ୍‌ ।

16 ଆମା ସାସନ୍‌କିନିକାନ୍‌ ବୁଦିସିଲିକାନ୍‌, ୱାନ୍‌ ବା ନାଣ୍ଡ ସେଇକାନ୍‌ ଆନାନ୍‌, ମାତର୍‌ ଆମାକାନ୍‌ ଲବିଦିଙ୍ଗ୍‌ କାଡ଼୍‌ନାନ୍‌, ୱାନ୍‌ ନିଜେଦି ଦିନ୍‌ ନାଣ୍ତ କିନାନ୍‌ ।

17 ଆମାବା ଲୋକ୍‌ ଡାକ୍‌ତି ଲୋକ୍‌ତି ଦାୟି ଆନାନ୍‌, ୱାନ୍‌ ଗୁଟା ସାନ୍ଦି ସନାନ୍‌; ଏନ୍‌ ୱାନିଙ୍ଗ୍‌ ତେବା କିମାକିନ୍‌ ।

18 ଆମା ଲୋକ୍‌ ନେଗି ସାରିଦୁ ବୁଲାନାନ୍‌, ୱାନ୍‌ ରକିୟା ପୟ୍‌ନାନ୍‌; ମାତର୍‌ ତାଗ୍‌ଇ ସାରିଦୁ ବୁଲାନି ଲୋକ୍‌ ଦାପ୍ରେନେ ବାଦାଦୁ ଆର୍‌ନାନ୍‌ ।

19 ଆମାକାନ୍‌ ନିଜେଦି ବୁମିଦୁ ପାଣିକିନାନ୍‌, ୱାନ୍‌ ନାଣ୍ଡ କାଦି ପୟ୍‌ନାନ୍‌; ମାରି, ଆମାକାନ୍‌ ପାଣି କିଇ ଲୋକା ୱେନ୍‌କା ବୁଲାନାନ୍‌, ୱାନ୍‌ ନାଣ୍ଡ କାକୁର୍ତି ଆନାନ୍‌ ।

20 ବିସ୍‌ବାସ୍‌ତି ଲୋକ୍‌ ନାଣ୍ତ ଆସିର୍ବାଦ୍‌ ପୟ୍‌ନାନ୍‌; ମାତର ଆମାକାନ୍‌ ମାଜନ୍‌ ଆଦେଙ୍ଗ୍‌ ନାଣ୍ଡ ବଦା କିନାନ୍‌, ୱାନ୍‌ ନାଣ୍ତ ଦଣ୍ତ୍‌ ପୟ୍‌ନାନ୍‌ ।

21 ମକମ୍‌ ସୁଡ଼ୁଜି ବିସାର୍‌ କିନିକା ନେଗେଣ୍ଡ୍‌ ସିଲେ । ମାରିବା କାଣ୍ଡେକ୍‌ ରୁଟି ଉଣ୍ତିଙ୍ଗ୍‌ ପାପ୍‌ କିନିକା ନେଗେଣ୍ଡ୍‌ ସିଲେ ।

22 ସେଇ ମନ୍‌ତି ଲୋକ୍‌ ଦନ୍‌ ୱେନ୍‌କା ଉରୁକ୍‌ନାନ୍‌, ମାତର୍‌ ୱାନ୍‌ କାକୁର୍ତିଦୁ ଆର୍‌ନାନ୍‌ ୱାନ୍‌ ଆକା ନେସ୍‌ଏନ୍‌ ।

23 ସାୱି ମାଟା ୱାର୍‌ଗିନି ଲୋକ୍‌ ବାଦ୍‌ଲୁ ଲୋକ୍‌ତିଙ୍ଗ୍‌ ନେଗିମାଟା ୱେର୍‌ନି ଲୋକ୍‌ ସାରାସାରି ଦୟା ପୟ୍‌ନାନ୍‌ ।

24 ଆମାକାନ୍‌ ବୁବା ଗି ୟାୟାଦି ଜିନିସ୍‌ ଡଙ୍ଗାଁ କିଜି ଇନାନ୍‌, ଇବେନୁ ଇନି ପାପ୍‌ ସିଲେ, ୱାନ୍‌ ନାସ୍ଟୁକିନି ଲୋକାୱାଲେ ସଙ୍ଗ୍‌ ଆନାନ୍‌ ।

25 ନାଣ୍ତ ଆସା ଆନି ଲୋକ୍‌ ଜାଟିଜଗ୍‌ଡ଼ା ସପ୍‌ନାନ୍‌, ମାତର୍‌ ଆମାକାନ୍‌ ପ୍ରବୁଦି ମୁସ୍‌କୁ ଆସା ଇଡ୍‌ନାନ୍‌, ୱାନ୍‌ ମାଜନ୍‌ ଆନାନ୍‌ ।

26 ଆମାକାନ୍‌ ନିଜେଦି ମୁସ୍‌କୁ ଆସା ଇଡ୍‌ନାନ୍‌, ୱାନ୍‌ ବୁଦିସିଲିକାନ୍‌; ମାତର୍‌ ଆମାକାନ୍‌ ବୁଦିଦାନ୍‌ ସାଲାନାନ୍‌, ୱାନ୍‌ ରକିୟା ପୟ୍‌ନାନ୍‌ ।

27 ଆମାକାନ୍‌ ସିଲିସାତି ଲୋକ୍‌ତିଙ୍ଗ୍‌ ଦାନ୍‌ ସିନାନ୍‌, ୱାନିଙ୍ଗ୍‌ ଉଣା ଆଏତ୍‌; ମାତର୍‌ ଆମାକାନ୍‌ ସିଲିସାତି ଲୋକ୍‌ତିଙ୍ଗ୍‌ ସୁଡ଼ୁଏନ୍‌, ୱାନ୍‌ ନାଣ୍ଡ ଆନାଦୁରିଆ ପୟ୍‌ନାନ୍‌ ।

28 ସେଇକାର୍‌ ନେଗିକା ଆତିଙ୍ଗାଁ, ଲୋକୁ ନିଜେଦିଙ୍ଗ୍‌ ଆଡ଼ାକ୍‌ନାର୍‌; ମାତର୍‌ ୱାର୍‌ ନାସ୍ଟୁ ଆତିଙ୍ଗାଁ, ଦାର୍ମୁଦିକାର୍‌ ନାଣ୍ତ ଆନାର୍‌ ।