1 ଲମୁୟେଲ ରାଜାଦି ମାଟା; ୱାନି ୟାୟା ୱାନିଙ୍ଗ୍‌ ଆମାକା ଅଜାକିତା ମାର୍ହାତ୍‌ ।

2 ଏ ନା ମାରିନ୍‌, ଏ ନା ପଟାଦି ମାରିନ୍‌, ଏ ନା ଲସ୍‌ତି ମାରିନ୍‌, ନାନ୍‌ ନିଙ୍ଗିଁ ଇନିକା ଇନା ?

3 ନିନୁ ଆଇମେକାଙ୍ଗ୍‌ ନିଜେଦି ସାକ୍‌ତି ସିମା, ମାରିବା ରାଜାର୍‌ ଆବେନୁ ନାସ୍ଟୁ ଆନାର୍‌, ଆବେନୁ ସଲ୍‌ମା ।

4 ଏ ଲମୁୟେଲ, ରାଜାରି ଅଙ୍ଗୁର୍‌ରସ୍‌ ଉଣିକା ଟିକ୍‌ ସିଲେତ୍‌, ରାଜାରି ଟିକ୍‌ ସିଲେତ୍‌; ମାରିବା କାଡ଼ୁ ଏମେ ଇଜି ଇନିକା ଅଦିକାରିରି ଟିକ୍‌ ସିଲେତ୍‌ ।

5 ୱାର୍‌ ଉଟିଙ୍ଗାଁ, ନିୟମ୍‌ ବାଣାଜି ଦୁକ୍‌ତି ଲୋକା ୱିଜେରି ବିସାର୍‌ ତାଗ୍‌ଇକା କିନାର୍‌ ।

6 ସାନି ନାନି ଲୋକ୍‌ତିଙ୍ଗ୍‌ କାଡ଼ୁ ସିଆ ମାରି ମନ୍‌ତୁ ଦୁଃକ୍‌ତି ଲୋକାଙ୍ଗ୍‌ ଅଙ୍ଗୁର୍‌ରସ୍‌ ସିଆ ।

7 ଆୟା ଲୋକ୍‌ ଉଣୁଜି ନିଜେଦି କାକୁର୍ତି ବାଣାପିନ୍‌ ମାରି ନିଜେଦି କାସ୍ଟୁ ମାରି ମନ୍‌ତୁ ତେବାମାକିତ୍‌ ।

8 ଗୁଲା ଲୋକା ଉଣ୍ତିଙ୍ଗ୍‌, ୱିଜେରି ଟୁରାଟୁରି ଉଣ୍ତିଙ୍ଗ୍‌, ନିଜେଦି ୱେୟୁ ପିଟାକିଆ ।

9 ଟିକ୍‌ ମାଟା ୱେର୍‌ସି ବିସାର୍‌ କିଆ, ମାରି ଦୁଃକ୍‌ ମାରି ସିଲିସାତିୱାରିଙ୍ଗ୍‌ ଟିକ୍‌ ବିସାର୍‌ କିଆ ।

10 ଗୁଣୁ ମାନି ଆଇମା ଏନ୍‌ ପୋଇଦେଙ୍ଗ୍‌ ଆଟ୍‌ନାନ୍‌ ? ବାଙ୍ଗାରାମ୍‌ଦି ମାଣାନ୍‌ ବା ଦାନି ଦାରା ନାଣ୍ଡ ।

11 ତାନି କନ୍‌ଲିଦି ଜିବନ୍‌ ତାନିମାନୁ ଆସା ଇଡ୍‌ନାତ୍‌, ମାରି ୱାନି ଲାବ୍‌ତି ଉଣା ଆଏତ୍‌ ।

12 ୱାଦ୍‌ ସାନି ସାନ୍ଦି କନ୍‌ଲିଦି ନାସ୍ଟୁ କିଏଣ୍ଡା ନେଗିକା କିନାତ୍‌ ।

13 ୱାଦ୍‌ ମେଣ୍ଡା ବୁର୍‌ବୁସେଙ୍ଗ୍‌ ମାରି ମସିନା* ପାର୍‌ସି ୱେଡ଼ିକାଦାନ୍‌ ନିଜେଦି କିୟୁଦାନ୍‌ ପାଣି କିନାତ୍‌ ।

14 ୱାଦ୍‌ ବେପାର୍‌ କିନି ଏର୍‌ଜାଜ୍‌ ୱାଜା; ୱାଦ୍‌ ଆକରାନ୍‌ ନିଜେଦି କାଦି ତାନାତ୍‌ ।

15 ୱାଦ୍‌ ସିକାଟି ମାନ୍‌ବୁ ମାନ୍‌ବୁ ନିଙ୍ଗ୍‌ନାତ୍‌ ମାରି ନିଜେଦି ୱିଜୁ ଲୋକାଙ୍ଗ୍‌ କାଦି ୱାର୍‌ନା ୱିସ୍‌ନାତ୍‌ ମାରି ସାକ୍‌ରାଣିକାଙ୍ଗ୍‌ ଆଇ ଆଇ ପାଣି ସିନାତ୍‌ ।

16 ୱାଦ୍‌ କିଡ଼ିଇଦି ବିସୟ୍‌ ବୁଜାଜି ଆକା କଣାତ୍‌, ୱାଦ୍‌ ନିଜେଦି କିୟୁଦି ଡାବୁଙ୍ଗ୍‌ ସିଜି ଅଙ୍ଗୁର୍‌ କିଡ଼ିଇ ଉର୍ହିସ୍‌ କିନାତ୍‌ ।

17 ୱାଦ୍‌ ବପୁଦାନ୍‌ ନିଜେଦି ଜୁକୁଦୁ ତରାନାତ୍‌ ମାରି ନିଜେଦି କିୟୁ ବପୁ କିନାତ୍‌ ।

18 ନିଜେଦି ବେପାର୍‌ ଜେ ଲାବ୍‌ଦିକା, ଇକା ୱାଦ୍‌ ବୁଜାନାତ୍‌; ମାରି, ନାଡ଼ା ବେଡ଼ାଦୁ ଦାନି ଦିୱା ନାମ୍‌ଜି ସଲ୍‌ଏତ୍‌ ।

19 ୱାଦ୍‌ ନିଜେଦି କିୟୁଦାନ୍‌ ନୁଲୁବଦୁ କୟ୍‌ଜି ନିଜେଦି ୱାତି ତିଆର୍‌ କିନାତ୍‌ ।

20 ୱାଦ୍‌ ଦୁକ୍‌ତି ଲୋକା ଉଣ୍ତିଙ୍ଗ୍‌ ୱେଡ଼ିକା ମନ୍‌ତାନ୍‌ ସିନାତ୍‌ ମାରି ସିଲିସାତି ଲୋକା ଉଣ୍ତିଙ୍ଗ୍‌ ନିଜେଦି କିୟୁ ପିରିପ୍‌ନାତ୍‌ ।

21 ୱାଦ୍‌ ନାଣ୍ଡ ପିନି ଆତିଙ୍ଗ୍‌ ବା ନିଜେଦି ଇଲୁବେଲି ବିସୟ୍‌ତାନ୍‌ ତିଲାଏତ୍‌; ଏନ୍ଦାଇର୍ରିଙ୍ଗ୍‌ ତାନି ୱିଜେରେ ଇଲୁବେଲି ଉସୁମ୍‌ତି ୱାତିଗନ୍ଦା ଆରାନାର୍‌ ।

22 ୱାଦ୍‌ ନିଜେଦି ଉଣ୍ତିଙ୍ଗ୍‌ କାବ୍‌ରା ସିତ୍‌ରା ଆରାନି ୱାତିଗନ୍ଦା ତିଆର୍‌ କିନାତ୍‌, ମାରି ୱାଦ୍‌ ନେଗି ଅଡ଼ିନି ୱାତି ମାରି ସେର୍‌ଗା ରଙ୍ଗ୍‌ତି ୱାତି ପିଡ଼ିଗିନାତ୍‌ ।

23 ଦାନି କନ୍‌ଲି ଦେସ୍‌ତି ପେରିଲୋକା ୱାଲେ ଗାଡ଼୍‌ତି ଦୁୱାର୍‌ତୁ ବାସ୍‌ନି ୱାଲେ ସନ୍‌ମାନ୍‌ ପୟ୍‌ନାନ୍‌ ।

24 ୱାଦ୍‌ ୱାତିଗନ୍ଦା ତିଆର୍‌ କିଜି ପର୍‌ନାତ୍‌, ମାରି ବେପାରି ଲୋକା କିୟୁଦୁ ଗାଟି ତର୍‌ସି ପର୍‌ନାତ୍‌ ।

25 ବପୁ ମାରି ସନ୍‌ମାନ୍‌ ଦାନି ୱାତିଗନ୍ଦା ୱାଜା; ମାରି, ୱାଜିନି କାଡ଼ାଦି ବିସୟ୍‌ଦାନ୍‌ ୱାଦ୍‌ ତିଲାଏତ୍‌ ।

26 ୱାଦ୍‌ ବୁଦିଦାନ୍‌ ନିଜେଦି ୱେୟୁ ରେଆନାତ୍‌; ଦାନି ୱେୟୁଦୁ ଦୟାଦି ମାଟା ମାନ୍‌ଜିନାତ୍‌ ।

27 ୱାଦ୍‌ ନିଜେଦି ଇଲୁଦି ପାଣିଦିଙ୍ଗ୍‌ ନାଣ୍ତ ମୋନ୍‌ ସିନାତ୍‌, ମାରି ଗାଡ଼ିଆଦାନ୍‌ କାଦି ଉଣୁଏତ୍‌ ।

28 ଦାନି କଡ଼ର୍‌ଆଇଲିକ୍‌ ନିଙ୍ଗ୍‌ଜି ଦାନିଙ୍ଗ୍‌ ଦନ୍ୟ ଦନ୍ୟ ଇନାର୍‌ ମାରି ଦାନି କନ୍‌ଲି ବା ଦାନିଙ୍ଗ୍‌ ଇୟାୱାଜା ୱେଡ଼ିକା କିନାନ୍‌;

29 ନାଣ୍ଡ ଆଇଲିକ୍‌ ଗୁଣ୍‌ ତର୍‌ତେ ମାନେ, ମାତର୍‌ ନିନ୍‌ ଆୟା ୱିଜେକା ମାଣାନ୍‌ ନେଗେଣ୍ଡ୍‌ ।

30 ନାଣ୍ତ ସବାଦିଙ୍ଗ୍‌ ସୁଡ଼୍‌ଜି ରସେ ଆନିକା ନେଗେନ୍‌ ସିଲେ, ଆକା ୱିଜୁ ସେଡିନେ, ମାତର୍‌ ଆମା ଆଇମା ପ୍ରବୁଙ୍ଗ୍‌ ତିଲାନାତ୍‌, ୱାଦ୍‌ ସନ୍‌ମାନ୍‌ ପୟ୍‌ନାତ୍‌ ।

31 ଦାନି କିୟୁଦି ପାଣିଦି ପଲ୍‌ ଦାନିଙ୍ଗ୍‌ ସିଦୁ, ମାରି ଦାନି ନିଜେଦି ପାଣିଦି ଗାଡ଼୍‌ତି ଦୁୱାର୍‌ତୁ ଦାନି ୱେଡ଼ିକା କିପିତ୍‌ ।