1 ଗ୍ୟାନ୍‌ ନିଜେଦି ଇଲୁ ତିଆର୍‌ କିତାମାନାତ୍‌,

ୱାଦ୍‌ ତାନି ସାତ୍‌ଗୋଟା ମୁଣ୍ଡେଙ୍ଗ୍‌ ତିଆର୍‌ କିତାମାନାତ୍‌;

2 ୱାଦ୍‌ ନିଜେଦି ଜାତୁଙ୍ଗ୍‌ ୱିଜୁ ସାପିସ୍‌ କିତାମାନାତ୍‌;

ୱାଦ୍‌ ନିଜେଦି ଅଙ୍ଗୁର୍‌ ରସ୍‌ ମିସା କିତାମାନାତ୍‌;

ୱାଦ୍‌ ନିଜେଦି ଟେବୁଲ୍‌ ବା ପାର୍‌ତାମାନାତ୍‌ ।

3 ୱାଦ୍‌ ନିଜେଦି ଦାସି ଆଇମେକାଙ୍ଗ୍‌ ପକ୍‌ତାମାନାତ୍‌,

ୱାଦ୍‌ ଗାଡ଼୍‌ତି ମୁସ୍‌କୁରି ବାଡିଦାନ୍‌ କୁକ୍‌ସି ଇନାତ୍‌,

4 "ଆମାକାନ୍‌ ଅବୁଜା ଲୋକୁ, ୱାନ୍‌ ଇବେନୁ ରାପିନ୍‌,"

ମାରି, ଏମେକାନ୍‌ ନିର୍ବୁଦି ଲୋକୁ, ୱାନିଙ୍ଗ୍‌ ୱାଦ୍‌ ଇନାତ୍‌,

5 "ରାଆ ନା କାଦି ଉଣୁଆ

ମାରି ନା ମିସାକିତି ଅଙ୍ଗୁର୍‌ ରସ୍‌ ଉଣୁଆ ।

6 ଏ ଅବୁଜା ଲୋକୁ, ଅବୁଜା ଲୋକା ତଡ଼୍‌ ଡ଼ିସ୍‌ସି ଜିବନ୍‌ ରକିୟା କିଦୁ;

ମାରି, ନେଗି ବିସାର୍‌ଦି ସାରିଦୁ ବୁଲାଦୁ ।"

7 ଆମାକାନ୍‌ ନିନ୍ଦାଦିଙ୍ଗ୍‌ ସିକିୟା ସିନାନ୍‌, ୱାନ୍‌ ନିଜେ ସେମାର୍‌ ପୋଇନାନ୍‌;

ମାରି, ଆମାକାନ୍‌ ସେଇ ଲୋକାଙ୍ଗ୍‌ ନେଗି ଉଣ୍ତିଙ୍ଗ୍‌ ଲାଗାନାନ୍‌, ୱାନ୍‌ ନିଜେ ମତ୍‌ କୁତାନାନ୍‌ ।

8 ନିନ୍ଦାକିନିୱାନିଙ୍ଗ୍‌ ଲାଗାମାଟ୍‌, ଆକା କିତିଙ୍ଗାଁ, ୱାନ୍‌ ମିଙ୍ଗିଁ କାଡ଼୍‌ନାନ୍‌,

ଗ୍ୟାନି ଲୋକ୍‌ତିଙ୍ଗ୍‌ ଲାଗାଦୁ, ଆବେଟ୍‌ ୱାନ୍‌ ମିଙ୍ଗିଁ ଜିବନ୍‌ ନୋନାନ୍‌ ।

9 ଗ୍ୟାନି ଲୋକ୍‌ତିଙ୍ଗ୍‌ ସିକିୟା ସିତିଙ୍ଗ୍‌, ୱାନ୍‌ ମାରି ନାଣ୍ଡ ଗ୍ୟାନି ଲୋକ୍‌ ଆନାନ୍‌

ମାରି, ଦାର୍ମୁ ଲୋକାଙ୍ଗ୍‌ ସିକିୟା ସିତିଙ୍ଗ୍‌, ଗ୍ୟାନ୍‌ ପିରିନାତ୍‌ ।

10 ପ୍ରବୁଦି ବିସୟ୍‌ତିଙ୍ଗ୍‌ ତିଲାତିଙ୍ଗାଁ ଗ୍ୟାନ୍‌ ଆରାମ୍‌ ଆନାତ୍‌,

ମାରି, ଦାର୍ମୁ ମାପୁରୁଦି ବିସୟ୍‌ ଗ୍ୟାନ୍‌ ଲାବ୍‌ କିତିଙ୍ଗାଁ ନେଗି ବିସାର୍‌ ୱାନାତ୍‌ ।

11 ଏନ୍ଦାଇର୍ରିଙ୍ଗ୍‌ ନା ମାଣାନ୍‌ ମି ଦିନ୍‌ ପିରିନାତ୍‌,

ମାରି, ମି ଜିବନ୍‌ତି ର୍ବାସୁ ପିରିନାତ୍‌ ।

12 ନିନ୍‌ ଗ୍ୟାନି ଆତିଙ୍ଗାଁ, ନିଜେଦି ଉଣ୍ତିଙ୍ଗ୍‌ ଗ୍ୟାନି ଆନି;

ଜଦି ନିନ୍ଦା କିନି, ନିଜେ ଆକା ପୟ୍‌ନି ।

13 ବୁଦିସିଲି ଆଇମା ଜାଟିଜଗ୍‌ଡ଼ା କିନାତ୍‌;

ୱାଦ୍‌ ବୁଦିସିଲିକାତ୍‌ ମାରି ଇନିକା ନେସ୍‌ଏତ୍‌ ।

14 ୱାଦ୍‌ ନିଜେଦି ଇଲୁଦି ଦୁୱାର୍‌ ଲାକ୍‌ତୁ

ମାରି ଗାଡ଼୍‌ତି ମୁସ୍‌କୁ ବାଡିଦୁ ଟାଟି ପାର୍‌ସି ବାସ୍‌ନାତ୍‌ ।

15 ୱାଦ୍‌ ଲାକ୍‌ତୁ ସିଜି ନିଜେ ନିଜେଦି ସାରିଦୁ ସାଡ଼ୁକୁ ସନି ଲୋକାଙ୍ଗ୍‌ କୁକ୍‌ସି ଇନାତ୍‌,

16 ଆମାକାନ୍‌ ବୁଜାଇକାନ୍‌, "ୱାନ୍‌ ଇବେନୁ ରାପିନ୍‌"

ବୁଦି ସିଲି ଲୋକାଙ୍ଗ୍‌ ୱାଦ୍‌ ଇୟା ମାଟା ଇନାତ୍‌,

17 "ଡଙ୍ଗାକିତି ଏରୁ ନିଟ୍‌ନେ

ମାରି ମାର୍‌ଗିଜି ଉଣି କାଦି ସାୱି ।"

18 ମାତର୍‌ ଆୟା ଲୋକୁ ନେସ୍‌ଏନ୍‌ ଜେ, ସାତି ଲୋକୁ ଆବେନୁ ମାନ୍‌ଜିନାର୍‌,

ମାରି, ଦାନି କୁକାତି ଲୋକୁ ପାତାଲ୍‌ଦି ଆଡ୍‌ଗିରି ବାଡିଦୁ ମାନାର୍‌ ।