1 ଦାଉଦତି ମାରିନ୍‌ ଇସ୍ରାଏଲଦି ରାଜା ସଲମନତି ନେଗି ବୁଦିସିନିମାଟେଙ୍ଗ୍‌; 2 ଗ୍ୟାନ୍‌ ମାରି ନେଗିବୁଦି ବୁଜାଦେଙ୍ଗ୍‌; ବୁଦିଦି ମାଟା ବିସାର୍‌ କିଦେଙ୍ଗ୍‌; 3 ନେଗେନ୍‌ ବୁଲାସାଲାକିନିକା, ଦାର୍ମୁଦିକା ମାରି ନେଗି ବିସାର୍‌ ମାରି ନ୍ୟାୟ୍‌ ବିସୟ୍‌ତାନ୍‌ ନେଗିବୁଦି ଆସ୍‌ତେଙ୍ଗ୍‌; 4 ସାନ୍ତିଦି ଲୋକାଙ୍ଗ୍‌ ଜାଗାର୍‌ତା କିଦେଙ୍ଗ୍‌ ମାରି ମୁରୁଲି ଲୋକାଙ୍ଗ୍‌ ବିଦ୍ୟା ମାରି ଅଜାଦେଙ୍ଗ୍‌ ଆଟ୍‌ନି ବୁଦିଦିମାଟା କାର୍‌ପ୍‌ତେଙ୍ଗ୍‌; 5 ଏଣ୍ତେସ୍‌ ଗ୍ୟାନ୍‌ଦି ଲୋକୁ ଆକା ୱେନ୍‌ଜି ବୁଦିଦୁ ପିରିନାନ୍‌ ମାରି ବୁଦିଦି ଲୋକୁ ନେଗି ମାଟାଦି ସିକିୟା ପୟ୍‌ନାନ୍‌; 6 ମାରି, ଉନ୍‌ଡ୍ରି ବୁଦି ମାଟା ମାରିଉଣ୍ଡ୍ରି ୱେର୍‌ତି କାତା ମାରି ବୁଦିଦି ଲୋକା ମାଟା ମାରି ୱାରି ମାର୍‌ଗିତି ମାଟା ବୁଜାଦେଙ୍ଗ୍‌ ଆଟ୍‌ନିଦେର୍‌ ।

7 ପ୍ରବୁଦି ମାଟାଦିଙ୍ଗ୍‌ ତିଲାତିଙ୍ଗ୍‌ ଗ୍ୟାନ୍‌ ପୁଟ୍‌ନାତ୍‌; ମାତର୍‌ ନିର୍ବୁଦି ଲୋକୁ ଗ୍ୟାନ୍‌ ମାରି କାର୍‌ପିନି ମାଟା ମାନାଏର୍‌ । 8 ଏ ନା ମାରିନ୍‌, ନି ବୁବାଦି ବୁଦିଦି ମାଟା ୱେନ୍‌ଆ ମାରି ନି ୟାୟାଦି ୱେର୍‌ତି ମାଟା ବାଣାମା । 9 ଏନ୍ଦାଇର୍ରିଙ୍ଗ୍‌ ଆକା ନି ନେଗି ତାଲାଗୁଡା ଆରାନିକା ମାରି କକ୍‌ଲାଦୁ ପୁସା ମାଡ଼ିତି ୱାଜା ଆନାତ୍‌ । 10 ଏ ନା ମାରିନ୍‌, ପାପି ଲୋକୁ ନିଙ୍ଗିଁ ବାଣ୍ଡିସ୍‌ତିଙ୍ଗା, ନିନୁ ୱାରି ମାଟା ଆସ୍‌ମା । 11 ୱାର୍‌ ଜଦି ଇନାର୍‌, "ମା ୱାଲେ ରାଦୁ, ମାଡ୍‌ ଡାକ୍‌ତେଙ୍ଗ୍‌ କାପ୍‌କିନାଟ୍‌, ନେଗିଲୋକାଙ୍ଗ୍‌ ସେଡିନେ ଆସ୍‌ତେଙ୍ଗ୍‌ ମାରାଗ୍‌ଜି ତେବାନାଟ୍‌; 12 ପାତାଲ୍‌ପୁର୍‌ ୱାଜା ମାଡୁ ୱାରିଙ୍ଗ୍‌ ଜିବନ୍‌ତାନ୍‌ ସାପିସ୍‌ନାଟ୍‌ ମାରି ଗୁଟାଦୁ ସାତି ଲୋକା ୱାଜା ୱାରିଙ୍ଗ୍‌ ପୁରା ସାପିସ୍‌ନାଟ୍‌; 13 ଆବେଟ୍‌ ମାଡ୍‌ ୱିଜୁରକାମ୍‌ଦି ନାଣ୍ତଦାରାଦି ଦନ୍‌ ପୟ୍‌ନାଟ୍‌, ଡଙ୍ଗାକିତି ଜିନିସ୍‌ତାନ୍‌ ନିଜେ ନିଜେଦି ଇଲୁ ବର୍‌ତି କିନାଟ୍‌, 14 ନିନୁ ମା ୱାଲେ ରାଆ ମାରି ମିସାଆ ମାରି ଆମାକା ମାପୁ କିତାମାନାପ୍‌ ଆକା ସାମାନ୍‌ ବାଟା କିନାଟ୍‌ ।"

15 ଏ ନା ମାରିନ୍‌, ନିନୁ ୱାରି ୱାଲେ ଆୟା ସାରିଦୁ ସଲ୍‌ମା, ୱାରି ସାର୍ରିଦାନ୍‌ ନିଜେଦି ପାଦ୍‌ତିଙ୍ଗ୍‌ ବୁଲାଦେଙ୍ଗ୍‌ ତେବାକିଆ; 16 ଏନ୍ଦାଇର୍ରିଙ୍ଗ୍‌ ୱାରି ପାଦାମ୍‌ ସେଇପାଣି କିଦେଙ୍ଗ୍‌ ଉରୁକ୍‌ନାତ୍‌ ମାରି ସାୟାମାର୍‌ଗା ଡାକ୍‌ତେଙ୍ଗ୍‌ ଦାପ୍‌ରେ ଉରୁକ୍‌ସି ସନାତ୍‌ । 17 ଆମାବା ପଟିଦି କାଣାଗା ଆଗ୍‌ଡ଼ି ଜାଡ଼ି ଅଡ୍‌ନିକା ସତ୍‌ନେ ସେଡି ଆନାତ୍‌ । 18 ୱାର୍‌ ନିଜେ ନିଜେଦି ଲୋଇ ସାୟାମାର୍‌ଗା ଡାକ୍‌ତେଙ୍ଗ୍‌ କାପ୍‌କିନାର୍‌ ମାରି ନିଜେ ନିଜେଦି ଜିବନ୍‌ତିଙ୍ଗ୍‌ ନାସ୍ଟୁ କିନି ଉଣ୍ତିଙ୍ଗ୍‌ ମାରାଗ୍‌ଜି ତେବାନାର୍‌ । 19 ୱିଜୁ ଦନ୍‌ ଲବିରି ସାରି ଇକା; ଆକା ଦନ୍‌ତି ଅଦିକାର୍‌ତି ଲୋକା ଜିବନ୍‌ ନାସ୍ଟୁ କିନାତ୍‌ ।

20 ଗ୍ୟାନ୍‌ ପେରିଜାରିଦୁ ଆଉଲିଆଜି କୁକୁନାତ୍‌; ୱାଦ୍‌ ଡେଣା ବାଡିଙ୍ଗାଁ ନିଜେଦି ବଲୁ ୱେନିସ୍‌ନାତ୍‌; 21 ୱାଦ୍‌ ନାଣ୍ତ ଲୋକା ଗଲି ଆନି ବାଡିଦୁ କୁକୁନାତ୍‌; ଗାଡ଼୍‌ତି ଡ଼ୁଗୁନି ବାଡିଦୁ ମାରି ଗାଡ଼୍‌ତୁ ନିଜେଦି ବଲୁ ଆଉଲିଆଜି ଇନାତ୍‌;

22 "ଏ ବୁଦିସିଲି ଲୋକୁ, ଏସୋ କାଡ଼ା ସେଇଦାନିଙ୍ଗ୍‌ ଜିବନ୍‌ନୋନିଦେର୍‌ ? ଏ ନିନ୍ଦାକିନିକିଦେର୍‌, ମାରି ଏସୋ କାଡ଼ା ନିନ୍ଦାଦୁ ୱେଡ଼ିକା ମାନିଦେର୍‌ ? ଏ ମୁର୍କ ଲୋକୁ, ମାରି ଏସୋ କାଡ଼ା ବିଦ୍ୟାଦିଙ୍ଗ୍‌ କାଡ଼୍‌ନିଦେର୍‌ ? 23 ନାନୁ ମି ନେଗି ଉଣ୍ତିଙ୍ଗ୍‌ ଲାଗାନି ମାଟା ଆସ୍‌ତୁ; ସୁଡ଼ୁଦୁ, ନାନ୍‌ ମି ମୁସୁକୁ ନା ନିଜେଦି ନେଗି ବୁଦି ସିନା, ନାନ୍‌ ନା ମାଟା ୱିଜୁ ମିଙ୍ଗିଁ ନେସ୍‌ପିସ୍‌କିନା । 24 ଏନ୍ଦାଇର୍ରିଙ୍ଗ୍‌ ନାନ୍‌ କୁକୁତା, ମାରି, ମିର୍‌ କେଏତିଦେର୍‌; ନାନ୍‌ କିୟୁ ସାକ୍‌ତା, ଆମାକାନ୍‌ବା ମାନାଏତାର୍‌; 25 ମାତର୍‌ ମିର୍‌ ନା ୱିଜୁ ୱେର୍‌ତି ମାଟାଦିଙ୍ଗ୍‌ ୱେନ୍‌ଇତିଦେର୍‌, ମାରି ନାନୁ ମି ନେଗି ଉଣ୍ତିଙ୍ଗ୍‌ ଲାଗାନି ମାଟାଦିଙ୍ଗ୍‌ ବଦା କିଏତିଦେର୍‌; 26 ଇୟାଉଣ୍ଡିଙ୍ଗ୍‌ ନାନ୍‌ ବା ମି କାସ୍ଟୁଦି ୱେଡ଼ାଦୁ ସିକ୍‌ନା, ମିଙ୍ଗିଁ ବାଦା ୱାନି ୱେଡ଼ାଦୁ ନାନ୍‌ ସେମାର୍‌ କିନା । 27 ଏସ୍ତିୱାଲେ ନାଣ୍ଡ ଗାଲିପିରୁ ୱାଜା ମିଙ୍ଗିଁ ବାଦା ୱାନାତ୍‌ ମାରି ନାଣ୍ତଗାଲି ୱାଜା ମିଙ୍ଗିଁ କାସ୍ଟୁ ୱାନାତ୍‌; ଏସ୍ତିୱାଲେ ଦୁଃକ୍‌ ମାରି ନପି ମି ଉଣ୍ତିଙ୍ଗ୍‌ ଗଟାନାତ୍‌; 28 ନାସ୍ତିୱାଲେ ୱାର୍‌ ନାଙ୍ଗି କୁକୁନାର୍‌, ମାତର ନାନ୍‌ ୱେନ୍‌ଏ; ୱାର୍‌ ନାଣ୍ଡ ଜାତୁନ୍‌ତାନ୍‌ ନାଙ୍ଗିଁ ରେବାନାର୍‌, ମାତର୍‌ ନାଙ୍ଗି ରେବାଦେଙ୍ଗ୍‌ ଆଟ୍‌ଏର୍‌ । 29 ଇର୍ରିଙ୍ଗ୍‌ ୱାର୍‌ ବିଦ୍ୟାଦିଙ୍ଗ୍‌ କାଡ଼ିତାର୍‌ ମାରି ପ୍ରବୁଙ୍ଗ୍‌ ମାନାନିକା ମନ୍ କିଏତାର୍‌; 30 ୱାର୍‌ ନା ଏମେବା କାର୍‌ପିନି ମାଟାଦିଙ୍ଗ୍‌ ଆସ୍‌ଏତାର୍‌ ମାରି ନା ନେଗିଦାନିଙ୍ଗ୍‌ ଲାଗାନି ମାଟାଦିଙ୍ଗ୍‌ ମାନାଏତାର୍‌ । 31 ଇୟାଉଣ୍ଡିଙ୍ଗ୍‌ ୱାର୍‌ ନିଜେ ନିଜେଦି କାର୍ମୁଦି ଦଣ୍ତ୍‌ତି ପଲ୍‌ ପୟ୍‌ନାର୍‌ ମାରି ନିଜେ ନିଜେଦି ତାଗ୍‌ଇ ବୁଦିଦି ପୁରା ଦଣ୍ଡ୍‌ ପୟ୍‌ନାର୍‌ । 32 ହୁଁ, ଅବୁଜା ଲୋକୁ ତାଗ୍‌ଇ ସାରିଦୁ ସଲ୍‌ସି ନାସ୍ଟୁ ଆନାର୍‌ ମାରି ବୁଦିସିଲି ଲୋକା ଜିବନ୍‌ତି ସାନ୍ତି ୱାରିଙ୍ଗ୍‌ ନାସ୍ଟୁ କିନାତ୍‌ । 33 ମାତର୍‌ ଆମା ଲୋକୁ ନା ମାଟା ୱେନାନ୍‌, ୱାନ୍‌ ସାନ୍ତିଦାନ୍‌ ବାସା କିନାନ୍‌ ମାରି କାସ୍ଟୁ ବେଡ଼ାଦୁ ତିଲାଏଣ୍ଡା ରୋମ୍‌ନାନ୍‌ ।"