1 ଗ୍ୟାନ୍‌ତି ମାରିନ୍‌ ନିଜେଦି ବୁବାଦି ନେଗି ମାଟା ୱେନାନ୍‌; ମାତର୍‌ ନିନ୍ଦାକିନିକାନ୍‌ ନେଗି ଲାଗାନି ମାଟା ୱେନ୍‌ଏନ୍‌ ।

2 ଲୋକ୍‌ ନିଜେଦି ୱେୟୁଦି ପଲ୍‌ଦି ମାଣାନ୍‌ ସାନ୍ତି ପୟ୍‌ନାନ୍‌;

ମାତର୍‌ ଦକାସିନିକାନ୍‌ ଜିବନ୍‌ତୁ କାସ୍ଟୁ ପୟ୍‌ନାନ୍‌ ।

3 ଆମା ଲୋକ୍‌ ନିଜେଦି ୱେୟୁଦୁ କାପ୍‌କିସ୍‌କିଜି ଇଡ୍‌ନାନ୍‌, ୱାନ୍‌ ନିଜେଦି ଜିବନ୍‌ ରକିୟା କିନାନ୍‌;

ମାତର୍‌ ଆମାକାନ୍‌ ସିନ୍ତା କିଏଣ୍ଡା ମାଟା ଇନାନ୍‌, ୱାନ୍‌ ସାନାନ୍‌ ।

4 ଗାଡ଼ିଆଦି ଲୋକ୍‌ ମନ୍‌ତୁ ଆସା କିତିଙ୍ଗାଁ ବା ଇନିକା ପୟ୍‌ଏନ୍‌,

ମାତର୍‌ ପାଣିକିନି ଜିବନ୍‌ ବପୁ ଆନାତ୍‌ ।

5 ଦାର୍ମୁଦି ଲୋକ୍‌ ମିସ୍‌ ମାଟାଦିଙ୍ଗ୍‌ କାଡ଼୍‌ନାନ୍‌;

ମାତର୍‌ ସେଇ ଲୋକ୍‌ କାପୁ ୱାଜା ଆନାନ୍‌, ମାରି ୱାନ୍‌ ସେମାର୍‌ ପୟ୍‌ନାନ୍‌ ।

6 ଦାର୍ମୁଦିକା ସାନ୍ତି ସାରିଦୁ ସନି ଲୋକ୍‌ତିଙ୍ଗ୍‌ ରକିୟା କିନାତ୍‌;

ମାତର୍‌ ସେଇକା ପାପି ଲୋକାଙ୍ଗ୍‌ ମାର୍ହାନା ପକ୍‌ନାନ୍‌ ।

7 ଆମାକାନ୍‌ ନିଜେଦିଙ୍ଗ୍‌ ମାଜନ୍‌ ଇଜି ତରାନାନ୍‌, ମାତର୍‌ ୱାନିଙ୍ଗ୍‌ ଇନିକାବା ସିଲେତ୍‌;

ଏନ୍‌ ନିଜେଦିଙ୍ଗ୍‌ କାକୁର୍ତି ତରାନାନ୍‌, ମାତର୍‌ ୱାନିଙ୍ଗ୍‌ ନାଣ୍ଡ ଦନ୍‌ ମାନାତ୍‌ ।

8 ଲୋକ୍‌ ନିଜେଦି ଜିବନ୍‌ତି ବାଦ୍‌ଲୁ ଦନ୍‌ ସିଦେଙ୍ଗ୍‌ ଆଟ୍‌ନାନ୍‌;

ମାତର କାକୁର୍ତି ଲୋକ୍‌ ଦାକାସିନି ମାଟା ୱେନ୍‌ଏନ୍‌ ।

9 ଦାର୍ମୁ ଲୋକ୍‌ତି ଜାୟ୍‌ ୱେଡ଼ିକା କିନାତ୍‌;

ମାତର୍‌ ସେଇୱାରି ଦିୱା ନାପାଇ ଆନାତ୍‌ ।

10 ଆକାର୍‌ଦାନ୍‌ ଆବ୍‌କା ଜାଟି ଜଗ୍‌ଡ଼ା ସନାତ୍‌;

ମାତର୍‌ ନେଗି ମାଟା ୱେନି ବାନୁ ବୁଦି ମାନାତ୍‌ ।

11 ମିସ୍‌ତାନ୍‌ ପୟ୍‌ତି ଦନ୍‌ ନାସ୍ଟୁ ଆନାତ୍‌,

ମାତର୍‌ କିୟୁଦାନ୍‌ ଉଣ୍ତାକିତି ଦନ୍‌ ପିରିନାତ୍‌ ।

12 ଏସ୍ତିୱାଲେ ଆସା କିନିକା ଲାଡ଼ି ଆନାତ୍‌, ମନ୍‌ ରୁଙ୍ଗୁନା ସନାତ୍‌, ମାତର୍‌ ଆସା କିତିକା ପୁରା ଆତିଙ୍ଗାଁ ମି ମନ୍‌ ୱେଡ଼ିକା ଆନାତ୍‌ ।

13 ଆମା ଲୋକ୍‌ ମାଟାଦିଙ୍ଗ୍‌ ମାନାଏନ୍‌, ୱାନ୍‌ ନିଜେଦି ମୁସୁକୁ ସାନିକା ତାନାନ୍‌;

ମାତର୍‌ ଆମାକାନ୍‌ ମାଟାଦିଙ୍ଗ୍‌ ମାନାନାନ୍‌, ୱାନ୍‌ ପଲ୍‌ ପୟ୍‌ନାନ୍‌ ।

14 ସାନି ଉରିଦାନ୍‌ ଡ଼େପ୍‌ନି ଉଣ୍ତିଙ୍ଗ୍‌

ଗ୍ୟାନ୍‌ ଲୋକ୍‌ତି ନିୟମ୍‌ ଜିବନ୍‌ ଏରୁ ୱାଜା ଆନାତ୍‌ ।

15 ନେଗି ବୁଦିଦି ପଲ୍‌ ଦୟା,

ମାତର୍‌ ଦକାସିନି ଲୋକ୍‌ତି ସାରି କାସ୍ଟୁଦିକା ।

16 ୱିଜୁ ସାଲାକି ଲୋକୁ ବୁଦିଦାନ୍‌ ପାଣି କିନାନ୍‌;

ମାତର ବୁଦିସିଲିକାନ୍‌ ବୁଦିସିଲି ମାଟା ୱେର୍‌ନାନ୍‌ ।

17 ସେଇ କାବୁର୍‌ତାନିକାନ୍‌ କାସ୍ଟୁଦୁ ଆର୍‌ନାନ୍‌;

ମାତର୍‌ ନେଗି କାବୁର୍‌ତାନିକାନ୍‌ ନେଗେନ୍‌ ତେବାନାତ୍‌ ।

18 ଆମା ଲୋକ୍‌ ନେଗି ଉଣ୍ତିଙ୍ଗ୍ ଲାଗାନି ମାଟା ମାନାଏନ୍‌, ୱାନ୍‌ କାକୁର୍ତି ମାରି ସେମାର୍‌ ପୟ୍‌ନାନ୍‌;

ମାତର୍‌ ଆମାକାନ୍‌ ୱେର୍‌ତି ମାଟା ୱେନାନ୍‌, ୱାନ୍‌ ସନ୍‌ମାନ୍‌ ପୟ୍‌ନାନ୍‌ ।

19 ମନ୍‌ତି ବଦା ପୁରା ଆତିଙ୍ଗ୍‌ ଜିବନ୍‌ତିଙ୍ଗ୍‌ ସାୱି ୱାନାତ୍‌;

ମାତର୍‌ ବୁଦିସିଲି ଲୋକ୍‌ ତାଗ୍‌ଇ ପାଣି ଡ଼ିସ୍‌ତେଙ୍ଗ୍‌ ବଦା କିଏନ୍‌ ।

20 ଗ୍ୟାନିଦି ଲୋକ୍‌ତି ୱାଲେ ବୁଲାସାଲା କିଦୁ, ଆବେଟ୍‌କୁ ନିନୁ ଗ୍ୟାନି ଆନି;

ମାତର୍‌ ବୁଦିସିଲି ଲୋକ୍‌ତି ସଙ୍ଗ୍‌ ଆତିଙ୍ଗ୍‌ କାସ୍ଟୁ ପୟ୍‌ନାନ୍‌ ।

21 ପାପି ଲୋକା ୱେନ୍‌କା ତାଗ୍‌ଇକା ପେର୍‌ନାତ୍‌;

ମାତର୍‌ ଦାର୍ମୁ ଲୋକାଙ୍ଗ୍‌ ନେଗି ପଲ୍‌ ସିଆଇ ଆନାତ୍‌ ।

22 ନେଗି ଲୋକ୍‌ ନିଜେଦି ନାତିରି ଉଣ୍ତିଙ୍ଗ୍‌ ଅଦିକାର୍‌ ଡ଼ିସ୍‌ନା ସୋନାନ୍‌;

ମାତର୍‌ ପାପି ଲୋକ୍‌ତି ଦନ୍‌ ଦାର୍ମୁ ଲୋକା ଉଣ୍ତିଙ୍ଗ୍‌ ଉଣ୍ଡାନାତ୍‌ ।

23 ସିଲିସାତିୱାନି ଚାସ୍‌ପାଣିଦାନ୍‌ କାଦି ନାଣ୍ଡ ଆନାତ୍‌;

ମାତର୍‌ ଅନ୍ୟାୟ୍‌ ଉଣ୍ତିଙ୍ଗ୍‌ ଆମା ଆମା ଲୋକା ନାସ୍ଟୁ ଆନାତ୍‌ ।

24 ଆମାକାନ୍‌ ବାଡିଗାଦାନ୍‌ ଡ଼େଇଦେଙ୍ଗ୍‌ ମାନା କିନାନ୍‌, ୱାନ୍‌ ନିଜେଦି ମାରିନ୍‌ତିଙ୍ଗ୍‌ କାଡ଼୍‌ନାନ୍‌;

ମାରି ଆମାକାନ୍‌ ୱାନିଙ୍ଗ୍‌ ଜିବନ୍‌ନୋନାନ୍‌, ୱାନ୍‌ ଟିକ୍‌ ବେଡ଼ାଦୁ ସାସ୍ତି ସିନାନ୍‌ ।

25 ଦାର୍ମୁଦିକାନ୍‌ ନିଜେଦି ଜିବନ୍‌ ସାନ୍ତି ଆନି ସାନ୍ଦି ଉଣାନ୍‌,

ମାତର୍‌ ପାପି ଲୋକ୍‌ତି ପଟା ପାଜ୍‌ଏତ୍‌ ।