1 ଟକେକିଜି ତୁସ୍‌ନିକା ପ୍ରବୁଦି ଉଣ୍ତିଙ୍ଗ୍‌ କାଡ଼୍‌ନି ବିସୟ୍‌ ।

ମାତର୍‌ ଟିକ୍‌ ତୁସ୍‌ନି ଗୁଣ୍ତୁ ୱାନିଙ୍ଗ୍‌ ୱେଡ଼ିକା କିନାତ୍‌ ।

2 କାଡ଼୍‌ନିକା ୱାତିଙ୍ଗାଁ ସେମାର୍‌ ୱାନାତ୍‌;

ମାତର୍‌ ସାନ୍ତିଦି ଲୋକ୍‌ତି ଲାକ୍‌ତୁ ଗ୍ୟାନ୍‌ ମାନ୍‌ଜିନାତ୍‌ ।

3 ସାନ୍ତିଦିୱାରିଙ୍ଗ୍‌ ସାନ୍ତି ୱାରିଙ୍ଗ୍‌ ସାରି ତର୍‌ନାତ୍‌,

ମାତର୍‌ ଦକାସିନିୱାରି ମାଟା ୱାରିଙ୍ଗ୍‌ ସାପିସ୍‌ କିନାତ୍‌ ।

4 ରିସାଦି ଦିନ୍‌ତୁ ଦନ୍‌ ସେଡିନେ ଆନାତ୍‌,

ମାତର୍‌ ଦାର୍ମୁ ସାନିମାଣାନ୍‌ ରକିୟା କିନାତ୍‌ ।

5 ସାଦୁଦି ଦାର୍ମୁ ୱାନି ସାରି ତର୍‌ନାତ୍‌,

ମାତର୍‌ ସେଇକାନ୍‌ ନିଜେଦି ସେଇବାନୁ ସାନାନ୍‌ ।

6 ସାନ୍ତିଦି ଲୋକା ଦାର୍ମୁ ୱାରିଙ୍ଗ୍‌ ରକିୟା କିନାତ୍‌,

ମାତର୍‌ ଦକାସିନିକାର୍‌ ନିଜେ ନିଜେଦି ସେଇପାଣିଦୁ ଦାରା ପଡ଼ାନାର୍‌ ।

7 ସେଇକାନ୍‌ ସାତିଙ୍ଗାଁ, ୱାନି ଆସା ନାସ୍ଟୁ ଆନାତ୍‌

ମାରି ଅଦାର୍ମୁଦିୱାରି ଆସା ନାସ୍ଟୁ ଆନାତ୍‌ ।

8 ଦାର୍ମୁଦିକାନ୍‌ ଦୁକ୍‌ତାନ୍‌ ରକିୟା ପୋଇନାନ୍‌,

ମାରି, ସେଇକାନ୍‌ ୱାନି ବାଦ୍‌ଲୁ ଆବେନୁ ୱାନାନ୍‌ ।

9 ଦାର୍ମୁସିଲିକାନ୍‌ ନିଜେଦି ୱେୟୁଦାନ୍‌ ପାଡ଼ାକାଦି ଲୋକାଙ୍ଗ୍‌ ସାପିସ୍‌ କିନାନ୍‌,

ମାତର୍‌ ଦାର୍ମୁଦିକାନ୍‌ ବୁଦିଦାନ୍‌ ରକିୟା ପୋଇନାନ୍‌ ।

10 ଦାର୍ମୁଦିକାନ୍‌ ସୁକ୍‌ ପୟ୍‌ତିଙ୍ଗ୍‌, ଗାଡ଼୍‌ତି ଲୋକୁ ୱେଡ଼ିକା କିନାର୍‌;

ମାରି, ସେଇକାନ୍‌ ସାତିଙ୍ଗା, ୱେଡ଼ିକା କିନାର୍‌ ।

11 ସାନ୍ତି ଲୋକ୍‌ତି ବର୍‌ତାନ୍‌ ଗାଡ଼୍‌ ନେଗେନ୍‌ ଆନାତ୍‌,

ମାତର୍‌ ସେଇ ଲୋକ୍‌ତି ୱେୟୁଦାନ୍‌ ଆକା ନାସ୍ଟୁ ଆନାତ୍‌ ।

12 ଆମାକାନ୍‌ ନିଜେଦି ପାଡ଼ାକାଦି ଲୋକାଙ୍ଗ୍‌ କାଡ଼୍‌ନାନ୍‌, ୱାନ୍‌ ବୁଦିସିଲିକାନ୍‌;

ମାତର୍‌ ବୁଦିଦିକାନ୍‌ ଆଲେନା ମାନାନ୍‌ ।

13 ଆମାକାନ୍‌ ସେଡି ମାଟା ଇଜି ବୁଲାନାନ୍‌, ୱାନ୍‌ ମାର୍‌ଗିତି ମାଟା ୱେର୍‌ନାନ୍‌,

ମାତର୍‌ ଆମାୱାନି ବିସ୍‌ବାସ୍‌ତି ମନ୍‌, ୱାନ୍‌ ମାଟା ଆଡ଼ାକ୍‌ସି ଇଡ୍‌ନାନ୍‌ ।

14 ନେଗି ମାଟା ୱେର୍‌ତେଙ୍ଗ୍‌ ସିଲି ଉଣ୍ତିଙ୍ଗ୍‌ ଲୋକୁ ସାନା ସନାର୍‌,

ମାରି, ନାଣ୍ଡଲୋକା ୱେର୍‌ନି ମାଣାନ୍‌ ଲୋକୁ ରକିୟା ପୟ୍‌ନାର୍‌ ।

15 ନେସ୍‌ଇ ଲୋକ୍‌ତି ଉଣ୍ତିଙ୍ଗ୍‌ ଆମାକାନ୍‌ ଦାୟି ଆନାନ୍‌, ୱାନ୍‌ ସତ୍‌ନେ କାସ୍ଟୁ ପୋଇନାନ୍‌;

ମାତର୍‌ ଦାୟି ଆଦେଙ୍ଗ୍‌ ଆମାକାନ୍‌ କାଡ଼୍‌ନାନ୍‌, ୱାନ୍‌ ନେଗେନ୍‌ତାନ୍‌ ମାନ୍‌ଜିନାନ୍‌ ।

16 ଦୟାମାନି ଆଇମା ସନ୍‌ମାନ୍‌ ଆସ୍‌ସି ଇଡ୍‌ନାତ୍‌,

ମାରି, ଅପାଇକାନ୍‌ ଦନ୍‌ ଇଡ୍‌ନାନ୍‌ ।

17 ଦୟାକିନିକାନ୍‌ ନିଜେଦି ଜିବନ୍‌ତିଙ୍ଗ୍‌ ନେଗେନ୍‌ କିନାନ୍‌;

ମାତର୍‌ ଆମାକାନ୍‌ ଦୟାକିଏନ୍‌, ୱାନ୍‌ ନିଜେଦି ମେନ୍ଦଲ୍‌ତିଙ୍ଗ୍‌ ଦୁଃକ୍‌ ସିନାନ୍‌ ।

18 ସେଇକାନ୍‌ ମିସ୍‌ ମାଟା ଉଣ୍ତା କିନାନ୍‌,

ମାତର୍‌ ଆମାକାନ୍‌ ଦାର୍ମୁ ୱିତୁ ୱିତ୍‌ନାନ୍‌, ୱାନିଙ୍ଗ୍‌ ସତ୍‌ନେ ପଲ୍‌ ମାନାତ୍‌ ।

19 ଆମା ଲୋକ୍‌ ଦାର୍ମୁଦୁ ଡାଟ୍‌ ତେବାନାନ୍‌, ୱାନ୍‌ ଜିବନ୍‌ ପୋଇନାନ୍‌;

ମାରି, ସେଇପାଣିଦି ୱେନ୍‌କା ଆମାକାନ୍‌ ସନାନ୍‌ ୱାନ୍‌ ନିଜେଦିଙ୍ଗ୍‌ ସାପିସ୍‌ କିନାନ୍‌ ।

20 ଅବୁଜା ମନ୍‌ତି ଲୋକାଙ୍ଗ୍‌ ପ୍ରବୁ କାଡ଼୍‌ନାନ୍‌,

ମାତର୍‌ ସାନ୍ତିଦିକାର୍‌ ୱାନି ୱେଡ଼ିକାଦିକାର୍‌ ଆନାର୍‌ ।

21 ସେଇକାର୍‌ କିକୁ ଆସ୍‌ସିସାତିଙ୍ଗା ବା ଦଣ୍ତ୍‌ ପୋଇନାର୍‌,

ମାତର୍‌ ଦାର୍ମୁଦି କୁଟୁମ୍‌ ରକିୟା ପୋଇନାର୍‌ ।

22 ପାଣ୍ତ୍ରିଦି ମୁଜିଦୁ ଏଣ୍ଡେସ୍‌ ବାଙ୍ଗାରାମ୍‌ଦି ନାତ,

ଆୟାୱାଜା ନେଗି ବିସାର୍‌ ଡ଼ିସ୍‌ନି ସୁନ୍ଦ୍‌ରି ଆଇମା ।

23 ଦାର୍ମୁଦି ଲୋକା ଆସାଦି ପଲ୍‌ ଆବ୍‌କା ନେଗିକା,

ମାତର୍‌ ସେଇୱାରି ଆସାଦି ପଲ୍‌ ରିସା ।

24 ଏନ୍‌ ଏନ୍‌ ବାଟା କିଜି ସିଜି ମାରି ନାଣ୍ତ ପିରିନାର୍‌,

ମାରି, ଏନ୍‌ ଏନ୍‌ ଦାନ୍‌ ସିଦେଙ୍ଗ୍‌ ବଦା କିଏତିଙ୍ଗାଁ ବା ଆବେଣାନ୍‌ କେବଲ ଉଣା ଆନାତ୍‌ ।

25 ଦାନ୍‌ ସିନି ଲୋକ୍‌ ୱେଡ଼ିକା ଆନାନ୍‌,

ମାରିବା, ଏନ୍‌ ଆଇ ଲୋକା ଡଡି ଏରୁ କାରେକିନିକାନ୍‌ ମାରି ୱାନି ଡଡି ବା କାରେ କିଆୟ୍‌ଆନାତ୍‌ ।

26 ପାସି ଏନ୍‌ ଉଣ୍ତା କିଜି ଇଡ୍‌ନାତ୍‌, ଦାନିଙ୍ଗ୍‌ ଲୋକୁ ଆନାଦୁରିଆ ସିନାର୍‌,

ମାତର୍‌ ଆମା ଲୋକ୍‌ ଆକା ପର୍‌ନାନ୍‌, ୱାନି ତାଲାଦୁ ଆସିର୍ବାଦ୍‌ ୱାନାତ୍‌ ।

27 ଆମା ଲୋକ୍‌ ଜାତୁନ୍‌ଦାନ୍‌ ନେଗିଦାନିଙ୍ଗ୍‌ ସେସ୍ଟା କିନାନ୍‌, ୱାନ୍‌ ଦୟା ପୋଇନାନ୍‌,

ମାରି ଆମାକାନ୍‌ ଆଇ ଲୋକା ଉଣ୍ତିଙ୍ଗ୍‌ ସେଇକା କିଦେଙ୍ଗ୍‌ ରେବାନାନ୍‌, ୱାନି ଉଣ୍ତିଙ୍ଗ୍‌ ଆକାନେ ଗଟାନାତ୍‌ ।

28 ନିଜେଦି ଦନ୍‌ତୁ ଆମାକାନ୍‌ ଆସା ଇଡ୍‌ନାନ୍‌, ୱାନ୍‌ ସାନାନ୍‌;

ମାତର୍‌ ଦାର୍ମୁଦି ଲୋକ୍‌ କଡ଼୍‌କି ଆକୁ ୱାଜା ୱେଡ଼ିକା ଆନାନ୍‌ ।

29 ନିଜେଦି ଇଲୁବେଲିଦିଙ୍ଗ୍‌ ଆମାକାନ୍‌ ଦୁଃକ୍‌ ସିନାନ୍‌, ୱାନ୍‌ ଗାଲି ୱାଜା ଆନାନ୍‌;

ମାରି, ବୁଦିସିଲି ଲୋକ୍‌ ଗ୍ୟାନ୍‌ ଲୋକ୍‌ତି ସାକର୍‌ ଆନାନ୍‌ ।

30 ଦାର୍ମୁ ଲୋକ୍‌ତି ପଲ୍‌ ଜିବନ୍‌ସିନି ମାରାନୁ ୱାଜା,

ମାରି, ଆମାକାନ୍‌ ଗ୍ୟାନ୍‌ଦିକାନ୍‌, ୱାନ୍‌ ଆଇୱାରି ଜିବନ୍‌ ଲାବ୍‌ କିନାନ୍‌ ।

31 ସୁଡ଼ୁଦୁ, ଦୁନିଆଦୁ ଦାର୍ମୁଦିକାର୍‌ ବା କିତି ଦଣ୍ତ୍‌ ପୟ୍‌ନାର୍‌,

ଆର୍‌ତିଙ୍ଗ୍‌ ତାଗ୍‌ଇକାର୍‌ ମାରି ପାପି ଲୋକୁ ଇନିକା ତାନିମାଣାନ୍‌ ନାଣ୍ତ ଦଣ୍ତ୍‌ ପୟ୍‌ଏର୍‌ ?