1 ନାଣ୍ଡ ଦନ୍‌ ବାଦ୍‌ଲୁ ନେଗି ଦରୁ ୱେଙ୍ଗିଁନିକା ନେଗେତ୍‌, ମାରି ୱେଣ୍ଡି ମାରି ବାଙ୍ଗାରାମ୍‌ ବାଦ୍‌ଲୁ ଲାଡ୍‌ ମାନି ଦୟା ନେଗେଣ୍ଡ୍‌ ।

2 ମାଜନ୍‌ ଲୋକୁ ମାରି କାକୁର୍ତି ଲୋକୁ ଉଣ୍ଡ୍ରେବାନୁ ମିସାନାର୍‌; ପ୍ରବୁ ଆୟାୱିଜେରିଙ୍ଗ୍‌ ତିଆର୍‌ କିତିକାନ୍‌ ।

3 ସାଲାକି ଲୋକ୍‌ ବାଦା ସୁଡ଼ୁଜି ନିଜେଦିଙ୍ଗ୍‌ ଆଡ଼ାକ୍‌ନାନ୍‌; ମାତର୍‌ ବୁଦିସିଲି ଲୋକୁ ଆଗ୍‌ଡ଼ି ସଲ୍‌ସି ସାସ୍ତି ପୋଇନାର୍‌ ।

4 ସାନ୍ତି ମାରି ପ୍ରବୁଦି ବିସୟ୍‌ ତିଲାନିକା ଇନାମ୍‌ ଦନ୍‌, ସନ୍‌ମାନ୍‌ ମାରି ଜିବନ୍‌ ।

5 ତାଗ୍‌ଇୱାରି ସାରିଦୁ ସାମ୍‌କୁ ମାରି ଉରି ତେବାନାତ୍‌; ଆମାକାନ୍‌ ନିଜେଦି ଜିବନ୍‌ ରକିୟା କିନାନ୍‌, ୱାନ୍‌ ଆୟାୱିଜୁ ମାଣାନ୍‌ ଆକ ତେବାନାନ୍‌ ।

6 କଡ଼ଦିଙ୍ଗ୍‌ ନେଗି ସାରିଦୁ ବୁଲାଦେଙ୍ଗ୍‌ ଅଜା କିଦୁ; ଆବେଟ୍‌ ୱାନ୍‌ ଡକ୍ରା ଆତିଙ୍ଗ୍‌ ବା ଆବେଣାନ୍‌ ୱେର୍ହେ ସଲ୍‌ଏନ୍‌ ।

7 ମାଜନ୍‌ ଲୋକୁ କାକୁର୍ତି ଲୋକା ମୁସ୍‌କୁ ସାସନ୍‌ କିନାନ୍‌, ମାରି, ୱାଡି ଅତି ଲୋକ୍‌ ୱାଡି ସିତି ଲୋକ୍‌ତି ଗତିମୁରୁ ଆନାନ୍‌ ।

8 ଆମାକାନ୍‌ ଅଦାର୍ମୁଦି ୱିତୁ ୱିତ୍‌ନାନ୍‌, ୱାନ୍‌ ବାଦାଦି ପାସି କୟ୍‌ନାନ୍‌ ମାରି ୱାନି ରିସାଦି ସାସନ୍‌ ବାଡିଗା ନାସ୍ଟୁ ଆନାତ୍‌ ।

9 ଆମାକାନ୍‌ ଲୋକାଙ୍ଗ୍‌ ଦୟା କିନାନ୍‌, ୱାନ୍‌ ଆସିର୍ବାଦ୍‌ ପୟ୍‌ନାନ୍‌; ଏନ୍ଦାଇର୍ରିଙ୍ଗ୍‌ ୱାନ୍‌ ନିଜେଦି କାଦିଦାନ୍‌ ସିଲିସାତି ଲୋକ୍‌ତିଙ୍ଗ୍‌ ବାଟା କିଜି ସିନାନ୍‌ ।

10 ନିନ୍ଦାକିନିୱାନିଙ୍ଗ୍‌ ସପ୍‌ତୁ, ଆବେଟ୍‌ ଜାଟିଜଗ୍‌ଡ଼ା ସନା ସନାତ୍‌; ମାରି, ବିରଦ୍‌ କିନିକା ମାରି ଅପମାନ୍ କିନିକା ଉଣା ଆନାତ୍‌ ।

11 ଆମା ଲୋକୁ ନେଗି ଜିବନ୍‌ତିଙ୍ଗ୍‌ ଲାଡ୍‌ କିନାନ୍‌, ଏନ୍‌ ଦୟାଦାନ୍‌ ୱାର୍‌ଗିନାନ୍‌, ମାରି ରାଜା ୱାନି ସଙ୍ଗ୍‌ ଆନାନ୍‌ ।

12 ପ୍ରବୁଦି କାଣୁକୁ ବୁଦି ପୋଇତି ଲୋକାଙ୍ଗ୍‌ ରକିୟା କିନାତ୍‌; ମାତର୍‌ ଅବିସ୍‌ବାସ୍‌ରି ମାଟା ୱାନ୍‌ ମାର୍‌ନା ପକ୍‌ନାନ୍‌ ।

13 ଗାଡ଼ିଆ ଲୋକ୍‌ ଇଣ୍ତ୍ରତେବାଜି ଇନାନ୍‌, ଆତ୍ରେ ପାର୍ଟାନରେସ୍‌ ମାନାତ୍‌; ନାନ୍‌ ସାରିଦୁ ସାନା ।

14 ଦାରି ପାଣିକିନି ଆଇମାଦି ୱେୟୁ ନିର୍‌ଇ ଗୁଟା ୱାଜା, ପ୍ରବୁ କାଡ଼୍‌ନି ଲୋକୁ ଆବେନୁ ଆର୍‌ନାର୍‌ ।

15 ଅରେନ୍‌ କଡ଼ଦି ମନ୍‌ତୁ ବୁଦି ତେବାଏତ୍‌, ମାରି, ସାସନ୍‌ ବାଡିଗା ଆକା ସପ୍‌ସି ୱାନି ମାଣାନ୍‌ ଆକ କିନାତ୍‌ ।

16 ଆମା ଲୋକୁ ନିଜେଦି ଦନ୍‌ ନାଣ୍ତ କିଦେଙ୍ଗ୍‌ ସିଲିସାତି ଲୋକ୍‌ତି ଉଣ୍ତିଙ୍ଗ୍‌ ବାଦା କିନାନ୍‌; ମାରି, ଏନ୍‌ ମାଜନ୍‌ ଲୋକ୍‌ତିଙ୍ଗ୍‌ ଦାନ୍‌ ସିନାନ୍‌, ୱାନିଙ୍ଗ୍‌ କେବଲ ଉଣା ଆନାତ୍‌ ।

17 ନିନୁ ନିଜେଦି ଗିତଣିଦାନ୍‌ ବୁଦିଦି ଲୋକା ମାଟା ୱେନ୍‌ଆ; ମାରି, ନା ବିଦ୍ୟାଦୁ ନିଜେଦି ମନ୍‌ ସିଆ । 18 ଏନ୍ଦାଇର୍ରିଙ୍ଗ୍‌ ନିନୁ ନିଜେଦି ଜିବନ୍‌ତୁ ଇଟ୍‌ତିଙ୍ଗ୍‌ ମାରି ନି ୱେୟୁଦି ୱାଲେ ଆକା ଉନ୍‌ଡ୍ରେ ଆଜି ମିସାତିଙ୍ଗା, ଆକା ୱେଡ଼ିକାଦିକା ଆନାତ୍‌ ।

19 ପ୍ରବୁଦିମାନୁ ଏଣ୍ଡେସ୍‌ ନି ଆସା ତେବାନାତ୍‌, ଇୟାଉଣ୍ଡିଙ୍ଗ୍‌ ନାନ୍‌ ନେରୁ ନିଙ୍ଗିଁ ଇୟାୱିଜୁ ମାଟା ୱେର୍‌ତା । 20 ନାନୁ ନି ଉଣ୍ତିଙ୍ଗ୍‌ ତିରିସ୍‌ ଗୋଟା ଗ୍ୟାନ୍‌ତି ମାଟେଙ୍ଗ୍‌ ରାସ୍‌ତା, ଇବେନୁ ନେଗି ବୁଦି ମାରି ଗ୍ୟାନ୍‌ ପୁରା ମାନାତ୍‌, 21 ନିନୁ ଆମାଜାକୁ ୱାରିଙ୍ଗ୍‌ ସତ୍‌ ମାଟା ୱେର୍‌ତେଙ୍ଗ୍‌ ଆଟ୍‌ନି, ଇୟାଉଣ୍ଡିଙ୍ଗ୍‌ ନାନ୍‌ ଇନିକା ନି ଉଣ୍ତିଙ୍ଗ୍‌ ଜଗ୍‌ଡ଼ାଦାନ୍‌ ମାରି ବିଦ୍ୟାଦାନ୍‌ ନ୍ୟାୟ୍‌ ମାଟା ରାସ୍‌ଏ ?

22 ସିଲିସାତି ଲୋକ୍‌ତିଙ୍ଗ୍‌ ସିଲିସାତିକାନ୍‌ ଇଜି ନେସ୍‌ସି ୱାନି ଜିନିସ୍‌ ଡଙ୍ଗାଁ କିମା, ମାରି, ଗାଡ଼୍‌ତି ସେର୍‌ଲାଦୁ ଦୁଃକ୍‌ତି ଲୋକାଙ୍ଗ୍‌ ବାଦା କିମା ।

23 ଇରିଙ୍ଗ୍‌ ପ୍ରବୁ ୱାରି ମାଟା ୱେନାନ୍‌, ମାରି, ଆମାକାର୍‌ ୱାରି ଜିନିସ୍‌ ଡଙ୍ଗାଁ କିନାର୍‌, ୱାନ୍‌ ୱାରି ଜିବନ୍‌ ଡଙ୍ଗାଁ କିନାନ୍‌ ।

24 ଗିଦ୍ରିଆନି ଲୋକ୍‌ତି ୱାଲେ ସଙ୍ଗ୍‌ ଆମା, ମାରି, ରିସାଦି ଲୋକା ୱାଲେ ବୁଲାମା ।

25 କିତିଙ୍ଗ୍‌, ନିନୁ ମାରି ୱାନି ସାରି ଅଜାଜି ନିଜେଦି ଜିବନ୍‌ ଉଣ୍ତିଙ୍ଗ୍‌ ଉରି ତିଆର୍‌ କିନି ।

26 ଆମାକାର୍‌ କିୟୁଦୁ ବାଦ୍‌ ଡାକ୍‌ନାର୍‌ ମାରି ୱାଡି ଉଣ୍ତିଙ୍ଗ୍‌ ଦାଇ ଆନାର୍‌, ୱାରି ଲୋଇରାନ୍‌ ନିନୁ ଅରେନ୍‌ ଲୋକ୍‌ ଆମା ।

27 ଏସେଙ୍ଗ୍‌ ୱାଡି ଡ଼େସିସିଦେଙ୍ଗ୍‌ ନି ମାନୁ ଇନିକା ବା ସିଲେତ୍‌, ଆର୍‌ତିଙ୍ଗ୍‌ ୱାନ୍‌ ଏନ୍ଦା ନି ଆଡ୍‌ଗିରାନ୍‌ ନି ପାର୍‌ନି ଟାଟି ଅନାନ୍‌ ?

28 ନି ଡକ୍‌ରାଦାଦାର୍‌ ଆମା ପାଡ଼ିଇ ସାନ୍ଦି ତିଆର୍‌ କିତାମାନାର୍‌, ଆକା ଗୁସାକିମା ।

29 ନିନୁ ନ ଆମାବା ଲୋକୁଦିଙ୍ଗ୍‌ ନିଜେଦି ବେପାର୍‌ଦୁ ଦାନ୍ଦା ଆନିକା ସୁଡ଼ୁତିମାନି ? ୱାନ୍‌ ରାଜାରି ଆଗ୍‌ଡ଼ି ନିଲ୍‌ନାନ୍‌ । ୱାନ୍‌ ଇସ୍ରି ପଦ୍‌ତି ଲୋକା ଆଗ୍‌ଡ଼ି ନିଲ୍‌ଏନ୍‌ ।