1 ସଲମନତି ନେଗି ସିକିୟା ।

ବୁଦିଦି ମାରିନ୍‌ ବୁବାଦି ୱେଡ଼ିକା କିବିସ୍‌ କିନାନ୍‌;

ମାତର୍‌ ବୁଦ୍ଧି ସିଲି ମାରିନ୍‌ ଉଣ୍ତିଙ୍ଗ୍‌ ୱାନି ୟାୟା ଦୁଃକ୍‌ କିନାତ୍‌ ।

2 ସେଇ ପାଣିଦାନ୍‌ ଇଟ୍‌ତି ଦନ୍‌ ଲାବ୍‌ ଇନି ସିଏତ୍‌;

ମାତର୍‌ ଦାର୍ମୁ ସାନି ମାଣାନ୍‌ ରକିୟା କିନାତ୍‌ ।

3 ପ୍ରବୁ ଦାର୍ମୁଦି ଲୋକାଦି ଜିବନ୍‌ତିଙ୍ଗ୍‌ ବାଙ୍ଗାଁଦାନ୍‌ ସାଦେଙ୍ଗ୍‌ ସିଏନ୍‌;

ମାତର୍‌ ସେଇ ଲୋକା ଆସା ପୁରା କିଏନ୍‌ ।

4 ଆମା ଲୋକୁ ଗାଡ଼ିଆ କିୟୁଦାନ୍‌ ପାଣି କିନାନ୍‌, ୱାନ୍‌ କାକୁର୍ତି ଆନାନ୍‌;

ମାତର୍‌ ପାଣିକିନି କିୟୁଦି ଲୋକୁ ମାଜନ୍‌ ଆନାନ୍‌ ।

5 ଜେଟା କାଡ଼ାଦୁ ଆମାକାନ୍‌ ଉଣ୍ଡା କିନାନ୍‌, ୱାନ୍‌ ବୁଦିଦି ମାରିନ୍‌;

ମାତର୍‌ ପାସିଦି ୱେଡ଼ାଦୁ ଆମାକାନ୍‌ ସୁଜ୍‌ଜି ମାନାନ୍‌, ଆୟା ମାରିନ୍‌ ସେମାର୍‌ତିକାନ୍‌ ।

6 ଦାର୍ମୁଦି ଲୋକ୍‌ତି ତାଲାଦୁ ଆର୍ସିବାଦ୍‌ ୱାନାତ୍‌;

ମାତର୍‌ ସେଇ ଲୋକ୍‌ତି ୱେୟୁ ସେଇ ମାଟା ଆଡ଼ାକ୍‌ନାତ୍‌ ।

7 ଦାର୍ମୁ ଲୋକ୍‌ତିଙ୍ଗ୍‌ ଏତ୍‌ କିଜି ଲୋକୁ ଆସିର୍ବାଦ୍‌ କିନାର୍‌, ମାତର୍‌ ସେଇ ଲୋକ୍‌ତି ଦର୍‌ ମାର୍‌ଗାନା ସନାତ୍‌ ।

8 ଆମାକାନ୍‌ ଜିବନ୍‌ତୁ ଗ୍ୟାନି, ୱାନ୍‌ ମାଟା ଆସ୍‌ନାନ୍‌;

ମାତର୍‌ ବୁଦିସିଲି କାବା ଲୋକ୍‌ ସାନା ସନାନ୍‌ ।

9 ସାନ୍ତିଦି ଲୋକୁ ତିଲାଏଣ୍ଡା ବୁଲାନାନ୍‌,

ମାତର୍‌ ୱେକଡେକ ଲୋକ୍‌ ଜାଣା ପଡ଼ାନାନ୍‌ ।

10 ଆମାକାନ୍‌ କାଣ୍‌ଗା ଡ଼େଇନାନ୍‌, ୱାନ୍‌ ଦୁଃକ୍‌ ତାନାନ୍‌,

ମାରି, ଗ୍ୟାନିସିଲି ନିର୍ବୁଦି ଲୋକ୍‌ ସାନାନ୍‌

11 ଦାର୍ମୁ ଲୋକ୍‌ତି ୱେୟୁ ଜିବନ୍‌ତି ଜଲାଏରୁ ୱାଜା ସନେ,

ମାତର୍‌ ସେଇ ଲୋକ୍‌ତି ୱେୟୁ ତାଗ୍‌ଇ ମାଟା ଆଡ଼ାକ୍‌ନାତ୍‌ ।

12 ରାଗା ଜାଟିଙ୍ଗ୍‌ ତାନାତ୍‌,

ମାତର୍‌ ଜିବନ୍‌ ନୋନିକା ୱିଜୁ ଅର୍ଦାମୁ ପିଡ଼ିକ୍‌ନାତ୍‌ ।

13 ନେଗି ବୁଦିଦି ଲୋକ୍‌ତି ୱେୟୁଦୁ ଗ୍ୟାନ୍‌ ତେବାନାତ୍‌,

ମାତର୍‌ ନିର୍ବୁଦି ଲୋକ୍‌ତି ମୁଟାମ୍‌ ଉଣ୍ତିଙ୍ଗ୍‌ ବାଡିଗା ମାନାତ୍‌ ।

14 ଗ୍ୟାନି ଲୋକୁ ବିଦ୍ୟା ଅଜାନାର୍‌,

ମାତର୍‌ ଅଗ୍ୟାନି ଲୋକ୍‌ତି ୱେୟୁ ନିଜେଙ୍ଗ୍‌ ନାସ୍ଟୁ କିନାତ୍‌ ।

15 ମାଜନ୍‌ ଲୋକ୍‌ତି ଦନ୍‌ ୱାନି ଡାଟ୍‌ ଗାଡ଼୍‌ ୱାଜା,

କାକୁର୍ତି ଲୋକା କାକୁର୍ତି ୱାରିଙ୍ଗ୍‌ ନାସ୍ଟୁ କିନାତ୍‌ ।

16 ଦାର୍ମୁ ଲୋକ୍‌ତି ପାଣି ଜିବନ୍‌ ସିନାତ୍‌,

ମାରି, ଅଦାର୍ମୁ ଲୋକ୍‌ ଉଣ୍ତାକିନି ଦନ୍‌ ପାପ୍‌ ତାନାତ୍‌ ।

17 ନେଗି ମାଟା ଆମାକାନ୍‌ ୱେନାନ୍‌, ୱାନ୍‌ ଜିବନ୍‌ତି ସାରିଦୁ ବୁଲାନାନ୍‌;

ମାତର୍‌ ଆମାକାନ୍‌ ନେଗି ମାଟା ଆସ୍‌ଏନ୍‌, ୱାନ୍‌ ବାୟା ଆନାନ୍‌ ।

18 ଆମାକାନ୍‌ ରାଗା ଆଡ଼ାକ୍‌ନା ଇଡ୍‌ନାନ୍‌, ୱାନି ୱେୟୁଦି ମାଟା ମିସ୍‌;

ମାରି, ଆମାକାନ୍‌ ସେଇ ମାଟା ଇନାନ୍‌, ୱାନ୍‌ ବୁଦିସିଲିକାନ୍‌ ।

19 ନାଣ୍ଡ ମାଟାଦୁ ଅଦାର୍ମୁ ନାଣ୍ତ ତେବାନାତ୍‌,

ମାତର୍‌ ଆମାକାନ୍‌ ନିଜେଦି ୱେୟୁଦିଙ୍ଗ୍‌ ମୁକ୍‌ନାନ୍‌, ୱାନ୍‌ ବୁଦିଦିକାନ୍‌ ।

20 ଦାର୍ମୁ ଲୋକ୍‌ତି ୱେତଲ୍‌ ବାସେକିତି ୱେଣ୍ଡି ୱାଜା,

ମାତର୍‌ ସେଇ ଲୋକ୍‌ତି ଜିବନ୍‌ ଉଣା ଦାରା ।

21 ଦାର୍ମୁ ଲୋକ୍‌ତି ବଲୁ ନାଣ୍ଡ ଲୋକାଙ୍ଗ୍‌ ଜାତୁନ୍‍ କିନାତ୍‌,

ମାତର୍‌ ବୁଦିସିଲି ଲୋକୁ ବୁଜାଇ ଉଣ୍ତିଙ୍ଗ୍‌ ସାନାର୍‌ ।

22 ପ୍ରବୁଦି ସାକା ମାଜନ୍‌ କିନାତ୍‌,

ମାରି, ୱାନ୍‌ ତାନି ୱାଲେ ଦୁଃକ୍‌ ସିଏନ୍‌ ।

23 ସେଇ ପାଣି କିଜି ବୁଦିସିଲିକାନ୍‌ ୱେଡ଼ିକା ଆନାନ୍‌,

ମାତର୍‌ ବୁଦିଦିକାନ୍‌ ଗ୍ୟାନ୍‌ ପୟ୍‌ଜି ୱେଡ଼ିକା ଆନାନ୍‌ ।

24 ସେଇ ଲୋକ୍‌ ଆମାକା ତିଲାନାନ୍‌, ଆକାନେ ୱାନି ଉଣ୍ତିଙ୍ଗ୍‌ ଆନାତ୍‌;

ମାତର୍‌ ଦାର୍ମୁ ଲୋକ୍‌ତି ବଦା ୱାନିଙ୍ଗ୍‌ ସିଆୟ୍‌ ଆନାତ୍‌ ।

25 ଗାଲିପିରୁ ୱାତିଙ୍ଗାଁ ସେଇକାନ୍‌ ମାରି ମାନ୍‌ଏନ୍‌,

ମାତର୍‌ ଦାର୍ମୁଦିକାନ୍‌ ୱିଜୁଦିନ୍‌ ତେବାନି କୁନାଦି ୱାଜା ଆନାନ୍‌ ।

26 ଆମାଜାକୁ ପାଲ୍‌କାଙ୍ଗ୍‌ ସଇନି ରସ୍‌ ମାରି କାଣାଗାଦିଙ୍ଗ୍‌ ଗୋଇ,

ଆୟାୱାଜା ନିଜେଦି ପକ୍‌ତିୱାରି ଉଣ୍ତିଙ୍ଗ୍‌ ଗାଡ଼ିଆ ।

27 ପ୍ରବୁଦି ବିସୟ୍‌ ତିଲାନି ଦିନ୍‌ ପିରିପ୍‌ନାତ୍‌,

ମାତର ସେଇୱାନି ଦିନ୍‌ ଉଣା କିଆଇ ଆନାତ୍‌ ।

28 ଦାର୍ମୁଦି ଲୋକା ଆସା ୱେଡ଼ିକାଦିକା ଆନାତ୍‌,

ମାତର ସେଇୱାନି ଆସା ୱାର୍‌ନା ସନାତ୍‌ ।

29 ପ୍ରବୁଦି ସାରି ସାନ୍ତିଦି ଲୋକା ଉଣ୍ତିଙ୍ଗ୍‌ ଡାଟ୍‌ତି ଗାଡ଼୍‌;

ମାତର ସେଇ ପାଣି କିନି ଲୋକା ଉଣ୍ତିଙ୍ଗ୍‌ ଆକା ସାନି ୱାଜା ।

30 ଦାର୍ମୁ ଲୋକ୍‌ ଏସେଙ୍ଗ୍‌ବା ଗୁସାଏନ୍‌;

ମାତର୍‌ ସେଇ ଲୋକ୍‌ ଦେସ୍‌ତିକାନ୍‌ ଆଏନ୍‌ ।

31 ଦାର୍ମୁ ଲୋକ୍‌ତି ୱେୟୁଦାନ୍‌ ଗ୍ୟାନ୍‌ ମାଟା ସନାତ୍‌,

ମାତର କୁଟ୍‌ ୱାର୍‌ଗିନି ୱେତଲ୍‌ କୟାନାତ୍‌ ।

32 ଦାର୍ମୁ ଲୋକାଦି ୱେୟୁ ନେଗି ମାଟା ନେସ୍‌ନାତ୍‌,

ମାତର ସେଇ ଲୋକ୍‌ତି ୱେୟୁ କୁଟ୍‌ ମାଟା ଇନାତ୍‌ ।