1 ତାନିୱେନ୍‌କା ନାନୁ ସୁଡ଼ୁତା, ମେଣ୍ତାପିଲା ସିୟୋନ ଗୋରନ୍‌ ମୁସୁକୁ ନିରାମାନାନ୍ । ୱାନି ୱାଲେ , ଲୋକୁ ମାର୍ହାର୍‌ । ୱାରି କାପାଲ୍‌ତୁ ମେଣ୍ତାପିଲା ମାରି ୱାନି ବୁବାଦି ଦରୁ ରାସାତାମାରାତ୍ । 2 ତାନିୱେନ୍‌କା ନାନୁ ୱେର୍‌ଆ, ଏରୁ ୱାଙ୍ଗ୍‌ନିଆଉଲି ମାରି ମିର୍‌ସିନି ଆଉଲି ୱାଜା ମୁସ୍‌କୁପୁର୍‌ତାନ୍‌ ଉନ୍‌ଡ୍ରି ବଲୁ ୱାତାତ୍‌ । ବାଜାଏସ୍‌ନିକାର୍‌ ବାଜାଏସ୍‌ସି ମାନି ମୋରି ଝୁମ୍‌କା ୱାଜା ଆକା ୱେନ୍‌ଜି ମାର୍ହାତ୍‌ । 3 ଆୟା , ଲୋକୁ ମୁସ୍‌କୁପୁର୍‌ ସିଂହାସନ୍‌ଦୁ, ନାଲ୍‌ଗି ଜାତୁଙ୍ଗୁଁ ମାରି ମଣ୍ତଲିଦି ପେରିନେତାରି ଆଗ୍‌ଡ଼ି ନିର୍ହାର୍ । ୱାର୍‌ ପୁନିପାଟା ପାରିଜିମାରାର୍‌ । ୱାରିଙ୍ଗ୍‌ ଡ଼ିସ୍‌ତିଙ୍ଗ୍‌ ଆଇକାର୍‌ ଏର୍‌ ଆୟା ପାଟା ପାର୍‍ଦେଙ୍ଗ୍‌ ଆଟ୍‍ଏଜିମାର୍ହାର୍‍ । ସାରା ଦୁନିଆ ଲୋକା ଜାତିଦି ମାଣୁକୁ କେବଲ୍‌ ୱାର୍‌ ରକିୟା ପୋଇତାମାରାର୍ । 4 ୱାର୍‌ ଆଇମେକା ୱାଲେ ନିଜେଦିଙ୍ଗ୍ ଏସ୍‌କାଙ୍ଗ୍ ପାପ୍‌ କିଏର୍‌ ମାର୍ହାର୍‌, ୱାର୍‌ ମାର୍ହାର୍‌ ନେଗିକାର୍‌ । ୱାର୍‌ ୱିଜୁଦିନ୍ ମେଣ୍ତାପିଲାଦି ୱେନ୍‌କା ବୁଲାଜିମାର୍ହାର୍‌ । ୱାର୍‌ ଲୋକା ମାଣୁକୁ ପାର୍‌ତୁମ୍‌ ରକିୟା ପଇଜି ମାପୁରୁ ମାରି ମେଣ୍ତାପିଲାଦି ଲାକ୍‌ତୁ ସର୍ପେ ଆତାମାନାର୍‌ । 5 ୱାର୍‌ ଏସ୍‌କାଙ୍ଗ୍ ମିଚ୍‌ ୱେର୍‌ନିକା ତର୍‌ଏତ୍, ୱାର୍‌ ପୁରା ଦସ୍‍ସିଲିକାର୍‍ ।

6 ତାନିୱେନ୍‌କା ନାନୁ ମାରିଡ଼େସି ସୁଡ଼ୁତା, ମାରି ଅରେନ୍‌ ଦୁତ୍‍ ବାଦଡ଼ଦୁ ନାଣ୍ତ ମୁସ୍‌କୁରାନ୍‌ ଇମିଜି ଇମିଜି, ଦୁନିଆଦି ୱିଜୁ ଜାତି, କୁଟୁମ୍‌, ବାସାଦି ମାରି ଦୁନିଆଦି ଲୋକା ଲାକ୍‌ତୁ ମାପୁରୁଦି ଆୟା ୱିଜୁଦିନ୍‍ତି ସୁସମାଚାର୍‌ ୱେର୍‌ସିନାନ୍‌ । 7 ୱାନ୍‌ ପେରି ବଲୁଦାନ୍ ୱେର୍‌ସିନାନ୍‌, "ମାପୁରୁଙ୍ଗୁଁ ତିଲାଦୁ, ୱାନି ଆତ୍ମାଦିଙ୍ଗ୍‌ ପ୍ରସଂସା କିଦୁ, ମାତର୍‌ ଲୋକା ବିଚାର୍‍ ବେଡ଼ା ଇଗା ୱାତାତ୍‌ନି । ମୁସ୍‍କୁପୁର୍‍, ଦୁନିଆ, ସାମୁଦୁର୍‌ ମାରି ୱିଜୁ ଏରୁଜଲେଙ୍ଗ୍‌ ତିଆର୍‍କିତିୱାନିଙ୍ଗ୍‍ ପୁଜାକିଦୁ ।"

8 ✝ଆୟା ଆଗ୍‌ଡ଼ିରି ଦୁତଦି ୱେନ୍‌କା ମାରିଉଣ୍ଡ୍ରି ଦୁତ୍‍ ୱାଜି ଇର୍ହାତ୍‌, "ୱାନିଦି ଦଂସ ଗଟାତାତ୍ । ୱେଙ୍ଗିଁତିମାନି ବାବିଲନ୍ ଦଂସ୍‌ ଆତାମାନାତ୍‌ । ୱାନ୍‌ ୱାନି ଦାରିପାଣି ୱାଜା କାଡ଼ୁ ଉଟ୍‌ପିସ୍‌ କିଜି ୱିଜୁ ଲୋକାଙ୍ଗ୍‌ ସୋସପିସ୍‌ କିତାମାର୍ହାନ୍‌ ।"

9 ଇୟା ରୁଣ୍ତି ଦୁତଦି ୱେନ୍‌କା ମାରିଉଣ୍ଡ୍ରି ଦୁତ୍‍ ୱାଜି ପେରି ବଲୁଦାନ୍ ଇନ୍‌ଡ୍ରେଙ୍ଗ୍‌ ଆସ୍‌ତାତ୍‌, "ଏନ୍‌ଆପିନ୍‌ ଜାତୁ ମାରି ତାନି ବମାଦିଙ୍ଗ୍‌ ପୁଜା କିନାନ୍ ମାରି ନିଜେଦି କାପାଲ୍‌ ନି କିୟୁଦୁ ୱାନି ସିନା ଆସ୍‌ନାନ୍‌, 10 ୱାନ୍‌ ମାପୁରୁଦି ରିସାଦିୱାଜା ଡୁବାଇଦୁ ୱାକ୍‍ତିମାନି ୱାନି ନାଣ୍ତ ରିସାଦି କାଡ଼ୁ ଉଣାନ୍‌ । ଏମେକାର୍‌ ଇୟା ପାଣିକିନାର୍‌, ୱାର୍‌ ୱିଜେରେ ମେଣ୍ତାପିଲା ମାରି ପବିତ୍ର ଦୁତ୍‍ରି ଆଗ୍‌ଡ଼ି ସିସୁ ମାରି ଗନ୍ଧକଦୁ କାସ୍ଟୁ ଆନେ । 11 ଆୟା କାସ୍‌ସିମାନି ସିସୁଦି ଗୋୟି ଜୁଗ୍‌ ଜୁଗ୍‌ କାସିସ୍‌ମାନାତ୍ । ଏମେକାର୍‌ ଜାତୁ ମାରି ଆୟା ମୁର୍ତିଦି ପୁଜା କିନାର୍, ମାରି ୱାନି ସିନା ଆସ୍‌ନାର୍‌, ୱାର୍‌ ନାଡ଼ାୱେଡ଼େ ୱିଜୁଦିନ୍‌ ଅସାନ୍ତି ଭୋଗାଜିମାନାର୍‌ ।"

12 ଏମେକାର୍‌ ମାପୁରୁଦି ମାଟାଆସ୍‌ନାର୍‌ ମାରି ଜିସୁଦି ଉଣ୍ତିଙ୍ଗ୍‌ ବିସ୍‌ବାସ୍‌ ତେବାନାର୍‌, ମାପୁରୁଦି ଆୟା ଲୋକା ଉଣ୍ତିଙ୍ଗ୍‌ ଏଣ୍ତେସ୍‌ବା ଦରକାର୍ ।

13 ନାନ୍‌ ୱେର୍‌ଆ, ମୁସ୍‌କୁପୁର୍‌ତାନ୍ ଉନ୍‌ଡ୍ରି ମାଟା ୱେଙ୍ଗିଁଜିନାତ୍; "ଇୟା ମାଟା ରାସ୍‍ତୁ ଏମେକାର୍ ଏଣ୍ତେସ୍‌କି ପ୍ରବୁଦି ସେବାକିଜି ସାନାସନାର୍, ୱାର୍‌ ଦନ୍ୟ ।"

ମାରି ନାନ୍‌ ୱେର୍‌ଆ, ତାଗ୍‍ଇଆତ୍ମା ଇଜିନାତ୍, "ଇକା ଏଣ୍ତେସ୍‌ବା ଗଟାନାତ୍ । ୱାର୍‌ ନିଜେ ନିଜେଦି କାସ୍ଟୁପାଣିଦାନ୍‌ ରମ୍‌ନାର୍‌, ଇରିଙ୍ଗ୍‌ ୱାରି ପାଣି ୱାରି ଲାକ୍‌ତୁ ଆନାତ୍‌ ।"

14 ତାନିୱେନ୍‌କା ନାନୁ ସୁଡ଼ୁତା, କାଣ୍ତେକ୍ ଅଡ଼ିନି ବାଦଡ଼ ମାରି ତାନି ମୁସୁକୁ ବାସ୍ତାମାନାନ୍‌ ମନୁସ୍ୟପୁତ୍ର ୱାଜା ଅରେନ୍‌; ୱାନି ତାଲାଦୁ ବାଙ୍ଗାରାମ୍‌ତି ମୁକୁଟ୍ ମାରି କିୟୁଦୁ ଦାରାଦି କଏର୍‌ । 15 ମନ୍ଦିର୍‌ତାନ୍ ମାରି ଉନ୍‌ଡ୍ରି ଦୁତ୍‍ ସୋସିୱାଜି ବାଦଡ଼ପିଡ଼ିକ୍‌ତିମାନି ଲୋକ୍‌ତିଙ୍ଗ୍‌ ନାଣ୍ତଆଉଲିଆଜି ଇର୍ହାନ୍‌, "ନି କଏର୍‌ ଆସ୍‌ସି ପାସି କୟ୍‌ଆ । ଦୁନିଆଦି ପାସି ଉଣ୍ତାକିଦେଙ୍ଗ୍‌ ଟିକ୍ ବେଡ଼ା ଇଗା ୱାତାମାନାତ୍‌ ।" 16 ଇକା ୱେନ୍‌ଜି ବାଦଡ଼ପିଡ଼୍‌ତି ଲୋକୁ ୱାନି କଏର୍‌ ଆସ୍‌ପିସ୍‌ସି ମାରି ଦୁନିଆଦି ପାସି ୱିଜୁ ଉଣ୍ତାତାତ୍‌ ।

17 ତାନିୱେନ୍‌କା ନାନୁ ସୁଡ଼ୁତା, ମାରି ଉନ୍‌ଡ୍ରି ଦୁତ୍‍ ମୁସ୍‌କୁପୁର୍‌ତି ମନ୍ଦିର୍‌ତାନ୍‌ ୱାଜିନାନ୍, ୱାନି କିୟୁଦୁ ବା ଉନ୍‌ଡ୍ରି ଦାରାଦି କଏର୍‌ ମାର୍ହାତ୍‌ ।

18 ତାନିୱେନ୍‌କା ବେଦିଦି ସିସୁ ଦାଇତ୍‌ତାନ୍‌ ମାନି ଉଣ୍ତ୍ରି ଦୁତ୍‍ କଏର୍‌ ଆସ୍ତିମାନି ମାରିଉଣ୍ଡ୍ରି ଦୁତଦିଙ୍ଗ୍‌ ଆଉଲି ଆଜି ଇର୍ହାନ୍‌, "କଏର୍‌ ଆସ୍‌ସି ଦୁନିଆଦି ଅଙ୍ଗୁର୍‍ କିଡ଼ିଇଦାନ୍‌ ଅଙ୍ଗୁର୍‍ ୱିଜୁ କୋୟ୍‌ଜ ପୋକ୍‌ଆ; ଆୟାୱିଜୁ ପାଣ୍ତିତେମାନେ ।" 19 ଆବେଟ୍‌ତାନ୍‌ ଦୁତ୍‍ ଦୁନିଆଦୁ ୱାନି କଏର୍‌ ଆସ୍‌ସି ଅଙ୍ଗୁର୍‍ ତିୱେଙ୍ଗ୍‌ଣ୍‌କୁ ଅଙ୍ଗୁର୍‍ କୋୟ୍‌ଜି ଉଣ୍ତା କିତାନ୍‌ ମାରି ଆୟାୱିଜୁ ମାପୁରୁଦି ନାଣ୍ତ ରିସାଦି ଅଙ୍ଗୁର୍‍ ପିର୍‌ନି କୁଣ୍ତ୍‌ଦୁ ପୋକ୍‍ତାର୍ । 20 ✝ଗାଡ଼୍‌ତି ଆତେରେ ମାନି ଆୟା କୁଣ୍ତ୍‌ଦୁ ଅଙ୍ଗୁର୍‍ କାଙ୍ଗ୍‌ ପିରିତାର୍ ମାରି ଆବେଟ୍‌ତାନ୍‌ ନେତେର୍‌ ସୋସି ଗଡ଼େଙ୍ଗାଁ ୱେୟୁ ସାନ୍ଧି କିଲୋମିଟର୍‌ତାନ୍‌ ପୁରା ନିରିକା ମାରି ପୁରା ଦୁଇ ମିଟର୍‌ ମୁସୁକୁ ନିଙ୍ଗିଁଜି ନେତେର୍‌ ୱାତାତ୍‌ ।