1 ତାନି ୱେନ୍‌କା ନାନୁ ମାରି ଅରେତ୍ ମୁସ୍‌କୁପୁର୍‌ ଦୁତ୍‌ତିଙ୍ଗ୍ ମୁକ୍‌ପୁର୍‌ତାନ୍ ରେତାଜି ୱାନିକା ସୁଡ଼ୁତା । ୱାନି କିୟୁଦୁ ପାତାଲ୍‍ପୁର୍‌ଦି କୁସିକାଣ୍ତି ମାରି ଉଣ୍ତ୍ରି ବଜୁଦି ସିକ୍‍ଣି ମାରାତ୍ । 2 ୱାଦ୍‌ ଆୟା ପୁର୍ବେଦି ସାରାସ୍, ଆୟା ତାଗ୍‌ଇ ସୟତାନ୍‍ତିଙ୍ଗ୍‌ ଆସ୍‌ସି , ବାର୍ସେକ୍ ସାନ୍ଦି ସିକ୍‌ଣିଦାନ୍ ତୋର୍‌ତା ମାର୍ହାତ୍‌ । 3 ମାରି ପାତାଲ୍‍କୁଣ୍ତିଦୁ ପୋକ୍‌ସି ଆୟାତାନି ସେର୍‍ଲା କେର୍‌ତାତ୍‌ ମାରି ସେର୍‍ଲା ଦେସ୍‍ତିଙ୍ଗ୍‌ ସିଲ୍‍ କିତାତ୍‌ । ହଜାର୍ ବାର୍ସେକ୍ ଜିଣାଇ ସାନ୍ଦି ୱାଦ୍‌ ମାରି ଏମେ ଦେସ୍‍ତି ଲୋକାଙ୍ଗ୍‌ ବାୟାକିଦେଙ୍ଗ୍‌ ଆଟେତ୍‍ନି । ଟିକ୍ ବେଡ଼ା ଇଗା ୱାତିଙ୍ଗ୍‍, ତାନିଙ୍ଗ୍‌ ଏସ ବେଡ଼ା ଉଣ୍ତିଙ୍ଗ୍‌ ମାରି ଉଣ୍ତ୍ରି ଦେବା ମୁକୁଡ଼ାକିନାର୍ ।

4 ତାନିୱେନ୍‍କା ନାନୁ ସୁଡ଼ୁତା ଏସ ସିଂହାସନ୍ ମାରି ଆୟାୱାନିକାଙ୍ଗ୍‌ ବାସ୍‌ତିମାନି ଲୋକା ବିଚାର୍‍ କିଦେଙ୍ଗ୍ ଅଦିକାର୍ ସିଆୟ୍‌ଆତାମାନାନ୍‌ । ମାରି ବା ନାନୁ ସୁଡ଼ୁତା, ଏସ ଲୋକା ସାତିୱାରି ଆତ୍ମା । ଜିସୁଦି ୱେର୍‌ତିମାନି ସତ୍‌ ମାରି ମାପୁରୁଦି ବାକ୍ୟ ପ୍ରଚାର୍‌ କିତିମାନିଙ୍ଗ୍‌ ଆୟା ଲୋକୁ ସାନିଦଣ୍ତ ପୋଇତା ମାର୍ହାର୍‌ । ୱାର୍‌ ପସୁଦିଙ୍ଗ୍‌ ନି ତାନି ବମାଦିଙ୍ଗ୍ ପୁଜା କିଏର୍‌ମାର୍ହାର୍‌, ମାରି କାପାଲ୍‌ତୁ ନି କିୟୁଦୁ ପସୁଦି ସିନା ଆସ୍‌ଏର୍‌ ମାର୍ହାର୍‌ । କ୍ରିସ୍ତଦି ୱାଲେ , ବାର୍ସେକ୍ ସାସନ୍‌ କିନି ଉଣ୍ତିଙ୍ଗ୍ ୱାର୍‌ ପୁନିଜିବନ୍‌ ଆତାମାର୍ହାର୍‌ । 5 ଆୟା , ବାର୍ସେକ୍ ପୁରା ଆଇ ସାନ୍ଦି ଆଇ ଆମା ସାତି ଲୋକ୍‌ଦି ମାରିଡ଼େସି ନିଙ୍ଗିଁନିକା ଆଏତ୍‍ ମାର୍‌ଆତ୍‌ । ଇକା ପାର୍‍ତୁମ୍‍ ମାରିଡ଼େସି ଜିବନ୍‌ଆଜି ନିଙ୍ଗିଁକା । 6 ସାତି ଲୋକ୍‌ତି ଇୟା ପାର୍‍ତୁମ୍‍ ମାରିଡ଼େସି ନିଙ୍ଗିଁନିମାନୁ ଏମେକାର୍ ମିସାତାମାନାର୍‌ ୱାର୍‌ ଏସା କାର୍ମୁଦିକାର୍‌ । ୱାର୍‌ ଏସ ୱେଡ଼ିକା ! ୱାରିଙ୍ଗ୍‌ ମାରି ରୁଣ୍ତି ଦେବେଙ୍ଗ୍‌ ସାନିକା ପୋଡ଼ାଏତ୍‌ନି । ୱାର୍‌ ମାପୁରୁଦି ମାରି କ୍ରିସ୍ତଦି ଜାଜକ ଆଜି କ୍ରିସ୍ତଦି ୱାଲେ , ବାର୍ସେକ୍ ସାନ୍ଦି ସାସନ୍‍ କିନାର୍ ।

7 , ବାର୍ସେକ୍‌ ପୁରା ଆନି ୱେନ୍‌କା ସୟତାନ୍‍ତିଙ୍ଗ୍‌ ଜଇଲ୍‍ତାନ୍ ମୁକୁଡ଼ା କିନାର୍ । 8 ମାରି ଗୋଗ୍ ମାରି ମାଗୋଗ୍ ୱାଜା ଦୁନିଆଦି ସାରିବେଡ଼ିତି ସାମ୍‌ଦୁରୁତି ବାଲିଗଣ୍ତି ୱାଜା ୱିଜୁତରିନ୍‌ ଆଜି ତେବାତିମାନି ଲୋକାଙ୍ଗ୍‌ ଲେକିସ୍‌ତେଙ୍ଗ୍‌ ଆଟ୍‌ଇ ଲୋକାଙ୍ଗ୍‌ ସୟତାନ୍ ବାୟାକିଜି ଜୁଦକିନି ଉଣ୍ତିଙ୍ଗ୍‌ ଏକଜୁଟ୍‌ କିନାତ୍‌ । 9 ୱାର୍‌ ଦୁନିଆଦି ୱିଜୁ ତରିନ୍‌ ସଲ୍‍ସି ପ୍ରବୁଦି ସାଦୁରିଙ୍ଗ୍‌ ମଣ୍ତଲିଙ୍ଗ୍‌ ୱିଜୁ ମାରି ମାପୁରୁଦି ଲାଡ୍‍ତି ଗାଡ଼୍‌ତିଙ୍ଗ୍‌ ଗେରେଆନାର୍ । ମାତର୍‌ ମୁସ୍‍କୁପୁର୍‍ତାନ୍‍ ସିସୁ ଆରିଜି ୱାରିଙ୍ଗ୍‌ ଦଂସ କିନାତ୍‌ 10 ମାରି ଏମେ ଗନ୍ଧକ୍‌ସିସୁ କାସ୍‌ସିମାନି ସାମ୍‌ଦୁର୍‌ତୁ ପସୁ ନି ବଣ୍ତବାବବାଦିର୍‌ ପୋକାତା ମାର୍ହାର୍‌, ବେମ୍‌ରିକିନି ସୟତାନ୍‌ତିଙ୍ଗ୍‌ ବା ଆବେନୁ ପୋକ୍‍ନାର୍‌ । ଆବେନୁ ୱାର୍‌ ୱେଡ଼େ ନାଡ଼ା ଜୁଗ୍‌ ଜୁଗ୍‌ ସାନ୍ଧି କାସ୍ଟୁ ଦୁଃକ୍‌ ପୋଇଜିମାନାର୍ ।

11 ତାନିୱେନ୍‌କା ନାନୁ ସୁଡ଼ୁତା, ଅଡ଼ିନି ରଙ୍ଗ୍‌ତି ଉଣ୍ତ୍ରି ପେରି ସିଂହାସନ୍ ମାରି ତାନି ମୁସ୍‌କୁ ଅରେନ୍‌ ବାସ୍‌ତା ମାନାନ୍‌ । ୱାନି ଆଗିଡ଼ିରାନ୍ ପୃତିବି ମାରି ବାଦଡ଼ ଉରୁକ୍‍ତେ ମାରି ୱାର୍‌ ମାରି ସୁଡ଼ୁଦେଙ୍ଗ୍‌ ଆଟ୍ଏତାର୍‍ନି । 12 ତାନିୱେନ୍‌କା ନାନୁ ସୁଡ଼ୁତା, ଏସ ପେରିକା, ଏସ ତାଗ୍‌ଇ ସାତିଲୋକୁ ୱିଜେରେ ସିଂହାସନ୍ ଆଗ୍‌ଡ଼ି ନିରାଆମାନାର୍‌ । ବଇଙ୍ଗ୍‌ୱିଜୁ କୁତ୍‌ତାର୍; ଆୟାୱିଜୁ ବଇଙ୍ଗାଁ ଲୋଇରାନ୍‌ ଜିବନ୍‌ ପୁସ୍ତକ ଦରୁଦି ଉଣ୍ତ୍ରି ବଇ ମାରାତ୍ । ଆୟା ଜିବନ୍‌ ପୁସ୍ତକଦୁ ଲୋକୁ ପାଣିକିତିମାନି ବିସୟ୍‌ତାନ୍‌ ଏମେ ୱିଜୁ ରାସାତାମାନାତ୍, ଆୟା ଇସାପ୍‍ତାନ୍ ୱାରି ବିସାର୍‍ଆତାତ୍‌ । 13 ଆୟା ବେଡ଼ାଦୁ ସାମୁଦୁର୍ ଲୋଇ ସାତିମାନି ଲୋକୁ ନିଙ୍ଗିଁଜି ୱାତାର୍‌ । ସାତିଗୁଟାଦୁ ମାନି ଲୋକୁ ବା ସୋସି ୱାତାର୍ । ୱାର୍‌ ୱିଜେରେ ନିଜେ ନିଜେଦି ପାଣିକିତି ଇସାପ୍‍ତାନ୍ ବିଚାର୍‌ ଆତାର୍‌ । 14 ତାନିୱେନ୍‌କା ସାନିକା ମାରି ସାନିପାତାଲ୍‌ତି ଆୟା ସିସୁଦି ସାମ୍‌ଦୁର୍‌ତୁ ପୋକ୍‌ତାର୍‌ । ଇୟା ସିସୁଦି ସାମ୍‌ଦୁର୍‌ ଆଜିନାତ୍, ରୁଣ୍ତି ଦେବେଙ୍ଗ୍‌ ସାନିକା । 15 ଆମାୱାରିନ୍ଦି ଦରୁ ଜିବନ୍‌ ପୁସ୍ତକଦୁ ରାସାଏତ୍‌ ମାର୍ହାତ୍‌, ୱାନ୍‌ ବା ୱିଜେରେ ସିସୁଦି ସାମ୍‌ଦୁର୍‌ତୁ ପୋକାଇ ଆତାର୍‌ ।