1 ପାଉଲ ଦର୍ବି ନି ଲୁସ୍ତ୍ରାଦୁ ସର୍ହାର୍‍ । ଆବେ ତିମତି ଦର୍‌ତି ଅରେନ୍‌ କ୍ରିସ୍ଟିୟାନ୍‍ ବାସାଜି ମାର୍ହାନ୍‍ । ୱାନ୍‌ ଅରେନ୍‌ କ୍ରିସ୍ତ ବିସ୍‍ବାସି ଜିହୁଦି ଆଇମାଦି ମାରିସି । ମାତର୍‌ ୱାନି ବୁବାସି ଅରେନ୍‌ ଗ୍ରିକ୍‌ ଲୋକୁ ମାର୍ହାନ୍‍ । 2 ଲୁସ୍ତ୍ରା ନି ଇକନିୟାଦୁ ମାନି ତଡ଼ାନ୍‌କା ଲୋଇ ତିମତିଦିଙ୍ଗ୍‌ ନେଗି ଲୋକ୍‌ ଇଜି ନେସ୍‌ତା ମାର୍‌ର୍ହାର୍‌ । 3 ପାଉଲ ୱାନି ୱାଲେ ତିମତିଙ୍ଗ୍‍ଁ ଅତେଙ୍ଗ୍‍ଁ ଇଜି ବଦା କିତାନ୍‌, ଆଦେଙ୍ଗ୍‍ଁ ୱାନିଙ୍ଗ୍‍ଁ ସୁନ୍ନତ କିତାନ୍‌ । ଇକା କିନି ମାଟା ଆତାତ୍‌, ତିମତିଦି ବୁବାସି ଗ୍ରିକ୍‌ ଲୋକୁ ଇଜି ଆୟା ବାଡିଆଙ୍ଗ୍‍ଁ ବାସାତିମାନିକାର୍‍ ଜିହୁଦି ଲୋକୁ ନେସ୍‍ତାମାର୍ହାର୍‍ । 4 ନାଣ୍ତ ଗାଡ୍‌କୁ ନାଡ଼୍‍ମି ସିଜି ସନି ୱାଲେ ୱାର୍‌ ବିସ୍‍ବାସିରିଙ୍ଗ୍‍ଁ ଜିରୁସାଲାମ୍‌ତି ପ୍ରେରିତ ସିସୁର୍‍ ନି ପେରି ନେତାର୍‍ ୱାରି ମାଣାନ୍‌ କିଆୟ୍‍ଆତି ନିତି ନିୟମ ୱିଜୁ ବୁଜାକିଜି, ଆୟାୱିଜୁ ମାନାଦେଙ୍ଗ୍‌ ଇଜି ଇଜିମାର୍ହାର୍‍ । 5 ଆବେଟ୍‌କୁ ମଣ୍ତଲିଙ୍ଗ୍‍ଁ ୱିଜୁ ବିସ୍‌ବାସ୍‌ତୁ ମାରି ନାଣ୍ତ ସାକ୍ତି ଆତାତ୍‌ ମାରି ଦିନ୍‍ତିଙ୍ଗ୍‍ ଦିନ୍‌ ଲୋକୁ ନାଣ୍ତ ଆଦେଙ୍ଗ୍‍ଁ ଆସ୍‌ତାର୍‌ ।

6 ପବିତ୍ର ଆତ୍ମା ୱାରିଙ୍ଗ୍‍ଁ ଆସିଆ ଦେସ୍‌ତୁ ପ୍ରଚାର୍‌ କିଦେଙ୍ଗ୍‍ଁ ସାରି ପୟ୍‍ଏତାର୍‍ ଆକା ୱାର୍‌ ପ୍ରୁଗିଆ ମାରି ଗାଲାତିୟ ରାଜିଦୁ ସର୍ହାର୍‍ । 7 ମିସିଆଦି ଲାକ୍‌ତୁ ଇଜି ବିତୁନିଆ ରାଜିଦୁ ସନ୍‍ଡ୍ରେଙ୍ଗ୍‍ଁ ସନିୱାଲେ ଜିସୁଦି ଆତ୍ମା ୱାରିଙ୍ଗ୍‍ଁ ସାରି ସିଏତାତ୍‍ । 8 ଆଦେଙ୍ଗ୍‍ଁ ୱାର୍‌ ମିସିଆ ନାଡ଼୍‍ମି ସିଜି ସଲ୍‍ସି ତ୍ରୋୟାଦୁ ସର୍ହାର୍‍ । 9 ଆୟା ନାଡ଼ା ପାଉଲ ଉନ୍‍ଣ୍ତ୍ରି ଦର୍ସନ୍‍ ପୟ୍‌ତାନ୍‌ ଜେ, ମାସିଦୋନିଆଦି ଅରେନ୍‌ ଲୋକୁ ମାଡ଼ିସ୍‌ କିଜି ଇଜିନାନ୍‌, "ମାସିଦୋନିଆଦୁ ୱାଜି ମାଙ୍ଗିଁ ସାକା କିଆ !" 10 ପାଉଲ ଇୟା ଦର୍ସନ୍‌ ପୟ୍‍ତିଦାପ୍ରେ ମାସିଦନିଆଦୁ ସନ୍‍ଡ୍ରେଙ୍ଗ୍‍ଁ ଇଜି ମାପ୍‌ ତିଆର୍‌ ଆତାପ୍‍, ଇରିଙ୍ଗ୍‍ଁ ମାପ୍‌ ସତେ ନେସ୍‍ତାପ୍‍, ମାପୁରୁ ଆବେଣି ଲୋକା ଲୋଇ ସୁସମାଚାର୍‌ ପ୍ରଚାର୍‌ କିଦେଙ୍ଗ୍‍ଁ ଇଜି ମାଙ୍ଗିଁ କୁକ୍‌ତାମାନାନ୍‌ ।

11 ମାପ୍‌ ଜାହାଜ୍‍ତାନ୍‍ ତ୍ରୋୟା ଡ଼ିସ୍‌ସି ସାମତ୍ରାଦୁ ସର୍ହାପ୍‍ ମାରି ମାରିନାଣ୍ତିଙ୍ଗ୍‍ଁ ନିଆପଲିଦୁ ଇତାପ୍‍ । 12 ଆବେଟ୍‍ଟାନ୍‍ ମାପ୍‌ ମାସିଦନିଆ ଜିଲାଦି ପେରି ଗାଡ଼୍‌ ପିଲିପିଦୁ ସର୍ହାପ୍‍ । ଇୟା ଗାଡ଼୍‌ ଉନ୍‍ଣ୍ତ୍ରି ରୋମିୟରି ବସ୍ତି ମାର୍ହାତ୍‌ । ମାପ୍‌ ଆବେନୁ ନାଣ୍ତ ଦିନ୍‌ ତେବାତାପ୍‍ । 13 ରମ୍‌ନି ଦିନ୍‌ ଗାଡ଼୍‌ ଆତ୍ରେ ମାନି ଗାଡା ପାଡ଼ି ସର୍ହାପ୍‍ । ମାପ୍‌ ଅଡ଼୍‍ବିତାପ୍‍, ଆବେ ଜିହୁଦିଲୋକୁ ଉଣ୍ତାଜି ପାର୍‌ତାନା କିଦେଙ୍ଗ୍‍ଁ ଇଜି ଉନ୍‍ଣ୍ତ୍ରି ବାଡି ତେବାନାତ୍‍ । ମାପ୍‌ ବାସ୍‍ତାପ୍‍ ମାରି ଆବେ ଉନ୍‍ଣ୍ତାତି ମାର୍ହି ଆଇମା ଲୋକା ୱାଲେ ୱାର୍‍ଗିତାପ୍‍ । 14 ତାମେ ଲୋଇ ତୁୟତିରା ଗାଡ଼୍‌ତି ସେର୍‍ଗା ରଙ୍ଗ୍‍ ୱାତିଗଦା ପର୍‌ଜି ମାନି ଲୁଦିଆ ଦର୍‌ତି ଅରେତ୍‌ ଆଇମା ମାର୍ହାତ୍‌ । ୱାଦ୍‌ ମାପୁରୁଦି ଉପାସନା କିଜିମାର୍ହାତ୍‍ ମାରି ପାଉଲ ଆମାକା ଇଜିମାର୍‍ଆନ୍‍, ଆକା ମନ୍‍ ସିଜି ୱେନ୍‌ଜି ମାନାଦେଙ୍ଗ୍‍ଁ ଇଜି ପ୍ରବୁ ତାନିଙ୍ଗ୍‍ଁ ସୁଜୋଗ ସିତାନ୍‌ । 15 ୱାଦ୍‌ ନି ତାନି ଇଲ୍‍ତି ୱିଜେରେ ଡୁବନ୍‌ ଅତି ୱେନ୍‌କା ମାଙ୍ଗିଁ ମାଡ଼ିସ୍‌ କିଜି ଇର୍ହାତ୍‌, "ପ୍ରବୁମାନୁ ସତ୍‍ତାନ୍‍ ନା ବିସ୍‌ବାସ୍‌ ମାନାତ୍‌ ଇଜି ଜଦି ମିର୍‌ ଅଡ଼ବିଜିନିଦେର୍‌, ଆର୍‍ତିଙ୍ଗ୍‍ଁ ୱାଜି ନା ଇଲ୍‌ତୁ ତେବାଦୁ ।" ୱାଦ୍‌ ଇୟାୱାଜା ତାନି ଇଲ୍‌ତୁ ସନ୍‍ଡ୍ରେଙ୍ଗ୍‍ଁ ଇଜି ମାଙ୍ଗିଁ ୱେର୍‌ତାତ୍‍ ।

16 ଅର୍‍ଲେନ୍‍ ମାପ୍‌ ପାର୍‌ତାନା ବାଡିଦୁ ସନିୱାଲେ ଅରେତ୍‌ ଦାସି ରିପାଦିଙ୍ଗ୍‍ଁ ବୁଡ଼ିତାପ୍‍ । ତାନି ଲୋଇ ମାନି ତାଗ୍‌ଇ ଆତ୍ମାଦି ସାକ୍ତିଦାନ୍ ୱାଦ୍‍ ବବିସତ୍‍ ମାଟା ଇନ୍‍ଡ୍ରେଙ୍ଗ୍‍ଁ ଆଟ୍‍ସି ମାର୍ହାତ୍‌ । ୱାଦ୍‌ ଲୋକା ବାଗ୍ୟ ଲେକିସ୍‌ କିଜି, ମାଲିକ୍‌କା ଉଣ୍ତିଙ୍ଗ୍‍ଁ ନାଣ୍ତ ଡାବୁଙ୍ଗୁଁ ଉଣ୍ତା କିଜିମାର୍ହାତ୍‍ । 17 ୱାଦ୍‌ ପାଉଲ ନି ମା ୱେନ୍‌କା ୱେନ୍‌କା ୱାଜି ଆଉଲି ଆଜି ଇର୍ହାତ୍‌, "ଇୟା ଲୋକୁ ୱିଜେରିଙ୍ଗ୍‍ଁ ପେରି ମାପୁରୁଦି ସେବାକିନିକାର୍‍ । ମିର୍‌ ଏଣ୍ତେସ୍‌ ପରିତ୍ରାଣ ପୟ୍‌ନିଦେର୍‌, ଇୟା ମାଟା ୱାର୍‌ ଇଜିନାର୍‍ !" 18 ରିପା ଆଇଲି ବେସି ଦିନ୍‌ ଆସ୍‌ସି ଇୟାୱାଜା କିତାତ୍‍ । ସାରାସାରି ପାଉଲ ରିସା ଆଜି ୱେନ୍‌କା ମାର୍‍ଜି ତାଗ୍‌ଇ ଆତ୍ମାଦିଙ୍ଗ୍‍ଁ ଆଦ୍‌ରିସି ଇର୍ହାନ୍‌, "ଜିସୁ କ୍ରିସ୍ତଦି ଦର୍‌ତାନ୍‌ ଆଦେସ୍‌ ସିଜିନା, ତାନି ମାଣାନ୍‌ ସହସ ସାଙ୍ଗ୍ଆ !" ଆୟା ଦାପ୍ରେ ତାଗ୍‌ଇ ଆତ୍ମା ତାନି ମାଣାନ୍‌ ସତା ସର୍ହାତ୍‍ । 19 ଏସ୍ତିୱାଲେ ତାନି ମାଲିକ୍‍କୁ ନିଜେଦି ଡାବୁଙ୍ଗୁଁ ଉଣ୍ତାକିନିକା ଆରାତାପ୍‌ ଇଜି ନେସ୍‍ସି, ପାଉଲ ନି ସିଲେଙ୍ଗ୍‍ଁ ଆସ୍‌ସି ଗାଡ଼୍‌ତି ମଜାୟ୍‍ ନାଡ଼୍‍ମିବାଡିଦୁ ମାନି ରମିୟ ନେତାର୍‌ଦି ଲାକ୍‌ତୁ ରେଲ୍‌ଜି ତାତାର୍‌ । 20 ମାରି, ୱାର୍‌ ୱାରିଙ୍ଗ୍‍ଁ ରମିୟ ସାସନ୍‍କିନିୱାରି ଲାକ୍‌ତୁ ତାସି ଇର୍ହାର୍‌, "ଇୟା ଲୋକୁ ଜିହୁଦିର୍‌, ଇୟାକାର୍‌ ମା ଗାଡ଼୍‌ତୁ ଜାଟିଜଗଡ଼ା କିଜିନାର୍‍ । 21 ୱାର୍‌ ମା ନିୟମ୍‌ ବିରୁଦ୍‍ତି ରିତିନିତି ଅଜାକିଜିନାର୍‍ । ମାଡ୍‌ ରମିୟ ଲୋକୁ, ଆଦେଙ୍ଗ୍‍ଁ ଇୟାୱିଜୁ ରିତିନିତି ଆସ୍‍ତେଙ୍ଗ୍‍ଁ ଆଟ୍‍ଏପ୍‍ ।" 22 ମାଲିକ୍‌କା ମାଟାଦୁ ଆସ୍‌ସି ଆବେ ମାନି ଲୋକୁ ପାଉଲ ନି ସିଲାଦି ବିରଦ୍‌ତାନ୍‌ ନିଙ୍ଗିଁତାର୍‍ ।

ପାଉଲ ନି ସିଲାଦି ଆଙ୍ଗିଁ କୁତ୍‍ସି ୱାରିଙ୍ଗ୍‍ଁ ବାଡିଗାଦାନ୍‍ ଡାକ୍‍ତେଙ୍ଗ୍‍ଁ ନେତା ଆଦେସ୍‌ ସିତାନ୍‌ । 23 ନାଣ୍ତ ମାଡ୍‌ ତିର୍‌ଇ ୱେନ୍‌କା ୱାର୍‌ ଜଇଲ୍‌ତୁ ସର୍ହାର୍‍ ମାରି ୱାରିଙ୍ଗ୍‍ଁ କୁସିକାଣ୍ତି ଆର୍‍ପ୍‍ସି କାପ୍‌କିଜି ଇଡ୍‍ଦେଙ୍ଗ୍‍ଁ ଇଜି କାପ୍‍କିନିୱାରିଙ୍ଗ୍‍ଁ ଆଦେସ୍‌ ସିଆୟ୍‍ ଆତାତ୍‌ । 24 ଇୟା ଆଦେସ୍‌ ପୟ୍‌ଜି କାପ୍‍କିନିକାନ୍‍ ୱାରିଙ୍ଗ୍‌ ଉନ୍‍ଣ୍ତ୍ରି ଲୋଇରି ବାକ୍‍ରାଦୁ ଇଡ୍‌ଜି, ବଜ୍‍ତି ମାରାନ୍‌ ଗଣ୍ତିଦୁ ୱାରି କାଲ୍‍କାଙ୍ଗ୍‍ଁ ତର୍‍ତା ଇଟ୍‌ତାନ୍‌ ।

25 ମଜାୟ୍‍ ନାଡ଼ା ପାଉଲ ନି ସିଲା ପାର୍‌ତନା କିଜିମାର୍ହାର୍‌, ମାପୁରୁଦି ଉଦେସ୍‍ତାନ୍‍ ପାଟା ପାର୍‍ଜି ମାର୍ହାର୍‌ ମାରି ଜଇଲ୍‌ତୁ ମାନି ଆଇକାର୍‌ ଇକା ୱେନ୍‌ଜି ମାର୍ହାର୍‌ । 26 ଆୟାଦାପ୍ରେନେ ନାଣ୍ତ ବୁମିକମ୍ଫ ଆତାତ୍‌ ମାରି ଜଇଲ୍‍ତି ମୁଲ୍‍କାଲ୍‍ତିଙ୍ଗ୍‍ଁ ଦୁକାତା ପକ୍‍ତାତ୍‍ । ବେଗି ବେଗି ୱିଜୁ ସେର୍‍ଲେଙ୍ଗ୍‌ ରେଆତେ ସର୍ହେ ମାରି ୱିଜୁ ଜଇଲ୍‌ତୁ ମାନିଲୋକା ସିକିଣିଙ୍ଗ୍‍ଁ ଆର୍‍ତେ ସର୍ହେ । 27 ଜଇଲ୍‍ତିଙ୍ଗ୍‍ଁ କାପ୍‍କିନିକାନ୍‍ ସେତାଆଜି ନିଙ୍ଗିଁତାନ୍‍ ମାରି ଜଇଲ୍‍ତି ସେର୍‍ଲେଙ୍ଗ୍‌ ୱିଜୁ ରେଆତିକା ସୁଡ଼୍‌ଜି ଅଡ଼୍‍ବିତାନ୍‍ ଜେ ଜଇଲ୍‍ତୁମାନିକାର୍‍ ଉର୍‍କୁତାମାନାର୍‍; ଆଦେଙ୍ଗ୍‍ଁ ୱାନ୍‌ ୱାନି କୁଡ଼ାମ୍‍ ସପ୍‍ସି କାତାଦେଙ୍ଗ୍‍ଁ ଇଜି ବଦା କିତାନ୍‌ । 28 ମାତର୍‌ ପାଉଲ ନାଣ୍ତ ଆଉଲିଦାନ୍‍ ଇର୍ହାନ୍‌, "ନିଜେଦିଙ୍ଗ୍‍ଁ ଇନି ନାଷ୍ଟୁ କିମା । ମାପ୍‌ ୱିଜେରେ ଇବେ ମାନାପ୍‍ ।"

29 ଜଇଲ୍‌ କାପ୍‍କିନିକାନ୍‍ ଦିୱା ତାପିସ୍‍କିତାନ୍‍ ମାରି ଲୋଇ ଉରୁକ୍‍ସି ୱାଜି ତିର୍‍ଗିଜି ତିର୍‍ଗିଜି ପାଉଲ ନି ସିଲାଦି କାଲ୍‍କା ଆଡ୍‍ଗି ଆର୍‍ତାନ୍‍ । 30 ୱେନ୍‌କା ୱାରିଙ୍ଗ୍‍ଁ ଆତ୍ରେ ଅସି ୱେନ୍‌ବାତାନ୍‌, "ଆଜ୍ଞାର୍‍, ରକିୟା ପୟ୍‍ଦେଙ୍ଗ୍‍ଁ ଇଜି ନାଙ୍ଗିଁ ଇନିକା କିଦେଙ୍ଗ୍‍ଁ ଆନାତ୍‌ ?"

31 ୱାର୍‌ ଇର୍ହାର୍‌, "ପ୍ରବୁ ଜିସୁମାନୁ ବିସ୍‌ବାସ୍‌ କିତିଙ୍ଗ୍‍ଁ, ନିନ୍‌ ମାରି ଇଲୁଦି ୱିଜୁ ଲୋକୁ ରକିୟା ପୟ୍‌ନିଦେର୍‌ ।" 32 ୱେନ୍‌କା ୱାର୍‌ ୱାନିଙ୍ଗ୍‍ଁ ନି ୱାନି ଇଲୁଦି ଆଇ ୱିଜେରିଙ୍ଗ୍‍ଁ ପ୍ରବୁଦି ବାକ୍ୟ ୱେର୍‌ତାର୍‌ । 33 ନାଡ଼ାଦି ଆୟା ସମୟ୍‍ତୁ ଜଇଲ୍‍ତିଙ୍ଗ୍‍ଁ କାପ୍‍କିନିକାନ୍‍ ୱାରିଙ୍ଗ୍‍ଁ ଅସି ୱାରି ଗାଉକୁ ୱିଜୁ ନର୍‍ତା ସିତାନ୍‌, ମାରି ୱାନ୍‌ ନି ଇଲ୍‍ତି ୱିଜେରେ ଆୟାଦାପ୍ରେ ଡୁବନ୍‌ ଅତାର୍‌ । 34 ତାନିୱେନ୍‍କା ୱାନ୍‌ ପାଉଲ ନି ସିଲେଙ୍ଗ୍‍ଁ ନିଜେଦି ଇଲ୍‌ତୁ ଅସି ଉଣ୍ତେଙ୍ଗ୍‍ଁ ସିତାନ୍‌ । ମାପୁରୁମାନୁ ବିସ୍‌ବାସ୍‌ କିତାର୍‍ଆକା ୱାନ୍‌ ନି ୱାନି ଇଲ୍‍ତି ୱିଜେରି ଜିବନ୍‌ ୱେଡ଼ିକାଦୁ ପୁରା ଆତାତ୍‌ ।

35 ମାରିନାଣ୍ତିଙ୍ଗ୍‍ଁ ସାଲ୍‍ଦି ରମିୟ ଅଦିକାରିର୍‍ ଜାମାନ୍‌କାଙ୍ଗ୍‍ଁ ଇୟା ଆଦେସ୍‌ ସିଜି ପକ୍‌ତାନ୍, "ଆୟା ଲୋକାଙ୍ଗ୍‌ ଡ଼ିସ୍‌ସୋ ସିଦୁ ।"

36 ଆବେଟ୍‌ ଜେଲ୍‌କାପ୍‍କିନିକାନ୍‍ ପାଉଲ୍‍ତିଙ୍ଗ୍‍ଁ ଇର୍ହାନ୍‌, "ଅଦିକାରିର୍‍ ନିଙ୍ଗିଁ ନି ସିଲେଙ୍ଗ୍‍ଁ ମୁକୁଡ଼ା କିଦେଙ୍ଗ୍‍ଁ ଇଜି ଆଦେସ୍‌ ପକ୍‍ତାମାନାନ୍‍ । ଇଲେଇ ମିର୍‌ ସାନ୍ତିଦାନ୍‌ ଇୟା ବାଡିଦାନ୍‍ ସନ୍‍ଡ୍ରେଙ୍ଗ୍‍ଁ ଆଟ୍‌ନିଦେର୍‌ ।"

37 ମାତର୍‌ ପାଉଲ ଜାମାନ୍‌କାଙ୍ଗ୍‍ଁ ଇର୍ହାନ୍‌, "ଇନି ନିନ୍ଦାଦୁ ଦସି ଆଏତିମାରିଙ୍ଗ୍‍ଁ ବା ୱାର୍‌ ଲୋକା ଆଗ୍‌ଡ଼ି ମାଙ୍ଗିଁ ଡାକ୍‍ତାର୍‍ । ମାପ୍‌ ରମିୟ ଲୋକୁ, ମାତର୍‌ ୱାର୍‌ ମାଙ୍ଗିଁ ଜଇଲ୍‌ତୁ ଇଟ୍‌ତାର୍‌ । ଇଲେଇ ୱାର୍‌ ମାଙ୍ଗିଁ ନେସ୍‌ଇୱାଜା ଡ଼ିସ୍‌ସୋ ସିଦେଙ୍ଗ୍‌ ବଦା କିଜିନାର୍‍ । ମାପ୍‌ ଇକା କିଦେଙ୍ଗ୍‍ଁ ସିଏପ୍‍ । ରମିୟ ଅଦିକାରିର୍‍ ନିଜେ ଇବେ ୱାଜି ମାଙ୍ଗିଁ ମୁକୁଡ଼ା କିପିର୍‍ ।" 38 ଜାମାନ୍‌କୁ ରମିୟ ଅଦିକାରିଙ୍ଗ୍‍ଁ ଇୟା ମାଟା ୱେର୍‌ତାର୍‌ । ପାଉଲ ନି ସିଲା ରମିୟ ଲୋକୁ ଇଜି ୱେନ୍‌ଜି ୱାର୍‌ ତିଲାତା ସର୍ହାର୍‍ । 39 ୱେନ୍‌କା ସଲ୍‍ସି ୱାରି ଲାକ୍‌ତୁ କେମା ଲୋସ୍‍ତାର୍‍ ମାରି ୱାରିଙ୍ଗ୍‍ଁ ଜଇଲ୍‍ତାନ୍‍ ମୁକୁଡ଼ା କିଜି ଗାଡ଼୍‌ ଡ଼ିସ୍‌ସି ସନ୍‍ଡ୍ରେଙ୍ଗ୍‍ଁ ମାଡ଼ିସ୍‌ କିତାର୍‍ । 40 ପାଉଲ ନି ସିଲା ଜଇଲି ଡ଼ିସ୍‌ସି ଲୁଦିଆଦି ଇଲ୍‌ତୁ ସର୍ହାର୍‍ । ଆବେ ୱାର୍‌ ବିସ୍‍ବାସ୍‌ତି ତଡ଼ାନ୍‌କାଙ୍ଗ୍‌ ବେଟ୍‍ ଆତାର୍‌ ମାରି ୱାରିଙ୍ଗ୍‍ଁ ୱେଡ଼ିକା ମାଟା କିବିସ୍‍ କିଜି ଆୟା ବାଡି ଡ଼ିସ୍‌ସି ସର୍ହାର୍‍ ।