ପ୍ରେରିତ 25

ସମ୍ରାଟତି ଲାକ୍‌ତୁ ପାଉଲ୍‍ତି ଦାବି

1 ପେସ୍ଟସ୍‍ ଇୟା ରାଜିଦୁ ଇନି ମୁନେଟି ୱେନ୍‌କା କାଇସରିଆଦାନ୍‍ ଜିରୁସାଲାମ୍‍ତୁ ସର୍ହାନ୍‍ । 2 ଆବେଟାନ୍‍ ପେରିଜାଜକ୍‌ ନି ଜିହୁଦି ନେତାର୍‌ ମାରିଡ଼େସି ପାଉଲ୍‍ତି ବିରଦ୍‌ତାନ୍‌ ଦାବି କିତାର୍‍ । 3 ପାଉଲ୍‍ତିଙ୍ଗ୍‍ଁ ଜିରୁସାଲାମ୍‍ତୁ ତାସି ୱାରିଙ୍ଗ୍‍ଁ ୱେଡ଼ିକାକିବିସ୍‍ କିଦେଙ୍ଗ୍‍ ଇଜି ୱାର୍‌ ପେସ୍ଟସ୍‍ତିଙ୍ଗ୍‍ଁ ମାଡ଼ିସ୍‌ କିତାର୍‍, ଇରିଙ୍ଗ୍‍ଁ ୱାର୍‌ ପାଉଲ୍‍ତିଙ୍ଗ୍‍ଁ ସାରିଦୁ ଡାକ୍‍ତେଙ୍ଗ୍‍ଁ ଇଜି ଉପାୟ୍‌ ତିଆର୍‌ କିତାମାର୍ହାର୍‍ । 4 ପେସ୍ଟସ୍‍ ଇର୍ହାନ୍‌, "ପାଉଲ୍‍ତିଙ୍ଗ୍‍ଁ ଉନ୍‌ଡ୍ରି ତରାୟ୍‍ଆତି ୱାଜା କାଇସରିଆଦୁ ଇଟାୟ୍‍ଆତାମାନାନ୍‍ ମାରି ବେଗି ନାନ୍ ନିଜେ ଆବେ ଡ଼େସି ସନା । 5 ଜଦି ୱାନ୍‌ ଇନି ଦସ୍‌ କିତାମାନାନ୍‍, ଆର୍‍ତିଙ୍ଗ୍‍ଁ ମି ନେତାର୍‌ ନା ୱାଲେ କାଇସରିଆଦୁ ସଲିର୍‌ ମାରି ତାନି ବିରଦ୍‌ତାନ୍‌ ୱାରି ଦାବି ୱେର୍‍ତୁ ।"

6 ପେସ୍ଟସ୍‍ ୱାରି ୱାଲେ ଆଟ୍ ଦସ୍‌ ଦିନ୍‌ତାନ୍‌ ନାଣ୍ତ ତେବାଜି କାଇସରିଆଦୁ ଡ଼େସି ୱାତାନ୍‌ । ମାର୍‍ନାଣ୍ତିଙ୍ଗ୍‍ଁ ୱାନ୍‌ ବିଚାର୍‍କିନିମାନୁ ବାସ୍‌ସି ପାଉଲ୍‍ତିଙ୍ଗ୍‍ଁ ତାତେଙ୍ଗ୍‍ଁ ଇଜି ଆଦେସ୍‌ ସିତାନ୍‌ । 7 ପାଉଲ ୱାତିଦାପ୍ରେ ଜିରୁସାଲାମ୍‌ତି ଜିହୁଦିଲୋକୁ ୱାନି ସାରିବେଡ଼୍‍ତି କେର୍‍ବ୍‍ଜି ନିର୍ହାର୍‍ ମାରି ୱାନି ବିରଦ୍‌ତାନ୍‌ ନାଣ୍ତ ଗୁରୁତ୍‍ଦାନ୍‍ ଦାବି କିତାର୍‍ । ମାତର୍‌ ୱାର୍‌ ଇୟାୱିଜୁ ପାର୍‍ମାଣ୍‍ତିଙ୍ଗ୍‍ଁ ସାସ୍‌ କିଏତାର୍‌ । 8 ଇରିଙ୍ଗ୍‌ ପାଉଲ ନିଜେଦି ମୋନ୍‌ତିଙ୍ଗ୍‌ ସିଜି ଇର୍ହାନ୍‌, "ଜିହୁଦିରି ନିୟମ୍‌ ବିରୁଦ୍‌ତାନ୍ ସିଲେ କି ମନ୍ଦିର୍‌ ବିରୁଦ୍‌ଦାନ୍‌ ସିଲେ କି ରୋମିୟ ସମ୍ରାଟ୍, ଏ ବିରୁଦ୍‌ତାନ୍ ନାନୁ ଇନିକା ଦସ୍‌ କିଏ ।"

9 ମାତର୍‌ ଫେଷ୍ଟସ୍‌ ଜିହୁଦିରି ୱେଡ଼ିକାଦିକାନ୍‌ ଆଦେଙ୍ଗ୍‍ଁ ଇଛା କିଜି ପାଉଲତିଙ୍ଗ୍‌ ୱେନ୍‍ବାତାନ୍‌, "ଜିରୁସାଲାମ୍‌ତୁ ସନି ଉଣ୍ତିଙ୍ଗ୍‌ ମାରି ଆବେନୁ ନା ଆଗ୍‌ଡ଼ି ଇୟାୱିଜୁ ଦୋସ୍‌ଦୁ ବିସାର୍‌ ଆଦେଙ୍ଗ୍‌ ନିନୁ ଇନିକା ରାଜି ଆନି ?"

10 ପାଉଲ ଇର୍ହାନ୍‌, "ନାନୁ କାଇସର୍‍ଦି ବିଚାର୍‌ କିନି ଆଗ୍‌ଡ଼ି ନିର୍ହାମାନା । ଇବେନୁନେ ନା ବିଚାର୍‍ ଆନିକା ମାନାତ୍ । ନିନୁ ନିଜେ ନେଗେନ୍‌ତାନ୍ ନେସ୍‌ତିମାନି ଜେ, ନାନୁ ଜିହୁଦିରି ବିରୁଦ୍‌ତାନ୍ ଇନିକା ଜାଟି କିଏ । 11 ଜଦି ନାନୁ ଅନ୍ୟାୟ୍‌ପାଣି କିତିମାରିଙ୍ଗ୍‌ ସାନିଦଣ୍ତ ପୋଇନା ଏମେ ପାଣିକିତାମାନା, ଆବେନୁ ଦଣ୍ତ୍‌ ପୋଇଦେଙ୍ଗ୍ ନାନୁ ଇଚ୍ଛା କିଏ । ମାତର ୱାର୍ ନା ବିରୁଦ୍‌ତାନ୍ ତାତିମାନି ଦୋସ୍‌ୱିଜୁ ଜଦି ଇନିକା ସତ୍ ସିଲେତ୍‌, ଆର୍‌ତିଙ୍ଗ୍‌ ଏନ୍‌ ନାଙ୍ଗି ୱାରି କିୟୁଦାନ୍‌ ଡ଼ିସିସ୍‍ କିଦେଙ୍ଗ୍ କାଇସର୍‍ଦିମାନୁ ନାନୁ ଇୟା ଅନୁରୋଦ କିତାମାନା ।"

12 ତାନି ୱେନ୍‌କା ପେସ୍ଟସ୍‍ ୱାରି ନେତାରିୱାଲେ ୱାରିଙ୍ଗ୍‌ ୱେର୍‌ତାନ୍‌, "ନିନୁ କାଇସର୍‌ଦିମାନୁ ଅନୁରୋଦ କିତିମାନି, ଆଦେଙ୍ଗ୍‍ଁ ନିନୁ କାଇସର୍‍ଦି ଲାକୁତୁ ସନି ।"

ଆଗ୍ରିପା ନି ବର୍ଣ୍ଣିସ୍‌ତି ଆଗ୍‌ଡ଼ି ପାଉଲ

13 ଏସଦିନ୍ ୱେନେକା ରାଜା ଆଗ୍ରିପା ମାରି ବର୍ଣ୍ଣିସ୍ ପେସ୍ଟସ୍‍ଦିଙ୍ଗ୍‌ ମିସାନି ଉଣ୍ତିଙ୍ଗ୍‌ କାଇସରିଆ ଗାଡ଼୍‌ତୁ ୱାତାର୍ । 14 ଆବେନୁ ୱାର୍‌ ଏସଦିନ୍ ତେବାତି ୱେନ୍‌କା ପେସ୍ଟସ୍‍ ରାଜାଦିଙ୍ଗ୍‌ ପାଉଲଦି ବିଷୟ ୱେରିସି ଇର୍ହାନ୍‌, "ପେଲିକସ୍‍ ଜଇଲ୍‌ତୁ ଇଟିତି ମାନି ଅରେନ୍ ଲୋକ ଇବେନୁ ମାନାନ୍ । 15 ନାନୁ ଏସ୍ତିୱାଲେ ଜିରୁସାଲାମ୍‌ତୁ ସର୍‌ଆ ମାର୍ହା, ଜିହୁଦି ପେରି ଜାଜକ ମାରି ଦାର୍ମୁ ନେତାର୍‍ ୱାନି ବିରୁଦ୍‌ତାନ୍ ଏସ ଦୋସକୁ ତାତାର୍ ମାରି ନାଙ୍ଗିଁ ୱାନିଙ୍ଗ୍‌ ଦୋସ୍‌ କିବିସ୍‌ କିଦେଙ୍ଗ୍ ଇର୍ହାର୍‌ । 16 ମାତର ନାନୁ ୱାରିଙ୍ଗ୍ ୱେର୍‌ତା ଜେ, ଅରେନ୍ ଦୋସିଙ୍ଗ୍ ବିସାର୍ କିନିବାଡିଦୁ ୱାନି ଦୋସ୍‌ଆସ୍‌ତିୱାରି ଆଗ୍‌ଡ଼ି ନିଜେଦିଙ୍ଗ୍‌ ସର୍‌ପେ କିନି ଉଣ୍ତିଙ୍ଗ୍‌ ସୁଜୋଗ ସିନି ଆଗ୍‌ଡ଼ି ୱାନିଙ୍ଗ୍ ‌ଦାଇ କିବିସ୍‌ କିଦେଙ୍ଗ୍ ମା ରୋମିୟରି ନିୟମ୍‌ ସିଲେତ୍‌ । 17 ୱାର୍ ଇବେନୁ ୱାନି ୱେନ୍‌କା ନାନୁ ୱେଡ଼ା କିଏଣ୍ତା ମାର୍‌ନାଣ୍ତିଙ୍ଗ୍‌ ବିଚାର୍‍କିନି ବାଡିଦୁ ବାସ୍‌ତା ମାରି ଆୟାୱାନିଙ୍ଗ୍‌ ଲୋଇ ତାତେଙ୍ଗ୍‌ ଇଜି ଆଦେସ୍ ସିତା । 18 ୱାନି ବିରୁଦ୍‌କିନି ଲୋକୁ ୱାନି ବିରୁଦ୍‌ତାନ୍ ଇନ୍‌ଡ୍ରେଙ୍ଗ୍‌ ନିର୍ହାର୍‌, ମାତର୍‌ ୱାର୍ ଏମେନାନି ଦୋସ ତାନାର୍ ଇଜି ନାନୁ ଅଡ଼୍‌ବିତା ମାର୍‌ଆ, ଆକା ୱାର୍ କିଦେଙ୍ଗ୍ ଆଟ୍‍ଏତାର୍ । 19 ୱାର୍ କେବଲ ନିଜେଦି ଦର୍ମ ବିସୟ୍‌ତିଙ୍ଗ୍ ମାରି ଜିସୁ ଦର୍‌ତି ଆମା ସାତି ଲୋକ୍‌ତିଙ୍ଗ୍‌ ପାଉଲ ଜିତିକାନ୍ ଇଜି ଦାବି କିଜିନାନ୍, ୱାନି ବିସୟ୍‌ ଅସି ଆସ୍‌ସିସାତାର୍‌ । 20 ଇୟାୱିଜୁ ବିସୟ୍‌ ମାରି ନେଗେନ୍‌ତାନ୍‌ ନେସିନି ଉଣ୍ତିଙ୍ଗ୍ ଇନିକା କିଦେଙ୍ଗ୍ ଆନାତ୍, ଇନିକା ତିର୍‌ କିଦେଙ୍ଗ୍ ଆଟ୍ଏଜି ଇୟା ଦୋସ୍‌ତୁ ବିଚାର୍ ଆନିଉଣ୍ତିଙ୍ଗ୍ ପାଉଲ ଜିରୁସାଲମ୍‌ତୁ ସୋନାନ୍‌ନୋ ଇଜି ନାନୁ ୱାନିଙ୍ଗ୍ ୱେନ୍‍ବାତା । 21 ମାତର ପାଉଲ, ନିଜେ କାଇସର ୱାନି ମାଟା ପୁରା କିପିନ୍ ଇଜି ୱେର୍‌ସି କାପ୍‌କିନିୱାରି ମାଣାନ୍ ସୁରକ୍ଷିତ ଆନି ଉଣ୍ତିଙ୍ଗ୍‌ ଅଡ଼୍‌ବିତାନ୍‌ । ଆଦେଙ୍ଗ୍‍ଁ କାଇସର୍‍ଦି ଲାକ୍‌ତୁ ପୋକ୍‌ନି ସାନ୍ଦି ୱାନିଙ୍ଗ୍ ବନ୍ଦି କିଜି ଇଡିନି ଉଣ୍ତିଙ୍ଗ୍ ନାନ୍‌ ଆଦେସ୍‌ ସିତାମାନା ।" 22 ଆଗ୍ରିପା ପେସ୍ଟସ୍‌ତିଙ୍ଗ୍‌ ଇର୍ହାନ୍‌, "ନାନ୍‌ ନିଜେ ଇୟା ଲୋକ୍‌ତି ମାଟା ୱେନ୍‌ଡ୍ରେଙ୍ଗ୍‌ ବଦା କିଜିନା ।" ପେସ୍ଟସ୍‍ ଇର୍ହାନ୍‌, "ୱିଗେରିଙ୍ଗ୍‌ ନିନ୍‌ ୱାନି ମାଟା ୱେନି ।" 23 ମାରିଉନ୍‌ଡ୍ରି ଦିନ୍‌ତୁ ଆଗ୍ରିପା ମାରି ବର୍ଣ୍ଣିସ୍ ସୌନ୍ୟରି ଦଲ୍‌ତି ପେରିକାନ୍‌ ମାରି ଗାଡ଼୍‌ତି ପେରି ଲୋକା ୱାଲେ ନାଣ୍ତ ୱେଡ଼ିକାଦାନ୍‌ ୱାଜି ବିଚାର୍‌କିନି ବାଡିଦୁ ଡ଼ୁଗିତାର୍‌ । ପେସ୍ଟସ୍‍ଦି ଆଦେସ୍‍ତାନ୍ ପାଉଲତିଙ୍ଗ୍‌ ଲୋଇ ତାତାର୍ । 24 ପେସ୍ଟସ୍‍ ଇର୍ହାନ୍‌, "ରାଜା ଆଗ୍ରିପା ମାରି ଆବେନୁ ମାର୍‌ଇ ପେରିମଣ୍ତଲି, ମିରୁ ଇୟା ଆମା ଲୋକ୍‌ତିଙ୍ଗ୍‌ ସୁଡ଼ୁଜିନିଦେର୍‌, ୱାନି ବିରୁଦ୍‌ତାନ୍‌ ଇବେଣିକାର୍‌ ମାରି ଜିରୁସାଲମ୍‌ତୁ ମାନି ଜିହୁଦିର୍‌ ନା ଲାକ୍‌ତୁ ୱେର୍‌ତା ମାନାର୍‌ । ୱାର୍‌ ୱାନି ଜିନି ମାନିକା ଟିକ୍‍ ସିଲେଜି ଦାବି କିଜି ଆଉଲି ଆଜିନାର୍‌ । 25 ମାତର୍‌ ୱାନ୍‌ ସାନିଦଣ୍ତ ପୟ୍‌ନି ନାନିକା କିତିମାନି ଇନି ଦସ୍‌ ନାନ୍‌ ସୁଡ଼ୁଏ । ୱାନ୍‌ ନିଜେ କାଇସରତିଙ୍ଗ୍‌ ୱେର୍‌ତି ମାନିଙ୍ଗ୍‌, ନାନ୍‌ ୱାନିଙ୍ଗ୍‌ ଆବେନୁ ପୋକ୍‌ତେଙ୍ଗ୍‌ ଇଜି ବଦା କିତାମାନା । 26 ମାତର୍‌ ୱାନି ବିସୟ୍‌ତାନ୍‌ ନେସ୍‌ନିୱାଜା କାଇସରତିଙ୍ଗ୍‌ ରାସ୍‌ତେଙ୍ଗ୍‌ ଇଜି ନାନ୍ଦି ଇନିକା ସିଲେତ୍‌ । ଆଦେଙ୍ଗ୍‌ ନାନ୍‌ ୱାନିଙ୍ଗ୍‌ ମି ଆଗ୍‌ଡ଼ି ମାରି ରାଜା ଆଗ୍ରିପା, ମି ଆଗ୍‌ଡ଼ି ତାତାମାନାନ୍‌, ଏଣ୍ତେସ୍‌ ୱାନି ବିସୟ୍‌ ନେଗେନ୍‌ତାନ୍‌ ୱେନ୍‌ବାତି ୱେନ୍‌କାନେ ନାନ୍‌ ଇନିକା ରାସ୍‌ତେଙ୍ଗ୍‌ ଆଟ୍‌ନା । 27 ଇରିଙ୍ଗ୍‌ ଅରେନ୍‌ ଜଇଲ୍‌ତୁମାନି ବିରୁଦ୍‌ତାନ୍‌ ମାନି ମାଟେଙ୍ଗ୍‌ୱିଜୁ ପୁରାନେଗେନ୍‌ତାନ୍‌ ବୁଜାଏଣ୍‌ଗା ୱାନିଙ୍ଗ୍‌ କାଇସରତି ଲାକ୍‌ତୁ ପୋକ୍‌ନିକା ଟିକ୍‌ ସିଲେ ଇଜି ନାନ୍ ଅଡ଼୍‌ବିଜିନା ।"