ରୋମତୁ ପାଉଲ ଏର୍ଜାହାଜ୍ତୁ ସନିକା
1 ମାପୁ ଇଟାଲିଦୁ ସନାଟ୍ ଇଜି ତିଆର୍ ଆତାମାର୍ହାପ୍, ନାସ୍ତିୱାଲେ ପାଉଲ ମାରି ଆଇ ଏସଲୋକ୍ ଜଇଲ୍ତୁ ମାର୍ଇକାର୍ "କାଇସର ସନ୍ୟଦଲ୍" ଦର୍ତି ଉନ୍ଡ୍ରି ରୋମିୟ ସନ୍ୟ ଦଲ୍ତି ସେନାପତି ଯୁଲିୟସଦି କିୟୁଦୁ ସର୍ପେ ଆତାର୍ । 2 ମାପୁ ଆସିଆ ଦେସ୍ତି ସାମୁଦୁର୍ତିପାଡ଼ିଦୁ ମାନି ବାଡିଆଙ୍ଗାଁ ସନି ଉଣ୍ତିଙ୍ଗ୍ ତିଆର୍ଆତିମାନି ଉନ୍ଡ୍ରି ଆଦ୍ରାମୁତ୍ତୀୟ ଉନ୍ଡ୍ରି ଏରୁଜାହାଜ୍ତୁ ଏକ୍ତାପ୍ । ଆରିସ୍ଟାର୍କସ୍ ଦର୍ତି ତେସଲନିକିଆ ଗାଡ଼୍ତି ଅରେନ୍ ମାସିଦୋନିଆଦି ଲୋକ୍ ମା ୱାଲେ ମାର୍ହାନ୍ । 3 ମାରି ଅର୍ଲେନ୍ ମାପୁ ସିଦନ୍ତୁ ଇତାପ୍ । ଯୁଲିୟସ୍ ପାଉଲତି ଉଣ୍ତିଙ୍ଗ୍ ସାକା ମାର୍ହାନ୍ । ପାଉଲତି ସଙ୍ଗ୍ରିମାଣ୍କୁ ୱାରି ଦରକାର୍ମାନି ଜିନିସ୍ ୱିଜୁ ଉଣ୍ତାକିନି ଉଦେସ୍ତାନ୍ ୱାରିଙ୍ଗ୍ ବେଟ୍ଆଦେଙ୍ଗ୍ ଇଜି ୱାନ୍ ପାଉଲତିଙ୍ଗ୍ ସାରି ସିତାନ୍ । 4 ମାପୁ ଆବେଟ୍ତାନ୍ ସନି ବେଡ଼ାଦୁ ପାଡ଼ିୱାନି ଗାଲି ୱାତାତ୍ଆକା ସାଇପ୍ରସ୍ ସାମୁଦୁର୍ତି ପାଡ଼ି ପାଡ଼ି ସର୍ହାପ୍, 5 ସିଲିସିଆ ନି ପାମ୍ଫିଲିଆ ଜିଣାଜି ଲୁକିଆଦି ମୁରାଦୁ ଇତାପ୍ । 6 ଆବେନୁ ୱିଜେରିଙ୍ଗ୍ ପେରିସେନାପତି ଆଲେକ୍ଜାଣ୍ତ୍ରିଆ ତ୍ରିଆଦି ଉନ୍ଡ୍ରି ଏରୁଜାହାଜ୍ ଇଟାଲିଦୁ ସନି ଉଣ୍ତିଙ୍ଗ୍ ତିଆର୍ ଆଜିମାନିକା ସୁଡ଼ୁଜି ମାଙ୍ଗିଁ ଆବେନୁ ଏକିସ୍ତାନ୍ ।
7 ମାପୁ ବେସି ଦିନ୍ ସାନ୍ଧି ଦିରେ ଦିରେ ସୋଲ୍ସି ବଡ଼େ କାସ୍ଟୁଦାନ୍ କ୍ନିଦ ଗାଡ଼୍ ଲାକ୍ତୁ ଇତାପ୍ । ପାଡ଼ିୱାନି ଗାଲିଦି ଉଣ୍ତିଙ୍ଗ୍ ମାପ୍ ଆୟା ତରିନ୍ ମାରି ଆଗ୍ଡ଼ି ସନ୍ଡ୍ରେଙ୍ଗ୍ ଆଟ୍ଏତାପ୍, ଆଦେଙ୍ଗ୍ କ୍ରିଟ୍ ସାମ୍ଦୁରୁତି ଉଣି ତରିନ୍ ସିଜି ରାଜିଦାନ୍ ସୋଲ୍ସି ସାଲମୋନି ପାଡ଼ି ସିଜି ସର୍ହାପ୍ । 8 ମାରି, ମାପୁ ପାଡ଼ି ପାଡ଼ି ବଡ଼େ କାସ୍ଟୁଦାନ୍ ଲାସାୟା ଗାଡ଼୍ ଲାକ୍ତୁରି ସୁନ୍ଦର୍ ବନ୍ଦର୍ ଦର୍ତି ବାଡିଦୁ ଇତାପ୍ ।
9 ମାପ୍ ଆବେନୁ ବେସି ଦିନ୍ ତେବାତାପ୍ । ଜିହୁଦିରି ଉପବାସ ପଣ୍ତୟ୍ ୱିଜିତା ମାର୍ହାତ୍, ଆୟା ବେଡ଼ାଦୁ ସାମ୍ଦୁରୁତୁ ସନିକା ତିଲାନିପାଣି ଆତାତ୍ । ଆଦେଙ୍ଗ୍ ପାଉଲ ୱାରିଙ୍ଗ୍ ଇୟା ମାଟେଙ୍ଗ୍ ୱେର୍ତାନ୍ : 10 "ତଡ଼କୁ ନାନ୍ ନେସ୍ତେଙ୍ଗ୍ ଆଟ୍ସିନା ଜେ, ଜଦି ମାପ୍ ଇବେଣ୍କୁ ମାରି ସନ୍ଡ୍ରେଙ୍ଗ୍ ଆରାମ୍ କିନିକା, ଆକା ତିଲାନିପାଣି ଆନାତ୍ । କେବଲ ଜେ ଜିନିସ୍ପତ୍ର ନି ଜାହାଜ୍ ନାସ୍ଟୁ ଆନାତ୍, ଆକା ସିଲେ, ମାତର୍ ମା ଜିବନ୍ତିଙ୍ଗ୍ ବା ସାନି ମୁସ୍କୁ ମାନାତ୍ ।" 11 ମାତର୍ ସେନାପତି ପାଉଲତି ମାଟା ବିସ୍ବାସ୍ କିଏଣ୍ଗା ଜାହାଜ୍ତି ପେରିୱାନିମାନୁ ମାରି ଜାହାଜ୍ତି ମାଲିକ୍ତି ମାଟାଦାନ୍ ଆସ୍ତାନ୍ । 12 ପିନି କାଡ଼ା କାଟେ କିଦେଙ୍ଗ୍ ଆୟା ବାଡି ସୁବିଦା ସିଲେତାତ୍, ଆଦେଙ୍ଗ୍ ସୋଲ୍ସିମାର୍ଇୱାରି ମାଣ୍କୁ ଏସଲୋକ୍ ସାମ୍ଦୁରୁତାନ୍ ସନ୍ଡ୍ରେଙ୍ଗ୍ ଜଦି ଆନାତ୍, ଫୈନିକ୍ସ୍ତୁ ପିନି କାଡ଼ା କାଟେକିନି ଉଣ୍ତିଙ୍ଗ୍ ମାର୍ହିଙ୍ଗ୍ । ଫୈନିକ୍ସ୍ ଉଣେରି ନି ୱେଡ଼ାଆର୍ନି ତରିନ୍ ମାରି ଡେବିରି ନି ୱେଡ଼ାଆର୍ନି ତରିନ୍ ମକମ୍ କିଜି ତେବାତିମାନି କ୍ରିଟ୍ଦି ଉନ୍ଡ୍ରି ବାଡି ।
ସାମ୍ଦୁରୁତୁ ଗାଲି
13 ଏସ୍ତିୱାଲେ ଉଣେରି ତରିଟାନ୍ ଦିରେ ଦିରେ ଗାଲି ୱାତାତ୍, ସନିକାର୍ ଇୟାତାନିଙ୍ଗ୍ ଉନ୍ଡ୍ରି ନେଗି ମାଟା ଇଜି ଅଡ଼ବିତାର୍ ମାରି ଲଙ୍ଗର୍ ପେର୍ଜି ଏସା ଆକ ସନ୍ଡ୍ରେଙ୍ଗ୍ ଆନାତ୍, କ୍ରିଟ୍ଦି ପାଡ଼ି ପାଡ଼ି ସନ୍ଡ୍ରେଙ୍ଗ୍ ଆସ୍ତାର୍ । 14 ମାତର୍ ଆୟା ଦାପ୍ରେନେ ସାମ୍ଦୁରୁ ଦିପ୍ ତରିଟାନ୍ ଡେବିରି ନି ଆଗ୍ଡ଼ିରାନ୍ ଗାଲି ନାଣ୍ତଦାନ୍ ନାଣ୍ତ ୱାଜି 15 ଜାହାଜ୍ତିଙ୍ଗ୍ ଆତାଡ଼ାତାତ୍ । ଜାହାଜ୍ତିଙ୍ଗ୍ ଗାଲି ତରିନ୍ ମକମ୍ କିଜି ଇଡ୍ଦେଙ୍ଗ୍ ଆଟ୍ଏତାପ୍ଆକା ମାପ୍ ମାରି ସେସ୍ଟା କିଏଣ୍ଗା ଗାଲିଦୁ ଜାହାଜ୍ତିଙ୍ଗ୍ ଦେଲ୍ଜ ସନ୍ଡ୍ରେଙ୍ଗ୍ ଡ଼ିସ୍ତା ସିତାପ୍ । 16 ମାରି, ଉନ୍ଡ୍ରି ଇସ୍ରି ବାଡି କାଉଦାଦି ଉଣେରି ତରିନ୍ ସିଜି ସନି ୱାଲେ ଅଡ଼ପ୍ ଗାଲିଦାନ୍ ରକ୍ୟା ପୟ୍ତା ମାର୍ହାପ୍ । ଆବେନୁ ମାପୁ ଏଣ୍ତେସ୍ବା ଜାହାଜ୍ତି ଡଙ୍ଗାଁଦିଙ୍ଗ୍ ନେଗି ବାଡିଦୁ ଇଡ୍ଦେଙ୍ଗ୍ ଆଟ୍ତାପ୍ । 17 ଡଙ୍ଗାଁସାଲାକିନିକାର୍ ତାନିଙ୍ଗ୍ ଜାହାଜ୍ ମୁସ୍କୁ ପେର୍ତାର୍ ମାରି ନାସ୍ତି ସାକାଦାନ୍ ଡାଟ୍ତାନ୍ ଜାହାଜ୍ତି ୱାଲେ ତର୍ତାର୍ । ଜାହାଜ୍ ଲିବିୟା ସାମ୍ଦୁର୍ ପାଡ଼ିଦି ବାଲି ଲୋଇ ଡ଼ୁଗୁଗାସନାତ୍ ଇଜି ତିଲାଜି ଡଙ୍ଗାଁସାଲାକିନିକାର୍ ପାର୍ଦା କୁତ୍ତାସିତାର୍ ଜାହାଜ୍ତିଙ୍ଗ୍ ଗାଲି ୱାନିମାନୁ ଦେଲ୍ଜି ସନ୍ଡ୍ରେଙ୍ଗ୍ ଡ଼ିସ୍ତାସିତାର୍ । 18 ନାଣ୍ତ ଗାଲି ଆଜିମାରିଙ୍ଗ୍ ଆୟା ମାର୍ନାଣ୍ତିଙ୍ଗ୍ ୱାର୍ ଜାହାଜ୍ତାନ୍ ଜିନିସ୍ପତ୍ର ଏର୍ତୁ ପୋକ୍ତାର୍, 19 ମାରି, ଆୟା ମାର୍ନାଣ୍ତିଙ୍ଗ୍ ଜାହାଜ୍ତି ଏସ ସାସାପାତି ସାମ୍ଦୁରୁତୁ ପୋକ୍ତାର୍ । 20 ନାଣ୍ତ ଦିନ୍ ସାନ୍ଧି ମାପ୍ ୱେଡ଼ା କି ସୁକେଙ୍ଗ୍ ସୁଡ଼ୁଦେଙ୍ଗ୍ ଆଟ୍ଏତାପ୍ ମାରି ନାଣ୍ତଦାନ୍ ନାଣ୍ତ ଗାଲି ୱାଜିମାର୍ର୍ହାତ୍ । ସାରାସାରିୱେନ୍କା ମାପୁ ରକିୟା ପୟ୍ନି ଆସା ୱିଜୁ ଡ଼ିସ୍ତା ସିତାପ୍ ।
21 ମାରି, ୱିଜେରେ ନିସ ଦିନ୍ ସାନ୍ଧି ବାଙ୍ଗାଁଦୁ ତେବାତି ୱେନ୍କା, ପାଉଲ ୱାରି ଲୋଇ ନିଲ୍ତାନ୍ନୋ ଇର୍ହାନ୍, "ଏ ତଡ଼ାନ୍କୁ, ମିରୁ ନା ମାଟା ଇସାବ୍ତାନ୍ କ୍ରିଟ୍ଦାନ୍ ଜାହାଜ୍ ଡ଼ିସ୍ଇ ମାନିକାଇରିଙ୍ଗାଁ, ମା ଇୟା କାକୁର୍ତି ଗଟେଆଏତାତ୍ ମାନ୍ଦି । 22 ମାତର୍ ଇଲେଇ ନାନ୍ ମିଙ୍ଗିଁ ଇଜିନା, ମିରୁ ସାହାସ୍ ଆସ୍ତୁ । ମି ଲୋଇରାନ୍ ଅରେନ୍ୱାନିନ୍ଧିବା ଜିବନ୍ ସଲ୍ଏତ୍, କେବଲ ଜାହାଜ୍ ନାସ୍ଟୁ ଆନାତ୍ । 23 ନାନ୍ ଆମା ମାପୁରୁଙ୍ଗୁଁ ସେବା କିଜିନା, ଇଏରି ନାଡ଼ାଦୁ ୱାନି ଅରେନ୍ ମୁସ୍କୁପୁର୍ତି ଦୁତ୍ ନା ଲାକ୍ତୁ ୱାଜି ଇର୍ହାନ୍, 24 ପାଉଲ, ନିନୁ ତିଲାମା । ନିନୁ ପୁରା କାଇସର୍ଦି ଆଗ୍ଡ଼ି ନିନି । ନି ଉଣ୍ତିଙ୍ଗ୍ ମାପୁରୁ ସାକା ଆତିମାନିଙ୍ଗ୍, ନି ୱାଲେ ସୋଲ୍ସିମାନି ୱିଜେରି ଜିବନ୍ ୱାନ୍ ରକ୍ୟା କିନାନ୍ । 25 ମାରି, ତଡ଼ାନ୍କୁ, ସାହାସ୍ ଆସ୍ତୁ ! ଇରିଙ୍ଗ୍ ନାନୁ ମାପୁରୁଦିମାନୁ ବିସ୍ବାସ୍ କିନା, ନାଙ୍ଗିଁ ଆମାକା ୱେରାୟ୍ଆତାମାନାତ୍, ଟିକ୍ ଆୟାୱାଜା ଗଟାନାତ୍ । 26 ମାତର୍ ମାଡୁ ଆଗ୍ଡ଼ି ସୋଲ୍ସି ଉନ୍ଡ୍ରି ସାମ୍ଦୁରୁ ଲୋଇ ମାନି ବାଡିଦୁ ଇଦେଙ୍ଗ୍ ପଡ଼ାନାତ୍ ।"
27 ଇୟା ସଲ୍ସିନିମାନୁ ସତି ସଉଦ ଦିନ୍ତୁ, ମାଡୁ ଆଦ୍ରିଆ ସାମ୍ଦୁରୁତୁ ଗାଲିପିରୁ ଦାନ୍ ଆୟାଦାପ୍ରେ ପେଲାୟ୍ ଆଜି ସୋଲ୍ପୁ ସୋଲ୍ପୁ, ପୁରା ମାଜାର୍ନାଡ଼ା ବେଡ଼ାଦୁ ଡଙ୍ଗାଁସାଲାକିନିକାର୍ ଅନୁମାନ୍ କିତାର୍ ଜେ, ମାଡୁ ପାଡ଼ି ଇଗା ସୋଲ୍ସିନିକା । 28 ୱାର୍ ଲେକିସ୍ କିଜି ନେସ୍ତାର୍, ଆବେନୁ ଏରୁଦି ଗୁମି ସଏ କଡ଼େ ପୁଟ୍ ମାନାତ୍ । ମାରି ଅଡ଼ପ୍ ଆଗ୍ଡ଼ି ସୋଲ୍ସି ମାରି ଉନ୍ଡ୍ରି ଦେବା ଲେକିସ୍ କିଜି ନବେ ପୁଟ୍ ଗୁମି ଏରୁ ମାନେ । 29 ଜାହାଜ୍ ଏଣ୍ତେସ୍ ଆମା ଗରନ୍ତୁ ସୋଲ୍ସି ଡୁକାନାତ୍ ଇଜି ତିଲାଜି ୱାର୍ ୱେନ୍କାରାନ୍ ନାଲ୍ଗି ପେରିଲୁହାମକେଙ୍ଗ୍ ପୋକ୍ତାରୋ ମାରି ସାଲ୍ଦି ଏସ୍ତିୱାଲେ ଆନାତ୍ ଇଜି କାପ୍କିଜି ତେବାତାର୍ । 30 ତାନେୱେନ୍କା ଡଙ୍ଗାଁସାଲାକିନିକାର୍ ଜାହାଜ୍ତାନ୍ ରେସି ୱାଜି ସନ୍ଡ୍ରେଙ୍ଗ୍ ସେସ୍ଟା କିତାର୍ । ଜାହାଜ୍ତି ଆଗ୍ଡ଼ିରାନ୍ ମାରି ଏସ ପେରିଲୁହାମକେଙ୍ଗ୍ ପୋକ୍ତେଙ୍ଗ୍ ସାଲାକି କିଜି, ୱାର୍ ଜାହାଜ୍ ମୁସ୍କୁ ମାନି ଡଙ୍ଗାଁଦିଙ୍ଗ୍ ଆଡ୍ଗି ରେପ୍ତାର୍ । 31 ମାତର୍ ପାଉଲ ସେନାପତି ମାରି ସନ୍ୟରିଙ୍ଗ୍ ଇର୍ହାନ୍, "ଡଙ୍ଗାଁସାଲାକିନିକାର୍ ଜାହାଜ୍ତୁ ମାନ୍ଏତିଙ୍ଗ୍, ମି ରକିୟା ପୟ୍ନିକା ମାରି ଆସା ସିଲେତ୍ ।" 32 ଆବେନୁ ସନ୍ୟର୍ ଡଙ୍ଗାଁଦି ନାସ୍କୁୱିଜୁ କୟ୍ଜି ଏର୍ତୁ ଦେଲ୍ଜି ସନ୍ଡ୍ରେଙ୍ଗ୍ ଡ଼ିସ୍ତାସିତାର୍ ।
33 ସାଲ୍ଦି ଆନି ଆଗ୍ଡ଼ିନେ ପାଉଲ ୱିଜେରିଙ୍ଗ୍ ଉଣ୍ତେଙ୍ଗ୍ ଇଜି ଇର୍ହାନ୍, "ଇୟା ସଉଦ ଦିନ୍ ଆତାତ୍ନି, ମିରୁ ଇନିକା ଉଣୁଇଦେର୍ ।" 34 ବାତିଙ୍ଗ୍ ମାଲିତା, ଇଲେଇ ଇନିକା ତିନ୍ଡ୍ରୁ, ଜିଜ ତେବାତେଙ୍ଗ୍ ଇକା ପୁରା ଦର୍କାର୍ ମାନାତ୍ । ତିଲାମାଟ୍, ମି ତାଲାଦି ଉନ୍ଡ୍ରି ବା କୁକୁଟି ନାସ୍ଟୁ ଆଏତ୍ । 35 ଇୟାୱିଜୁ ମାଟା ୱେର୍ସି ପାଉଲ ରୁଟି ଆସ୍ସି ୱିଜେରି ଆଗ୍ଡ଼ି ମାପୁରୁଙ୍ଗୁଁ ଦନ୍ୟବାଦ୍ ସିଜି ରୁଟି ରୁକ୍ସି ତିର୍ହାର୍ । 36 ଆବେନୁ ୱାର୍ ୱିଜେରେ ସାହାସ୍ ଆଜି ନିଜେନିଜେ ବା ତିର୍ହାର୍ । 37 ନାସ୍ତିୱାଲେ ଜାହାଜ୍ତୁ ୱିଜେରେ ଦୁଇସ ସତୁରି ସୋଅ ଲୋକ୍ ମାର୍ହାର୍ । 38 ୱିଜେରେ ପଟା ବର୍ତି ଉଟି ୱେନ୍କା ଜାହାଜ୍ତିଙ୍ଗ୍ ଉସାସ୍ କିନି ଉଣ୍ତିଙ୍ଗ୍ ଆବେନୁ ମାର୍ଇ ୱିଜୁ ଗଦ୍ମୁ ସାମ୍ଦୁରୁତୁ ପୋକ୍ତାର୍ ।
ଜାହାଜ୍ତି ନାସ୍ଟୁଆନିକା
39 ମାର୍ନାଣ୍ତିଙ୍ଗ୍ ସାଲ୍ଦି ପାଡ଼ି ଆମା ବାଡିଦୁ ୱାଜି ୱାର୍ ଇତାର୍, ଡଙ୍ଗାଁସାଲାକିନିକାର୍ ନେସ୍ତେଙ୍ଗ୍ ଆଟ୍ଏତାର୍; ମାତର୍ ୱାର୍ ସୁଡ଼ୁତାର୍, ଆକା ଉନ୍ଡ୍ରି ଇସ୍ରିସାମ୍ଦୁରୁତି ବାଲି ବୁମି । ଆବେନୁ ଜାହାଜ୍ ଅତେଙ୍ଗ୍ ଇଜି ତିର୍ କିତାର୍ । 40 ଆଦେଙ୍ଗ୍ ପେରିଲୁହାମକେଙ୍ଗ୍ ନାସ୍କୁ ୱିଜୁ କୟ୍ଜି ଆୟାୱିଜୁ ସାମ୍ଦୁରୁ ଆଡ୍ଗି ମୁସାୟ୍ ଆନି ଉଣ୍ତିଙ୍ଗ୍ ଡ଼ିସ୍ତାସିତାର୍ । ମାରି ଏଣ୍ତେଲ୍ତି ନାସ୍କୁୱିଜୁ କୁତ୍ସି ସିଜି ସାମାନ୍ଦୁ ତର୍ତିମାନି ପାର୍ଦାଦିଙ୍ଗ୍ ପେର୍ତାର୍ । ଏଣ୍ତେସ୍କି ଗାଲିଦାନ୍ ପେଲାୟ୍ ଆଜି ଜାହାଜ୍ ପାଡ଼ି ତରିନ୍ ସନ୍ଡ୍ରେଙ୍ଗ୍ ଆସ୍ତାତ୍ । 41 ମାତର୍ ବାଲି ଚଡ଼ା ମୁସ୍କୁ ନାଣ୍ତଡୁକାଜି ଜାହାଜ୍ତି ଆଗ୍ଡ଼ିରିକା ଆଡ୍ଗି ମୁଜାୟ୍ ଆତାତ୍ ମାରି ଉଲୁକାଏରୁ ନାଣ୍ତ ଡୁକାଜି ଜାହାଜ୍ତି ୱେନ୍କା ତରିଟିକା ରୁଙ୍ଗୁଁଦେଙ୍ଗ୍ ଆସ୍ତାତ୍ ।
42 ଜଇଲ୍ତୁମାରିଇକାର୍ ପାଡ଼ି ପଙ୍ଗ୍ଁରାଜି ପଙ୍ଗ୍ଁରାଜି ସନାର୍ ଇଜି ଅଡ଼ବିଜି ୱାରିଙ୍ଗ୍ ସାୟାମାର୍ଗା ଡାକ୍ତେଙ୍ଗ୍ଁ ଇଜି ସନ୍ୟର୍ ବିଚାର୍ କିତାର୍ । 43 ମାତର୍ ସେନାପତି ପାଉଲତି ଜିବନ୍ ରକିୟା କିଦେଙ୍ଗ୍ ଅଡ଼ବିଜି ମାର୍ର୍ହାନ୍; ଆଦେଙ୍ଗ୍ ୱାନ୍ ସନ୍ୟରିଙ୍ଗ୍ ଆବେଟ୍ତାନ୍ ଆଲେ କିତାନ୍ । ପଙ୍ଗ୍ଁରାଦେଙ୍ଗ୍ ଆଟ୍ସିମାନି ୱିଜେରିଙ୍ଗ୍ ସାମ୍ଦୁରୁତୁ ଗାତ୍ସି ପଙ୍ଗ୍ଁରାଜି ପଙ୍ଗ୍ଁରାଜି ପାଡ଼ି ସନି ଉଣ୍ତିଙ୍ଗ୍ ଆଦେସ୍ ସିତାନ୍, 44 ମାରି ମାର୍କାପାଟା ନି ଜାହାଜ୍ତି ଆମା ରୁଙ୍ଗିଁତି ମକାଦିଙ୍ଗ୍ ଆସ୍ସି ଦେଲ୍ଦେଙ୍ଗ୍ ଇଜି ଆଇୱାରିଙ୍ଗ୍ ଇର୍ହାନ୍ । ଇୟାୱାଜା ମାପୁ ୱିଜୁଲୋକ୍ ନେଗେନ୍ତାନ୍ ସୋଲ୍ସି ପାଡ଼ି ଇତାପ୍ ।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)