ପ୍ରେରିତ 28

ମେଲତି ବାଡିଦୁ ପାଉଲ

1 ନେଗେନ୍‍ତାନ୍‍ ପାଡ଼ି ସଲ୍‍ସି ସୁଡ଼ୁତାପ୍‌ ଜେ ମାପ୍‌ ମେଲତି ବାଡିଦୁ ଇତାମାନାପ୍‍ । 2 ଆବେଣି ପୁର୍ବେଦାନ୍‌ ବାସାତିଲୋକୁ ମା ଉଣ୍ତିଙ୍ଗ୍‍ଁ ଜିବନ୍‌ନୋନିକା ତର୍‍ତାର୍‍ । ନାସ୍ତିୱାଲେ ପିରୁ ୱାଜି ପିନି ଆଜିମାର୍ହାତ୍‍ । ଆଦେଙ୍ଗ୍‍ଁ ୱାର୍‌ ସିସୁ କାସିସ୍‍କିଜି ମାଙ୍ଗିଁ କୁକ୍‍ତାର୍‍ । 3 ପାଉଲ ମୋପ ୱେର୍‍କୁ ପେର୍‌ଜି ସିସୁଦୁ ପକ୍‍ତେଙ୍ଗ୍‍ଁ ସଲ୍‍ସି ମାର୍ହିୱାଲେ ଆବେଟାନ୍‍ ଉନ୍‍ଣ୍ତ୍ରି ସାରାସ୍‍ ସତାତ୍‍ ମାରି ୱେସ୍‍ନି ମାଣାନ୍‌ ରକିୟା ପୟ୍‍ଦେଙ୍ଗ୍‍ଁ ଇଜି ୱାନି କିୟୁ ମୁସ୍‌କୁ ଏକ୍‌ସି ଆବେ ତେର୍‌ବିଜି କାସ୍‌ତା ମାର୍‌ର୍ହାତ୍‌ । 4 ଆବେ ବାସାତିଲୋକୁ ପାଉଲ୍‍ତି କିୟୁଦୁ ଦୁଙ୍ଗ୍‍ଁଜିମାନି ସାରାସ୍‌ତିଙ୍ଗ୍‍ଁ ସୁଡ଼୍‌ଜି ୱାରିୱାରି ଲୋଇ ଇନ୍‍ଜିସାତାର୍‌, "ଇକାନ୍‌ ସତେନ୍‍ ଅରେନ୍‌ ଲୋକାଙ୍ଗ୍‌ କାତ୍‍ତିକାନ୍‍ ଆନାମାନାନ୍‌, ୱାନ୍‌ ସାମ୍‍ଦୁର୍‍ତାନ୍‍ ରକିୟା ପୟ୍‌ତି ସର୍ହିମାରିଙ୍ଗ୍‍ଁ ବା ଦାର୍ମୁ କିୟୁଦାନ୍‌ ମାରି ଜିଏନ୍‍ ।" 5 ମାତର୍‌ ପାଉଲ ନିଜେ ଗାଉ ଆଏଜି, ସାରାସ୍‌ତିଙ୍ଗ୍‍ଁ ସିସୁ ଲୋଇ ସାଡ଼୍‍ତା ପକ୍‌ତାନ୍‌ । 6 ପାଉଲ୍‍ତି ମେନ୍ଧଲ୍‍ ୱାସ୍‍ସି ନିଙ୍ଗ୍‍ଁନାତ୍‍ ମାରି ୱାନ୍‌ ସାଜି ଆଡ୍‍ଗି ଆର୍‌ନାନ୍‌ ଅଡ଼୍‍ବିଜି, ୱାର୍‌ ଏସ ସମୟ୍ କାପ୍‍କିତାର୍‍ । ମାତର୍‌ ନାଣ୍ତ ସମୟ୍ କାପ୍‌କିଜି ଏସ୍ତିୱାଲେ ସୁଡ଼ୁତାର୍‌ ଜେ, ପାଉଲ୍‍ତି ଇନିକା ନାସ୍ଟୁ ଆଏତାତ୍‌, ୱାର୍‌ ମନ୍‍ ଡ଼େପ୍‍ସି ଇର୍ହାର୍‌, "ଇକାନ୍‌ ଅରେନ୍‌ ମାପୁରୁ !"

7 ଆବେଟାନ୍‍ କାଣ୍ତେକ୍‍ ଆକ ଦ୍ୱୀପ ବାଡିଦି ପେରି ପାଣିକିନିକାନ୍‌ ପବ୍ଳିୟତି ଇଲୁ ନି କିଡ଼ିଇ ମାର୍ହାତ୍‌ । ୱାନ୍‌ ମାଙ୍ଗିଁ କୁକ୍‍ତାନ୍‍ ମାରି ମାପ୍‌ ମୁନେନ୍‌ ସାନ୍ଦି ତାମେମାନୁ ତେବାତାପ୍‍ । 8 ପବ୍ଳିୟସ୍‍ତି ବୁବାସି ନବ୍‌ ନି ଆମାସୟ୍‍ ରୋଗ୍‍ ଆତାମାର୍ହାନ୍‍ । ପାଉଲ ୱାନି ବାକ୍‍ରାଦୁ ସର୍ହାନ୍‍, ୱାନି ଉଣ୍ତିଙ୍ଗ୍‍ଁ ପାର୍‌ତନା କିଜି ୱାନି ମୁସ୍‌କୁ କିୟୁ ଇଡ୍‌ଜି ୱାନିଙ୍ଗ୍‍ଁ ନେଗେନ୍‌ କିତାନ୍‌ । 9 ଇୟା ଗଟନା ୱେନ୍‌କା ଦିପଦି ରୋଗିଲୋକ୍‍ ୱିଜେରେ ପାଉଲ ଲାକ୍‌ତୁ ୱାଜି ନେଗେନ୍‌ ଆତାର୍‌ । 10 ୱାର୍‌ ମାଙ୍ଗିଁ ନାଣ୍ତ ସାହାଜ୍ୟ ସିତାର୍‍ ମାରି ମାପ୍‌ ଆବେଟାନ୍‍ ଜାହାଜ୍‍ତୁ ବାସ୍‌ସି ସନିୱାଲେ ମା ସନି ଉଣ୍ତିଙ୍ଗ୍‍ଁ ଦର୍‍କାରି ମାନି ୱିଜୁ ୱାର୍‌ ତାସି ଜାହାଜ୍‍ତୁ ଇଟ୍‍ତା ସିତାର୍‍ ।

ମେଲିତିଦାନ୍‍ ରୋମ୍‍ତୁ

11 ଆଲେକ୍‍ଜାଣ୍ତ୍ରିଆ ଦାନ୍‍ ୱାତିମାନି "ଜାଡ଼୍‌ୱା ଦିୟାମ୍‍" ଦର୍‌ତି ଉନ୍‍ଣ୍ତ୍ରି ଜାହାଜ୍‌ ମେଲିତି ଦିପଦୁ ପିନି କାଡ଼ା କାଟେ କିତାମାର୍ହାତ୍‍ । ଦିପଦୁ ମୁନ୍‍ଣ୍ତ୍ରି ଲେଜ୍‌କୁ ତେବାତି ୱେନ୍‌କା ମାପ୍‌ ଆୟା ଜାହାଜ୍‍ତୁ ବାସ୍‌ସି ମାରି ସନ୍‍ଡ୍ରେଙ୍ଗ୍‍ଁ ଆରାମ୍‌ କିତାପ୍‍ । 12 ଆଗ୍‌ଡ଼ି ମାପ୍‍ ସିରାକୁସ୍‍ ଗାଡ଼୍‌ତୁ ଇଜି ଆବେ ମୁନେନ୍‌ ତେବାତାପ୍‍ । 13 ଆବେଟାନ୍‍ ମାରି ସଲ୍‍ସି ମାପ୍‌ ରେଗିୟ ଗାଡ଼୍‌ତୁ ଇତାପ୍‍ । ମାର୍‍ନାଣ୍ତିଙ୍ଗ୍‍ଁ ଡେବିରି ତରିଟାନ୍‍ ଗାଲି ୱାତାତ୍‍ ମାରି ରିନେନ୍‍ ୱେନ୍‌କା ପୁତେଅଲି ଗାଡ଼୍‌ତୁ ଇତାପ୍‍ । 14 ଆବେ ଏସ ଲୋକୁ କ୍ରିସ୍ତ ବିସ୍‍ବାସ୍‌ତି ତଡ଼ାନ୍‌କାଙ୍ଗ୍‌ ବୁଡ଼ିତାପ୍‍ । ୱାରି ୱାଲେ ଉନ୍‍ଣ୍ତ୍ରି ୱାରା ତେବାଦେଙ୍ଗ୍‍ଁ ଇଜି ୱାର୍‌ ମାଙ୍ଗିଁ ବାତିଙ୍ଗ୍‌ ମାଲିତାର୍‍ । ସାରାସାରି ରୋମ୍‍ତୁ ସର୍ହା ଇତାପ୍‍ । 15 ମା କାବୁର୍‌ ୱେନ୍‌ଜି ରୋମ୍‍ତି ତଡ଼ାନ୍‌କୁ ମାଙ୍ଗିଁ ବେଟ୍‌ଆଦେଙ୍ଗ୍‍ଁ ଇଜି "ଆପିୟ ସାତାଦୁ" ନି "ତିନି ସରାଇ" ଦର୍‌ତି ଗାଡ଼୍‍କାଙ୍ଗ୍‍ଁ ୱାତାର୍‌ । ୱାରିଙ୍ଗ୍‍ଁ ସୁଡ଼୍‌ଜି ପାଉଲ ମାପୁରୁଙ୍ଗ୍‍ଁ ଦନ୍ୟବାଦ୍‌ ସିତାନ୍‌ ମାରି ୱେଡ଼ିକା ଆତାନ୍‌ ।

ରୋମ୍‍ ଗାଡ଼୍‌ତୁ ପାଉଲ ‍

16 ମାପ୍‌ ରୋମ୍‍ତୁ ଇତି ୱେନ୍‌କା, ପାଉଲ୍‍ତିଙ୍ଗ୍‍ଁ ସାରି ପୁଟ୍‍ତାତ୍‍ଆକା, ୱାନିଙ୍ଗ୍‍ଁ କାପ୍‍କିଦେଙ୍ଗ୍‍ଁ ବାସେ ଆତି ଅରେନ୍‌ ସନ୍ୟ ୱାଲେ ୱାନ୍‌ ନିଜେ ବଦାଦାନ୍ ଆମା ବାଡିଦୁବା ତେବାଦେଙ୍ଗ୍‍ଁ ଆଟ୍‌ନାନ୍‌ ।

17 ମୁନେଟି ୱେନ୍‌କା ପାଉଲ ଲାକ୍‍ତୁରି ଜିହୁଦି ନେତାରିଙ୍ଗ୍‍ଁ ଉନ୍‍ଣ୍ତ୍ରି ମିଟିଙ୍ଗ୍‍ଁ ମିସାଦେଙ୍ଗ୍‍ଁ ଇଜି କୁକ୍‍ତାର୍‍ । ୱାର୍‌ ଉଣ୍ତାତାର୍‍ଆକା ପାଉଲ ୱାରିଙ୍ଗ୍‍ଁ ଇର୍ହାନ୍‌ : "ଇସ୍ରାଏଲ୍‌ତି ତଡ଼ାନ୍‌କୁ, ମା ଲୋକା ବିରଦ୍‌ତାନ୍‌ ମାରି ମା ଡକ୍ରାଦାଦାରି ମାଣାନ୍‌ ମାପ୍‌ ପୟ୍‍ତିମାନି ରିତିନିତି ବିରଦ୍‌ତାନ୍‌ ନାନ୍ ଇନିକା କିଏତିଙ୍ଗ୍‍ଁ ବା, ଜିରୁସାଲାମ୍‍ତୁ ନାନ୍ ତରାୟ୍‍ଆଜି ରୋମିୟରି କିୟୁଦୁ ସର୍ପେ ଆତାମାନା । 18 ନାଙ୍ଗିଁ ୱେନ୍‍ବାତି ୱେନ୍‌କା ସାନି ଉଣ୍ତିଙ୍ଗ୍‍ଁ ନାନ୍ ଇନି ଦସ୍‌ କିଏ ଇଜି ନେସ୍‍ତେଙ୍ଗ୍‍ଁ ଆଟ୍‍ସି ରୋମିୟ ଲୋକୁ ନାଙ୍ଗିଁ ଡ଼ିସିସ୍‍କିଜି ସିଦେଙ୍ଗ୍‍ ବଦାକିତାମାର୍ହାର୍‍ । 19 ✝୨୮:୧୯ ପ୍ରେରିତ ୨୫:୧୧.ମାତର୍‌ ଜିହୁଦି ଲୋକୁ ତେନି ବିରୁଦ୍‍କିତାର୍‍ଆକା, ନିଜେଦି ଲୋକା ବିରଦ୍‌ତାନ୍‌ ନା ଇନି ଦସ୍‌ ସିଲେତିଙ୍ଗ୍‌ ବା, ନାନ୍ ସମ୍ରାଟ୍‍ତିଙ୍ଗ୍‍ଁ ମାଡ଼ିସ୍‌ କିଦେଙ୍ଗ୍‍ଁ ରାଜି ଆତା । 20 ଆୟାଉଣ୍ତିଙ୍ଗ୍‌ ଇୟା ବିସୟ୍‌ତାନ୍‌ ୱାର୍‌ଗିଜି ସାଦେଙ୍ଗ୍‍ଁ ନାନ୍ ମିଙ୍ଗିଁ କୁକିସ୍‍କିତାମାନା । ସତ୍‍ତାନ୍‍, ଆମାୱାନି ମୁସ୍‌କୁ ଇସ୍ରାଏଲ୍‌ତି ଲୋକୁ ଆସା କିତାମାନାର୍‍, ୱାରି ଉଣ୍ତିଙ୍ଗ୍‍ଁ ନାନ୍ ସିକ୍‍ଣି ଦାନ୍‍ ତରାତାମାନା ।"

21 ୱାର୍‌ ୱାନିଙ୍ଗ୍‌ ଇର୍ହାର୍‌, "ମାପ୍‌ ଜିହୁଦା ଦେସ୍‍ତାନ୍‍ ନି ବିସୟ୍‌ତାନ୍‌ ଇନି ସିଟିଆକୁ ପୟ୍‍ଏପ୍‍, କିନି କାବୁର୍‌ ଅସି ମାରି ନି ବିସୟ୍‌ତାନ୍‌ ଇନି ଦସ୍‌ କିଜି ଇନ୍‍ଡ୍ରେଙ୍ଗ୍‍ଁ ମା ତଡ଼ାନ୍‌କା ଲୋଇରାନ୍‌ ଏନ୍‌ ଇବେ ରେଏନ୍‌ । 22 ଆୟା ଆମାକାଆପିତ୍‍, ମାପ୍‌ ନି ମାଟା ୱେନ୍‍ଡ୍ରେଙ୍ଗ୍‍ଁ ବଦାକିନାପ୍‍, ଇରିଙ୍ଗ୍‍ଁ ମାପ୍‌ ନେସ୍‌ନାପ୍‌ ୱିଜୁ ଲୋକୁ ନି ଦଲ୍‌ ବିରଦ୍‌ତାନ୍‌ ମାଟା ଇଜିନାର୍‍ ।"

23 ୱାର୍‌ ଉନ୍‍ଣ୍ତ୍ରି ଦିନ୍‌ ତିଆର୍‌ କିଜି ମାରି ୱାରି ଲୋଇ ନାଣ୍ତ ଲୋକୁ ଆୟାନାଣ୍ତିଙ୍ଗ୍‌ ପାଉଲ ତେବାଜିମାନି ବାଡିଦୁ ୱାତାର୍‌ । ସାଲ୍‍ଦିରାନ୍‍ ନାଡ଼ା ସାନ୍ଦି ପାଉଲ ୱାରିଙ୍ଗ୍‍ଁ ମାପୁରୁଦି ରାଜିଦି ବିସୟ୍‌ତି ବାକ୍ୟ ପ୍ରଚାର୍‌ କିଜି ସାକି ସିତାନ୍‌ ମାରି ମୋସାଦି ନିୟମ୍‌ ନି ବାବବାଦିରି ମାଣାନ୍‌ ରାସାତି ବାକ୍ୟ ସପ୍‍ସି ଜିସୁଦିମାନୁ ୱାର୍‌ ବିସ୍‌ବାସ୍‌ କିଦେଙ୍ଗ୍‍ଁ ଚେସ୍ଟାକିତାନ୍‍ । 24 ୱାରି ଲୋଇ ଏସ ଲୋକା ଜିବନ୍‌ ବାଦେଲ୍‌ ଆତାତ୍‌, ମାତର୍‌ ଆଇକାର୍‌ ବିସ୍‍ବାସ୍‍ କିଏତାର୍‌ । 25 ଇୟା ବିସୟ୍‌ତାନ୍‌ ୱାରି ଲୋଇ ନାଣ୍ତ ଜାଟି ସତାତ୍‍ । ୱାର୍‌ ସନି ଆଗ୍‌ଡ଼ି ପାଉଲ ଉନ୍‍ଣ୍ତ୍ରି ମାଟା ମୁସ୍‌କୁ ଦିୟାନ୍‌ସିଜି ଇର୍ହାନ୍‌ : "ପବିତ୍ର ଆତ୍ମା ମି ଡକ୍ରାଦାଦାରିଙ୍ଗ୍‍ ବାବବାଦି ଜିସାୟଦି ୱେୟୁଦାନ୍‌ ଟିକ୍‌ ମାଟା ଇର୍ହାମାର୍ହାନ୍‌ ! 26 ୱାନ୍‌ ଇର୍ହାନ୍‌ :

"ଇୟା ଲୋକାଙ୍ଗ୍‌ ସଲ୍‍ସ ଇନ୍‌ଆଁ,

ମିର୍‌ ୱେନିଦେର୍‍, ନାଣ୍ତ ୱେନିଦେର୍‍, ମାତର୍‌ ବୁଜାଇଦେର୍‍ ।

ମିର୍‌ ସୁଡ଼୍‍ଜିମାନିଦେର୍‍, ମାତର୍‌ ସୁଡ଼ୁଦେଙ୍ଗ୍‌ ଆଟ୍‌ଇଦେର୍‌ ।

27 ଇରିଙ୍ଗ୍‍ଁ ଇୟା ଲୋକାଦି ଜିବନ୍‌ ଉଣା ବୁଦି,

ୱାର୍‌ ନିଜେ ନିଜେଦି କାଣୁକୁ ନି

ଗିତଣିଙ୍ଗ୍‍ଁ ମୁକ୍‍ତାମାନାର୍‍,

ଆକା ଆଏତିମାରିଙ୍ଗ୍‍ଁ, ୱାର୍‌ କାଣୁକୁ ରେସି ସୁଡ଼ୁଦେଙ୍ଗ୍‌ ଆଟ୍‍ତାର୍‍ମାନ୍ଦି

ମାରି ଗିତଣିଙ୍ଗ୍‍ଁ ସିଜି ୱେନ୍‍ଡ୍ରେଙ୍ଗ୍‍ଁ ଆଟ୍‍ତାର୍‍ମାନ୍ଦି ।

ୱାରି ତାଲାଦୁ ବୁଜାନି ସାକ୍ତି ମାର୍ହାତ୍‍ମାନ୍ଦି;

ୱାର୍‌ ମାପୁରୁ ତରିନ୍‌ ଡ଼େସି ସର୍ହାର୍‍ମାନ୍ଦି

ମାରି ୱାରିଙ୍ଗ୍‌ ନାନ୍ ନେଗେନ୍‍କିତାମାନ୍ଦି ।"

28 ସାରାସାରି ପାଉଲ ଇର୍ହାନ୍‌, "ମିର୍‌ ନେସ୍‍ସ ମାନ୍‌ଡ଼୍ରୁ, ପରିତ୍ରାଣ ଉଣ୍ତିଙ୍ଗ୍‍ଁ ମାପୁରୁଦି ସୁସମାଚାର୍‌ ଅଣଜିହୁଦି ଲୋକା ଲାକ୍‌ତୁ ପକାୟ୍‍ଆତାମାନାତ୍‍ । ୱାର୍‌ ଆକା ୱେନାର୍‌ ।" 29 ମାରି, ପାଉଲ ଇୟାୱିଜୁ ମାଟା ଇର୍ହାନ୍‍ଆକା, ଜିହୁଦି ଲୋକୁ ଆପ୍‍ଣା ଆପ୍‍ଣା ଲୋଇ ସୁରି ୱାର୍‌ଗିଜି ୱାର୍‌ଗିଜି ସର୍ହାର୍‍ ।

30 ପାଉଲ ଉନ୍‍ଣ୍ତ୍ରି ଇଲୁ ବାଡ଼ା ଅସି ଦୁଇ ବାର୍ସେକ୍‍ ସାନ୍ଦି ତେବାତାନ୍‌ ମାରି ୱାନିଙ୍ଗ୍‍ଁ ସୁଡ଼ୁଦେଙ୍ଗ୍‌ ୱାଜିମାନି ୱିଜୁ ଲୋକାଙ୍ଗ୍‌ କୁକ୍‍ସି ମାର୍ହାନ୍‍ । 31 ଦର୍ଜ ନି ସାହାସ୍‍ତି ୱାଲେ ୱାନ୍‌ ମାପୁରୁଦି ରାଜି ବିସୟ୍‌ତାନ୍‌ ପ୍ରଚାର୍‌ କିଜି ପ୍ରବୁ ଜିସୁ କ୍ରିସ୍ତଦି ବିସୟ୍‌ତାନ୍‌ ସିକିୟା ସିଜି ମାର୍ହାନ୍‍ ।