ପ୍ରେରିତ 20

ମାସିଦନିଆ ନି ଆକାୟାଦୁ ସନିକା

1 ଜାଟିଜଗଡ଼ା ୱିଜିତି ୱେନ୍‌କା ପାଉଲ ବିସ୍‍ବାସିରିଙ୍ଗ୍‍ଁ ଉଣ୍ତା କିଜି ୱେଡ଼ିକାଦି ମାଟା ୱେନିସ୍‍କିତାନ୍‍ । ୱାରି ମାଣ୍‌କୁ ସଲ୍‍ସି ୱାନ୍‌ ମାସିଦନିଆଦୁ ସର୍ହାନ୍‍ । 2 ୱାନ୍‌ ୱିଜୁ ରାଜି ସିଜି ସର୍ହାନ୍‍ ମାରି ନାଣ୍ତ ନେଗିମାଟା ୱେର୍‌ସି ଲୋକାଙ୍ଗ୍‌ ୱେଡ଼ିକା କିତାନ୍‌ । ତାନେୱେନ୍‌କା ୱାନ୍‌ ଗ୍ରିସ୍‌ ଦେସ୍‌ତୁ ଇତାନ୍‌ । 3 ଆବେ ମୁନ୍‍ଡ୍ରି ଲେଜ୍‌କୁ ତେବାତାନ୍‍ । ୱାନ୍‌ ସିରିଆଦୁ ସନ୍‍ଡ୍ରେଙ୍ଗ୍‍ଁ ତିଆର୍‌ ଆନିୱାଲେ ଜିହୁଦିଲୋକୁ ୱାନି ବିରଦ୍‌ତାନ୍‌ ଉପାୟ୍ କିଜିନାର୍‍ ଇଜି କାବୁର୍‌ ପୟ୍‌ଜି ମାସିଦନିଆ ସାରିତରିନ୍‍ ଡ଼େସି ସନ୍‍ଡ୍ରେଙ୍ଗ୍‍ଁ ଅଡ଼୍‍ବିତାନ୍‍ । 4 ବେରିଆଦୁ ବାସାନି ପୁରୁଦି ମାରିସି ସୋପାତ୍ର, ତେସଲନିକିଆଦି ଆରିସ୍ଟାର୍କସ୍‍ ନି ସେକୁନ୍ଦ, ଦର୍ବିଦି ଗାୟ, ଆସିଆ ଦେସ୍‌ତି ତୁକିକ ନି ତ୍ରପିମ, ମାରି ତିମତି ୱାନି ୱାଲେ ସର୍ହାର୍‍ । 5 ୱାର୍‌ ଆଗ୍‌ଡ଼ିରାନ୍‌ ସଲ୍‍ସି ତ୍ରୋୟାଦୁ ମାଙ୍ଗିଁ କାପ୍‍କିତା ମାର୍ହାର୍‌ । 6 କମିର୍‌ସିଲି ରୁଟି ପଣ୍ତୟ୍‌ତି ୱେନ୍‌କା ମାପ୍‌ ପିଲିପି ଗାଡ଼୍‌ତାନ୍‍ ଏରୁ ନାସି ପାସ୍‌ ଦିନ୍‍ ୱେନ୍‌କା ତ୍ରୋୟାଦୁ ୱାରି ୱାଲେ ମିସାତାପ୍‍ ମାରି ଆବେ ଉନ୍‍ଣ୍ତ୍ରି ୱାରା ତେବାତାପ୍‍ ।

ତ୍ରୋୟାଦୁ ପାଉଲ୍‍ତି ସାରାସାରି ସନିକା

7 ୱାରାଦି ଆଗ୍‌ଡ଼ିରି ନାଣ୍ତିଙ୍ଗ୍‌ ମାପ୍‌ ଅର୍‌ସେ ଉଣି ବଜୋଦୁ ଉଣ୍ତାତାପ୍‍ । ପାଉଲ ଲୋକାଙ୍ଗଁ ମାଜ୍‌ରାନାଡ଼ା ସାନ୍ଦି ମାଟା ୱେର୍‍ତାନ୍‍, ଇରିଙ୍ଗ୍‍ଁ ମାର୍‍ନାଣ୍ତିଙ୍ଗ୍‍ଁ ୱାନ୍‌ ଆୟା ବାଡି ଡ଼ିସ୍‍ତେଙ୍ଗ୍‍ଁ ସଲ୍‍ସିମାର୍ହାନ୍‍ । 8 ଆମା ମୁସ୍‌କୁରି ମହଲାଦୁ ମାପ୍‌ ମିଟିଙ୍ଗ୍‍ଁ କିଜିମାର୍ହାପ୍‍, ଆବେ ନାଣ୍ତ ଦିୱେଙ୍ଗ୍‌ କାସ୍‍ସି ମାର୍ହେ । 9 ଆବେ ଇଉଟିକସ୍‍ ଦର୍‌ତି ଅରେନ୍‌ ମୁରୁଲି ଜରକା ଲାକ୍‌ତୁ ବାସ୍‍ତାମାର୍ହାନ୍‍, ପାଉଲ ମାଟା ଇନି ସମୟ୍‍ତୁ ୱାନିଙ୍ଗ୍‍ଁ ସୁସ୍‍କାଣ୍‍କୁ ୱାଦେଙ୍ଗ୍‌ ଆସ୍‍ତେ । ୱାନ୍‌ ନାଣ୍ତ ସୁଜ୍‍ଜି ମୁନ୍‍ଣ୍ତ୍ରି ମହଲା ମୁସ୍‌କୁରାନ୍‌ ଆଡ୍‍ଗି ଆର୍‍ତାନ୍‍ । ୱାର୍‌ ୱାନିଙ୍ଗ୍‍ଁ ନିକିନିୱାଲେ ୱାନ୍‌ ସାତା ସର୍ହାମାର୍ହାନ୍‍ । 10 ମାତର୍‌ ପାଉଲ ଆଡ୍‍ଗି ରେସି ୱାଜି ୱାନିଙ୍ଗ୍‍ଁ ପମ୍‌ଜି ଆସ୍‌ସି ଇର୍ହାନ୍‌, "ଦାନ୍ଦା ଆମାଟ୍‍ । ୱାନ୍‌ ଜିତାମାନାନ୍‍ ।" 11 ତାନିୱେନ୍‍କା ୱାନ୍‌ ମୁସ୍‌କୁ ଡ଼େସି ସଲ୍‍ସି ରୁଟି ରୁକ୍‍ସି ତିର୍‍ଆନ୍‍ ମାରି ୱେଡ଼ା ସନି ସାନ୍ଦି ୱାରି ୱାଲେ ନାଣ୍ତ ୱାର୍‌ଗିଜି ଆବେଣାନ୍‍ ସର୍ହାନ୍‍ । 12 ଲୋକୁ ମୁରୁଲି କଡ଼ଦିଙ୍ଗ୍‍ଁ ଜିତିମାନିକା ସୁଡ଼୍‌ଜି ୱାନି ଇଲ୍‌ତୁ ଅତାର୍‌ ମାରି ନାଣ୍ତ ୱେଡ଼ିକା ପୟ୍‌ତାର୍‌ !

ତ୍ରୋୟାଦାନ୍‍ ମିଲିଟସ୍‍ତୁ ସନିକା

13 ମାପ୍‌ ଆଗ୍‌ଡ଼ିରାନ୍‌ ଜାହାଜ୍‍ତୁ ଏକ୍‌ସି ଆସୋସ୍‍ତୁ ସର୍ହାପ୍‍ । ଆବେଣାନ୍‍ ମାପ୍‌ ପାଉଲ୍‍ତିଙ୍ଗ୍‍ଁ ଜାଜ୍‍ତୁ ଅତେଙ୍ଗ୍‍ଁ ମନ୍‍ କିତାମାର୍ହାପ୍‍, ଇରିଙ୍ଗ୍‍ଁ ୱାନ୍‌ ସାରିବୁଲାଜି ଆୟା ବାଡିଦୁ ଇନାନ୍‌ ଇଜି ଇର୍ହାମାର୍ହାନ୍‌ । 14 ୱାନ୍‌ ଏସ୍ତିୱାଲେ ମାଙ୍ଗିଁ ଆସୋସ୍‍ତୁ ବେଟ୍‌ଆତାନ୍‌, ମାପ୍‌ ୱାନିଙ୍ଗ୍‍ଁ ଜାହାଜ୍‍ତୁ ଅସି ମିତିଲିନିଦୁ ସର୍ହାନ୍‍ । 15 ଆବେଣାନ୍‍ ମାରି ସଲ୍‍ସି ମାର୍‍ନାଣ୍ତିଙ୍ଗ୍‍ଁ କିଅସ୍‍ ଲାକ୍‌ତୁ ଇତାପ୍‍ । ମାରି ଉଣ୍ତ୍ରି ଦିନ୍‍ତି ୱେନ୍‌କା ମାପ୍‌ ସାମସ୍‍ତୁ ଇତାପ୍‌, ମାର୍‍ନାଣ୍ତିଙ୍ଗ୍‍ଁ ମିଲିଟସ୍‍ତୁ ଇତାପ୍‍ । 16 ଆସିଆ ରାଜିଦୁ ମାରି ନାଣ୍ତ ସମୟ୍ ତେବାଏନ୍‍ଣ୍ତା ଏପିସସ୍‍ ପାଡ଼ି ପାଡ଼ି ଜାହାଜ୍‌ ସାଲାକିଦେଙ୍ଗ୍‍ଁ ପାଉଲ ମନ୍‍ କିତାନ୍‌ । ଜଦି ଆତିଙ୍ଗ୍‍ଁ, ପେଣ୍ଟିକସ୍ଟ ନାଣ୍ତିଙ୍ଗ୍‍ଁ ଜିରୁସାଲାମ୍‍ତୁ ଇଦେଙ୍ଗ୍‍ଁ ଇଜି ୱାନ୍‌ ଦାନ୍ଦା ଆଜିମାର୍ହାନ୍‍ ।

ଏପିସିୟ ମଣ୍ତଲିଦି ନେତାରିଙ୍ଗ୍‍ଁ ପାଉଲତି ପକ୍‍ନି ମାଟା

17 ମିଲିଟସ୍‍ତାନ୍‌ କାବୁର୍‌ ପୋକ୍‌ସି ଏପିସିୟ ମଣ୍ତଲିଦି ପେରି ନେତାର୍‍ରିଙ୍ଗ୍‌ ୱାନି ୱାଲେ ମିସାଦେଙ୍ଗ୍‍ଁ ପାଉଲ କୁକିସ୍‍ କିତାନ୍‌ । 18 ୱାର୍‌ ୱାଜି ଉଣ୍ତାତାର୍‌ଆକା ପାଉଲ ଇର୍ହାନ୍‌, "ଆସିଆ ରାଜିଦୁ ଇନି ପାର୍‍ତୁମ୍‍ ଦିନ୍‍ତାନ୍‍ ନାନୁ ଏଣ୍ତେସ୍‌ ମି ୱାଲେ ଏସ ସମୟ ତେବାତା ମାର୍ହା, ଆକା ମିର୍‌ ନେସ୍‌ନିଦେର୍‌ । 19 ଜିହୁଦି ଲୋକା ଉପାୟ୍‍ତି ଉଣ୍ତିଙ୍ଗ୍‍ଁ ନାଙ୍ଗିଁ ଏମେ ୱିଜୁ ଦୁକ୍‍କାସ୍ଟୁ ବଗାଦେଙ୍ଗ୍‍ଁ ପଡ଼ାତାତ୍‍, ତାନି ଲୋଇ ନାନୁ ପ୍ରବୁଦି ସେବାକିନି ୱାଜା ଆଡ଼୍‌ବାଜି ସାନ୍ତିଦାନ୍‌ ପାଣି କିତାମାନା । 20 ମିର୍‌ ନେସ୍‌ନିଦେର୍‌ ଜେ, ନାନୁ ଲୋକାମାନୁ ପ୍ରଚାର୍‌ କିନିୱାଲେ ମାରି ମି ଇଲ୍‌କାଙ୍ଗ୍‌ ସିକିୟା ସିନିୱାଲେ ମି ନେଗେନ୍‌ ଆନି ୱାଜା ଇନି ବିସୟ୍‌ ୱେକ୍‍ତେଙ୍ଗ୍‍ ୱେନ୍‌କା ଗୁସାଏମାର୍ହା । 21 ଜିହୁଦିଲୋକୁ ନି ଅଣଜିହୁଦି ଲୋକୁ ୱିଜେରିଙ୍ଗ୍‍ ନାନୁ ଆଟ୍‌ୱା ଜାଗାର୍‌ତା ସାକି ସିତାମାର୍ହା ଜେ, ୱାର୍‌ ପାପ୍‌ତାନ୍‌ ଡ଼େସି ଏତ୍‌କିଜି ମାପୁରୁ ତରିନ୍‌ ମନ୍‍ ସିନାର୍‍ ମାରି ପ୍ରବୁ ଜିସୁଦିମାନୁ ବିସ୍‌ବାସ୍‌ କିନାର୍‌ । 22 ଇଲେଇ ପବିତ୍ର ଆତ୍ମାଦି ମାଟା ମାନାଜି ନାନୁ ଜିରୁସାଲାମ୍‍ତୁ ସଲ୍‍ସିନା, ନେସେଏ ଆବେନ୍‌ ନାନ୍‌ ଇନିକା ଆନାତ୍‌ନୋ । 23 ପବିତ୍ର ଆତ୍ମା ନାଙ୍ଗିଁ ଜାଗାର୍‌ତା କିତା ସିତାମାନାତ୍‍ ଜେ ୱିଜୁ ଗାଡ଼୍‍କାଙ୍ଗ୍‍ଁ ନାନୁ ଜଇଲ୍‍ସଲ୍‍ସି କାସ୍ଟୁ ପୟ୍‍ନା । 24 ମାତର୍‌ ନା ଉଣ୍ତିଙ୍ଗ୍‌ ନା ନିଜେ ଜିବନ୍‍ତିଙ୍ଗ୍‍ଁ ନାନୁ ଇସ୍ରିକା ଇଜି ଅଡ଼୍‍ବିନା । ମାପୁରୁଦି ଦୟା ବିସୟ୍‌ତାନ୍‌ ପ୍ରବୁ ଜିସୁ ଏମେ ମାଟା ୱେର୍‌ତେଙ୍ଗ୍‌ ଇଜି ନାଙ୍ଗିଁ ସେବା ଦାୟିତ ସିତାମାନାନ୍‌, ଆକା ପୁରା କିଦେଙ୍ଗ୍‌ ଇଜିନା ସୁସମାଚାର୍ ପ୍ରଚାର୍‌ ପାଣି ସାକି ପୁରା କିନା, ନିସନେ ନା ବଦା ।

25 "ମାପୁରୁଦି ରାଜି ବିସୟ୍‌ତାନ୍‌ ପ୍ରଚାର୍‌ କିଦେଙ୍ଗ୍‌ ଇଜି ନାନୁ ମି ୱିଜେରି ଲାକ୍‌ତୁ ସଲ୍‍ସିନା । ଇଲେଇ ସୁଡ଼ୁଦୁ, ନାନୁ ନେସ୍‌ନା ଜେ, ମି ମାଣାନ୍‌ ଏନ୍‌ ନାଙ୍ଗିଁ ମାରି ସୁଡ଼ୁଏନ୍‌ । 26 ଆଦେଙ୍ଗ୍‌ ନେର୍‍ରି ଇୟା ସୁଜଗଦୁ ନାନୁ ଆଟ୍‍ୱାଦାନ୍‍ ମି ଲାକ୍‌ତୁ ୱେର୍‌ସିନା ଜେ, ଜଦି ମି ଲୋଇରାନ୍‌ ଏନ୍‌ ନାସ୍ଟୁ ଆନାନ୍‌, ଆୟାଉଣ୍ତିଙ୍ଗ୍‌ ନାନୁ ଦାଇ ସିଲେ । 27 ଇରିଙ୍ଗ୍‌ ମାପୁରୁଦି ୱିଜୁ ଉଦେସ୍ ମି ଲାକ୍‌ତୁ ୱେର୍‌ତେଙ୍ଗ୍‌ ନାନୁ ୱେନ୍‌କା ଗୁସାଏ । 28 ମାରି ମିର୍‌ ନେତା ୱାଜା ନିଜେଦି ବିସୟ୍‌ତାନ୍‌ ମାରି ପବିତ୍ର ଆତ୍ମା ମି ଜାତୁନ୍‍ ଅତେଙ୍ଗ୍‌ ଏମେ ବିସ୍‍ବାସି ମାନ୍ଦାଦିଙ୍ଗ୍‌ ଡ଼ିସ୍‍ତା ସିତାମାନାନ୍‌, ଆୟା ୱିଜେରି ବିସୟ୍‌ତାନ୍‌ ଜାତୁନ୍‍ ଆଆ । ମେଣ୍ତା ଗାଉଡ଼ୁ ୱାଜା ମାପୁରୁଦି ମଣ୍ତଲିଦି ଜାତୁନ୍‍ ଅଆ । ଆୟା ମଣ୍ତଲିଦିଙ୍ଗ୍‍ ୱାନ୍‌ ୱାନି ମାରିସିଦି ନେତେର୍‌ତି ମାଣାନ୍‌ ନିଜେଦିକା କିତାମାନାନ୍‍ । 29 ନାନୁ ନେସ୍‌ନା, ନାନୁ ସର୍‍ରି ୱେନ୍‌କା ମି ଲୋଇ ବୟ୍‍ଙ୍କାର୍‍ ବେନ୍‍ଡ୍ରରକିଙ୍ଗ୍‍ ୱାନେ ମାରି ମାନ୍ଦାଦିଙ୍ଗ୍‌ କାଣ୍ତିଆକାବ୍‍ରା କିଏନ୍‍ଣ୍ତା ଡ଼ିସ୍‍ଉ । 30 ସମୟ୍ ୱାନାତ୍‍, ଏସ୍ତିୱାଲେ ମି ନିଜେଦି ଦଲତୀ ଏସ ଲୋକୁ ବିସ୍‍ବାସିରିଙ୍ଗ୍‍ ମିଚ୍‌ ମାଟା ୱେର୍‌ସି ତାଗ୍‌ଇ ସାରିଦୁ ଅନାର୍‍ । 31 ନାସ୍ତିୱାଲେ ଜାଗାର୍‌ତା ମାନ୍‌ଡ଼୍ରୁ, ନାନୁ ଜେ ୱେଡ଼େ ନାଡ଼ା କାଣେରୁଙ୍ଗୁଁ ୱାକ୍‍ସି ମୁନ୍‍ଣ୍ତ୍ରି ବାର୍‍ସେକ୍‍ ସାନ୍ଦି ମି ୱିଜେରିଙ୍ଗ୍‍ ସିକିୟା ସିତାମାନା, ଇୟା ମାଟା ମନ୍‌ତୁ ଇଡ୍‌ଦୁ ।

32 "ଇଲେଇ ନାନୁ ମିଙ୍ଗିଁ ମାପୁରୁଦି କିୟୁଦୁ ମାରି ୱାନି ଦୟାଦୁ ପୁରାତି ବାକ୍ୟଦୁ ସର୍ପେ କିଜିନା, ଆୟା ବାକ୍ୟ ମିଙ୍ଗିଁ ବପୁ କିଦେଙ୍ଗ୍‌ ଇଜି ମାପୁରୁଦି ଲୋକା ଉଣ୍ତିଙ୍ଗ୍‌ ମାନି ୱିଜୁ ଆର୍ସିବାଦ୍‌ ମିଙ୍ଗିଁ ସିଦେଙ୍ଗ୍‍ ଇଜି ଆଟ୍‍ନା । 33 ନାନୁ ଏ ୱେଣ୍ତି, ବାଙ୍ଗାଁରାମ୍‍ ମାରି ୱାତିଗନ୍ଦା ପୟ୍‌ଦେଙ୍ଗ୍‌ ଆସା ଇଡ୍‍ଏ । 34 ମିର୍‌ ନେସ୍‌ନିଦେର୍‌, ନାନୁ ନା ଇୟା ରୁଣ୍ତି କିକାଣ୍‍କୁ ପାଣି କିଜି ନିଜେଦି ମାରି ନା ୱାଲେ ପାଣିକିନିୱାରି ୱିଜୁ ଦର୍‌କାର୍‌ ପୁରା କିତାମାନା । 35 ପୟ୍‌ନି ମାଣାନ୍‌ ଦାନ୍‌ କିନିମାନୁ ନାଣ୍ତ ୱେଡ଼ିକା ତେବାନାତ୍‍, ନିଜେ ପ୍ରବୁ ଜିସୁଦି ଇୟା ବାକ୍ୟଦିଙ୍ଗ୍‍ ଏତ୍‌କିଜି ଇୟାୱାଜା ନାଣ୍ତ କାସ୍ଟୁଦି ପାଣିଦାନ୍‌ ମାପ୍‌ ଆଟ୍‍ଇ ଲୋକାଙ୍ଗ୍‌ ସାକା କିନି ଦର୍‌କାର୍‌, ଇୟା ବିସୟ୍‌ତାନ୍‌ ନାନୁ ୱିଜୁଦିନ୍‌ ମିଙ୍ଗିଁ ସାରି ତର୍‍ତାମାନା ।"

36 ଇୟାୱିଜୁ ମାଟା ୱେର୍‌ତି ୱେନ୍‌କା ପାଉଲ ୱାରି ୱାଲେ ମେଣ୍ତେଙ୍ଗ୍‍ ଗଟ୍‌କିଜି ପାର୍‌ତନା କିତାନ୍‌ । 37 ୱିଜେରେ ଆଡ଼୍‌ବାଜି ଆଡ଼୍‌ବାଜି ପାଉଲତିଙ୍ଗ୍‌ ପମ୍‍ଜି ନଣ୍ତ୍‍ଜି ପୋକ୍‌ତାର୍‌ । 38 ୱାର୍‌ ୱାନିଙ୍ଗ୍‌ ମାରି ସୁଡ଼୍‍ଦେଙ୍ଗ୍‍ ଆଟ୍‍ଏର୍‍ ଇଜି ୱାନ୍‌ ଇର୍ହାନ୍‍ଆକା ୱାର୍‌ ନାଣ୍ତ ଦୁଃକ୍‌ ଆତାମାର୍ହାର୍‍ । ୱାର୍‌ ୱାନିଙ୍ଗ୍‌ ପୋକ୍‌ତେଙ୍ଗ୍‌ ଇଜି ଜାହାଜ୍‌ ଲାକ୍‌ତୁ ସର୍ହାର୍‍ ।